الثلاثاء، نوفمبر 09، 2010

يوم الضمير العالمى


انا اسمى امين بشتغل موظف فى مكان ما
مش مهم تعرفوا هو فين ولا حتى بعمل فيه ايه
المهم ان الشغل ده انا واحد من المسؤولين فيه عن خدمة المواطنين(حبايبى)
انا متزوج وعندى 3 ابناء فى مراحل مختلفة من التعليم
بحاول على قد مااقدر انى اوفرلهم حياة كريمة واخليهم احسن منى
انا بصلى الحمدلله وبصوم وبعمل اللى يقدرنى عليه ربنا من العبادات
وعودت ولادى كمان انهم يصلوا ويصوموا
والحمدلله عايشين
بصحى من بدرى اروح شغلى وارجع اخر النهار ارتاح فى بيتى
وفضلت الحياة ماشية على كده
لغاية مافى يوم من الايام صحيت ومالحقتش افطر فى البيت
لان ام العيال كانت عاوزة المصروف
مديت ايدى فى جيبى واديتها اللى فيه النصيب
الولية اول مامسكت الفلوس فى ايدها راحت مصوتة
-حرام عليك ياراجل هو انت ماعندكش ضمير انت مش عارف كيلو الطماطم بقى بكام والفراخ بكام وال....
-خلاص ياولية انسدى
وطبعا زودتلها الحصيلة
خوفت اتأخر اكتر من كده قمت اشتريت سندويتشات فول واخدتها معايا الشغل
ودخلت قعدت على المكتب ولسة هاخد اول لقمة لقيت واحد داخل عليا من المواطنين (حبايبى)
- لو سمحت عاوز اخلص الورق ده
- طيب ثوانى حضرتك
الراجل راح مكشر مرة واحدة
-ثوانى ايه.........اكيد طبعا عاوزنى استنى سعادتك لما تفطر
هو مفيش ضمير المفروض حضرتك بتيجى هنا تشتغل مش تاكل
انت ماعندكش ضمير؟
انا سمعت الكلمة دى فين قبل كده...
طبعا بعد الكلمتين دول انا نزلت الساندويتش تانى على المكتب
-يافتاح ياعليم يارزاق ياكريم
هات الورق ياأستاذ ...
عملت له اللازم وسيبته يمشى
الراجل الرذل بعد ماخلصتله ورقه وسد نفسى على الصبح
الا ماطلع من جيبه ورقة بخمسة وحطهالى فى الدرج
حسبى الله ونعم الوكيل...قال ويقول ان انا اللى ماعنديش ضمير
طبعا انا دماغى صدعت طلبت شاى من فرغلى فراش المكتب
ماهو يعنى مش هيبقى جوع وقلة مزاج كمان
واول ماحطيت الكوباية على بقى حسيت انى عاوز ارجع
-انت يافرغلى
-ايوة يااستاذ امين
-مش تغسل الكوبايات يافرغلى ايه القرف ده
-جرى ايه يااستاذ امين الكوباية مغسولة وزى الفل والله....هو انا هجيبها مش مغسولة ليه يعنى ...حد كان قالك انى ماعنديش ضمير؟
- تاااااااانى...ضمير تانى...هو فيه ايه؟
وعدى اليوم على اقل من مهله
والمواطنين(حبايبى)عمالين يتوافدوا على مكتبى
و طول ماانا شغال عمال اشوف ايه موضوع الضمير ده اشمعنى انا يعنى اللى عاوزنى يبقى عندى ضمير ماهو كل الناس ماعندهاش ضمير... السواق اللى ركبت معاه الصبح لهف الاجرة ونزلنى قبل مكان شغلى بكيلو..
الجزار اللى جبت منه اللحمة امبارح مقطعلى اللحمة ونصها دهن ....العيش امبارح اشتريته ولقيت فيه مسمار
الفكهانى بيغشنى فى الميزان....وفرغلى مش بيغسل الكوبايات ......حتى حرمنا المصون بتخنسر من مصروف البيت....اشمعنى انا يعنى اللى هيبقى عندى ضمير هو الضمير هيأكلنى عيش...
وقبل ميعاد الانصراف بخمس دقائق
دخلت علينا واحدة ست شيك ورقيقة جدا ومبتسمة عاوزة تخلص كام ورقة كده بس هياخدوا وقت
-معلش يامدام احنا اسفين ميعاد الانصراف والله حضرتك ممكن تيجى بكرة
وكأنى شتمتها وتحولت الابتسامة الى تكشيرة وانعدمت الرقة وبدأت وصلة ردح من النوع الفاخر
-نعععععععععم بكرة ده ايه ياخويا ده انتوا عمالين تلففونى من الصبح على مكاتبكم.... اييييييييييييييييييييه هو خلاص مابقاش فى ضمير
وبعدين يعنى فى كلمة ضمير دى
-ياست حضرتك احنا خلاص دقيقة وهنروح
-ماليش دعوة انتوا لازم تشتغلوا لغاية اخر دقيقة انا مش ماشية غير لما اخلص ورقى.
بصراحة انا بقى طلبت معايا انى مش مخلص لها ورق لولا ان الست دى فى اخر لحظة رجعت لانسانيتها ورقتها تانى واديتنى فى الخباثة كده ورقة بخمسين جنيه ...وانتوا عارفين بقى........ انا راجل عندى ضمير ولازم اعمل شغلى للمواطنين (حبايبى) ما هو انا هنا أساسا علشان اخدمهم ومفيش حاجة لما أخلص للست حاجتها...ولا ايه؟
خلصت شغلى وركبت الاتوبيس وانا معايا حصيلة اليوم.....400 جنيه..........
واول مادخلت البيت لقيت ام العيال بتقولى ان ام سحر عدت علينا وعاوزة الجمعية.
ولسة بدخل ايدى فى جيبى لقيت نفسى بصرخ واقول.......

