الأحد، ديسمبر 12، 2010

نظرتى للحياة بعد عامين من الزواج




قبل مااكتب البوست ده فكرت كتير اوى اكتبه بالعامية او باللغة العربية

وقررت اكتبه بالعامية علشان مش عاوزة حد يعتبره تدوينة

ممكن تسموها فضفضة او اعترافات أو رغى

او ممكن نسميها كلام فاضى:)

بعد كام يوم من النهاردة انا هحتفل بعيد زواجى الثانى

اه والله سنتين بحالهم

السنتين دول لما فكرت فى احداثهم شوية كده لقيت ان فى تغيرات كتير جدا حصلت لى فيهم

سواء فى نمط حياتى او فى افكارى

انا حبيت انى اكتب التطورات دى على شكل عناوين وكل عنوان يبقى معاه موجز بسيط كده


البداية


عادى يعنى زى أى اتنين بيتعرفوا ويتخطبوا

طبعا انا ككل البنات كنت فاهمة الحياة انها رومانسية طول الوقت

وافلام عربى وافلام هندى وان الحياة هتفضل بمبى والسما هتمطر قلوب على طول

طبعا اكتشفت ان الكلام ده غلط فى غلط

يعنى مش هنبقى على طول شادية وعبد الحليم حافظ

لا طبعا

الحياة الحقيقية مختلفة يعنى مش دايما بيبقى فيه رومانسية

وبصراحة لو الدنيا رومانسية على طول هتقلب بمسلسلات تركى من اللى انا مش بحبها

الموضوع ده كان صدمة فى الاول

تليفونى


من فترة وانا بقلب فى تليفونى اكتشفت ان تليفونى مليان

بأسماء ناس عمرى ماكنت اتخيل انى ممكن اسجلهم عندى
لقيت نمرة السوبر ماركت وبتاع الخضار وبتاع الفراخ ودكتور الاطفال

زمان تليفونى كان عليه ارقام صاحباتى والناس القريبين منى وبس

دلوقتى تليفونى مليان ارقام ناس ماعرفهاش بس مهمة جدا بالنسبة لى




صديقاتى


لما كانت واحدة من صاحباتنا بتتجوز وبعدين تختفى مرة واحدة

كان بيكون فى صدمة كبيرة بسبب بعدها عننا

وكان الشيطان يوسوس لنا انها يعنى مش عاوزة تعرف صحابها تانى

او مثلا غيرانة على جوزها او يعنى ممكن تكون خايفة تتحسد ولا حاجة

لما اتجوزت اكتشفت انى ببعد عن صحابى غصب عنى وهما كمان لما اتجوزوا بعدوا

كلنا بعدنا عن بعض مابقيناش قريبين زى الاول بس ده مش

علشان اى سبب من الاسباب الهايفة اللى قولتها دى

انما بالعكس بيبقى نفسى امسك التليفون وافضل اكلم حد من صحباتى

زى زمان بس للاسف اللى بياخدنا من بعض هو الوقت

يعنى انا ماعنديش وقت اتكلم ولا صاحباتى اكيد هيبقى عندهم وقت


ازمات


فى كل جوازة فى البداية كده بيبقى فى ازمة ...

دايما بيقولوا ان السنة الاولى بتبقى صعبة

وهى فعلا بتبقى صعبة علشان الطباع المختلفة

والعادات المختلفة وحاجات كتير بين الطرفين

بالنسبة لى الازمة كان لها جانب ايجابى وجانب سلبى

هبدأ بالجانب السلبى

طبعا غير توتر الجو والحاجات دى

اكتشفت ان فى ناس بتشمت

اه والله ناس بتشمت وتتمنى الشر

اما الجانب الايجابى هو انى عرفت ناس كتير على حقيقتها

وعرفت اميز بين السىء والجيد

يعنى حصل عندى حاجة كده ممكن نسميها نضج فجائى

والاهم من ده كله ان الازمة عدت الحمدلله

الامومة


حاجة كده ماينفعش تتوصف بوصف

نعمة من ربنا لما يكون عندك حاجة صغنتوتة ماتعرفش تعمل حاجة من غيرك

معتمدة عليك اعتماد كلى

ورغم الزن والسهر وقلة النوم والراحة

الا انها حاجة من اجمل الحاجات اللى فى الدنيا

زمان كنت بستغرب ان ماما وبابا بيقولوا انهم بيفرحوا لما يشوفونا فرحانين

كنت بستغربهم اوى

بس لما كبرت عرفت ان كلامهم صح

ربنا يكرم كل الناس بالذرية الصالحة

ويبارك فى كل الاطفال


الاهل


دايما شايلين الهم

محدش يفتكر انه لما بيكبر ويتجوز اهله بينسوه

لااااااااااااا ابدا ده كل مدى بيزيد الهم

اكتشفت ده لما كنت كل مرة بستنى بنتى تكبر شوية علشان ارتاح

وكل مابتكبر كل مابفرح بيها وكمان كل ماتعبى وقلقى بيزيدوا


زوجى


حبيت اتكلم عنه اخر حاجة علشان اتكلم براحتى

رغم انى كنت محضرة كلام كتير اوى الا انه كله راح منى لما جيت اكتب

مش عارفة ليه

بس انا عاوزة اقول انه
احنا زى اى اتنين بيتخانقوا ويتصالحوا
والحاجات دى كل الناس عندها مشاكل
لكن احقاقا للحق طبعا هو
بيشجعنى دايما انى اكون احسن
ودايما بيساعدنى احقق طموحى
على فكرة هو اللى عامل تصميم المدونة
وهو اللى عامل تصميم الصورة الجديدة
وكمان مفيش بوست بينزل غير لما باخد رأيه فيه
ربنا يهدينا ويبعد عننا كل حاجة وحشة


