الاثنين، سبتمبر 06، 2010

أرض النفاق


منذ أيام شاهدت فيلم أرض النفاق وهو عن قصة للكاتب الكبير يوسف السباعى الذى أحب كتاباته جدا وبالرغم من اننى احفظ الفيلم واتذكره جيدا الا اننى من هواة مشاهدته مرارا وتكرارا.......ولكن عندما شاهدته فى تلك المرة اخذتنى افكارى وشردت بعيدا عن الفيلم وفكرت فى الاحداث اليومية التى نتعرض لها وعن بعض الكلمات والجمل التى تخرج من افواهنا بصفة مستمرة وبشكل شبه يومى هل نطلق عليها فى المطلق نفاق ام يحددها الموقف الذى تعرضنا له عندما صرحنا بهذه الكلمات او تلك الجمل.

وزاد شرودى اكثر عندما اتيت بأمثلة لبعض المواقف التى تحدث ويمكن لنا بأن نفسرها كنفاق او مجاملة....

مثلا...عندما يقول الزوج لزوجته بأنها جميلة بل انها أجمل نساء الارض فمن المؤكد أنه يكذب وربما تعلم زوجته ذلك وهذا ليس لان زوجته قبيحة او دميمة لاسمح الله ولكن لانه لم يجول فى الارض من شرقها لغربها حتى يرى جميع نسائها ويحكم بأن زوجته هى أجملهن ومع ذلك تتقبل الزوجة تلك الكلمات بسعادة بالغة.
مثلا آخر وهو علاقة الموظف بمديره فى العمل وخصوصا عندما يكون هذا المدير مستجد فى العمل ستجد لافتات الترحاب فى كل مكان واستقبال رائع وعبارات مدح لاحصر لها بالرغم من ان الموظفين ربما لم يروه فى حياتهم سوى فى أول يوم عمل له فى المكان..وتجدهم يستقبلونه بالزهور...ومعظمهم يقولون له حال العمل لن يغيره للافضل سواك يافندم..ومع ذلك تجد المدير سعيدا ممتنا لهم جميعا.
وهناك علاقة اخرى ربما يكون فى ظاهرها المجاملة والحب وبباطنها الكذب والنفاق فعندما تتزوج فتاة تبادر لاكتساب ود وحب حماتها وتناديها بماما وفى رأيى الشخصى أنه لايصح أن تنادى الزوجة حماتها بماما حيث من الممكن أن تحبها دون أن تجعل احدا يشارك أمها الحقيقية فى لقب تتمناه كل أم من ابناءها.فالفتاة بالطبع لن تحب حماتها مثل أمها وربما تكون تكره حماتها ولا تحبها.

واعتقد انه ليس هناك فتاة تكره أمها...

والحماة أيضا لن تحب زوجة ابنها مثل ابنتها ابدا بالاضافة الى ذلك فإن حماة الزوجة ليست بحاجة لشخص اضافى يناديها بماما لانها بالطبع لديها أبنائها الذين يشبعونها بتلك الكلمة....ولكن لاانكر ان ربما هناك زوجات ينادون حماتهن بلقب ماما حبا فيهن بالفعل ولكنهن قليلات جدا.ولكن دائما تجد أن الحماة لاتكترث لهذا التودد ولا تقتنع به وتعلم جيدا انه مجرد كلمة تقولها زوجة ابنها لارضائها وربما تقتنع من داخلها ان زوجة ابنها لاتحبها (يعنى بالعربى كده ومن الاخر الحموات مش بياكلوا من الكلام ده.... ريحوا نفسكم ياستات).


وهناك الكثير من الامثلة التى تحتاج كتبا لا رسالة كهذه. اعتدنا عليها يوميا ونتعامل بها وببراعة شديدة...ربما لانعلم ان هذا نفاق وربما نقصد به المجاملة بالفعل ...


لمزيد من التفاصيل شاهدوا فيلم أرض النفاق.








هناك 31 تعليقًا:

  1. يوست جميل جدا
    بس انا اكتر حاجه بفتكرها لما بشوف فيلم ارض النفاق حال ناس فى شهر رمضان تلاقيهم فى الجوامع كتير وصلاه الفجر تحسى انها صلاه جمعه وبعد رمضان ترجع فاضيه ولو كانوا بيعملوها باحساس لاستمروا ولكن اصبحت العبادات فى رمضان عادات لكن اللى كان فى الفيلم كان احسن لان فى الفيلم لما شربوا الاخلاق اخلاقهم اتصلحت مش زى مابيعملوا فى رمضان عبادات وليس اخلاق بالرغم ان الاخلاق عباده وهى المطلوبه

