الجمعة، مايو 21، 2010

اعرف اتيكيت الكلام فى التليفون(شوفتوا الخيبة اللى احنا فيها)


مين فينا مابيتكلمش فى التليفون كل يوم. سواء موبايل
او تليفون ارضى.
طبعا كلنا بس اللى انا عرفته
ان التليفون ليه حاجة اسمها اتيكيت..
اه والله زى الاتيكيت بتاع الاكل كده.
أنا بقى نويت اكسب فيكم ثواب كبييير
واقولهولكم وانتوا قولولى رأيكم.....
اتفقنا؟
خبراء الاتيكيت بيقولوا ان اى حد
بيتكلم فى التليفون
بيرسم فى خياله صورة للى بيكلمه علشان كده
وانت بتتكلم لازم تحط ده فى دماغك
خصوصا لو بتكلمه لاول مرة.
ولو كنت انت اللى طالب لازم الاول
تتأكد من الرقم اللى انت طلبته
وبعدين تقول اسمك وبعدين
تطلب الشخص اللى انت هتكلمه
(كلنا بنعمل كده تقريبا)
بيقولوا كمان انك ماتردش على
الطرف التانى فى المكالمة باستهانة واستهزاء
لازم يكون الرد واضح ومهذب
(وبرده كلنا بنعمل كده)
بيقولوا كمان بلاش تبدأ الحوار
بكلمة نعم او ايوة.
لازم تنسى الكلمتين دول
من القاموس بتاعك.
ولازم يكون صوتك
وانت بتتكلم مليان حيوية
حتى لو انت مكتئب وحالتك
حالة لازم تكون مرح
(أمال يعنى متصل بالناس تجبلهم اكتئاب).
ولو فى حد طلبك فى التليفون
رد على التليفون بسرعة
وتسيب اللى فى ايدك وتهتم بيه
حتى لو كان معاك ناس
او عازم حد فى بيتك
(مش كفاية انه عبرك واتصل بيك)
وطبعا لازم تاخد بالك من الناس
القاعدين جنبك
علشان ممكن صوتهم يكون عالى
فيزعجوا اللى اتصل بيك
يعنى ممكن تقوم من جنبهم (أو تطردهم)
ولازم صوتك يكون
مسموع عند اللى انت بتكلمه.
بس ماتعليش صوتك
قوى علشان طبلة ودانه...
ولو الخط قطع اتصل بيه تانى .
ايوة لازم تتصل تانى
ماهو اكيد انت اللى قفلت السكة فى وشه...
واخر ملاحظة وانت بتتكلم
ماتتحركش كتير
علشان ده بيأثر على نبرة صوتك.
ده بالنسبة للتيفون العادى
اما الموبايل ده ليه اتيكيت تانى خالص...
بيقولوا بلاش تستخدم تليفونك
المحمول قدام الناس
ولو كنت فى محطة الاتوبيس او المطار
ابعد عن الزحمة قدر الامكان
حتى لو الاتوبيس هيفوتك
او الطيارة هتطلع مش مهم.
المهم ماتزعجش الناس اللى واقفة
كفاية انهم منتظرين فى الزحمة كده.
وياريت لما تكون
راكب ميكروباص ماتفضلش
تشغل النغمات وتفضل تسمع فيها.
انت مش اول واحد يشترى
موبايل بلاش صداع.
انا علشان اريح نفسى من الكلام ده
بطلت ارد على التليفون
أو اتصل بأى حد وعلشان ارتاح اكتر
قررت أبيع الموبايل
لو حد عايز يشتريه يعنى.


* تم نشر هذا الموضوع للمرة الاولى بمنتدى جمعية رسالة الخيرية بتاريخ 1 فبراير2007 وحقوق النشر محفوظة
.


لمشاهدة
اللينك الاصلى للموضوع.............إضغط هنا

هناك 27 تعليقًا:

  1. ههههههههههههههههههههه

    طيب هتبيعيه بكام :D

    ونوعه ايه اصلا <_<

    ردحذف
  2. يااااه ده كان من زمان الموضوع ده
    ايامها كان من التليفونات القديمة
    لو عاوزة الجديد بقى خوديه ومايغلاش عليكى
    هدية يعنى

    ردحذف
  3. (:

    طيب حاضر

    بس صحيح حكاية النغمات دى هى اللى تنرفز صراحة

    مقال جميل و ممتاز (:

    ردحذف
  4. هههههههههههه
    والله العظيم يا بنتى انا كنت عايز اقولك حاجه شبه نهاية كلامك ده.