-يانهااااااااار مش فايت انا اتسرقت ......سرقنى واحد ماعندوش ضمير.



هناك 31 تعليقًا:

  1. ههههههههههههههههههههههههه والله العظيم بجد احلى موضوع قريته للاخر مش مجامله عارفه عامله زى ايه

    جحا كان رايح السوق يشترى حمار فواحد قابله بيقوله رايح فين يا جحا قاله رايح اشترى حمار قاله قول ان شاء الله قالوه ليه ان شاء الله الفلوس فى جيبى والحمار فى السوق
    راح جحا السوق وجه الراجل قابله قاله فين الحمار قاله ان شاء الله الفلوس اترقت

    ردحذف
  2. وصفتى

    الشارع المصرى و الحياة اللى عيشنها

    بكل بساطة للأسف

    (:

    للأسف

    ردحذف
  3. ii=ههههههههههههههههه
    لازم طبعا
    اصل الضمير
    لما ينقح كده
    اللى جه غلط يروح غلط
    هههههههههههه
    ناس معندهاش ضمير
    مبدعه يا نهى

    ردحذف
  4. كتابتك فعلاً ليها مذاق و طعم مختلف
    للأسف الناس كلها بتنادي بالضمير و نسيوا ان فاقد الشئ لا يعطيه
    شكراً على الموضوع الحلو و الأسلوب الأحلى

    ردحذف
  5. السلام عليكم
    بجد موضوع روعة
    هههههههههه
    ضحكتيني
    مسكين الراجل ده
    مكل الناس بلا ضمير
    مين بالدنيا دي معه ضمير
    مرة اديت لوحده بنت شي قلت لها وصليه للجيران الي جمبكم
    قالت لا انا هروح بيه لبتنا
    قلت لها انتي وضميرك
    قالت انا بلا ضمير ليه هو في حد معه ضمير بالحياة هذه
    صدقت كلماتها
    وصدقت قصتك
    تقبلي مروري
    سلامي ليكي ياحلى وارق نهى.