    ردحذف
  2. مبسوطه اوى انى اخدت اول تعليق اانا شفت الفيلم اكتر من مرة وهو من الافلام اللى بحبها اوى قصة رائعه ومعانها حلوى اوى وعندك حق كل المجاملات اللى بتحصل في حياتنا بنفكر انها مجاملات مع انها ممكن تكون نفاق بس صدقينى ناس كتير اوى متعرفش تعيش من غير ماتسمع كلام حلو حتى لو هى عارفه انو نفاق تقبلى مرورى وبالتوفيق ديما.منه

    ردحذف
  3. النفاق

    كما قلتى له من الأشكال الكثير

    و لكن لى تعليق على ما يقال بين الزوجين

    لو أنهما يحبان بعضهما سيكون هذا الكلام منطقى جدا

    أن كل من يحب بصدق لن يرى أحدا سواه

    أما بالنسبة للباقى انا متفق معك فيه تماما

    و كنت من فترة هنزل بوست

    عبارة عن اغنية تحمل هذا المعنى

    جميل البوست جدا

    شكرا (:

    تحياتى

    ردحذف
  4. من رأيى المجامله والنفاق وجهين لعمله واحده
    لكن هناك مجامله تعتبر فى حد ذاتها علامه تشجيع لصغار النفوس ليس اكثر
    فعندما نصفق لطفل عمل عمل بسيط جدا نصفق له باعتبار ان هذا العمل رائع وما فيش بعد كده
    فهذه اليست تعتبر مجامله وليس نفاق

    ردحذف
  5. انظرى الى حال المصريين فى كل انحاء حياتهم ، ستعلمى ان ارض النفاق مازالت موجوده.

    ولن تنتهى

    ردحذف
  6. السلام عليكم ورحمة الله وبركااته

    اتفق معك واختلف ف نفس الوقت

    اتفق ان النفاق له أرضا واسعه تجوب مجتمعنا

    ولكن احيانا ما يظهر للاخرين نفاق لا يكون نفاق ولا مجامله عابره ولكن يكون تعبير صادق عن ما يكنه الانسان ف تلك اللحظه

    يعنى زى ما ذكرتي ..

    مثلا بين الازواااج
    ان الزوج يقول لزوجته انها اجمل واحده ف العالم
    اكيد زى ما ذكرتي .. انه مشفش كل نساء العالم عشان يحكم حكم زى ده
    لكن لحظتها .. ولان ف حاجات كتتيير بتتعلق بالمعنى زى العشره .. الطيبه .. جدعنة الزوجه ف احيان كتير .. الحنيه .. الحب .. الخ .. كل ده بيخليه يشوفها احسن واحده ف العالم حتى لو كانت قاعده جنب ملكة جمال
    المعنى هنا بيكون معنوي اكتر منه مجامله او نفاق ظاهري

    وطبعا .. لكل قاعده ششواااذ .. واكيد ف رجالة بينافقووا بالمعنى اللى ذكرتيه .. وفي زوجات كمان عشان الرجاله ميزعلوش

    بس المعنى اللى اقصده
    بالرغم ان النفاق قد يكون سائد ف مجتمعنا
    لكن هنعتبر ان المشاعر الحقيقيه صفه متنحيه لكنها موجوده

    ليس كل كلام جميل نفاق ..او مجامله
    قد يكون فعلا قلب ينبض بتلك المشاعر .. تختلف حسب الانسان


    لكيييييييييييت كتير قوي .. معلش بقي
    بس يارب المعنى يكون وصل

    اشكرك انك خبتيني افتح ع الرابع كده من اول رد واول زيارة

    استعيني بالله بقي شكلى مطوله عندكم

    بوست جميل

    كل سنه وانتى طيبة وعيد فطر مبارك عليكم جميعا

    ردحذف
  7. انا مش فاكرة الفيلم دة خالص يا نهى
    و تقريبا ماشوفتهوش خالص ..
    فعشان كدة للأسف الصورة اللي بتتكلمي عنها مش واصلة لي اوي بالشكل اللي انتي متخيلاه :)
    بس النفاق بقى ضرورة اجتماعية .. و أصلاً على فكرة اللي بيتنافق بيكون مدرك ان الشخص اللي بينافقه كذاب ..
    لأن الدنيا اتغيرت !

    ردحذف
  8. الفيلم ده من أكتر الأفلام اللي كنت بحب أشوفها ف صغري ، لإني عموما كنت بحب أي عمل لفؤاد المهندس و مكنتش اعرف ان الفيلم ف اصله رواية ، بس قصته نفسها كنت بحب أشوفها و لحد دلوقتي لو شفته مش هازهق منه...

