السبت، سبتمبر 18، 2010

مشروب الرجولة الاول





لو كنت عيل صغير بتلعب فى الشارع وبتجرى ورا عربيات الرش طول النهار

لو اهلك مفيش على لسانهم غير كلمة ياعيل....


خلاص مشكلتك اتحلت اوعى تزعل ابدا ولا تشيل فى نفسك

الحل موجود ومش هيزيد سعره عن كام جنيه


نحن نقدم لك المفاجأة


الحل الاكيد للرجولة


استرجل يابنى انت وهو


استرجل بسرعة واشرب بيريل


تعالى على نفسك واستحمل طعم الشعير علشان تاخد اللقب


ده مش اى لقب


ده لقب رااااااااجل اللى علشان تاخده

لازم تسترجل فى الاول

وتشرب بيريل


انسى معنى الرجولة الحقيقى ..

انسى الشهامة والاخلاق الحلوة والكرم وانسى انك تكون كويس مع الناس ومع اهل بيتك وانسى انك تكون صادق فى وعودك وعند كلمتك وانسى انك لازم تحترم نفسك وتتقى ربنا فى تصرفاتك

انسى كل حاجة لها علاقة باللى عرفته وسمعته زمان عن الرجولة ومعناها الحقيقى.


افتكر بس معايير الرجولة الجديدة ..افتكر انك لازم تحط الانكل على الركبة علشان تكون ارجل من دروجبا..

ولازم تفتكر انك لو بتتخانق انت وصاحبك مع ناس كتير لازم تستندل وتضرب صاحبك بدل ماتجرى وتسيبه انما اوعى تفكر تقف معاه او تدافع عنه علشان هما كتير.


اشرب بيريل واسترجل علشان طعمه الجميل هيغطى على المر اللى انت بتدوقه

على اساس ان الرجالة بس هما اللى بيتبعبوا وبيدوقوا المر

وعلى اساس ان مشروب الرجولة الاول هو اللى هينسيهم المر والبيت والعيال والشغل والمصاريف

وكل القرف اللى شايفينه.


زمان كان المراهقين بيعايروا بعض بقلة شرب السجاير

وكان معيار الرجولة بالنسبة لهم هو السيجارة

دلوقتى الدنيا تطورت وبقت الرجولة كلها مقفول عليها فى زجاجة بيريل


العبقرى صاحب فكرة الاعلان عرفنا ان مشروب البيريل ده مشروب رجالى زى الملابس الرجالى والاحذية الرجالى كده

يعنى محظور على السيدات شربها

طيب ياترى لو كان فى سيدات وبنات بيحبوا يشربوا بيريل

ياترى هيكون ايه الموقف

مش كده الشركة خسرت زباين ؟


انا متهيألى ان الحملة الجاية هتكون اعلانات عن مشروب بيريل الحريمى(للسيدات فقط)


بس خليكوا شاهدين انا صاحبة الفكرة

علشان لو نفذوها تبقى حقوقى المالية محفوظة....

هناك 70 تعليقًا:

  1. السلام عليكم ورحمة عندك حق فى كل كلمة اعلان خايب ومهوش اى معنى غير ان ده مشروب حرام اصلا والرجوله مش بتشرب ايه او تاكل ايه زمان كانو بيقولو الراجل مش بس بكلمته الراجل برعايته لبيته واسرته دلوقت لا انسى بيتك وحياتك واشرب كحوليات عشان تبقى راجل ربنا يهديهم او ياخدهم تحياتى ليكى

    ردحذف
  2. وبقول لكل شخص رجل او امراه ان البيرل حرام شرعا لانها ثبت بالتحاليل ان بها نسبة كحول...........
    وثبت أن بها نسبة يسيرة من الكحول اذن مايسكر قليله فكثيره حرام

    ردحذف
  3. هههههههههههه
    ال رجولة ال
    :D

    علي رأي الست أحلام ::
    " قليل من الرجال .. كثير من الذكور ! "

    تحياتي

    ردحذف
  4. عندك حق اعلانات مستفزه وسخيفه بتعتمد على المراهقين

    ردحذف
  5. أزيك (:

