الأربعاء، ديسمبر 29، 2010

كل سنة وانتم طيبين+المصرى اليوم+تحديث مقالة اخرى


بعد ساعت قليلة هنبدأ عام جديد

عام 2011

سنة 2010 خلصت بسرعة جدا

متهيألى الوقت بيجرى وبيعدى بسرعة اوى اكتر من زمان مش كده

اهم حاجة حصلتلى فى 2010 هى معرفتى بيكم من خلال المدونة

دى اهم واجمل حاجة حصلت بجد

يارب نفضل دايما سوا على طول

واتمنى لى وليكم سنة سعيدة مليانة خير وحب وسعادة ونجاح

وعاوزاكم تحكولى ايه اكتر حاجة مهمة حصلت لكم السنة دى

وايه امنياتكم فى السنة الجديدة؟


وبالمرة بقى ده رابط اول مقالة تتنشرلى فى جريدة المصرى اليوم

المقالة دى كانت موجودة فى المدونة قبل كده لو تفتكروها


وهنا رابط مقالتى الاسبوعية على ميدان الحرية

كل سنة وانتوا طيبين

وطبعا موضوع تكرار الاعتذار عن تقصيرى معاكم ده

بقى بايخ اوى انا عارفة والله

ويارب يصلح الاحوال وادخل تانى بإستمرار

الثلاثاء، ديسمبر 21، 2010

مقالتى الجديدة +اعتذار واجب جدا



جبتلكم مقالتى الجديدة على مجلة ميدان الحرية

والمرة دى انا هحطها كاملة علشان لو اى حد مش عارف يشوفها

وكمان الرابط هيكون موجود علشان لو تحبوا تعلقوا هناك

سى السيد
لم تكن شخصية سى السيد التى كتب عنها الأديب الكبير
نجيب محفوظ من درب الخيال ...
نعلم جميعا أن سى السيد متواجد بيننا فى كل عصر وكل زمان
وربما يكون هناك سى السيد فى كل بيت ولكن بنسب متفاوتة
سى السيد هو الشخص الحاكم بأمره فى المنزل
يعتبر كلمته حكم واجب النفاذ على من حوله
ربما لايوجد سى السيد بالشكل المتعارف عليه فى عصر
لا تسمح فيه المرأة بأن تكون أمينة ..
الكثير من الرجال يعتقد بأن المرأة خلقت خصيصا لخدمته
وعليها القيام بكل الأعباء التى يستحى هو من القيام بها
والتى يرى أن تربيته الشرقية لاتسمح له
بالقيام بتلك الاعمال النسائية على حد قوله
فالمرأة سواء كانت عاملة أم لا تعمل عليها ان تقوم بترتيب المنزل
وإعداد الطعام وتنظيف الملابس ومراجعة الدروس مع الأبناء
أما هو فيكتفى للخروج إلى العمل فى الصباح ثم يعود لينام قليلا
ويستيقظ لمشاهدة البرامج أو الخروج مع الإصدقاء مثلا
بينما الزوجة فى عمل مستمر طيلة اليوم
لايفكرأن يساعدها أبدا أو حتى يسألها إن كانت تحتاج لمساعدته
على الرغم من أنه دائما يذكر أن الرجال قوامون على النساء
ولكنه للأسف لايعرف المعنى الحقيقى للقوامة
وعلى الرغم من معرفته أيضا بأنه لايوجد نص قرآنى
أو حديث شريف يلزم المرأة
بأن تفعل كل ذلك وحدها ويحرم فعله على الرجال
فإن الرسول عليه الصلاة والسلام كان متعاونا مع اهل بيته..
أليس لكم فى رسول الله أسوة حسنة؟
للاسف يرى بعض الرجال ان مساعدتهم لزوجاتهم ستجلب لهم العار
على الرغم من أن الزوجة تقوم بتلك الأعمال من أجله هو
وبمنتهى الحب
وتتمنى سماع ولو مجرد كلمة تقدير فلا تجد
أيها الرجل
إن كنت لاتريد ان تعين زوجتك على المجهود الجبار الذى تقوم به
من اجلك فهذا من شأنك على الرغم من ان مساعدتك لها لن تنقص من قدرك أبدا
ولكن من فضلك لاتقلل مما تفعله لأن فى ذلك إهانة لها
فإن ماتفعله الزوجة ليس بقليل وإعلم انها ليست خادمتك
بل هى شريكة لك وأنت شريكا لها.





اعتذار واجب جداااااا:انا عاوزة اعتذر لكم لانى مش بدخل على مدونتى ومش بعرف اعلق على مدوناتكم

غصب عنى والله وفى اول فرصة ان شاء الله كل ده هيتظبط

بس على فكرة انا متابعة كل اللى بتكتبوه:)

اشوفكم على خير

وماتزعلوش منى

الثلاثاء، ديسمبر 14، 2010

الجنس فى المدارس..مقالتى الجديدة

ازيكم
اخباركم ايه
جبتلكم رابط مقالتى الجديدة فى مجلة ميدان الحرية
عاوزة رأيكم

الأحد، ديسمبر 12، 2010

نظرتى للحياة بعد عامين من الزواج




قبل مااكتب البوست ده فكرت كتير اوى اكتبه بالعامية او باللغة العربية

وقررت اكتبه بالعامية علشان مش عاوزة حد يعتبره تدوينة

ممكن تسموها فضفضة او اعترافات أو رغى

او ممكن نسميها كلام فاضى:)

بعد كام يوم من النهاردة انا هحتفل بعيد زواجى الثانى

اه والله سنتين بحالهم

السنتين دول لما فكرت فى احداثهم شوية كده لقيت ان فى تغيرات كتير جدا حصلت لى فيهم

سواء فى نمط حياتى او فى افكارى

انا حبيت انى اكتب التطورات دى على شكل عناوين وكل عنوان يبقى معاه موجز بسيط كده


البداية


عادى يعنى زى أى اتنين بيتعرفوا ويتخطبوا

طبعا انا ككل البنات كنت فاهمة الحياة انها رومانسية طول الوقت

وافلام عربى وافلام هندى وان الحياة هتفضل بمبى والسما هتمطر قلوب على طول

طبعا اكتشفت ان الكلام ده غلط فى غلط

يعنى مش هنبقى على طول شادية وعبد الحليم حافظ

لا طبعا

الحياة الحقيقية مختلفة يعنى مش دايما بيبقى فيه رومانسية

وبصراحة لو الدنيا رومانسية على طول هتقلب بمسلسلات تركى من اللى انا مش بحبها

الموضوع ده كان صدمة فى الاول

تليفونى


من فترة وانا بقلب فى تليفونى اكتشفت ان تليفونى مليان

بأسماء ناس عمرى ماكنت اتخيل انى ممكن اسجلهم عندى
لقيت نمرة السوبر ماركت وبتاع الخضار وبتاع الفراخ ودكتور الاطفال

زمان تليفونى كان عليه ارقام صاحباتى والناس القريبين منى وبس

دلوقتى تليفونى مليان ارقام ناس ماعرفهاش بس مهمة جدا بالنسبة لى




صديقاتى


لما كانت واحدة من صاحباتنا بتتجوز وبعدين تختفى مرة واحدة

كان بيكون فى صدمة كبيرة بسبب بعدها عننا

وكان الشيطان يوسوس لنا انها يعنى مش عاوزة تعرف صحابها تانى

او مثلا غيرانة على جوزها او يعنى ممكن تكون خايفة تتحسد ولا حاجة

لما اتجوزت اكتشفت انى ببعد عن صحابى غصب عنى وهما كمان لما اتجوزوا بعدوا

كلنا بعدنا عن بعض مابقيناش قريبين زى الاول بس ده مش

علشان اى سبب من الاسباب الهايفة اللى قولتها دى

انما بالعكس بيبقى نفسى امسك التليفون وافضل اكلم حد من صحباتى

زى زمان بس للاسف اللى بياخدنا من بعض هو الوقت

يعنى انا ماعنديش وقت اتكلم ولا صاحباتى اكيد هيبقى عندهم وقت


ازمات


فى كل جوازة فى البداية كده بيبقى فى ازمة ...

