الثلاثاء، يونيو 07، 2011

حاجة لازم أعتذر عنها قبل ما أرجع أكتب تانى

طبعا كلكم متفقين معايا ان مش عيب اننا نعتذر على حاجة غلط عملناها
خصوصا لو كانت الحاجة دى ناس كتير بتشوفها وممكن تقتنع بيها
انا قبل ما أرجع أكتب تانى كان لازم اعتذر عن تدوينة كنت كتبتها أيام الثورة
التدوينة كانت عن وائل غنيم لو تفتكروها
كتبتها بعد ما ظهر مع منى الشاذلى فى الحلقة الشهيرة
اللى بكى فيها وكل الناس تقريبا تعاطفت معاه
انا كنت واحدة من اللى تعاطفه معاه
وبسرعة كتبت تدوينه للاسف وصفته فيها بأنه بطل
طبعا مع احترامى لكل الناس اللى شايفاه بطل انا خلاص مابقتش شايفاه بطل لان فى حاجات كتير سمعتها وعرفتها شككتنى فى حكاية البطولة دى
والاختلاف فى الرأى لا يفسد للود قضية
انا بعتذر عن التدوينة دى وحذفتها كمان
انا شايفة انه كان عيب اوى انى افضل محتفظة بالتدوينة على صفحات المدونة
أشوفكم على خير

هناك 43 تعليقًا:

  1. انا بصراحة معرفش كتير عن وائل غنيم

    بس اعرف كتير عن شباب مصر الابطال

    اللي استشهدوا واللي اتصابوا

    واللي بدمهم كان تمنها رجوع بلدنا لينا


    فهناك ملايين من شعب مصر نزلوا الشارع

    فالثورة تنسب لشعب باكمله وقادتها شهدائنا

    ردحذف
  2. اولا تحية طيبة لشجاعتك واعتذارك عن شيء ما احسستي انه خطأ
    ممكن نتفق معاكي وممكن نختلف معاكي انه بطل او مش بطل ممكن نصدق اللي بنسمعه وممكن منصدقهوش
    هو فعلا لقاؤه مع منى الشاذلي اثر في ناس كتير وخلى ناس كتير تغير رايها وتتعاطف مع الثوار محدش ينكر فضله في ده
    بس هل هو بطل او مش بطل هل هو ممثل بارع امدعي بطولة او هو فعلا بطل
    دي حاجة منقدرش نحكم عليها وعلمها عند الله
    هو بالنسبالي مواطن مصري عادي قام بعمل ممؤثر في الثورة يستحق عليها الشكر
    تحياتي

    ردحذف
  3. لو كان تغيير رايك ده بسبب توفيق عكاشة فهو مريض نفسى و عضو لجنه سياسات و بيخرف كتير

    انا لم ارى اى شىء غلط من وائل غنيم و هو واضح جدا من البداية و مش عايز كراسى

    Tears

    tears-demo3.blogspot.com

    ردحذف
  4. أنا مش شايف إنه بطل وفي نفس الوقت مش شايف إن عشان أنا وغيري مش شايفين إنه بطل يبقي نقول عليه كلام وحش
    لأني برضو شايف إنه معملش حاجة , حلوة أو وحشة . . عادي يعني
    بس فيه ناس بتحب تهاجم لمجرد الهجوم
    وناس بتحب تصنع الرموز حبا في العبودية
    وأنا الحمدلله ولا من دول ولا من دول

    تحياتي . .

    ردحذف
  5. انا ايضا لا اعترف به بطلا كما يراه البعض
    وسواء اتفق الجميع او اختلف على كونه بطلا
    فالتاريخ سيعطي كل واحد حقه بكل انصاف وبكل امانة

    خالص تقديري

    Casper

    ردحذف
  6. تغبطين على الشجاعة

    بالطبع رأيي في الأمر لا يحتاج لإفصاح :)

    ردحذف
  7. السلام عليكم
    دكتورتنا الفاضلة
    الاعتذار من صفات الكتاب المتميزين ومن سيم الشجاعة واحترام القارئ
    حمدالله ع سلامتك مرة تانية