    ردحذف
  9. بوست جميل

    بس عندى تعليق هو كل اللى انت قولتيه دا مش نفاق

    اولا الزوج لما يكذب على زوجته مش نفاق
    وهو اصلا مبيكنش بيكذب لانه فعلا الحبيب مبيشوفش فى الدنيا احلى من حبيبه

    البنت لما تقول لحماتها ياماما دا من باب الود وكتير من الحموات بيحبوا كدا

    ولما تقولها بحب وتكلمها بكلام حلو دا ذكاء اجتماعى عشان متخربش على بيتها

    علاقه الموظف بالمدير بتكون من باب المجامله
    عشان انه جديد ولازم نرحب بيه

    بس كل دا يندرج تحت اسم الذكاء الاجتماعى

    ردحذف
  10. كل سنة وانتي طيبة عيد فطر سعيد
    تحياتي الخالصة

    ردحذف
  11. السلام عليكم
    كل عام انتىة بخير
    انا لا اكذب ولكنى اتجمل
    الكذب مباح والنفاق فى الزوجه
    علشان العشره تدوم
    بس وللمصالحه وكده
    فى غير ما يغضب الله
    اى حاجه تانيه لازم
    الواحد يعيش من غير نفاق بس يحاول

    احنا بشر مش
    ملائكه
    يا نهى
    لازم امراض القلب تكون موجوده
    من حقد وحسد ونفاق
    عافانا الله اواياكى
    الفليم رائعه من الروائع التى لا تعوض
    فى زمننا

    ردحذف
  12. جيت بس علشان اقولك كل سنة وانت طيبه.منه

    ردحذف
  13. كل سنة وكللللللللللللكم طيبين وبخير
    عيد سعيد ويارب دابما تكونوا بخير وصحة ومبسوطين
    اتأخرت فى الرد شوية سامحونى
    شكرا لكل الناس اللى كتبت تعليق وشكرا لكل الناس اللى قرأت البوست
    ان شاء الله أرد على التعليقات النهاردة
    كل سنة وانتم طيبين

    ردحذف
  14. عمرو يسرى
    مش بس كده كمان ممكن تلاقى بنات بتلبس الحجاب فى رمضان وبعد رمضان تخلعه
    كمان الناس تبطل الكذب والنميمة والغيبة فى شهر رمضان ولما يخلص ترجع ريما لعادتها القديمة
    وكأن ربنا فرض علينا العبادة وامرنا نبعد عن المعاصى فى شهر رمضان وباقى السنة براحتنا
    نورت المدونة

    ردحذف
  15. عاشقة وبدوب فى حبيبى
    انا مش ضد المجاملات نهائى
    انا كمان احيانا بحب اسمع الناس بتجاملنى وانا كمان بجاملهم
    لكن انا ضدها عمال على بطال ومن غير سبب
    نورتينى يامنة بزيارتك

    ردحذف
  16. ٌRamy
    عموما اى زوجين لازم يقولوا لبعض كلام حلو انا متفقة معاك طبعا
    لان ده بيكون حب مش نفاق لكن احيانا بتزيد عن حدها شوية وبتكون غير منطقية
    وده مش مع الازواج بس
    ده مع كل الناس
    المجاملة مطلوبة طبعا وضرورية احيانا بس بشوية منطق
    نورت المدونة بالزيارة

    ردحذف
  17. mrmr
    هو النفاق والمجاملة شبه بعض
    بس ممكن المجاملة تكون علشان تعبرى بيها عن حبك وبتكون فيها نسبة كبيرة من الحقيقة
    انما النفاق بيكون لارضاء شخص ما علشان مصلحة شخصية
    بتنورينى يامراميرو

    ردحذف
  18. ويكا
    ده الطبيعى فى الوقت ده
    انظر حولك هتلاقى ان اغلب الناس لو سمعت رأيك فيها بصراحة ممكن تاخد منك موقف
    رغم انك بتقول رأيك بمنتهى الادب وحاطط عليه كلمتين مجاملة كمان
    الناس عاوزة تسمع على طول انها كويسة
    وده ماينفعش لان بالشكل ده هيكون نفاق للابد مش مجرد مجاملة

    ردحذف
  19. do3aa elshoprawy
    كل سنة وانتى طيبة ومفيش تطويل ولا حاجة
    بصى الفقرة اللى انا ذكرت فيها الزوج والزوجة دى
    انا متفقة معاكى ومع كل الناس انها ضرورة
    لكن هو انا كنت اقصد بيها معنى تانى اللى انا اقصده مش ان الزوج منافق ولا حاجة لكن اقصد ان الزوجة كمان محتاجة تسمع منه الكلام ده ونقيس على كده اى حد بيحتاج انه يسمع كلمة حلوة حتى لو بشكل غير منطقى
    نورتى المدونة
    عيد سعيد