    شاهديين و معاكى حتى باب المحكمة ههههههههه

    الباب بس يا عم رامى

    لالالا و قدام القاضى كمان (:

    شوفى بقا خلاص كل الموازين اتقلبت و كل المعانى الحقيقية اندثرت

    يعنى انتِ لو بتعملى حدج كويس يبقى بتعمليه كويس علشان انتى خايفه مش علشان انتى محترمه

    لو حد اتفقت معه و اداك كلمه و رجع فيها و زعلت يبقى انت الللى غلطان علشان مخدش عليه حاجة
    انما كلمته عهد ايه الكلام العبيط دة

    يييييييييييييه و قيسى على كدة كتير

    الفهم للأشياء أختل

    سوررى غميتك (:

    ردحذف
  6. ياللى نصحت الناس بشرب النبيت
    مع بنت حلوة وعود وضحك وحديت
    مش كنت تنصحهم منين تكسبوا
    تمن ده كله ؟ ولا يمكن نسيت
    عجبى
    بص ياستى متحلميش قوى بانك صاحبة الفكرة الناس دى عاملة حسابها على كل حاجة لان المنظمات النسائية هطالب بالمساوة مع الرجل ولازم تشرب بيريل وهيعتصمو قدام الشركة رافعين علب البريل واللافتات وممكن كمان يضربوا عن الطعام هههههههه
    الجد ان الشركات المعلنة عندنا منقوعة فى الهيافة مثلا اعلان اتصالات كل النجوم دى يسرا ومنير وابو عوف وهند وعز ودنيا فى اعلان واحد ملايين من الجنيهات مش كان اولى به معهد الاورام الجديد زى ما بيحصل فى اغلب دول العالم وبرضه كان اعلان هيفضل طول العمر كل الاعمال الخيرية بيقوم بها الشركات الكبرى فى العالمكله الا فى مصر
    تحياتى ابراهيم رزق

    ردحذف
  7. صباح الإعلانات ...
    هههههههههههههههه
    أنتى مشكلة بجد يا نهى
    بس الصراحة هو إعلان خايب جدا
    هى الرجولة بتشرب ؟؟؟
    ههههههههههه
    تسلم إيدك
    بوست تحفة
    دمتى بخير

    ردحذف
  8. أكتر حاجة بتضحكني منظر الواد اللي بيقول
    أنا حسام . . أنا راجل
    بطريقة لا توحي غير بأنه مش هاين عليه يقولها أصلا

    ردحذف
  9. هو الاعلان فعلا مالهمش حق فيه
    قال رجوله قال
    اغلب السيدات بتشرب بيريل ده مشرب شعير وليس به اى نسبه كحول وممتاز فى علاج الحصوه والاملاح ده كلام بعض الدكاتره وبينصحوا بكده
    بس بوست دمه شربات
    تعرفى انا كنت فطسانه من الضحك وانا بقرا البوست
    شكرا يا قمر ان بسببك ضحكت قوى
    تسلمى يا اجمل وارق نهى

    ردحذف
  10. معك حق فى كل كلمة

    بجد اعلان فى منتهى الغباء

    ردحذف
  11. اعلان مستفز وحقير كمان
    يعني لو مشربتش البيريل ابقي مش راجل

    فعلا شوية جهلة ونفعيين

    تحياتي

    ردحذف
  12. وده يديكي انطباع قد بقينا تافهين ومش نافعين غير في الكلام اللي ملوش معني
    تحياتي للبوست الجميل ده
    دايما افكارك جميلة

    ردحذف
  13. الله يرحمك يا رجوله
    بجد
    تلوقتى الرجوله مش للجنس الخشن
    الرجوله موقف
    سواء راجل او ست

    فكره جميله جدا

    بس اصلا البريل انا
    مش بحبه
    بحب فيروز بجد
    وشويبس جولد

    ردحذف
  14. هو أنا مش عارفه أنا اللى محروق دمى النهارده؟؟ ولا الدنيا ملخبطه معايا من كتر ما عماله اشوف حاجات تخنق؟؟