دايما بيقولوا ان السنة الاولى بتبقى صعبة

وهى فعلا بتبقى صعبة علشان الطباع المختلفة

والعادات المختلفة وحاجات كتير بين الطرفين

بالنسبة لى الازمة كان لها جانب ايجابى وجانب سلبى

هبدأ بالجانب السلبى

طبعا غير توتر الجو والحاجات دى

اكتشفت ان فى ناس بتشمت

اه والله ناس بتشمت وتتمنى الشر

اما الجانب الايجابى هو انى عرفت ناس كتير على حقيقتها

وعرفت اميز بين السىء والجيد

يعنى حصل عندى حاجة كده ممكن نسميها نضج فجائى

والاهم من ده كله ان الازمة عدت الحمدلله

الامومة


حاجة كده ماينفعش تتوصف بوصف

نعمة من ربنا لما يكون عندك حاجة صغنتوتة ماتعرفش تعمل حاجة من غيرك

معتمدة عليك اعتماد كلى

ورغم الزن والسهر وقلة النوم والراحة

الا انها حاجة من اجمل الحاجات اللى فى الدنيا

زمان كنت بستغرب ان ماما وبابا بيقولوا انهم بيفرحوا لما يشوفونا فرحانين

كنت بستغربهم اوى

بس لما كبرت عرفت ان كلامهم صح

ربنا يكرم كل الناس بالذرية الصالحة

ويبارك فى كل الاطفال


الاهل


دايما شايلين الهم

محدش يفتكر انه لما بيكبر ويتجوز اهله بينسوه

لااااااااااااا ابدا ده كل مدى بيزيد الهم

اكتشفت ده لما كنت كل مرة بستنى بنتى تكبر شوية علشان ارتاح

وكل مابتكبر كل مابفرح بيها وكمان كل ماتعبى وقلقى بيزيدوا


زوجى


حبيت اتكلم عنه اخر حاجة علشان اتكلم براحتى

رغم انى كنت محضرة كلام كتير اوى الا انه كله راح منى لما جيت اكتب

مش عارفة ليه

بس انا عاوزة اقول انه
احنا زى اى اتنين بيتخانقوا ويتصالحوا
والحاجات دى كل الناس عندها مشاكل
لكن احقاقا للحق طبعا هو
بيشجعنى دايما انى اكون احسن
ودايما بيساعدنى احقق طموحى
على فكرة هو اللى عامل تصميم المدونة
وهو اللى عامل تصميم الصورة الجديدة
وكمان مفيش بوست بينزل غير لما باخد رأيه فيه
ربنا يهدينا ويبعد عننا كل حاجة وحشة


اشوفكم على خير ان شاء الله

الخميس، ديسمبر 09، 2010

لغتنا الجميلة...المظلومة دائما


كل شعب من شعوب العالم بلا إستثناء يعتز باللغة الخاصة به

كل شعب من شعوب العالم يتباهى بلغته ويتفاخر بها

إلا نحن...

نعم الشعوب العربية لاتتباهى بلغتها

لغة القرآن الكريم

نتسابق لمعرفة وتعلم لغات أخرى بل نتسابق لننسى لغتنا الاصلية

حقا انها مأساة

كنت سألتمس لنا العذر ان كنا نسعى لتعلم لغات أخرى حتى نستفيد وتزيد مجالات

معرفتنا بقراءة كتب بلغات مختلفة مثلا او محاكاة شعوب تتكلم بلغة مختلفة

ولكننا للاسف الشديد نسعى لتعلم لغات أخرى فقط من أجل التباهى

لكى نقوم بدس بعض الكلمات المختلفة داخل الجمل العربية التى ننطق بها

وكل منا حسب اجتهاده فهناك من يسعى لتعلم الانجليزية

وهناك من يسعى لتعلم الفرنسية لأنها لغة(شيك) كما يطلقون عليها

وهناك من يتعلم الأسبانية مثلا على سبيل التجديد

ولكن أكثرهم انتشارا بالفعل هى اللغة الانجليزية

يسعى الجميع لتعليم ابنائه اللغة الانجليزية

وهذا لأجل المستقبل حيث انه لاعمل الأن لمن لايمتلك أكثر من لغة

لكن ما الحكمة فى تعليم الابناء (حشر) الكلمات الانجليزية فى احاديثهم اليومية

بل وتعنيفهم إن قاموا بإستخدام اللغة العربية أحيانا

فمثلا أجد ان الأم تعلم ابنها بأن هذا الحيوان اسمه cat

وان أخطأ فى يوم وأطلق عليها قطة

ستعنفه امه بشدة

وتكون النتيجة خروج جيل بارع فى اللغات الاجنبية

وفاشل بجدارة حتى فى أن يكتب إسمه باللغة العربية

ظاهرة اخرى انتشرت وتستفزنى كثيرا

وهى الكتابة على طريقة الـ (franco)

مثلا ان اكتب كلمة مساء الخير هكذا

(masa2 el5eer)

كنت اظن أن من يكتب كذلك لديه مشكلة فى جهاز الكمبيوتر الخاص به

إلى أن وجدت يوما ما فتاة تتكلم مع أحد الأشخاص على الفيس بوك

بخصوص موضوع كان محل جدل ونقاش

وتلفت نظره إلى أن من يكتب باللغة العربية هو شخص(local)

استفزتنى جدا كلماتها وأحزنتنى

ألهذه الدرجة نكره لغتنا الأصلية؟

ولهذه الدرجة نرى أنه من العار أن نتعامل بها

ليس العيب فى أن نتعلم لغة أو لغتان أو ثلاث

ولكن العيب فى أن لا نحترم لغتنا

من لايحترم لغته لن يحترمه العالم

الثلاثاء، ديسمبر 07، 2010

باركولى وهنونى أو هنونى وباركولى المهم تشاركونى








يانااااس


ياعاااالم


يااااابشر


ياصحابى


ياأصدقائى


انا فرحانة


فرحانة اوى


ولازم تفرحوا معايا


النهاردة اول مقالة ليا


تنزل فى مجلة ميدان الحرية


والحاضر يعلن الغايب


وتعالوا خدوا الجاتوه


والحاجة الساقعة


وعاوزة اقول ان وشكم كان وش السعد عليا


الاثنين، ديسمبر 06، 2010

كل سنة وكلكم طيبين


كل سنة وكلكم طيبين وبخير

بكرة اول يوم فى العام الهجرى الجديد ان شاء الله

ربنا يجعلكم كلكم سعداء وفرحانين ومبسوطين

ربنا يكتر من مناسباتنا السعيدة دايما

ياترى بتحتفلوا باليوم ده ازاى؟؟؟

السبت، ديسمبر 04، 2010

واجب.......من شيرين سامى


فى عالم التدوين انتوا عارفين ان موضوع الواجبات ده انتشر

انا عموما مش بيجيلى واجبات كتير لان مدونتى لسة ماكملتش سنة يعنى مدونة نونو

بس لما بتجيلى بلتزم ان انا اعملها

شيرين سامى صاحبة مدونة حدوتة مصرية بعتتلى واجب لذيذ اوى بيتكون من سؤالين (ياسلام لو كانت واجبات المدرسة زمان من سؤالين وبس:))

انا بقى عملت الواجب اهه وعاوزة التصحيح والدرجة النهائية ونجمة المتفوقين كمان:)