اشوفكم على خير ان شاء الله

هناك 32 تعليقًا:

  1. ملك النجوم
    هى دى سنه الحياة
    لكن بالتفاهم كل شئ بيعدى
    و طالما وجدت معاهدة حب من الطرفين
    يتغلب كل حبيب على مشاكل او معوقات حبيبه
    وهذه هى معاهدة الحب الى كل حبيبين
    انه فى يوم / /
    بيب كل من /
    الاعتراف المتبادل بشعور كل منا للاخر بعدم الفراق و العهد بالحب و الوفاء
    و هذا توقيع منا بذلك
    الحبيب/.....
    الحبيبة/.........
    مدة صلاحية المعاهدة
    الى الابد

    ردحذف
  2. ملك النجوم
    فعلا لما بيكون فى حب بجد
    كل المشاكل بتعدى
    نورت المدونة:)

    ردحذف
  3. تحياتي لك ... جميل جداً أن تنظري للحياة الزوجية بهذه الصورة الإيجابية بحكم النتيجة الطيبة بعد التحول من حياة العزوبية إلى تكوين أسرة قررت المضي في الحياة المشتركة بين اثنين مهما كانت العاطفة بينهما تظل الممارسة الفعلية للحياة الزوجية هي المحك ، وماقرأته أساس متين لقادم الأيام التي أرجوها لكما سعيدة مباركة بإذن الله تعالى .
    ولعلي أتشرف بمطالعتك لما كتبته عن الحياة الزوجية بين زوجين أحدهما الزوج (المتشائل) وإن كانت لاتعني بالضرورة أنها تشير لحياة مستقرة ، وإليك الرابط (مدونتي الثانية : بنت النبي ) وهي يوميات كتبتها على أجزاء آمل أن أتمكن من إكمالها في أقرب وقت بإذن الله تعالى :

    http://turki-alghamdi1966.blogspot.com/

    ردحذف
  4. نهى

    انا مرتاح اوى بعد ما قريت التدوينه دى.

    عارفه يا نهى ، انا بقيت حاسس دلوقتى ان القاعده الاساسيه فى الناس هى حياه غريبه وشاذه والمآسى.

    اه انا عارف ان كل بيت وكل بنى ادم فى حياته صولات وجولات مع الدنيا واقدرا الله ، الا انها عتمت شويه فى وش ناااس كتير اوى الفتره اللى فاتت دى ومازالت .

    بس عارفه ليه

    علشان النفوس اتغيرت وعلاقتنا بربنا برده اتغيرت
    اتغيرت كتير

    مش عايز اطول ، لانى لو سيبت نفسى هكتبلك بوست هنا :)
    لكن بكل صدق احنا محتاجين وقفات مع النفس.

    عموماً انا عارف ان البوست ده نظره سريعه على حياتك ، وفيه احوال كتيره عندك ما تطرقتيش لها سواء حلوه او لا قدر الله مش حلوه ، الا ان هنا مش مكانها ، علشان كده عجبنى هدوء معالجتك لوصف الاشياء وتوسطنك بدون اى غلو

    دومتى بخير

    وبقلك من كل قلبى وبصدق شديد
    ربنا يباركلك فى حياتك وزواجك وابناءك ، وان لا يجعل للجفوه فى بيتك منفذ ولا مُقام .
    وان يجعل الله امام عينك دوماً ويكون زوجك على هذا لكى دائماً عوناً.
    تحياتى

    ردحذف
  5. ربنا يسعدك يا نهي ان شاء الله
    فعلا حياتنا بتتغير تماما بعد الجواز و لسه كمان انتي في الاول كل ما الفترة تطول المسؤليات تزيد و تنشغلي اكتر عن اصحابك بس لما الولاد بيكبروا بيكون سهل انك تتقابلي مع اصحابك كل فترة و الاولاد يتعرفوا بيكون شئ لطيف .
    اما عن نمر التليفونات فلسه برضه نمرة المدرسه ان شاء الله و الميس و المشرفة بتاعت الباص و خلااااااافه

    اما عن الازمات عادي طالما في تفاهم و حب بين الطرفين كله بيعدي
    ايه رايك فيه بقدملك خبراتي المكتسبة
    10 سنين جواز :)

    ردحذف
  6. السلام عليكم
    سنة الحياة يوم مشاكل ويوم فرح وسعاده
    الحب هو الي يصمد الحياة الزوجيه لو كان في حب هيتفاهموا
    كله موده ورحمة
    ربنا يخليهم لك ويارب تتوفقي بحياتك والدينا والدنيوية
    تقبلي مروري
    سلامي لاجمل وارق نهى.

