كل سنة ونتم طيبين وبخير
بما ان النهاردة اول يوم فى شهر رمضان ربنا يتقبل منا صيامنا وصلاتنا
وبما ان النهاردة اول يوم فى حملة تدوينات اغسطس
قررت ادمج الموضوعين مع بعض
ممكن اكلمكم عن ذكرياتى فى رمضان؟
وانا صغيرة بدات اصوم من ابتدائى كان صيام ساعة كده ولا اتنين لغاية واحدة واحدة ماكملت اليوم كله
لغاية مابقيت فى رابعة ابتدائى وعرفت اصوم الشهر كله بالكامل
فوانيس رمضان زمان كانت احلى بكتير رغم يعنى انها ماكنتش بتغنى لكن كانت بتنور كل الناس اللى فى سنى يفتكروها
وكان فى كمان الفانوس ابو عصفورة
انا بحب اوى لقمة القاضى وبلح الشام وبحب فى رمضان اكل البفتيك والمكرونة بالبشاميل
زمان رمضان كان مختلف مفيش مسئولية مفيش التزامات مفيش اى حاجة غير اللعب وفوازير نيللى وشريهان وطبعا بوجى وطمطم :)
دلوقتى فى مسئولية والتزامات وناس انا مسئولة عنهم مش بعرف استمتع اوى زى الاول
كمان الدنيا نفسها بقت مختلفة مش عارفة انتوا حاسين بكده ولا انا بس اللى عندى الاحساس ده
بس السنة دى بدأ احساس رمضان يرجعلى وانا شايفة بنتى بتلعب ومبسوطة بالفانوس
انا رغيت كتير اوى والكلام مش مرتب .....مش كده؟
كمان انا مقصرة معاكم لانى تعبانة شوية معلش اعذرونى
انا هسيبكم مع اغنية رمضانية بحبها اوى مش عارفة ليه كل ما اسمعها بعيش فى جو رمضان زمان ...رمضان ايام الطفولة...بعيط لما بسمعها
كل سنة وانتم طيبين ...ورمضان كريم