السؤال الاول
هل انا فضولية وبحب اتدخل فى شئون الاخرين؟
انا مش فضولية ولا حاجة
بالعكس انا مش بحب اتدخل فى شئون حد علشان محدش يتدخل فى شئونى
بس المشكلة ان عندنا ناس بتبقى فضولية من بعيد لبعيد يعنى ممكن تعرف حاجات عنك من الناس المحيطين بيك
انا مش بحب ادخل نفسى فى شئون اى حد
لكن فى ناس بيبقى التدخل ضرورى فى حياتهم
يعنى طبعا انا فضولية جدا وحشرية جدااااااا فى اى حاجة تخص جوزى
يعنى لازم اعرف ادق التفاصيل عن اى حاجة
وطبعا ده طبع معظم الزوجات:)
والحمدلله هو مش بيزعل او بينزعج من الحكاية دى
وطبعا فضولية مع بابا وماما واخواتى
انما مع الاصحاب مثلا انا ممكن اسالهم من باب الاطمئنان واللى يحب يحكى هو حر لكن مش بتحايل على حد
السؤال الثانى
ماهى الاسئلة التى تستفزنى؟
انا عادة ماعنديش مشكلة مع الاسئلة
لان الطبيعى ان الناس تسألك
لكن انا اللى ممكن يستفزنى الطريقة بتاعة السؤال
يعنى فى طرق للاسئلة تتعب الواحد وتجيبله العصبى
وكمان اللف والدوران فى الاسئلة مش بيعجبنى
كان فى سؤال وانا صغيرة بيغيظنى اوى
ياترى بتحبى ماما اكتر ولا بابا
السؤال ده كان بيخلينى متغاظة اوى
يعنى ايه بحب مين اكتر
طبعا الاتنين بحبهم اوى
وبعدين ايه الاحراج ده اصلا واساسا ايه الفايدة من السؤال يعنى
ولسة السؤال ده بيضايقنى لغاية دلوقتى لما حد بيساله لاى طفل
ممكن نقول انها عقدة منذ الطفولة:)
فى كمان سؤال تانى
كنت بستغربه شويتين
ياترى بنتك شبهك ولا شبه باباها؟
اكيد يعنى شبه حاجات مننا احنا الاتنين
زى اى طفل فى العالم
بس انا دلوقتى بقى اللى بقيت أسأل
هى شبه مين
وبفرح اوى لما بيقولوا انها شبهى
وبفرح برضه لما بيقولوا انها شبه باباها
معادلة صعبة مش كده
طبعا اسئلة كتير تانية بتغيظ
زى سؤال هتخاوى بنتك امتى
متهيالى دى حاجة خاصة محدش ليه دعوة بيها
بس عموما الفضوليين فى حياتى مش كتير والحمدلله
انا خلصت اجابات بقى خلاص
واحب اوجه الواجب اللذيذ الظريف الجميل الصغنن ده
لرحاب صالح صاحبة مدونة حياتى ومش حرة فيها
ومها البنا صاحبة مدونة الطير المهاجر
وwise صاحبة مدونة احلام على ورق ومدونة انها حقا عائلة محترمة
كان نفسى اوجه التاج ده لناس كتير بس انا عارفة ان فى ناس كتير عملته
والدعوة مفتوحة يعنى اللى عاوز يكتب الواجب يكتبه
اشوفكم على خير ان شاء الله:)

الأربعاء، ديسمبر 01، 2010

هنتخب ميييييييييين؟؟؟(2)




نعم انا وجدت الحل

اعتقد ان الاستاذ سعيد جارنا مهتم بتلك الاشياء ومؤكد انه سيفيدنى
وفى صباح يوم الجمعة وبعد انتهاء صلاة الجمعة تحديدا
تقابلت مع الاستاذ سعيد اثناء خروجه من المسجد
وجلسنا سويا على احد المقاهى القريبة من منازلنا
-والله يااستاذ سعيد انا كنت عاوز اروح انتخب السنة دى
رد الاستاذ سعيد بحماس
-هايل يأستاذ امين ده صوتك امانة ده حقك الد........قاطعته لاننى لست بحاجة للمزيد من هذا الكلام ...
-ايوة لكن انا معرفش حد خالص فياريت يعنى لو ترشحلى انت حد انتخبه
رد عليا الرجل بحدة مبالغ فيها
-ايه ده ياراجل انت بتقول ايه ارشحلك حد هو احنا بنشترى طماطم ياامين دى انتخابات يعنى انت اللى لازم تختار اللى هيمثلك فى المجلس
شوف.... انا ممكن اخدمك برضه انت ممكن تسألنى على اى مرشح وانا اقولك رأيى فيه وفى برنامجه وبعد كده انت حر ..اختار اللى يعجبك
اعجبتنى الفكرة رغم انها سخيفة الى حد ما وسألته عن احد المرشحين ...كانت لافتاته معلقة امام المقهى
رد علي قائلا
-والله هو مش قد كده يعنى...انا مستحيل انتخبه...بس انت حر
غادرنا المقهى وانا طوال الطريق اتساءل مارأيك بفلان واشاور على اللافتات المعلقة بالشوارع
وكانت اجاباته تأتى هكذا متوالية
-انتخبناه السنة اللى فاتت ومعملش حاجة..
-لالالا بلاش الراجل ده انا عارفه شخصيا...بلاش...بلاش
-ياعم بلاش الناس دى مانتتخبش حد منهم
كنت قد مللت من الاسئلة فقررت ان اسأله سؤالا اخير
-هو انت هتنتخب مين؟
وكأنه كان ينتظر السؤال
أخذ يكلمنى عن احد المرشيحن ويمدح فيه ويذكر صفاته الجميلة وفى النهاية قال
- ده احسن واحد فيهم وانا هنتخبه وكل الناس هتنتخبوا
وقتها كنت وصلت لقمة الملل وكان لسان حالى يقول
-ياشيخ منك لله ماكان من الاول بدل ماسمعتنى الكلمتين اياهم دول...ده انت راجل ممل وماعندكش ضمير والله
تدوخنى كل ده علشان برضه انتخب اللى انت عاوزه...انا اللى غلطان من الاول
وصلت بيتى وقد استقريت على المرشح الذى سينتخبه سعيد
وفى يوم السبت ذهبت لعملى وفى اثناء ركوبى للميكروباص
سمعت احد الركاب يتكلم عن الانتخابات وعن احد المرشحين
الذين سألت عنهم الاستاذ سعيد ولكنه لم يشجعنى على انتخابه
ووجدت كلامه عنه مختلف تماما ويقول
انه رجل نزيه ومحترم وهو افضل المرشحين فعلا
زادت حيرتى ولكنى قررت ان انتخب هذا الرجل
خصوصا واننى شعرت بأن الاستاذ سعيد له مصلحة ما عندما ينجح الشخص الذى سينتخبه
وفى صباح يوم الانتخابات استيقظت مبكرا وارتديت ملابسى وجلست مع اسرتى
كان اولادى سعداء جدا وفرحين بأن والدهم شخص ايجابى وسيذهب لأداء واجب وطنى
وهذا ماجعلنى أشعر بأننى جندى ذاهب الى معركة او مناضل قومى وكنت فخور بنفسى جدا
وفى ساعة الصفر وضعت بطاقتى الانتخابية بمحفظتى و نزلت الى الشارع متجها الى اللجنة الانتخابية
كانت الساعة تعدت الثانية ظهرا وكانت الشوارع مزدحمة
كنت أريد ان يعرف جميع الناس اننى ذاهب للانتخاب
وما ان اقتربت من اللجنة حتى وجدت سيارة اسعاف تقف امام الباب
وبعض الاشخاص يحملون رجلا ويضعونه فيها
توقفت قليلا قبل ان اقترب اكثر لأجد ماذا يحدث
وجدت الشرطة تقبض على رجلا وتضعه فى سيارتها
وهناك مشاجرات وسباب وزحام شديد
فى تلك اللحظة دار حوار بينى وبين نفسى
او بمعنى اوضح دار حوار بينى وبين ضميرى
-ايه ياأمين واقف كده ليه ؟ ماتروح تنتخب وتخلص نفسك
-اروح فين ده هناك ولا يوم القيامة ده الناس الاسعاف بتشيلهم
-وانت مالك هو انت هتتخانق انت هتنتخب وتمشى
-ياسلالالالالالالالالالام هو انا هستنى لما اخد كرسى فى دماغى ولا ضربة من اى حد
- طيب والمرشح اللى انت رايح تنتخبه ده وصوتك اللى كنت هتديهوله
-يعنى هو كان من باقية اهلى ولا صوتى اللى كان هينجحه؟
لو له نصيب هينجح ان شاء الله
-طيب وولادك اللى مستنيينك فى البيت وفرحانين هتقولهم ايه؟
-اااااااااه هما دول المشكلة!!!!!!!!اعمل معاهم اييييه؟
سكت قليلا افكر فى موقف اولادى منى بعدما يعرفوا ان والدهم شخص جبان
ولكن بعد لحظات خطرت على بالى فكرة جهنمية
استدرت مرة اخرى عائدا الى المنزل
ودخلت احد المكتبات واشتريت زجاجة حبر احمر
وقمت بإغراق إبهامى فيها
ثم تخلصت من الزجاجة
ووصلت المنزل

-وجت سليمة الحمدلله:)

الثلاثاء، نوفمبر 30، 2010

هنتخب ميييييييييييييين؟؟؟(1)