    ردحذف
  6. نهى

    الضمير مالوش يوم محدد
    المفروض كل يوم هو يوم الضمير
    بس فى مجتمعاتنا نتكلم كثيرا ولا نفعل شيئا
    مع اننا مؤمنين بقوله
    كبر مقتا عند الله ان تقولوا ما لا تفعلون

    بوست جميل
    تحياتى

    ردحذف
  7. صورة واقعيه للشارع المصرى نهى

    لديك اسلوب ساخر رائع

    ليت جميع الضمائر تصحوا

    موضوع فى الصميم

    تحياتى

    ردحذف
  8. يوميات مواطن مصري او نقدر نقول يوميات مصر
    هي دي مصر بكل ما فيها من مميزات وعيوب كلنا عندنا نزعة ايمانية ورغبة اننا نبقي كويسين بس للاسف الظروف بتغيرنا وبتخلينا نعمل حاجات مش بتاعتنا الا من رحم ربي
    وهم قليل
    وبغض النظر عن المستقبل المظلم او ولي الامر الظالم او مباحث امن الدولة العتاة جميل جدا اسلوبك ربنا يزيدك ابداع
    تحياتي الخالصة

    ردحذف
  9. ههههههههههههههههه
    عارفه كله كوم
    وياعينى على الفلوس اللى اتسرقت صعب عليا عارفه ليه
    اصل شكله اتروق من مراته
    بحييكى على اسلوبك

    ردحذف
  10. هههههههههههههههه

    ضمير دمه خفيف
    أأأأأأأقصد بوست دمه خفيف
    احييكى على خفه دمك
    بس كله كوم والست الرقيقه المبتسمه اللى اتحولت لقدرت قادر الى انسانه مكشره وغضبانه
    لكن علشان مصلحتها لازم تروق كده وتدفع المعلوم
    هذا هو حال مصر يا عزيزتى وصفتيه بدقه

    ردحذف
  11. هههههههههههه
    اه والله ماعندوش ضمير اصل الفلوس اللى مش عندها ضمير لازم تروح للحرميه اللى معندهاش ضمير

    ردحذف
  12. ابتسم انت في مصر , نو كومنت ^_^
    good post

    ردحذف
  13. السلامو عليكم

    هههههههههههههههههههههههههههههههههه

    ضحكتينى قوووووى يانهى بجد

    يستاهل مش بيعمل كل حاجه بضمير
    طيب زعلان ليه ماهو اللى سرقه فى الاتوبيس سرقه بضمير برضو هههههههه
    امال ايه الشعب المصرى من كبيره لصغيره حراميه اقصد عندهم ضمييييييييير
    هو احنا فى حاجه بتتعبنا غير الضمير
    ياااااااااه على الضمير

    ربنا يعمر بيتك يالى فى بالى
    اصله ممشى البلد بكل ضمير
    ادعوله ادعوله

    يسلم اسلوبك يانهى
    طبعا انا عارف اول ماتقرى التعليق هتقولى الواد ده هيخرب بيتى وهيقفلى المدونه
    هههههههههههههه

    تحياتى لآجمل قلب

    محمـــد التركـــى

    ردحذف
  14. سلام عليكم بسم الله الرحمن الرحيم قال تعالى : " للفقراء الذين أحصروا في سبيل الله لا يستطيعون ضرباً في الأرض يحسبهم الجاهل أغنياء من التعفف صدق الله العظيم تحياتي يانهي

    ردحذف
  15. احسن انه اتسرق بس اكيد هيطلع غلبه في المواطنين حبايبه تاني يوم علشان يعوض اللي اتسرق.
    منه لله هو و ضميره
    فكرة رائعة ممكن تكون سلسلة موظف عنده ضمير
    تقبلي تحياتي

    ردحذف
  16. جميلة يا نهى انك توصلى الفكرة بتاعتك بإسلوب غير مباشر كدة ..

    وهى دى الواقع والحقيقة والله بكل أسف .. حكاية دمها خفيف زيك :)

    تحياتى

    ردحذف
  17. يبدو إنني علقت على هذا الموضوع في موضوع آخر عن غير قصد D:

    ======

    يظل الموظف المصري مغلوبا على أمره وما على شاشات الاعلام الا أن تصفه بأنه ليس لديه ضمير

    =======

    موضوع متميز وطرح رائع لقضية هامة
    بالتوفيق دائما

    تقبلي مروري

    Casper

    ردحذف
  18. رااائعه يا نهى

    ضحكت فى الأخر جدا لكن تعليقى الأوحد هو

    هم يضحك وهم يبكى

    ردحذف
  19. هي ده المشكله الكبيره اللي احنا عايشنها كل اللي بيقدر على التاني مش بيرحمه المدرس ما يصدق يمسك تلميذ والجزار اول ما يشوف زبون لازم ينصب عليه ما هو ابنه التلميذ والزبون المدرس كله بيعض في كله وهكذا زي ما انت حكيتي باسلوبك الجميل والشيق

