الخميس، يونيو 24، 2010

عيد زواج تامر


كنت أتابع برنامج مصر النهاردة(البيت بيتك)سابقا
وكان يتحدث المذيع تامر أمين ويقول انه تذكر أن اليوم هو الموافق لعيد زواجه وكيف اجتهد فى تقديم هدية لزوجته فى يوم عيد زواجهم السعيد وأنه اخذ يهنئها بتلك المناسبة.
حتى فوجىء بزوجته تخبره بأن هذا اليوم ليس بيوم زواجهم وان زواجهم لم يكن فى هذا اليوم من العام.وبالطبع فقد شعر بالاحراج من زوجته...وله كل الحق.

ولكن بغض النظر عن خطأه فى تذكر يوم زواجه الصحيح وعن نوع الهدية المقدمة.
وبغض النظر أيضا عن تحدثه فى أمور شخصية ببرنامج يتحدث عن احوال مصر الا اننى اعتقد ان 95% من زوجات المصريين قمن بمصمصة شفاههن ونطقن فى نفس واحد لأزواجهن (شايف ياخويا الرجالة بتفتكر عيد جوازها ازاى؟)
ولن يشفع للازواج المساكين ان تامر أخطأ فى حساب التاريخ لان سيكون رد الزوجات وفى نفس واحد أيضا أن المهم انه تذكر المناسبة وإشترى لزوجته هدية.

وبالرغم من ان الحديث فى أمر كهذا سيجعل أى زوجة تتابع البرنامج تتحول للشجار مع زوجها او فى اقل تقدير تلفت نظره بدهاء لهذا الامر, إلا اننى فكرت..لماذا لا يحتفل الازواج المصريون بعيد زواجهم وينسونه.... بل يتناسونه.
وحتى ان تذكر أحدهم تلك المناسبة فإنه لايتفوه بكلمة واحدة. ربما هربا من ان تطلب الزوجة هدية ولكننى أعتقد انها ستكتفى بالتهنئة فنادرا مايتذكر الزوج تلك المناسبة وخصوصا بعد مرور سنوات على هذا الزواج ربما لمشاغل الحياة ووجود الاهم من ذلك من وجهة نظره وبالتبعية تنتقل عدوى النسيان الى الزوجة.
ولكن عندما يتذكر الزوج تلك المناسبة فإن زوجته ستعتبر من المحظوظات فى هذه الدنيا وبالتالى فلن تطمع فى هدية ... وحتى ان طلبت الهدية فربما لأنها تعلم جيدا انها فى العام القادم لن تحصل حتى على التهنئة لأن زوجها لن يتذكر .. فنحن لسنا فى زمن المعجزات.
أعتقدأن الزوجة المصرية تحديدا تستحق كل تقدير لكل ماتقوم به من اجل أسرتها فإنها تهتم بالزوج والابناء والمنزل حقا انه مجهود خرافى لايستطيع أى رجل تحمله فما بالك بكلمة تقدير تتمناها ولا تسمعها.

هناك 18 تعليقًا:

  1. هو ان افتكرها كفاية عليها وقع المفاجأة بانه فاكر ...وساعتها مش هتطلب منه هدية كفاية عليها انها لسة في باله منسهاش في زحمة الحياة...فكرتيني باغنية انغام اللي كلماتها معناها ان فيه حاجات بسيطة ممكن متكنش واخد باللك منها لكن بتزعل

    لولا

    ردحذف
  2. و الله يا نهى معاكي حق ..
    اصلا اسلوب تامر في الحديث عن اموره الشخصية يا نهى اسلوب مش بروفيشنال ( يعني اسلوب مش احترافي )
    محاولاتنا لنسخ ثقافة الامريكيين اللي بيتكلموا عن حياتهم الخاصة في التوك شو محاولات فاشلة ..!!
    المراة بشكل عام مخلوق رقيق جداً يا نهى ..
    و لما تكون ام و زوجة بتكون مثال حقيقي للتضحية و الحب و الاهتمام .
    من حقها كلمة حلوة .. من حقها كلمة شكراً .. من حقها ابتسامة تقدير :)
    بغض النظر عن وجود مناسبة او لأ ..
    التقدير مهم جداً .

    ردحذف
  3. مش عارفه بجد بيحصل ليه بس اهو بيحصل و خلاص
    جايز عشان احنا متعودناش اننا نحتفل بأى حاجه حلوه تحصلنا
    الله اعلم
    جايز الدنيا واخدانا و مخليانا مش واخدين بالنا من احى حاجه
    ممكن برضه

    ردحذف
  4. لولا
    اولا اغنية انغام دى اسمها ايه؟

    ثانيا هى عمرها ماهتفكر تطلب هدية املا فى انه يهنيها بالمناسبة تانى السنة اللى بعدها وهى وحظها يفتكر او مايفتكرش

    ردحذف
  5. شيماء على
    انتى عارفة لما بتعدى سنين والزوج بينسى الزوجة هى كمان بتنسى وحتى لو افتكرت بتعمل نفسها ناسية علشان حاجات كتير منها علشان تتجنب الصدمة لما تلاقيه ناسى كل سنة وحفظا لماء وجهها وحاجات تانية كتير
    لكن مفيش شك ان المرأة كائن رغم رقته الا انه صعب جدا على معظم الرجال انهم يفهموها

    ردحذف
  6. بنت وولد

    لا والله اكيد ساعات بناخد بالنا بس مابنحبش نفتكر
    ناس كتير بتفتكر ان المشاعر الجميلة بتنتهى مع تقادم الزمن رغم ان المفروض ان العكس هو اللى يحصل