-هو النهاردة ايه فى ايام ربنا؟
قالها صديقى وزميلى فى العمل الاستاذ حسن وهو يجلس على مكتبه
-النهاردة الخميس ياسيدى ....خير بتسأل ليه؟
-علشان الانتخابات ياأستاذ أمين انت مش عايش معانا فى الدنيا ولا ايه؟
-لا عايش معاكم وعندى بطاقة انتخاب كمان بس يعنى ماليش انا فى حكاية الانتخابات دى
وفجأة تدخل فى الحوار احد المواطنين الذين يأتون لقضاء مصالحهم لدينا
-ازاى كده دى سلبية هى دى مش بلدك وصوتك امانة لازم تدلى بيه فى الانتخابات فين ضميرك الوطنى؟
-؟؟؟؟؟؟؟؟؟؟؟؟؟؟
نظرت اليه متعجبا من تدخله المفاجىء فى الحوار ومنعت نفسى من أن اقول له
-وانت ايه اللى حشرك يارخم
ولكننى قررت عدم الرد إلا ان زميلى الاستاذ حسن تحمس جدا للحوار معه وقال
-فعلا انا عن نفسى مهتم جدا بموضوع الانتخابات ده ولازم اعرف برامج المرشحين وافضل ادور لغاية مااستقر انا هنتخب مين
رد المواطن اياه قائلا
-تمام كده هو ده الكلام الايجابى مش واحد يقول انا ماليش فى حكاية الانتخابات دى.........ده كلام ياراجل برضه
كنت اود ان اقفز من مكانى وأضرب هذا الشخص ولكنى تمالكت اعصابى حتى انصرف وانتهى اليوم وعدت الى منزلى
وبعد تناول الغذاء جلست انا واولادى وزوجتى نشاهد التلفزيون وكان ممتلئا منذ عدة ايام بإعلانات حس المواطنين على الذهاب للانتخاب
وفجأة فاجئنى ابنى الصغيروائل بسؤال
-بابا بابا هو ينفع انتخب ؟
-انت يامفعوص انت عاوز تنتخب مين ان شاء الله...عموما هو ماينفعش..
كنت اود ان اقول له
تنتخب ايه ياواد انت ده ابوك مابينتخبش.... هتنتخب انت ياعيل
وردت علينا ابنتى الكبيرة اميرة
-اسمحلى يابابا هو ليه مش بيخلوا اللى فى سننا ينتخبوا يعنى انا عندى 12 سنة ومن حقى اقول رأيى لان احنا فى عصر الديموقراطية وصوتى امانة وده واجبى واعتقد كمان انه حق من حقوقى الدستورية
-؟؟؟؟؟؟؟؟؟؟؟؟؟؟؟؟؟؟؟
نظرت اليها وانا متعجب....... من اين تأتى بهذه الافكار
وقبل ان اسألها دخلت زوجتى وحرمى المصون بكوبا من الشاى
-ايه ده انا مش قلت لك اعملى لى قهوة؟
ردت عليا بإقتضاب
-نسيت وعملت شاى .....وبعدين الاتنين زى بعض
سكت مرغما وأخذت الشاى لاتناوله حتى سألنى ابنى
-بابا هو يعنى ايه ديمو ديمو ديمو......هى اسمها ايه؟
-اسمها ديموقراطية..
الديموقراطية دى معناها انى اطلب اللى انا عاوزه ومامتك تجيبلى اللى هى عاوزاه
قلت ذلك وانا انظر لزوجتى ولكنها لم تعيرنى اى اهتمام
دخلت لانام قليلا ولكننى لم استطيع حيث ان الفكرة سيطرت تماما على تفكيرى
لماذا لا اذهب للادلاء بصوتى انه فعلا حقى كما تقول ابنتى حتى ابنى يشغل تفكيره بهذا الموضوع فى هذه السن الصغيرة وزميلى الاستاذ حسن ليس افضل منى
حتى هذا المواطن السخيف الذى اثار اشمئزازى ...لماذا لاأذهب للانتخاب؟
ولكن انا لاأعرف أحدا من المرشحين وليس لدى فكرة عن برامجهم الانتخابية
ولكن هناك حل :)
----------------------
تفتكروا أمين هيعمل ايييييييه
هقولكوا المرة الجاية

الأحد، نوفمبر 28، 2010

كيلو اللحمة ب14 جنيه



ياااااااااااااااااه الايام بتجرى بسرعة اوى....العيد الكبير خلاص فاضل عليه كام يوم ربنا يستر بقى من طلبات العيال وامهم

لما اشوف كده ايه اخبار النهاردة ولو ان الجرايد اخبارها كل يوم زى ماهى.......

وقبل ان ابدأ بقراءة اول خبر

"يلقى زوجته من البلكونة بسبب لحمة العيد"

-ياساتر يارب هو فيه كده؟

-ياآميييييييييييييييييين......

استر يارب كده تبقى عاوزة حاجة..........ايوة ياستى ماتوطى صوتك ده شوية ولا انتى فرحانة بالاسم

وخرجت حرمنا المصون من المطبخ وجلست بجوارى

-ايه بقى هتجيب لنا كام كيلو لحمة السنة دى:)

لم التفت لها واكملت قراءة الخبر بصوت عالى(يمكن تخاف وترجع المطبخ تانى)

-ألقى عامل بزوجته من الطابق الثاني بسبب مطالبتها له بأموال لشراء لحمة العيد.....

-انت هتهزر ياراجل

قالتها زوجتى وهى تضحك واكملت

-قول بجد هتجيب كام كيلو لحمة..........

اسمع ياآمين

وكلمتنى بنبرة حادة

-انت لازم تكتر الكمية السنة دى ده العيد ولازم يكون الاكل كتير

مش لازم كل سنة العيال يتخانقوا مع بعض على الاكل العيال لازم تفرح

-يعنى عاوزانى ادبح لكم عجل... انتى مش عارفة الكيلو بقى بكام ؟

مانجيب على قدنا وخلاص

-امين........ اتصرف انا ماليش دعوة ولا انت عاوزنى اكلم اخواتى وهما يتصرفوا معاك بطريقتهم

-خلالالالالالالالالالالاص هى حصلت اخواتك ...حاضر هتصرف

وفى اليوم الثانى ذهبت لعملى لم استطع التركيز طلبت فنجان قهوة سادة من فرغلى لعله يستطيع ان يبعد عنى الصداع وجلست افكر بصوت عالى

- هتعمل ايه ياامين اجيبلهم منين لحمة وهدوم للعيد وكمان عاوزين يخرجوا

لا وكمان قال عاوزين ياكلوا بره ........يعنى هو علشان نعيد لازم نصرف اللى معانا كله وبعدين انا مهما عملت ومهما اخدت من الناس اكراميات مش هيكفى طلبات الهانم وعيالها

-مالك يااستاذ امين انت بتكلم نفسك؟

-اعمل ايه يافرغلى انت عارف بقى زنقة العيد واللحمة اللى بتغلى كل ربع ساعة

ده انا قريت ان الكيلو وصل ل100 جنيه فى بعض المناطق.

-لالالالالا يااستاذ امين سيبك من الاسعار دى

الكلام ده عند الناس اللى معندهاش ضمير والحرامية انما عند الحاج محى الكيلو ب14جنيه ولحمة ايييييييه ماقولكش عليها

-14جنيه يافرغلى؟؟؟؟؟؟؟؟؟؟؟؟!!!!!!

-اه والله الحج محى ده اصله جوز اختى وراجل عارف ربنا ويكره الجشع والطمع والنصب راجل مستقيم وبتاع ربنا وضميره صاحى

عنوانه فى الكارت ده روح عنده وقوله انك من طرفى ..وادعيييييلى

مع حماس فرغلى تشجعت وذهبت للحاج محى الجزار بعد انتهاء العمل ولم اصدق نفسى فعلا كيلو اللحم ب14 جنيها والزحام شديد جدا...استطعت الوصول للحاج محى واشتريت منه كمية كبيرة ولم انسى شراء الكبدة وبعض اللوازم الاخرى ...وصلت البيت وفرحت زوجتى جدا حتى انها لم تسألنى من اين جئت بثمن كل هذه الكمية!