    انتوا هتخنقونا ليه بلا خنقه

    ردحذف
  5. والله حلو الموضوع يا نهي اوووي
    بس علي فكرة مش خقولك انه مستحيل جدا اننا نعمله لاننا كلنا تقريبا بنعمل عكسه تماما
    انا بتحرك كتير وانا بتكلم سواء ف تليفون البيت او الموبايل واحيانا صوتي بيعلي عشان بتنرفز من اللي بيكلمني واحيانا بفضل ارسم خطوط
    متقاعة او دواير او حاجات كدة بتدل علي حالتي ساعتها ...بالنسبة للكلام ف الشارع او محطة قطر او اتوبيس او مترو فده بحدووود جدا يعني لو محتاجة ضروري اعمل مكالمة زي مثلا اني مكنتش اعرف احنا هناخد المحاضرة في مدرج كام واتصلت بصاحبتي وانا في المترو عشان اعرف برغم ان اللي جنبي كانوا مشغالين الام بي ثري الله ينور ...حلو اووي البوست ومعلش عشان اتسرق ....هي دي مشكلة النت

    ردحذف
  6. كل يوم بكتشف اننا مش عارفين حاجة خالص فيكي الخير والله جزاكي الله خيرا
    تحياتي

    ردحذف
  7. فعلا يوجد للموبايل طقوس خاصة لا أعلم من قام بعرضها على الشعب المصري لكنها أصبحت واقعا ملموس

    ======

    موضوع مهم جدا
    وكلمات لها هدف ومغزى

    تقبلي مروري
    Casper

    ردحذف
  8. تصدقى
    ح تصدقى ان شاء الله
    انا كنت ح اقترح عليكى تبيعى الموبايل بلا دوشه دماغ
    انا ذهقت من التليفونات الارضيه والموبيلات ويسلام كمان لو تليفون الشغل ابوظه علشان محدش يطلبنى ويطلب منى شغل هههههههههه
    وجارى تنفيذ الخطه ويارب ما يكتشفوها ويصلحوه
    تسلمى يا قمر
    وتصبحى على خير

    ردحذف
  9. حلو الموضوع ده وتعليقاتك جمييييييييييييييلة ....متغيبوش كتير
    لولا

    ردحذف
  10. ههههههههههههه
    اتكيت مين يعرف الاتكيت الايام هذه في الموبايل كل واحد يمشي او يجلس جمبك في اي مكان يتكلم بصوت عالي عشان يعرف الناس انه اجاله اتصال كله وجع دماغ
    انا اخر سنه بدراستي ومفيش معي موبايل خالص والحمدلله مفيش ازعاج غير ازعاج تلفون البيت
    ههههههههههه
    تقبلي مروري
    سلامي لاجمل وارق بنوتة واجمل افكار وعقلك الي يفكر.

    ردحذف
  11. Ramy
    هى النغمات تنرفز بعقل
    ده بقت منظرة وحاجة مملة
    خصوصا النغمات الشعبية
    بس الموبايلات دلوقتى ارحم من نغمات 3310 زمان
    انا كان عندى واحد بس كان ازعاج:)

    ردحذف
  12. ويكا
    هههههههه
    معلش بقى
    ادينى قولت لكم الحل فى الاخر اهه:))

    ردحذف
  13. re7ab.sale7
    احنا اصلا لو التزمنا بالتعليمات دى
    مش هنفكر نشيل موبايلات تانى
    هى بس الحاجات اللى مفروض الناس تعملها انها لما تحب تشغل اغانى تركب الهاند فرى مش لازم تسمع الناس معاها
    اما بقى ان الموضوع اتسرق فربنا يسامح اللى عمل كده
    ناس كتير قالولى طالما اتسرق يبقى حلو
    بس انا مش مقتنعة بالفكرة دى
    دايما منورانى

    ردحذف
  14. سندباد
    اى خدمة
    انا اهه بقولكم اللى انتوا مش عارفينه
    اسمعوا الكلام بقى:)

    ردحذف
  15. casper
    معاك حق فعلا بقت واقع ملموس
    المشكلة ان الموبايل اصلا بعد ماكان مجرد كماليات
    اصبح دلوقتى من الاساسيات
    نورت