    ردحذف
  7. اي ست في الدنيا مش بس المصرية تستحق التقدير والاحترام بس فيه نقطة احب اوضحها بما ان الست (المفروض) انها الحاجة الحلوة في حياة الراجل..
    لو كانت بتخلي حياتة (افضل) بعد زواجة منها فا ده ديما ها يدفعة انه يتشوق على اي مناسبة حلوة عشان (يرد) لها اي حاجة حلوة..
    ولو العكس..فا ممكن قوي يتجاهل ده..
    ومش معنى كده انه دفاعا عن الراجل او انه مظلوم..
    بس بجد..تصرفات صغيرة حلوة..ممكن تغير حاجات كبييييرة في حياتنا..(لو) بس كل حد دور واهتم يعرف ازاي يعملها للطرف الاخر. :)

    ردحذف
  8. آآآ..على فكرة..
    نسيت اقولك تلغي حروف التاكيد اللي بتظهر عند التعليق..
    موافقة...صح..؟؟
    انا كنت متاكد انك ها توافقي (';')

    ردحذف
  9. سلام عليكم

    أنا موافقه إن أغلب الأزواج مش بيقدروا يفهموا زوجاتهم
    لكن كمان فيه زوجات بتستسلم لطناش الزوج

    يعنى لو مشكلة الزوج انه مش رومانسى وبينسى يوم زواجهم .. لكنه فى نفس الوقت محتوى لزوجته

    أرحم بكتير من زوج مش بينسى أى تاريخ رومانسى وبيحتفل بيه لكنه غير قادر على تحمل المسئوليه فى أوقات الجد ويحلها بعنف او يهرب منها

    الكمال لله وحده

    على فكره انا كمان عارفه اغنية انغام .. بس ناسيه إسمها

    ردحذف
  10. Timo
    معاك حق فعلا كل الزوجات فى الدنيا تستحق التقدير لكن اكتر واحدة فيهم هى الزوجة المصرية لانها بتعمل حاجات كتير اوى علشان البيت والزوج والاولاد وبتنسى نفسها نهائى
    ومعاك حق كمان لما قلت ان الزوج لما يكون سعيد مع زوجته بيحاول انه يسعدها بس المشكلة ان اغلب الرجال فى مصر مش بيهتموا بالمناسبات وخصوصا عيد زواجهم لان نصهم بيكون مش فاضى والنص التانى شايف انه عامل اللى عليه وزيادة ومش محتاج كمان انه يحتفل بمناسبة زى دى ولما بيكون فى قلة من الرجال بيحتفلوا بالمناسبة دى بيلاقوا سخرية من الناس بلا حدود للاسف

    ردحذف
  11. timo
    خلاص انا لغيت حروف التأكيد

    ردحذف
  12. مها البنا
    اكيد يامها زوج عاقل ومتفهم افضل من زوج غير مسؤول
    هى المشكلة مش فى المناسبة نفسها انما المشكلة فى التقدير نفسه
    يعنى لو هو زى ماانتى بتقولى كده محتويها يبقى رومانسى وبكده هى مش هتكون منتظرة يوم عيد جوازها لان كل يوم بالنسبة لها هيكون عيد لانها هتكون سعيدة معاه

    ردحذف
  13. انت فين بقى كلللل ده مختفية..؟؟
    انا ها اسمي الاعراض الاختفائية باسمي..
    اوع تكوني اتعديت مني :) :)

    ردحذف
  14. timo
    مفيش اختفاء ولا حاجة ان شاء الله فى بوست نازل قريب جدا
    وشكرا لاهتمامك

    ردحذف
  15. والله انا من رايى ان الزوج او الزوجه اللى بيتناسوا مناسبه مهمه زى دى لازم ينتبهوا ان فى حاجه كبيره فى حياتهم اتغيرت لان ده مش يوم عادى ده يوم جوازهم اللى المفروض ان ده احسن حاجه حصلتلهم هما الاتنين ولما يتناسوا يوم زى ده يبقى اكيد ان الحب بدا يقل تريجيا ويحل محله شىء اسمه الاعتياد

    ردحذف
  16. غير معروف
    طبعا المفروض لازم يفتكروا اليوم ده
    بس لازم كمان فى كل ايام السنة الزوجة تاخد حقها فى التقدير وطبعا تقدر زوجها
    لان اكيد هما الاتنين بيعملوا اللى يقدروا عليه علشان يسعدوا بعض

    ردحذف
  17. لما يبقى يخلص فلوس دروس العيال والمدرارس وفلوس البس وفلوس الاكل وفلوس مصروف البيت ومصاريف الكاترة وقسط التلاجه والجمعية اللى عاملها مع عثمان البواب ده لو مكنش هو شخصا عثمان البواب هيبقى سعتها يفتكر يجبلها هدية ده لو فضل معاه فلوس ههههههههه.كتاباتك حلوة اوى يا نهى اتمنى تزورى مدونتى وكل سنه وانتى طيبه .انا منه

    ردحذف
  18. عاشقة وبدوب فى حبيبى
    والله معاكى حق يامنه بس يعنى مش لازم هدية كفاية الكلمة
    على فكرة احيانا الكلمة بتكون اجمل هدية وكمان ببلاش ومن غير تكاليف
    شكرا على رأيك
    واكيد ان شاء الله هزور مدونتك اللى باين عليها انها حلوة من اسمها

    ردحذف

ممكن تكتب رأيك هنا وممكن تناقشني وتنتقدني كمان لكن الغلط ممنوع :)