وفى صباح يوم العيد وتحديدا بعد انتهاء صلاة العيد قامت زوجتى بإعداد الكبدة واكلناها كوجبة افطار وكانت رائعة لدرجة ان ابنى الصغير قال وفمه ممتلىء بالطعام

-حلوة اوى الكبدة دى يابابا دى احلى كبدة كلتها فى حياتى ابقى هات منها على طول

حمدت الله وشكرته وانا طوال الوقت ادعوا لفرغلى وللحاج محى

وبعد الافطار قامت زوجتى لاعداد الشاى وجلست اتابع ماكتب فى صفحة الحوادث

ووجدت خبرا جعلنى اقفز من مكانى

"القبض على جزار يبيع لحم الحمير قبل العيد"

حدثت نفسى قائلا:

-ايه ده بقى....معقول يكون هو...الخبر بيقول انه فى المكان اللى فيه الحج محى بس مش شرط يعنى ماالجزارين كتير

وبعدين احنا كويسين اهه وقاعدين الحمدلله وام العيال بتحضر الغدا فى المطبخ ...مفيش حاجة... مفيش حاجة ....اعوذ بالله من الشيطان

ظللت جالسا اترقب زوجتى واولادى حتى بدأ المغص يتسلل الينا واحدا تلو الاخر وقام الجيران بإستدعاء الاسعاف ودخلنا المستشفى

ورغم الامى وغيظى من اننى اكلت كبدة حمار

الا اننى كنت سعيد جدا لاننا قضينا العيد بالمستشفى وتخلصت من مصروفات التنزه ليلا وشراء طعام اضافى واقنعت نفسى بأن وجودنا فى المستشفى (تغيير جو وفسحة من نوع جديد)

اما فرغلى

انا هخرب بيته بس لما ارجع له


ـــــــــــــــــــــــــــــــــــــــــــــــــــــــــــــ







البوست الجاى ان شاء الله هيكون مع امين والانتخابات...بس اعرف رأيكم الاول لان تقريبا دى بالنسبة لى تجارب اولية فى كتابة حاجات زى كده يعنى رأيكم يهمنى وهيفيدنى جدا

اشوفكم على خير:)




السبت، نوفمبر 27، 2010

أزمة ضمير


السلام عليكم


ازيكم جميعا اخباركم ايه يارب تكونوا طيبين وبخير

انا مش عاوزة حد يكون زعلان منى علشان انا مقصرة معاكم جدا

بس والله الوقت عندى ملخبط اوى اليومين دول

والحمد لله على كل حال

فاكرين استاذ امين

اللى كان الشخصية الرئيسية فى بوست يوم الضمير العالمى

انا نويت اكملها واخليها سلسلة هيكون اسمها ازمة ضمير

ان شاء الله هبدأ انزلها قريب جدا

اتمنى تعجبكم ان شاء الله

اشوفكم دايما على خير

الخميس، نوفمبر 25، 2010

أرض زيكولا

مدينة زيكولا
اغرب مدينة ممكن تسمعوا عنها او تشوفوها
مدينة بتتعامل بالذكاء مفيش نقود او عملات
كل معاملاتها بوحدات الذكاء
يعنى الذكاء هو مصدر الثروة
وكل سنة يتم ذبح افقر من فى المدينة
مدينة زيكولا دخلها شاب مصرى وعاش فيها لمدة سنة كاملة
كان واحد من اهلها
دخلها وهو مش عارف انه هيدخلها وهيعيش فيها
لو عاوزين تعرفوا دخلها ازاى؟
وليه كان مضطر يعيش فيها لمدة سنة
وايه اللى حصل معاه هناك
وتعيشوا مع رواية من اجمل الروايات
رواية فيها الخيال والرومانسية والتشويق فى الاحداث

اقرأوا رواية أرض زيكولا

لمؤلفها الدكتور عمرو عبد الحميد
وهنا




الثلاثاء، نوفمبر 16، 2010

كل سنة وكلكم طيبين وبخير

ازيكم جميعا كل سنة وكلكم طيبين وبخير
يارب تكونوا كلكم مبسوطين
ويسعدكم ويجعل كل ايامكم اعياد ان شاء الله
انا طبعا بعتذر عن الغياب الطويل ده بس انا مسافرة حاليا
ومش بعرف ادخل على النت كتير
وكمان مش بعرف ارد على تعليقاتكم عندى او حتى اعلق فى مدوناتكم علشان مشكلة التعليقات رجعت تانى
والمشكلة دى هى اللى بتقابلنى كل مرة بسافر فيها علشان بستعمل اللاب توب وتقريبا سببها الusb modem
انا بشكركم كلكم على تعليقاتكم الجميلة انا فرحانة بيها جدا جدا
وان شاءالله لما ارجع هرد على كل التعليقات الجميلة اللى فرحتنى
كل سنة وكلكم طيبين
وربنا يحقق لكم كل اللى تتمنوه
ونكون كلنا السنة الجاية من حجاج بيت الله الحرام
اشوفكم على خير
كنت عاوزة ارفع لكم صورة حلوة
بس النت مش عارفة بقى بطىء كده ليه
كل سنة وانتم طيبين
وعيد سعيد:)

الثلاثاء، نوفمبر 09، 2010

يوم الضمير العالمى


انا اسمى امين بشتغل موظف فى مكان ما
مش مهم تعرفوا هو فين ولا حتى بعمل فيه ايه
المهم ان الشغل ده انا واحد من المسؤولين فيه عن خدمة المواطنين(حبايبى)
انا متزوج وعندى 3 ابناء فى مراحل مختلفة من التعليم
بحاول على قد مااقدر انى اوفرلهم حياة كريمة واخليهم احسن منى
انا بصلى الحمدلله وبصوم وبعمل اللى يقدرنى عليه ربنا من العبادات
وعودت ولادى كمان انهم يصلوا ويصوموا
والحمدلله عايشين
بصحى من بدرى اروح شغلى وارجع اخر النهار ارتاح فى بيتى
وفضلت الحياة ماشية على كده
لغاية مافى يوم من الايام صحيت ومالحقتش افطر فى البيت
لان ام العيال كانت عاوزة المصروف
مديت ايدى فى جيبى واديتها اللى فيه النصيب
الولية اول مامسكت الفلوس فى ايدها راحت مصوتة
-حرام عليك ياراجل هو انت ماعندكش ضمير انت مش عارف كيلو الطماطم بقى بكام والفراخ بكام وال....
-خلاص ياولية انسدى
وطبعا زودتلها الحصيلة
خوفت اتأخر اكتر من كده قمت اشتريت سندويتشات فول واخدتها معايا الشغل
ودخلت قعدت على المكتب ولسة هاخد اول لقمة لقيت واحد داخل عليا من المواطنين (حبايبى)
- لو سمحت عاوز اخلص الورق ده
- طيب ثوانى حضرتك
الراجل راح مكشر مرة واحدة
-ثوانى ايه.........اكيد طبعا عاوزنى استنى سعادتك لما تفطر
هو مفيش ضمير المفروض حضرتك بتيجى هنا تشتغل مش تاكل
انت ماعندكش ضمير؟
انا سمعت الكلمة دى فين قبل كده...
طبعا بعد الكلمتين دول انا نزلت الساندويتش تانى على المكتب
-يافتاح ياعليم يارزاق ياكريم
هات الورق ياأستاذ ...
عملت له اللازم وسيبته يمشى
الراجل الرذل بعد ماخلصتله ورقه وسد نفسى على الصبح
الا ماطلع من جيبه ورقة بخمسة وحطهالى فى الدرج
حسبى الله ونعم الوكيل...قال ويقول ان انا اللى ماعنديش ضمير
طبعا انا دماغى صدعت طلبت شاى من فرغلى فراش المكتب
ماهو يعنى مش هيبقى جوع وقلة مزاج كمان
واول ماحطيت الكوباية على بقى حسيت انى عاوز ارجع
-انت يافرغلى
-ايوة يااستاذ امين
-مش تغسل الكوبايات يافرغلى ايه القرف ده
-جرى ايه يااستاذ امين الكوباية مغسولة وزى الفل والله....هو انا هجيبها مش مغسولة ليه يعنى ...حد كان قالك انى ماعنديش ضمير؟
- تاااااااانى...ضمير تانى...هو فيه ايه؟
وعدى اليوم على اقل من مهله
والمواطنين(حبايبى)عمالين يتوافدوا على مكتبى
و طول ماانا شغال عمال اشوف ايه موضوع الضمير ده اشمعنى انا يعنى اللى عاوزنى يبقى عندى ضمير ماهو كل الناس ماعندهاش ضمير... السواق اللى ركبت معاه الصبح لهف الاجرة ونزلنى قبل مكان شغلى بكيلو..
الجزار اللى جبت منه اللحمة امبارح مقطعلى اللحمة ونصها دهن ....العيش امبارح اشتريته ولقيت فيه مسمار
الفكهانى بيغشنى فى الميزان....وفرغلى مش بيغسل الكوبايات ......حتى حرمنا المصون بتخنسر من مصروف البيت....اشمعنى انا يعنى اللى هيبقى عندى ضمير هو الضمير هيأكلنى عيش...
وقبل ميعاد الانصراف بخمس دقائق
دخلت علينا واحدة ست شيك ورقيقة جدا ومبتسمة عاوزة تخلص كام ورقة كده بس هياخدوا وقت
-معلش يامدام احنا اسفين ميعاد الانصراف والله حضرتك ممكن تيجى بكرة
وكأنى شتمتها وتحولت الابتسامة الى تكشيرة وانعدمت الرقة وبدأت وصلة ردح من النوع الفاخر
-نعععععععععم بكرة ده ايه ياخويا ده انتوا عمالين تلففونى من الصبح على مكاتبكم.... اييييييييييييييييييييه هو خلاص مابقاش فى ضمير
وبعدين يعنى فى كلمة ضمير دى
-ياست حضرتك احنا خلاص دقيقة وهنروح
-ماليش دعوة انتوا لازم تشتغلوا لغاية اخر دقيقة انا مش ماشية غير لما اخلص ورقى.
بصراحة انا بقى طلبت معايا انى مش مخلص لها ورق لولا ان الست دى فى اخر لحظة رجعت لانسانيتها ورقتها تانى واديتنى فى الخباثة كده ورقة بخمسين جنيه ...وانتوا عارفين بقى........ انا راجل عندى ضمير ولازم اعمل شغلى للمواطنين (حبايبى) ما هو انا هنا أساسا علشان اخدمهم ومفيش حاجة لما أخلص للست حاجتها...ولا ايه؟
خلصت شغلى وركبت الاتوبيس وانا معايا حصيلة اليوم.....400 جنيه..........
واول مادخلت البيت لقيت ام العيال بتقولى ان ام سحر عدت علينا وعاوزة الجمعية.
ولسة بدخل ايدى فى جيبى لقيت نفسى بصرخ واقول.......