    الرجوله بقت بالمشروب

    والحياه بقت بالمقلوب

    وعجبى على حياه فيها الحزين مغلوب

    والإفترا منتهاه وموجوعه منه قلوب




    اللهم أهد قومى فإنهم لا يعلمون

    بوستك وجعنى يا نهى

    الله يسامحك :(

    ردحذف
  15. ههههههههههههه

    الرجوله بقت اشرب بريل وبس


    طبعا يا قمر حقوقك محفوضه

    بس ابقى احجزيلى اتنين

    علشان الانوثه ما حدش احسن من حد

    بس عارفه مش بحب البريل

    طعمه وحش اووووووووووى

    تسلم افكارك ياقمر

    تحياتى

    ردحذف
  16. الحنين
    انا سمعت موضوع انها حرام بس مش عارفة ده صح ولا ايه
    انا اصلا مش بحبه لكن فكرة الاعلان استفزتنى

    ردحذف
  17. الحنين
    شكرا على الاضافة
    بس هما ليه كاتبين انها خالية من الكحول
    متهيألى كده يبقى غش تجارى
    نورتى

    ردحذف
  18. أعقل مجنونة
    مين الست احلام دى ؟
    نورتينى بزيارتك الحلوة

    ردحذف
  19. عمرو يسرى
    للاسف فعلا اعتمادهم على المراهقين هو اللى بيخلى اعلاناتهم مستفزة كده
    وفى الاخر الاهل هما اللى بيعانوا مع اولادهم

    ردحذف
  20. Ramy
    فعلا كل حاجة مفهومها اتغير وخصوصا موضوع الصدق فى الوعود ده
    بقت حاجة عادية ان الناس ترجع فى كلامها
    رغم ان زمان كانت بتتقال الكلمة وعلى انها كلام رجالة
    ماعلينا المهم انى لاقيت شهود تشهد معايا

    ردحذف
  21. ابراهيم رزق
    احنا عندنا فعلا الاعلانات بقت مستفزة وتافهة
    ومع ذلك بتسحب ملايين بس يمكن علشان العائد من وراها بيكون اكتر
    اعلانات زمان كانت احسن بكتير
    لكن موضوع انهم يحولوا مصروفات الاعلان دى لعمل الخير
    دى حاجة شبه مستحيلة تقريبا

    ردحذف
  22. الحب الجميل
    الرجولة دلوقتى بتتشرب
    ممكن فى زجاجات او علب معدنية اللى احنا بنسميها كانز
    والله الاعلان ده غايظنى بجد غايظنى جدااااااااااااااااا
    بس ولا يهمك انتى نورتينى:)))

    ردحذف
  23. faw
    هههههههه
    طيب على فكرة حسام ده هو السبب اللى خلانى اكتب البوست
    اعلان قمة فى الاستفزاز
    من اول الفكرة لغاية الممثلين اللى فيه وخصوصا حسام

    ردحذف
  24. mrmr
    اسمع فعلا من ناس كتير انه بيتوصف كدواء
    وكمان كغسول للبشرة شديدة الحساسية
    بس انا مبسوطة والله انى ضحكتك
    ربنا يسعدك دايما

    ردحذف
  25. tears
    هو فعلا اعلان فى منتهى الغباء
    واسمحيلى اضيف منتهى الاستفزاز

    ردحذف
  26. Haytham elsayes
    دى حاجة اضافية كمان من سخافات الاعلان
    مش بيعملوا حساب ازاى الناسش هتستقبل الاعلان
    نوع من انواع لفت الانظار للمنتج لكن بشكل غبى

    ردحذف
  27. sendbad
    و فعلا الاعلان هايف وبيعكس الثقافة بتاعتنا
    رغم انه بيخاطب فئة معينة اللى هما المراهقين
    بس هو عموما فكرته سخيفة جدا
    شكرا على رأيك
    نورت المدونة