    ردحذف
  16. mrmr
    ههههههههه
    لالالا كده ماحدش هيكتش الخطة
    ده سر خلاص
    التليفونات ساعات بتكون رخمة
    بس ارجع واقول برضه تانى
    هى نعمة وربنا يديمها
    رغم ان الفواتير بتتعب جيوب الناس:)

    ردحذف
  17. لولا
    ربنا يخليكى ياقمراية
    مش هغيب كتير ان شاء الله

    ردحذف
  18. هلا نهى ...
    ^^

    أنا الحمدلله مافي عندي تليفون أرضي
    لعدم الإستقرار في مكان حدد
    :))))
    أما الموبايل أحيانا فعلا بتمنى إني أحذفه من حياتي
    بسبب ناس معينه .. بس مقدرش أعمل كده عشان ناس معينه برضه ^^

    بوستك كتير خفيف ويحمل فكره كتير رائعه ...

    أنا مبسوطه إني دخلت مدونتك بالصدفه

    أما عن سرقة البوست فده أكيد عشان فعلا الموضوع حلو
    بس ده مايمنعش إنها مازالت إسمها سرقه
    أنا وزمايلي غنانينا من ده وراح نعمل حمله ضدهم
    راح أقولك عشان تدخلي معانا لعلى وعسى نصدهم شويه ...

    تحياتي الملونه لروحك المرحه
    ^_^

    ردحذف
  19. ghada mohsen
    اولا نورتى المدونة بتعليقك
    ثانيا انا مبسوطة ان البوست عجبك
    ثالثا لازم تقوليلى فعلا على الحملة بتاعتكم علشان انضم ليكم
    نورتى بجد

    ردحذف
  20. ههههههههههههههههههه
    قصدك بقى مين هايبيع جهازة معايا
    هههههههههههههههههه
    موضوع جميل بجد أحييكي عليه
    :)

    ردحذف
  21. علاء سالم
    ههههههه
    صحيح فعلا لو القوانين دى احنا ملزمين بيها فعلا كلنا هنرمى موبايلاتنا مش هنبيعها بس
    شكرا لذوقك وسعيدة ان الموضوع عجبك

    ردحذف
  22. وما ننساش لو بنتكلم على الموبايل نبطل السؤال الرخم (انت فين) عشان بيحسس اللي نكلمه اننا ها نطلب منه حاجة بعده على طول او مجرد الفضول السخيف.

    اصل الموضوع ده عامل لي عقدة نفساوية :)

    ردحذف
  23. السلامو عليكم

    تصدقى يانهى جالى صداع
    ههههههههههههههههههه
    مش منك لا من تليفونى
    وعلى راى نجم الجيل المنيل
    تليفونى رن اه اه واللى ردت اه ياعينى صوته نيله
    ههههههههههههه
    انا معاكى هبيعه
    اه والله ارتاح شويتين من الدوشه
    تسلمى يانانا

    تحياتى
    محمد التركى

    ردحذف
  24. نهى ..

    متفكرنيش بالموبايل.. أنا موبايلى عايز موبايل جنبه أصله كحكح وصحتة بقت على قدة ..

    بيفصل 200000 مرة فى الدقيقة ..

    وأول سؤال بسمعة من أى حد برد عليه فى التليفون ..

    إنتى شايلة موبايل ليه ؟؟؟

    وبيكون الرد .. علشان نفسى يجيلى الضغط ^_*

    تسلم أفكارك :)

    ردحذف
  25. timo
    نسيت اكتب موضوع سؤال انت فين ده
    لانه غالبا اللى بيسأل بعد مابيسأل وياخد اجابة
    يااما بيطلب حاجة فعلا
    او بيتكلم فى حاجة تانية مالهاش علاقة بالسؤال
    يعنى بيكون فضول فعلا

    ردحذف
  26. محمد التركى
    هو الحل اننا بدل مانبيعهم نقفلهم شوية وخلاص
    بدل مانخسر فيهم
    شكرا على راأيك

    ردحذف
  27. زهرة
    هههههههه
    غيرى البطارية يازهرة
    ممكن تكون هى السبب
    ربنا يكرمك يازهرة ونورتينى

    ردحذف

ممكن تكتب رأيك هنا وممكن تناقشني وتنتقدني كمان لكن الغلط ممنوع :)