-يانهااااااااار مش فايت انا اتسرقت ......سرقنى واحد ماعندوش ضمير.



الأحد، نوفمبر 07، 2010

كتاب مالوش اسم


اجمل حاجة واحلى حاجة لما بشترى كتاب واقرأه والاقى ان فلوسى ماراحتش على الفاضى

بكون فرحانة اوى بالمعلومات اللى بعرفها او حتى لو اخدت عظة من رواية جديدة

انما الفرحة الكبيرة بقى لما كتاب يغير حاجة من جوايا ساعتها ممكن يبقى احساس ان الفلوس اللى دفعتها فى الكتاب مش كفاية وانه يستحق اكتر من كده


انا بحب القراءة جدا ومن وانا صغيرة متعودة عليها

بس علشان استفيد اكتر عودت نفسى انى كل شهر لازم اشترى كتاب

وهو وحظه معايا بقى لو عجبنى يبقى هخلص قرايته اكتر حاجة فى 3 ايام

لو مش قد كده يبقى مش بقراه كله او بياخد معايا وقت طويل


واخيرا اشتريت كتاب احمد العسيلى اللى سماه كتاب مالوش اسم

طبعا انا عارفة انى اخر واحدة فى مصر اشترت الكتاب

لانى اشتريته فى الطبعة السادسة

اشتريت الكتاب لما سمعت من ناس كتير انه كتاب هايل

انا كنت مستغربة جدا من اسم الكتاب

ايه الفكرة يعنى ان الكتاب مايبقاش له اسم


الكتاب من اول حرف شدنى جدا

مكتوب باللغة العامية انما بشكل عبقرى

الكتاب مش بيتكلم عن فكرة واحدة

انما بيتكلم عن حاجات كتير بتشغل بال ناس كتير اوى

بيتكلم عن علاقتنا بربنا وعن الصلاة وعن الموت

وعن الضمير وعن الاطفال وحاجات تانية


انا خلصت قراية الكتاب فى 3 ايام فعلا

ولو الوقت كان سمحلى انا كنت خلصته فى يوم واحد

اختلفت مع الكاتب فى بعض حاجات

بس اتفقت معاه فى حاجات كتير

منها ان ماينفعش نقتل شقاوة اطفالنا لانهم بيضايقونا

وكمان طريقة تعاملنا مع الحشرات المزعجة بقتلنا لهم

رغم ان ربنا خلقهم هما كمان علشان يعيشوا


وحاجة تانية بقى كمان الكتاب ساعدنى انى افهمها

التأميم..........اعترف انى ماكنتش فاهمة التأميم اوى
يعنى قصدى مش فاهمة ليه فى ناس معاه وناس ضده

ليه ناس بتحب عبد الناصر وليه ناس بتكرهه

لما قريت الكتاب فهمت وكمان اقتنعت برأى العسيلى جدا


احلى حاجة عملها معايا الكتاب ده هو انى خلانى اتعامل مع الحياة بأسلوب بسيط اكتر شوية من الاول


ولما خلصت الكتاب ساعتها عرفت انه كان صعب ان الكتاب ده يكون له اسم غير كتاب مالوش اسم وانه فعلا لازم كل واحد قرأه هو اللى يسميه على مزاجه كما ذكر احمد العسيلى فى نهاية الكتاب

الحاجة الغريبة اللى قابلتنى وعرفت بعد كده انها حصلت مع ناس كتير

هى انى كل ماكنت بقرأ الكتاب كنت بسمع صوت احمد العسيلى فى ودانى

كأنه بيتكلم فى برنامجه .......غريبة مش كده؟

السبت، نوفمبر 06، 2010

حماية عناوين المدونات....عند مين؟(البوست اللى لينكه اترفع)




ده البوست اللى كان نازل والرابط بتاعه اترفع

المفروض الواحد لما ياخد حاجة مش بتاعته يعترف بكده ويرجع الحق لاصحابه

خصوصا لو الموضوع ده يتعلق بمصداقيته قدام الناس...مش كده؟
انما لما يكون اى واحد اعتدى على حق غيره وكمان مش عاوز يعترف بكده او يعتذر حتى بجد فعلا بتكون حاجة تزعل.

الكلام ده انا بقولوا ليه بقى؟

قولتولى ليه

انا احيانا بحب اعمل بحث على جوجل بإسم المدونة واشوف ايه اللى هيطلعلى

من كام يوم لقيت جروب بإسم المدونة بتاعتى على الفيس بوك وطبعا انا لسة ماعملتش كده

يبقى الجروب ده منيييييييييييييييين؟

دخلت اشوف ايه الموضوع

لقيت مدونة لسة معمولة فى شهر اكتوبر بنفس اسم المدونة (كلام فاضى)

عاملها مجموعة اشخاص

بصيت فيها لقيتها حلوة يعنى ومحتواها جيد

بس انا مشكلتى معاهم الاسم

طبعا كتبت لهم تعليق حييتهم فيه على مدونتهم عادى لان دى الصراحة ولفت نظرهم ان فى مدونتين ملكى بالاسم ده وسيبت الروابط مع التعليق

وبعدين بعدها بكام ساعة قلت اشوف ايه الاخبار



بصيت لقيتهم مسحوا التعليق ولا كأن حاجة حصلت



انا زعلت طبعا مش بس علشان مسحوا التعليق..انا زعلت علشان كان المفروض يقدروا الاسلوب اللى انا خاطبطهم بيه كان المفروض يردوا بنفس الطريقة

غير كده كمان انا ماطلبتش منهم انهم يغيروا الاسم تانى فى التعليق انا بس كنت حابة انهم يعرفوا ان الاسم ده موجود من قبل مايعملوا مدونتهم وحكاية تغيير الاسم دى راجعة لذوقهم



انا طبعا رديت عليهم تانى وقلت لهم ان كده عيب وانا عارفة انهم عارفين ان اسم كلام فاضى موجود على البلوجر وهما بيسجلوا