    ردحذف
  8. انا لسة مش شايفاها ثورة ولسة مش شايفاها خير اللهم الا فى حبس سفلة النظام السابق الوزراء الحرامية الزبالة ومن اول يوم بقول يا جماعه بلاش تصقفوا للاحداث فى ذروتها لازم نستنى و نتروى و نحكم على الامور بخواتيمها ولازم يكون فى محك عام للعدل مقياس و فكر و وعى جمعى عشان متقلبش ثورة فرنسية دموية اكتر من الدماء المصرية - مصرية اللى اريقت دلوقتى بدات ملامح الدموية فى طلب احكام الاعدام وللعلم مفيش قاضى حيحكم بالاعدام الا اذا كان واثق الف فى المية من عدالة الحكم حتى خالد سعيد اصبح مشكوك فى امرة بعد ما بدات بعض الحقائق تظهر احنا مجتمعنا اتبهدل اتهد فية معنى الامن ومعنى احترام منفذ القانون فى فوضى فى سلبيات بشعه يا عالم حنقدر نتخطاها ولا خلاص
    عموما بجد برافو على الشجاعه فى التراجع
    ومبروك مقدما بعد اتضاح حقائق اكتر حيكون لصاحبة المدونة لقب فلول زييى كدة وربنا يستر على البلد و الحكم على احداث يناي حيكون بعد خمس سنين من دولقت كدة يمكن اللى مجدوه و فرحوا بيه و غنولة و مشوا فى المظاهرات وعملولة افلام يندموا اشد الندم .

    ردحذف
  9. هو نفسه قال انه مش بطل...لكن الناس تحب تطلع اي حد فوق او تنزله وتمسحه من البلوج...يا اختي مش مهم الحياة الشخصية للفرد المهم ما عمله...سعد زغلول كان قمرتجي وقاد ثورة...مصطفى كامل كان بيسنكح على محمد فريد وياخد فلوسه وبرضه قاد امه....السادات كان سوابق وحاول يقتل النحاس باشا وبرضه قام بواجبه....حتى لو هو فيه كل العبر برضه حرك الناس بعياطه...

    ردحذف
  10. طيب مش كنتى توضحى إيه اللى حصل وغير نظرتك ليه؟

    ردحذف
  11. احيكى على انك عندك القدره للاعتذار على حاجه شايفاها غلط
    وائل غنيم ده من كتر الكلام اللى اتقال ضده او معاه
    خلى الواحد مش عارف يحدد موقفه بالظبط
    انا من الناس اللى مش شايفاه بطل وكمان مش شايفاه وحش
    بس يمكن كان هو بدايه الشعله للثوره من بعد خالد سعيد

    ردحذف
  12. حمدالله ع سلامتك حبيبتي واكيد كل واحد حر في رأيه نورتينا تاني

    ردحذف
  13. طيب انتي شايفاه انه مش بطل!!! وميستحقش وصف بطل !!!,البديهي والمنطقي انك تقولينا ايه هو اللي سمعتيه عن هذا الشاب العظيم وجعلكي تغيري وجهة نظرك عنه؟!وخصوصا انك بتقولي عن حضرتك انك رئيس تحيرير مجلة" كلام فاضي"

    الحقيقه انا مش عارف اقول لحضرتك ايه ,هذا الشاب يا سيدتي هو من خيرة شباب مصر ومن احرار هذا العالم ويحزنني ويؤلمني ان اقرأ ما كتبتيه عنه

    ردحذف
  14. شئ طبيعي اننا منتفقش علي شخصية اي حد قدامنا ولازم يكون في اختلاف المهم اننا نقول راينا بصراحة من غير ما نجرح حد
    تحياتي لشجاعتك وعودة محمودة ان شاء الله

    ردحذف
  15. السلام عليكم

    حمد الله على السلامة أختي نهى...

    بما إنك بتسأليني: "رأيك ايه فى اللى مكتوب هنا"؟
    أجاوبك:

    صراحة أنا لا أعلم الكثير عن وائل غنيم.. لكن نصيحتي لك (دون أن أعرف وجهة نظرك ولا سبب تغيرها) أن تنتبهي لعدة أمور عن تقييم شخص:

    1- الأصل في التعامل مع المسلم إحسان الظن به.
    2- التثبت من المعلومات إذا جاءني ما يسيء إليه.
    3- الإعراض عن أي معلومة غير موثقة بدليل (قاااااطع).
    4- إذا كان الإنسان شخصية عامة فالتقييم يجب أن يكون في المجال المحدد فقط دون ظلم، يعني لا يصح مثلا أن أقول الطبيب الفلاني فاشل في الطب لأنه لا يصلي.
    5- فقط المصلحين والداعين إلى الأخلاق الحميدة علينا أن نقيمهم من واقع أخلاقهم (بشرط) عدم تتبع عوراتهم.. فلم نؤمر بتتبع عورات الناس.. فلا نلتفت للمواقع التي نذرت نفسها لفضائح المشاهير مثلا. ما نحاسب الشخص المصلح عليه هو ما جهر به من معصية فقط.

    تحياتي أختي الكريمة.. وفي انتظار التدوينة القادمة.