    ردحذف
  28. محمود(باحث عن حب)
    فعلا الرجولة مواقف بالنسبة للناس كلها
    ممكن مثلا يقولوا على واحدة ست انها ب100 راجل علشان هى جدعة
    البيريل مش حلو فعلا ويمكن ده السبب فى الحملة بتاعته
    يعنى اللى يقدر على الطعم ده هيبقى جدع وبرضه بيكلموا المراهقين

    ردحذف
  29. مها البنا
    معلش بقى يامها والله
    مش قصدى اضايقك وازعلك خالص
    بس احنا فعلا بنشوف حاجات تفور الدم
    ربنا يبعد عنك الضيق والزعل
    وماتزعليش منى

    ردحذف
  30. جايدا العزيزى
    ربنا يكرمك ياجايدا
    لما يعملوا المشروب الحريمى نبقى نشوف هيعجبنا ولا ايه
    المهم ان كده انا معايا اتنين شهود لحقوق ملكيتى الفكرية لو نفذوا الفكرة دى
    نورتينى

    ردحذف
  31. السلام عليكم

    فعلا والله معاكي حق
    الإعلان مبتذل بشكل مقرف بس دا العادي دلوقتي في الإعلانات كلها

    المفروض كانوا يقولوا إسترجل وإتفرج على الإعلانات لأن الفرجه عليها فعلاً محتاجه صبر الرجال ومش أي رجال
    ربنا يرحمنا برحمتة

    ردحذف
  32. علاء سالم
    ايوة مظبوط فعلا الاعلان نفسه عاوز قوة وصبر وحبايتين ضغط علشان نقدر نشوفه
    ولسة ياما هنشوف من بتوع الاعلانات

    ردحذف
  33. ههههههههههه
    الاعلان دا بيستفزنى والله

    اسلوبك جميل وضحكنى :)
    دمتى بكل خير

    ردحذف
  34. بصراحة الإعلان هايف جدا .. فلو أصبحت الرجولة هكذا فعلى الرجال السلام .. بارك الله فيك

    ردحذف
  35. همسات وبحر الحياة
    دى كلمة مستفز والله قليلة
    مش لاقياله وصف
    ربنا يكرمك على رأيك وسعيدة انى ضحكتك

    ردحذف
  36. جنون عبقرى
    فعلا الهيافة وصلت ان الرجولة بيبيعوها فى مشروبات
    بعد ماكانت مواقف بقت بيريل

    ردحذف
  37. للرجولة والأنوثة معاني سامية ونبيلة .. ولكن الإعلام لا يفرق بين القيم والإنحطاط .. وهمه جمع المال فقط!!

    ردحذف
  38. نهى اولا وحشتينى جدا يا قمر

    ثانيا كالعاده دم الخفيف طاغى

    على كتباتك وكلماتك السكر وعثل

    ثالثا الاعلان ده مفهوش ريحة الرجوله

    قال استرجل قال هههههههه....منه

    ردحذف
  39. السلام عليكم
    كلام بمحلة
    بس عايزة اعرف هم الي عملوا الاعلان ده عقلهم كان فين؟
    مش عارفة هم بيزتهزئوا بالرجولة ولا ايه قصدهم بالاعلان ده
    اعلان بايخ
    بس كلامك حلو .
    ولايهمك حقوقك محفوظة بالاعلان التاني
    هههههههه
    ممكن تقبليني ضيفة دائمة بمدونتك
    عارفة ان تعليقي جية متاخر
    بس ياريت تقبليني.
    سلامي

    ردحذف
  40. المجهول
    اولا اهلا بيك
    ثانيا للاسف فعلا مابقاش فى حاجة اسمها احترام للمشاهدين
    معظم الاعلانات دلوقتى فيها ابتذال

    ردحذف
  41. عاشقة وبدوب فى حبيبى
    انتى كمان وحشتينى يامنه
    بصى انا لما بشوف الاعلان ده دمى بيتحرق
    رأيك اسعدنى جدا ياقمراية