عموما الاسم موجود كده كده ومثبت فى المدونة القديمة انها شغالة من مايو 2009 وفى المدونة هنا من مايو 2010


المهم البوست ده كان نزل هنا وانا رفعته تانى علشان اشوف ردهم على التعليق الجديد علشان برضه مابقاش بظلم حد


المهم بعد كده دخلت تانى لقيتهم ردوا على التعليق الجديد وقالولى انهم مسحوا التعليق علشان كان فى روابط مدونات تانية

وان الساحة تسعنا احنا الاتنين وان رابط مدونتى غير رابط مدونتهم


عموما انا ماطلبتش من حد يغير اسامى (رغم ان ده حقى)

انا مش هطلب من حد كده لانها راجعة لتقديرهم

مدونتهم فعلا حلوة بس كان المفروض طالما عرفوا ان فى مدونة بإسم تانى كانوا غيروا الاسم
وغير كده كان لازم يردوا ويوضحوا هما ليه حذفوا التعليق

انا ماعنديش مشكلة معاهم بس نزلت البوست هنا فيه الحكاية كاملة لان فى ناس دخلت تقراه ومالقتهوش


انا كل اللى عاوزة اعرفوا دلوقتى ان لما واحد يتعب ويختار اسم لمدونته مين اللى يحمى حقه لو صحى من النوم لقى واحدة تانية بنفس الاسم..حد بقى يجاوب على السؤال ده!!!!!!!!


الجمعة، نوفمبر 05، 2010

اشترك معانا...ممكن+تحديث(لينك بيت المدونين)




فى الاول بس عاوزة اعتذر للناس اللى دخلت تشوف موضوع سرقة وبجاحة ومالقتهوش

لان الموضوع ده له ظروف خاصة هقولهالكم البوست الجاى ان شاء الله اللى هينزل النهاردة او بكرة بالكتير

المهم بقى البوست ده كل الناس المشاركين فى بيت المدونين عارفينه تقريبا لانه منول من هناك بس ياريت بقى الناس اللى لم تشترك فى بيت المدونين معانا تشترك وتشوف الموضوع وياريت كمان اللى لسة مانقلهوش ينقله عنده فى مدونته.

اشوفكم على خير قريب جدا ان شاء الله:)


سالخير عليكم .....
اولاً ومن هذا المنبر الجديد احب ان امرر خالص شكرى واعتزازى وتقديرى و .......
.... ايه الدخله دى .........
لا لا لا ...... انسوا الكلام اللى فوق فى اولاً ده ....... احنا مش كده خالص .....


احنا هنا اصحاب وزملاء ..... احنا هنا قرايب وعزوه .............
يعنى لا فيه رسميات ولا هو موقع عام بيتكلم بشكل رسمى او بصوره مرسومه مسبقاً وهيكل واطار وبرواز وتشكيل وتبــــ ....... برده الكلام كبر منى تانى .........


لا بقى بصوا ...... انا هقول تانى بس بالشكل بتاعنا اللى كلنا هنتفق عليه الا وهو ......
اننا هنا مش عاملين موقع رسمى او مؤسسه وده واجهتها ....... لا خاااالص ...... ابسلوتلى ........


يا اخوانا هنا زى ما قلنا بيت المدونين ...... يعنى كل الناس اللى هنا اعضاء فيه ..... بدون طلب اشتراك او التحاق ........


ده بيت معمول عن طريق مجموعه من وسطنا ..... بهدف نتلم ونتقابل فيه ....... حاجه كده زيها زى التجمعات التدوينيه ..... لا بيبقى فيها ريس ولا بيبقى فيه برنامج مفروض ........

بمعنى أصح وأقرب للفهم ...... هنا بمثابة تجمع تدوينى ، بس بدل ماهو بشحمنا ولحمنا ....... هيبقى بقلمنا وكيبوردنا .......


لان مش كل الناس بتعرف تحضر التجمعات ..... مش كل الناس بسهوله تقدر تتواجد فى كل الأماكن .......
لكن هنا كله يقدر يتواجد فى نفس الوقت من اى مكان او زمان ......... من اسكندريه لاسوان ...... صحره كان او بستان ..... حلوه الـ (وان دى ) ....
حتى ولو عايش برا مصر هيقدر يتواصل ........ هنقدر نتكلم وندردش ....... هنقدر نتبادل الحوار والنقاش .......
هنقدر نقترح على بعض افكار كتير ومواضيع اكتر واكتر ..............


احنا هنا بنعتقد ان المدونين فى مصر بدأوا يبقوا فى الصوره ..... بدأو يبقوا كيان مؤثر فى المجتمع والاعلام ......


لقد قال نابليون بونابرت يوماً :
"لا أخشى ألف مدفع وألف جندي بقدر ما أخشى لسان صحفي أو مقال جريدة. ... "


فالصحافه هى الطابور او السلطه الرابعه ..... وهى المؤثر والمحرك للمجتمع ........
علشان كده قلنا نحاول نتجمع.....
نعمل مكان نتلم فيه ومن بعض نسمع ........
اكيد هتفرق كتير معانا ...... اكيد هتفرق مع المجتمع .......

تخيلوا لو مثلاً ...... المكان ده فعلاً بقى بيلتقى فيه اكبر عدد مننا ..... وبقينا نتفق على حاجات مع بعض من خلاله .....
وبقى كل الناس عارفاه ... القاسى منهم والبادى ..... ومثلاً مثلاً .......
جينا على تجمع زى بتاع التبرع بالدم اللى خالد همس الاحباب بيدعى ليه ده ........ وجينا معلنين هنا وقولنا "يا جماعه عايزين الايام الجايه دى كلها كل المدونين يعلنوا عندهم على التجمع حتى اللى مش هيجوا يعلنوا ..... لان التجمع مش مقتصر على المدونين بس ............... "
وفعلا الناس كلها عجبتها الفكره واعلنت ............... متخيلين رد الفعل ؟!!!!

متخيلين الفكره دى (التجمع ) ممكن تعجب ناس تانيه اد ايه وممكن يعملوها فى محافظاتهم ازاى ؟! وعلى ذلك قيسوا امثله كتيره ......
متخيلين مدى تأثيرنا هيبقى عامل ازاى فى المجتمع ؟!!

ده من جهه ...... وفيه جهات تانيه او افكار تانيه كتيره هى هدفنا هنا برده ..............

زى ايه ؟!!
زى اخبارنا اللى احنا بننشرها كل يوم دى ..... فلان اتجوز، فلانه اتجوزت ...... فلان عيد ميلاده امتى ...... فلانه غسلت المواعين ولا لسه ؟!
فلان اتخنق من مراته ...... فلانه قتلت جوزها ..............
طبعا كده بقى الموضوع جرسه وشرده ........... لا مش كده .....
لان بكل بساطه ...... احنا هنا مش هنذيع او ننشر اى خبر الا من خلال صاحبه ..............
صاحبه فقط هو اللى هيقولنا عليه وننشرهوله ...... مش هننشر شئ الا ما صاحبه هو اللى يقول او يوافق مسبقاً ..... لان بكل بساطه .....
الخبر هيتنشر وصاحبه هو اللى بنفسه هيجى يعلق عليه ويرد على تعليقات الناس ............
بمعنى اصح هيبقى فيه تواصل اكتر ومشاركه اكبر ........ هيبقى فيه ود وترابط وتراحم ......
لان الموضوع مش هيبقى عباره عن "موقع بينشر اخبار" (موقع اخبارى) لا .............. احنا هدفنا هنا اجتماعى ......
برده زى خبر مدونه جديده اتفتحت ، ممكن نعلن عنها ، لمزيد من الانتشار ومساعده للمدونين الجدد انهم يجوا وينتشروا وسطينا بدون مجهود كبير ووقت طويل ....
زى برده اننا نحط لنكات كل المدونين المتواجدين معانا ومش متواجدين .... بنحاول نضيف كل اللى نعرفه .... (طالما ان محتوى مدونته فى اطار مقبول ... طبعاً) ...



فيه افكار تانيه برده كتيره عندنا وعندكم ممكن تقولولنا عليها ونناقشها .......

يعنى على سبيل المثال ....... عندنا فكره جديده هقترحها عليكم دلوقتى ...... ونتناقش فى كيفيه تنفيذها ..... زى ما اتناقشنا فى الشعار بتاع بيتنا هنا واختارناه فعلا على حسب اقتراح الاغلبيه وقد كان والحمد لله ............