    ردحذف
  16. سواح فى ملك الله
    معاك حق والله يرحم كل شهدائنا
    والثورة للشعب كله مش لشخص واحد بس

    ردحذف
  17. المهم ان حياتنا اصبحت بها حريه وان كل انسان ظلمنا وظلم مصر فى 30 سنه اخد جزاؤه وان شاء الله كل انسان ياخذ على قدر ميزانه
    المهم انك رجعتى تكتبى من جديد ونتمتع بكلماتك الرائعه دائما تقبلى تحياتى الاحـــــــــــــــلام

    ردحذف
  18. و الله أنا احترمت وائل غنيم في حاجة مهمة أوي ..
    هو إنه بعد عن الأضواء .. و مانجذبش للنجومية زي أسماء محفوظ و شادي الغزالي اللي عمالين يعكوا في كل حتة جوة مصر و براها ..
    أسماء محفوظ اتحولت لبطلة متحدثة بإسم مصر .. و دي مصيبة .. أسماء محفوظ على قدر من الجهل المخجل ..!!

    ردحذف
  19. ازيك نهى عاملة اية

    مش عيب ان الانسان يعتذر

    ومش عيب ان الانسان يكتب عن ما هو مقتنع بة بكل صراحة

    تحياتى

    ردحذف
  20. عزيزتي أنت تعلمين أن مجتمعنا مجتمع شائعات
    لست مع وائل غنيم ولا ضد وائل غنيم
    ولكنني ضد ثقافة أن نبني حكما لمجرد (السمع)
    فأراؤنا ليست ثابتة دائما بسبب هذه الثقافة
    جميعنا يعلم أن ثورتنا لم يقدها شخص أو حزب ،كانت ثورة شعبية بحتة..
    (السمع) وحده لا يكفي لتكوين رأي جديد وحذف تدوينه

    لكِ أطيب التحية والتقدير..

    ردحذف
  21. الاستاذة العزيز نهى

    اولا حمد لله على سلامتك و دايما منورة بكتاباتك

    انا من الاول مش مقتنع بوائل غنيم و بما انك غيرت رأيك عن اقتناع فهذا شئ جميل ان نحاول البحث عن الحقيقة

    و الاعتذار الذى اقدمتى عليه يدل على قدر ثقافتك و الاعتراف اذا ضللت الطريق

    وفقك الله يا نهى و دايما منتظرين كتابتك

    ردحذف
  22. مصطفى سيف
    طبعا معاك حق انا مش بحكم عليه لحاجة سمعتها
    بس عقلى اللى صدقه من غير مايسمع عنه حاجة رجع تانى ومابقاش مقتنع به وكان لازم اوضح ده
    شكرا لك يامصطفى

    ردحذف
  23. tears
    آخر واحد ممكن يعمل تأثير على أفكارى هو توفيق عكاشة

    ردحذف
  24. انا اسفة انى برد بالتنقيط بس انا برد على قد مابقدر علشان عندى ظروف
    هكمل رد بكرة ان شاء الله
    اشوفكم على خير

    ردحذف
  25. faw
    متفقة معاك فى رأيك
    والحمد لله انا ماغلطش فيه او فى اى حد لان ده مش من طبعى

    ردحذف
  26. كاسبر
    معاك حق الكلمة الاخيرة للتاريخ

    ردحذف
  27. أحمد شريف
    شكرا لك ياأحمد:))

    ردحذف
  28. مدونة رحلة حياة
    ربنا يكرمك وشكرا على ذوقك

    ردحذف
  29. kontiki
    مش لدرجة فلول
    الثورة ماكنتش وحشة بس الفكرة اننا مجدنا ناس ماتستحقش
    الثورة كده او كده كانت هتحصل بس للاسف مش بنتقبل الاراء
    يعنى لو قلت رأيك بصراحة يقولوا خاينة وتبع الحزب الوطنى
    ربنا يعديها على خير

    ردحذف
  30. tarkieb
    على فكرة انا مش ضده بس كان عيب انى اغير رأيى واقول انى منافقة
    متهيألى ده اللى كانوا تزعلوا منه
    شكرا ليك

    ردحذف
  31. موناليزا
    كان ممكن اكتب كل حاجة دلوقتى خلتنى رأيى
    بس للاسف مش هينفع علشان كم الهجوم اللى تعرضت له
    يكفى انكم تعرفوا انى غيرت رأيى هو ده المهم
    وانا مش فى مجال انى اجرح فى اى شخص علشان اقنع الناس تغير رأيها فيه

    ردحذف
  32. بنت من الزمن ده
    هو ده بالظبط اللى انا عاوزة اقوله
    شكرا ليكى واهلا بيكى فى المدونة