    ردحذف
  42. رشا
    اللى عملوا الاعلان ده كان عقلهم فى الفلوس اللى هيجمعوها من وراه
    يمكن الاعلان نفسه مايجيبش نتيجة اوى مع الناس لان كل واحد شايف انه راجل من غير مايشرب بيريل انما فى النهاية هما هيقبضوا مش مهم بقى سخافة الفكرة طالما عجبت اصحاب الشركة
    نورتى المدونة وطبعا اهلا بيكى دايما وتسعدنى زيارتك للمدونة بالتأكيد
    ونورتى:)

    ردحذف
  43. الغريب انه برغم الانتقادات الكتيرة على الاعلان ده ولسه مستمر

    ردحذف
  44. المشكله بقي لو بنت غلطت في الازازه وشربتها هيطلع لها شنب والا ايه

    ردحذف
  45. موناليزا
    فى نظرية بتقول ان كثرة النقد تدل على النجاح
    ودى بيتبعها اكتر الناس اللى عندهم افكار غريبة
    والنظرية دى احيانا بتكون صح لكن تطبيقها غلط فى اغل الاحوال
    وبتوع الاعلان بيطبقوها غلط طبعا لانهم معتقدين ان هو ده النجاح

    ردحذف
  46. سواح فى ملك الله
    التعليق ده ضحكنى اوى على فكرة
    هما فعلا اكيد هيخسروا العنصر النسائى اللى كان بيشترى المنتج

    ردحذف
  47. الأخت الفاضلة :: Noha Saleh ::
    أسعد الله أوقاتك ولحظاتك بكل خير ..
    أختي ،، تناولتِ موضوعًا مهما وبطريقة غير تقليدية ..
    الإعلانات والإسفاف في طرق العرض أو العبارات الاستفزازية ..
    كان عندنا مطعم قام بإعلان على شاكلة هذا الإعلان ..
    وضع وجبة وكتب عليها " إذا كنت رجلاً فتناولها كاملة "
    ولكن ولله الحمد بعد أن قام بعض الجادين بشكواه .. لم يمضٍ أسبوع إلا وقد أزيل الإعلان ..
    وأمثال هؤلاء يحتاجون إلى وقفة جادة ليحترموا شخص الزبون ..
    سعدت بتواجدي في عالمك المتميز ..
    أطيب الأمنيات :)

    ردحذف
  48. محمد سعد القويرى
    اولا اهلا بيك
    ثانيا فعلا انا معاك ان الموضوع محتاج وقفة جادة جدا يمكن بعدها الامر تتغير
    لكن احيانا بيكون المعلن شخص ذكى وبيغير الاعلان فعلا لكن بيطور الفكرة وعن طريق التحايل بيقدمها تانى
    وده حصل فعلا مع احد القنوات
    شكرا للزيارة وسعيدة بيها وسعيدة برأيك جدا

    ردحذف
  49. صباح الخير والطيبة ... سعدت بمرورك الأول على مدونتي المتواضعة ... وها أنا أرد الزيارة للتعبير عن تقديري لحروفك ... تحياتي لشخصك الكريم .

    ردحذف
  50. تركى الغامدى
    زيارتك اسعدتنى
    شكرا لك ولذوقك

    ردحذف
  51. نهى عامله ايه يارب تكونى بخير ابقى طمنينى عليكى ديما وابقى اسألى يا وحشه .....منه

    ردحذف
  52. طيب يا اوختشي .. مادام العملية مختزلة في قزازة ..
    يبقى نشوف اذا ممكن يحصل دعم و تقدم على البطاقات التموينية .. جايز تكون هي دي الحل لقيم الرجولة اللي اندثرت !!

    ردحذف


  53. السلام عليكم
    ماشاء الله

    مدونة اكثر من رائعة والله

    اردت فقط ان اسجل مروري من هنا

    مدونتي هنا



    ردحذف
  54. mena
    معلش يامنة ماتزعليش بجد
    عارفة انى ندلة والله
    اوعى تكونى لسة زعلانة:)

    ردحذف
  55. شيماء على
    هههههههه
    والله متخيلة الطابور الطويل اللى مستنى الازازة المدعمة واللى هيكون اطول من طوابير العيش

    ردحذف
  56. عمار مطاوع
    مرورك اسعدنى
    شكرا ليك جدا على الزيارة الكريمة
    نورت المدونة

    ردحذف
  57. بجد يا نهى عندك حق جداً .. إعلان مفيش اتفهه من كدة

    مش لاقيين حاجة يعملوها .. زى اعلانات كدة ميلودى تتحدى قله الادب لقيوا لاالناس زعلانه من الوقاحة قالوا نتحداها بقى .. بس باستفزاز ..