وان كان انا نفسى بعترف ان الشعار فيه حته كده عايزه تتغطى ......................... (بس ان شاء الله هنغطيها ونلبسها نقاب كمان ان شاء الله ....... ههههه ) . بس يا جماعه والله ما حد فينا يعرفها الست دى ..... دا احنا لقيناها كده فى وسط الجماعه اللى واقفين واتكسفنا نمشيها ..............



المهم
نرجع لموضوعنا وفكرتنا ................ الا وهى :

هنستضيف كل فتره معينه (ثابته او متغيره.... للنقاش برده ) ، مدون من المدونين ......
حاجه كده هتبقى زى التاج .... بس المره دى فيها ميزتين ...... الاولى انه هيبقى معمول له هو بعينه .... والتانيه هيبقى فيه تفاعليه اكتر ..... ليه ؟! ..... لان .....

لان ايه ؟!

لان احنا هنتفق مع المدون ده الاول زنبلغه انه مرشح للبوست اللى جاى علشان يتعمل معاه حوار ..... ولو وافق ....
هننزل خبر فى بوست نقول:
"ان المدون اللى هيتعمل معاه الحوار القادم يا اخوانا هو ..... فلان ......
وبالتالى الناس فى صفحة التعليقات تبدأ تكتب الاسئله اللى عايزين يسألوهاله ........ (طبعاً فى المعقول يعنى ..... ) ، واللى هيبعتوا الاسئله ممكن يبعتوا بالاسم بتاعهم او لو محرجين ممكن يبعتوا باسم غير معروف .............
من ضمن الاقتراحات برده ...... ان التعليقات فى البوست بتاع الاسئله ده بعينه (الاسئله المقترحه) هتبقى معمول لها اشراف ، بحيث ما احناش ضمنين الظروف برده ......
واحد زى على علوكه او اشرف كوخه ممكن يدخلوا بغير معروف ويسألوا اسأله كخه .... ونبقى اتسببنا فى احراج للراجل او الراجله اياً كان .......



عموماً الموضوع بين اديكم ....... الفكره كلها اتعرضت ...... (اقصد فكرة البيت نفسه ) .... والفكره بتاعت الحوار برده اتعرضت ...... مستننين ارائكم ومقترحاتكم ......



صحيح برده احنا عايزين نسمى الفكره الاخيره دى اسم .... زى موضوع التاج كده ما اصطلح عليه انه اسمه تاج ......

يعنى عايزين نسمى البوست ده اسم ثابت مثال :

" فى بيتنا مدون " .....

"على القهوه " .....

"انا مين " ...........

" اقفش مدون " ......
" مدون فى ورطة " ........

كده يعنى .............
وعلى فكره الاسماء دى مش للاختيار ، دى للمثال .... يعنى عايزين اسماء تانيه .....
............
...............


بس...........


انتوا لسه قاعدين ............ الموضوع عجبكم ولا إيه .... انا عايز أروح ....

بيت المدونين تروحوا له
من هنا


سلاااام
ويكا
منقول من بيت المدونين

السبت، أكتوبر 23، 2010

بوست مظلوم+غياب قصير

ازيكم جميعا اخباركم ايه
يارب كلكم تكونوا كويسين وبخير
انا هغيب كام يوم عن المدونة
مش هتأخر ان شاء الله هما كام يوم بس
لكن مش هغيب عن مدوناتكم ان شاء الله
هحاول اتابعكم كلكم
ولغاية ماأرجع هسيبلكم لينك بوست كنت كتبته من زمان جدا
البوست ده عجب الناس اللى قرأوه لما اتكتب زمان
وغالى عندى لانه تقريبا اول حاجة كتبتها
البوست ده اتسرق واتنشر بأسماء ناس تانية من غير حتى مجرد الاشارة انه منقول
وكمان اتظلم لانى نزلته هنا فى المدونة مع بوستات تانية من غير ماياخد حقه فى القراءة
اتمنى تقرأوه ويارب يعجبكم
أشوفكم على خير
ملحوظة:فكرة اعادة نشر البوستات القديمة دى مش فكرتى دى فكرة كنت شوفتها فى مدونة يوميات مريض نفسى ومدونات تانية كمان

الجمعة، أكتوبر 15، 2010

دعوة لعمل الخير

كنت جاية النهاردة اكتب بوست جديد
ولما دخلت المدونات الصديقة اشوف ايه الاخبار
لقيت مدونة واحد شاى ومدونة الحب الجميل ناشرين بوست عن حالة انسانية
تحتاج لمن يساعدها وبسرعة
ولان الدال على الخير كفاعله
قررت انشر بيانات الحالة يمكن حد يقدر يساعدها
ولو حتى بمجرد دعوة
ياريت اللى يقدر ينشر البوست عنده مايتأخرش
احيانا ينتاب المرء منا حالة من العجز عن التفكير او الشعور بالتقصير تجاه الاخرين

واحيانا اخرى تتقاذفنا امواج الحياة وتجذبنا بعيدا عن شاطىء الحياة ولكن عندما يريد الله لنا خيرا يرسل من ياخذ بايدينا او من يدلنا الى فعل الخير اومساعدة شخص ما وتلك نعمة من الله نحمده ونقدسه عليها فالشكر للاخ الكريم صاحب مدونة طهر فؤادك على دعوته الكريمة لمساعدة شخص مريض يحتاج منا المساعدة والى نص الرسالة

فاكر جمعية الامل (فرع سوهاج ) اللى كانت عاملة معرض ملابس لمساعدة مرضى السرطان يارب تكون افتكرتها... المهم جت ليهم حالة بس صعبة شوية ومحتاجة كلنا نتكاتف مع بعض ونساعدها وهكتبلك تفاصيل الحالة ويارب تنشرها ونحاول نساعدها كلنا باللى نقدر علية ان شاء الله وهى على لسان الحالة طبعا ربنا يشفيها ويعافينا جميعا اللهم امين والمسلمين

بتقول :-
اسمه بخيت محمود أحمد والذى يعمل بالهيئة العامة للتأمينات الاجتماعية بســوهاج
وبيقول :-
حيث انني مريض بمرض ( السرطان فى الكلى ) وتم اجراء عملية لاستئصال الورم على نفقتي الخاصة بتاريخ 26/11/2009 ثم تم دخولى الى معهد اورام اسيوط بتاريخ 5/12/2009 واوصى الطبيب المعالج بضرورة الاستمرار فى العلاج بدواء (sutent) وذلك لمدة 18 شهرا حتى يتم الشفاء وتبلغ قيمة علبة الدواء 23 الف جنيها ونظرا لارتفاع سعر الدواء عن قدرتي المالية فقد وافقت شركة فايزر للادوية على تخفيض 50% من قيمة الدواء وحيث ان الدواء بعد تخفيض 50% تبلغ قيمته 11.500 الف جنيها .ونظرا لظروفى المالية الصعبة حيث انني اعول اسرة فأرجو من سيادتكم التكرم بالموافقة على مساعدتي لشراء هذا الدواء بصفة مستمرة أو مساهمة اهل الخير ويعتبرهذا الدواء الوحيد فى علاجي الذى تحسنت عليه صحتي حيث اننى فى حاجة الى 6 جرعات حتى اتماثل للشفاء .
وجعلكم الله عونا للمحتاجين
ت/0115428158
العنوان/سوهاج- شارع ابو الحسن البصري خلف شارع 15
الى هنا انتهت الرسالة من صاحب الرسالة وبدا دورنا فى مساعدته كل بقدر استطاعته فمن يريد النشر او التنويه عن الحالة فى مدونته او على موقع الفيس بؤك فشكرا له وجزاءكم الله خيرا
ومن يريد التبرع فيمكنه ارسال حوالة بريدية باسم السيدة / ماجدة بخيت محمد ابراهيم وهى زوجة المريض على مكتب بريد سوهاج الفرعى بالحميات ورقم التليفون المذكور بعاليه يخص الحالة ايضا .
او من يرغب بارسال حوالة بنكية اوالتبرع نقدا فانا مستعد لاستقبالها وارسالها الى الحالة باليد ،ولاى استفسار يمكنكم الاتصال برقم المريض بعاليه او الاتصال على رقم أ.خالد 0101345140
نقلا عن:
مدونة واحد شاى
مدونة الحب الجميل