    ردحذف
  20. شيماء على
    كل سنة وانتى طيبة
    قصة الفيلم بتحكى عن شخص بسيط عايش مع زوجته وبيشتغل فى مكان ما
    زوجته نكدية ومديره مطلع عنيه

    فى يوم عدى على تاجر اخلاق عنده حبوب لكل الاخلاق اللى على الارض
    اخد من عنده حبوب النفاق وحياته ارتاحت جدا مع الناس كلها وشغل اعلى المناصب
    وفى مرة بالغلط اخد حبوب الصراحة والدنيا اتلخبطت تانى
    دى قصة الفيلم بإختصار وكان بطولة فؤاد المهندس وشويكار

    انا معاكى ان النفاق منتشر للاسف ورغم ان المنافقين اصبحوا معروفين الا انهم لسة موجودين وبيلاقوا اللى بيسمعهم

    ردحذف
  21. ELMOSTAFZ
    هى الرواية حلوة والفيلم هايل
    خصوصا لما رمى حبوب الصراحة فى المية وكل واحد خرج اللى جواه
    متهيألى انه من الافلام اللى مش ممكن نزهق منها ابدا
    عيد سعيد..نورت

    ردحذف
  22. همسات وبحر الحياة
    نورتى المدونة بزيارتك وكل سنة وانتى طيبة
    متفقة معاكى بأن الذكاء الاجتماعى مهم
    بس احيانا فى حاجات بتحصل وبتتعمل بتعدى خطوط الذكاء
    الاجتماعى وبتتحول لنفاق تام وده اللى انا اقصده
    نورتى المدونة وعيد سعيد

    ردحذف
  23. sendbad
    كل سنة وانت طيب وعيد سعيد
    وربنا يعيد عليك الايام بكل خير

    ردحذف
  24. محمود(باحث عن حب)
    عارفة طبعا اننا بشر مش ملائكة وكلنا فينا امراض القلب اللى بتتكلم عنها
    بس يمكن تكون محاولة اننا ناخد بالنا ان فى فرق بين النفاق والكلمة الطيبة علشان الحياة تمشى
    متفقة معاك فى رأيك
    وكل سنة وانت طيب وعيد سعيد

    ردحذف
  25. محمود(باحث عن حب)
    عارفة طبعا اننا بشر مش ملائكة وكلنا فينا امراض القلب اللى بتتكلم عنها
    بس يمكن تكون محاولة اننا ناخد بالنا ان فى فرق بين النفاق والكلمة الطيبة علشان الحياة تمشى
    متفقة معاك فى رأيك
    وكل سنة وانت طيب وعيد سعيد

    ردحذف
  26. عاشقة وبدوب فى حبيبى
    كل سنة وانت طيبة
    عيد سعيد عليكى
    وربنا يخليكى ياقمر

    ردحذف
  27. عندك حق ياقلبى

    ومعاك فى كل كلمه كتبتيه

    موضوع رائع

    تسلم ايديك


    عيد سعيد


    تحياتى

    ردحذف
  28. واجب اختياري لو مكنتوش حلتوه وأنا غيرت فيه سؤال
    لمعرفة إطلاعتكم فلو عايزين تحلو خير وبركه ، ولو مش عايزين متقلقوش الواجب مش هيتحط في أعمال السنة .
    ما هي كتب الطفولة التي بقيت عالقة في ذاكرتك؟
    مَنْ أهم الكتاب الذين قرأتَ لهم ؟
    من هم الكتاب الذين قررت ألا تقرأ لهم مجددا؟
    في صحراء قاحلة ، أي الكتب تحمل معك؟
    ما هو الكاتب الذي لم تقرأ له أبدا ، وتتمنى قراءة كتبه ؟
    ما هي قائمة كتبك المفضلة ؟
    ما هي الكتب التي تقرؤها الآن ؟
    اللي بعت الدعوه ؟
    أرسل الدعوة لمدون واحد علي الأقل من أجل مشاركتنا باطلاعهم في القراءة ؟

    ردحذف
  29. جايدا العزيزى
    كل سنة وانتى طيبة
    شكرا ليكى على رأيك ونورتى المدونة

    ردحذف
  30. MR.PRESIDENT
    شكرا على الواجب وانا ان شاء الله هحل الاسئلة قريب
    عيد سعيد وكل سنة وانت طيب

    ردحذف
  31. زيزى موديرن26 سبتمبر، 2010 11:42 ص

    كلامك حلو اوى يا مدام نهى بس ليا عتاب عليكى انك ما قبلتيش طلب الصداقة ياريت تقبليه

    ردحذف

ممكن تكتب رأيك هنا وممكن تناقشني وتنتقدني كمان لكن الغلط ممنوع :)