    ربنا يشفى يا حبيبتى ويرحمنا بقى

    يسلم قلمك :)

    ردحذف
  58. جيت اشوف في جديد ولا لأ
    تحياتي

    ردحذف
  59. زهرة
    موضوع ميلودى ده حاجة تانية
    دول عملوا زى اللى بيبيع منتج وحش اوى لنا الناس اعترضت عليه غير اسم المنتج وغير العبوة لكن المنتج هو نفس المنتج

    ردحذف
  60. sendbad
    شكرا على اهتمامك ياسندباد
    وربنا يسهل ويكون فى جديد قريب على المدونة

    ردحذف
  61. التركيز في كلام الأعلانات
    هيصيبنا بسكتة دماغية في غضون شهرين على الأكثر

    ردحذف
  62. السلام عليكم
    فينك مش باينة
    محدش بيشوفك
    طولتي كتير
    عسى ان تكوني بخير.
    طمنينا عليك.
    سلامي

    ردحذف
  63. د.ياسر عمر عبد الفتاح
    الاعلان فعلا مستفز جدا
    وكل الاعلانات تقريبا للاسف التلفزيون بيعرض الاعلانات والفواصل بتكون المسلسلات او البرامج
    شكرا على زيارتك

    ردحذف
  64. رشا
    الحمد لله انا بخير يارشا
    شكرا ليكى اهتمامك ياقمراية
    وان شاء الله هنزل بوست قريب
    نورتى

    ردحذف
  65. هذه أول زيارة لي للمدونة

    وإن شاء الله .. لن تكون الأخيرة

    ======

    هذا الموضوع كان في بالي منذ فترة وكنت سوف أعرضه في

    صورة مقال

    نظرا لكم التفاهات التى رأيتها في ذاك الاعلان المدعو

    " استرجل واشرب بيريل " ولا أعلم الرابط العجيب بين

    الرجولة التى عرفناها بالشجاعة والتضحية وحسن

    التصرف عند الشدائد وبين مشروب لا أجد له صفا ولا

    نعرف له طعما من رائحة ...

    أحسبه عصير " خميرة " كالتى تُباع عند صاحب المخبز

    لكن ماذا أقول فهذا هو الاعلام المصري

    ليتنا حتى نقلد العرب في سلسلة اعلانات رأيتها تُعرض

    على قناة " روتانا " على ما أتذكر بعنوان " البركة

    بالشباب " ليتنا نتعلم ونعي ولكن !

    ======

    معذرة على الإطالة

    تقبلي مروري

    Casper

    بالمناسبة مدونة رائعة تحمل هدفا واضح ومحدد

    بالتوفيق دائما

    ردحذف
  66. casper
    اهلا بيك فى المدونة وسعيدة انها نالت اعجابك
    الاعلان فعلا به كم كبير من التفاهة والسطحية
    والتقليل من المعنى الحقيقى للرجولة اللى متمثلة فى صفات كتير لم يتطرق اليها الاعلان
    اعلانات البركة بالشباب اعلانات هايلة ياريت كان عندنا حاجة زى كده بدل اعلانات كتير تانية تدل على سذاجة من صنعوها
    شكرا لذوقك وسعدت برأيك

    ردحذف
  67. انتى كدا فوله وا جميله

    ردحذف
  68. ههههههههههههههه على فكره انا بشرب بريل دلوقتي :3

    حاسس اني عايز ارجع :3

    ردحذف

ممكن تكتب رأيك هنا وممكن تناقشني وتنتقدني كمان لكن الغلط ممنوع :)