    ردحذف
  20. هههههههههههه
    انا بقرأ وكل شوية اضحك واختي تقولي في اية يا بنتي وانا اضحك وهي تتنرفز في اية يا بنتي وانا بجد مش عارفة اقولها اية ....
    بجد انت عسولة يا نهي والله بجد بدون مجاملة كتاباتك جميلة اوووووي واسلوبك سهل وجميل وسلس جدا ان اي حد يقراه وميحس بطوله ولا باي حاجة غي انه غارق في الكلمات والمعاني ....تحفة بجد يا نهي ...تحياتي ...ويا ريتني اكون زيييك كدة

    ردحذف
  21. السلام عليكم

    الضمير

    سمعت ان الضمير بقي بيبيعوه ويشتروه
    صحيح الكلام ده ولا ده كلام فاضي

    بس هو الاستاذ امين ماله مكشر ليه كده
    مش لوحده اللى بيحصل له كل ده

    تقبلى مرورى وتحياتى

    ردحذف
  22. السلام عليكم
    كيف حال اجمل واحلى واطيب نهى
    يارب تكون بالف خير
    كل سنه وانتي طيبة وينعاد عليك بالصحة والعافية وتتحقق كل امانيكي.
    سلامي لاجمل وارق بنوتة.

    ردحذف
  23. نص نبيه ، ويشد المتلقي ، وكل عيد وأنت والأسرة الكريمة بصحة وسلامة أعاده الله تعالى عليكم بكل خير .

    ردحذف
  24. هههههههههههههههههههههه
    والله رووووووووووووووعة روعة روعة
    تسلم ايدك بجد اسلوبك رائع

    ردحذف
  25. جميلة جدا .. معبرة جدا.. يعجبني الأسلوب القصصي الذي يوصل الرسالة بدون أسلوب خطابي... والرسالة فعلا وصلت...

    أسجل إعجابي أيضا بأسلوب السرد من وجهة نظر إنسان (ما عندوش ضمير).. كيف يحلل لنفسه ما يفعله!! هذه هي نظرتي فعلا لهذه النوعية التي نقابلها كلنا.. كنت دائما أتساءل: هل ينام وضميره مرتاح وهو يطعم زوجته وأبناءه مال حرام؟!!! لكني أدركت مع الأيام أن كل واحد من هذه النوعية أراح ضميره بمبرر ما.. وبهذا يفعل ما يفعل بدون وازع من ..... ضمير!!!

    شفتي.. إنتي لخصتي كل الرغي بتاعي ده بقصة بسيطة طريفة.. تستحق أن تنشر ورقيا.. صدقيني.

    تحياتي أختي الكريمة.. وكل عام وأنتِ بخير وسعادة.

    ردحذف
  26. كل عام وانت بخير

    كل عام وانت الى الله اقرب وعلى طاعته ادوم

    عيد اضحى مبارك

    اعاده الله عليك بالخير واليمن والبركات

    ويارب العام القادم تكون عند الحبيب المصطفى

    عيد سعيد

    تحياتى

    ردحذف
  27. هههههههههههههههههه
    هم يضحك
    تبقى انت اكيد فى مصر
    تسلم الايادى

    ردحذف
  28. كل عام وانت بخير

    ردحذف
  29. بهديكم بوكيه من الورورد على أنغام أحلى عود ودايما العيد عليكم يعود كل سنة وانتم دايما بخير

    عيد سعيد على كل الناس الطيبين

    ردحذف
  30. بهديكم بوكيه من الورورد على أنغام أحلى عود ودايما العيد عليكم يعود كل سنة وانتم دايما بخير

    عيد سعيد على كل الناس الطيبين

    ردحذف
  31. انا بشكركم كلكم على تعليقاتكم الحلوة
    ومبسوطة جدا انها عجبتكم
    ربنا يكرمكم كلكم
    والف شكر ليكم

    ردحذف

ممكن تكتب رأيك هنا وممكن تناقشني وتنتقدني كمان لكن الغلط ممنوع :)