    ردحذف
  33. كارمن
    شكرا ليكى والبلوج منور بيكم انتم

    ردحذف
  34. rack-your minds
    ياأخى انت خلينى أدور مليون مرة فى البوست علشان كلمة مايستحقش يكون بطل دى مالقتهاش
    انا قلت انى مابقتش بشوفه بطل وده رأيى انت شايفه بطل وعظيم كمان يبقى ده رأيك وانا احترمه
    انا ماغلطش فى خالص لان مش لازم الانسان يكون بطل علشان نحكم عليه انه كويس او وحش
    وبالمناسبة احب اقولك انى مش كاتبة انى رئيسة تحرير مجلة كلام فاضى انا كاتبة انى رئيسة تحرير مدونة كلام فاضى ومتهيألى كل واحد فينا رئيس تحرير لمدونته
    اما بخصوص بقى انى جعلتك تحزن لكلامى عن وائل غنيم فطبعا انا ماكنتش اقصد كده مش عن قصد منى نهائى
    ونورت المدونة

    ردحذف
  35. سندباد
    شكرا ليك ياسندباد
    الطبيعى ان مفيش اتفاق على شخص واحد فى كل حاجة
    شكرا لذوقك

    ردحذف
  36. ماجد القاضى
    ردود حضرتك دايما بتسعدنى
    انا ماوضحتش اسباب تغيير وجهة نظرى
    وطبعا لم اتطرق لاعلاقة وائل غنيم بربنا نهائى
    الحكاية كلها انى اتلخبطت فترة وبعد كده اكتشفت انه ماينفعش البوست يفضل وانا مشوشة يمكن فى يوم من الايام ارجع تانى واقول انه بطل لو اقتنعت بده بجد
    لانى مش هكتب حاجة بعد كده غير وانا مقتنعة بها تمااااما
    شكرا لحضرتك جدا ونورت المدونة بجد:)

    ردحذف
  37. الاحلام
    شكرا بجد على ذوقك
    وفعلا المهم اننا اتحررنا بعد 30 سنة

    ردحذف
  38. شيماء على
    يعنى هو مش مبتعد عن الاضواء اوى
    بس عموما الناس اللى زى أسماء محفوظ وغيرها بينكشفوا بسهولة دلوقتى

    ردحذف
  39. تيمور
    اهلا بيك ياتيمور
    ونورت المدونة
    شكرا لذوقك

    ردحذف
  40. ندى نصر
    اهلا بيكى فى المدونة
    اكيد ماينفعش نبنى حاجة على السمع بس وائل غنيم او اى شخصية مشهورة احنا عموما بنبنى رأينا عنها بالسمع وقناعاتنا الشخصية واحساسنا
    زى ماكلنا شوفناه فى البداية وسمعنا عنه كان برضه عن طريق السمع
    نورتينى

    ردحذف
  41. محمد السيد
    الله يكرمك يامحمد
    وشكرا ليك

    ردحذف
  42. اولا عودة حميدة للمدونة يا نهى ..

    بالنسبة لوائل غنيم فأنا بصراحة معجبة في مواقفه الشجاعة وما فعله لانه هو من حرك كل الشباب وبث في قلوبهم الامل والحماسة .. صحيح انا اعتبر خالد سعيد هو مفجر الثورة مثله مثل البوعزيزي ولكن المحرك كان وائل .. سمعنا كلام كثير عنه وضده ولكن يشفع له عندي انه احد الاسباب في قيام الثورة ضد الظلم والفساد ، كمان انا مع رأيي اخي ماجد القاضي في النقاط التي ذكرها ..

    طبعا كل شخص حر برأيه ، انت حرة برأيك والاختلاف في الرأي لا يفسد للود قضية ، ربما اكون مخطئة وربما انت تكونين مخطئة ولكن تبقى قلوبنا على بعض ولا يدخل الحقد والبغضاء فيما بيننا ، نحن أخوة عرب ومسلمين وربنا يوحد صفنا يارب وكلمتنا كمان ..

    ربنا يحفظ مصر وشعب مصر بكل فئاتها وطوائفها .

    دمت بخير اختي العزيزة ، في انتظار القادم .

    ردحذف
  43. وجع البنفسج
    طبعا الاختلاف فى الرأى لايفسد للود قضية ابدا
    وسواء اتفقنا او اختلفنا على شىء دى حاجة جيدة ان يبقى عندنا مساحة نقول رأينا وماينفعش ابدا الحكر على الاراء اللى بقى منتشر دلوقتى جدا
    ربنا يكرمك ياقمر

    ردحذف

ممكن تكتب رأيك هنا وممكن تناقشني وتنتقدني كمان لكن الغلط ممنوع :)