    ردحذف
  7. بوست يجنن لخصتى فيه كل اللى بيحصل فى اوى سنتين او تلاته جواز
    انا بقى بعد اتناشر سنه جواز اقدر اقولك ان لسه التغييرات و النضوج جاى جاى
    و مشاكل الاطفال اما يكبروا و المذاكره
    و ووووو
    مش عايزه اشيلك الهم حبيبتى
    بس الحياه كده كل ما نمشى و نعيش فيها بنتعلم اكتر واكتر

    ردحذف
  8. اولا اهنيكي على السنه الثانيه وعقبال مليون سنه وانت في حب وسعاده مع زوجك واولادك ان شاء الله
    طول ما انت مستعده تتغيري عشان تلائمي ظروف حياتك سواء الزوج او الاولاد او كل الظروف في البيت صدقيني هتعرفي تعيشي في سعاده ودايما الزوج بيحب الافضل لبيته وزوجته في ستات بتفهم وستات بتفتكر انه عايز يتحكم وخلاص مع ان المساله سهله جدا لكل اللي عايزه تعيش هو وهي الهدف الاساسي الوصول لبر الامان ولو وقفوا في وش بعض اكيد المركب هتغرق
    وعقبال ما نيجي السنه اللي جايه نبارك

    ردحذف
  9. فكرة جميلة فكرة الفضفضة دي
    ربنا سبحانه وتعالي يديم عليكي السعادة والهدوء ويطرح فيها الخير باذن الله
    دعواتنا كلنا ليكي بالخير انشالله
    تقديري واحترامي

    ردحذف
  10. اختي الفاضلة
    لاتحكمي علي رحلتك في السنوات الاولي
    فلازال هناك عطاء قادم

    ادعوا الله لكي ولزوجك ووليدك
    بالصحة والستر
    تحيتسي لكي

    ردحذف
  11. نصيحة صغيرة
    بعد انجاب الطفل الأول الأهتمام بالزوج بيقل , مما يشعر الزوج ببعض الغيرة
    لو الأهتمام بالزوج يظل كما هو يبقى شيء كويس و لو قل يكون بقدر بسيط

    ردحذف
  12. أولاً كل سنه و انتم طيبين و سعداء ان شاء الله
    ثانياً بقى أنا سعيده بكلامك جداً تقريباً كل المتزوجين بيمروا بنفس المراحل و التغيرات
    يعني كلنا اتصدمنا من تدهور الرومانسيه و الناس اللي بتبان على حقيقتها و الغريبه ان النظره للأمور و حاجات كتير بتتغير تقريباً هو ده النضوج اللي بيقولوا عليه
    لكن للأسف اكتشفت من الزواج ان البنت بتتظلم جداً لأن مسؤلياتها كتيره و غالباً الرجل بيستهين بيها ده غير انها بتكون لسه متدلعه و محتاجه حنان و هو بيكون عايزها زي الست الوالده يعني أنثى جميله بتهتم بنفسها و في نفس الوقت ست بيت شاطره و أم ليه قبل ابنه و بعد كل ده هتبقى مقصره بردو
    أنا لو فتحت في الموضوع ده مش هخلص هههه لكن الحق يقال ان وجود زوج محب معطاء أكبر نعمه من ربنا و الأطفال هما جزء منا و سر سعادتنا و أماننا رغم صغرهم ربنا يديمها نعمه و يسعدنا جميعاً
    شكراً على الموضوع الجميل و تحياتي الشديده

    ردحذف
  13. كل سنة وانتي طيبة


    مدونتك جميلة اول مرور ومش الاخير ان شاء الله


    خالص تقديري وتحياتي

    ردحذف
  14. اكيد كل فترة في حياتنا لها قواعدها والحاجات اللي بنتعلمها
    جميل اننا نراجع حياتنا زي ماعملت كده ونشوف ازاي نظبط نفسنا علي كل مرحلة ونكون مبسوطين فيها

    ردحذف
  15. ربنا يبارك لك ويسعدك
    ويديم عليك الصحة والسعادة
    اللهم امين
    بوست فضفضة بس عاقل وهادىء

    تحياتى

    ردحذف
  16. السلام عليكم أختي نهى

    1- لاحظت التغيير في تصميم المدونة وعجبني.

    2- بتقولي إن دي مش تدوينة؛ لأ تدوينة ونص.. والله الموضوع مهم جدا.. ليه؟ لأن مش أي حد عنده القدرة على التأمل.. القدرة إنه يقف في كل معمعة الحياة وينظر إلى الخلف ويراجع حساباته.. ده في حد ذاته من أهم ما يساعد على التطوير بالتنبه إلى السلبيات لتخطيها والاهتمام بالإيجابيات في المستقبل.

    3- البداية: جميل توضيحك الناشئ عن تجربة لعل غيرك ممن لم يتزوجن لا تصيبهن نفس الصدمة.

    4- تليفوني: واقعية جدا هذه الجزئية بقدر ما هي مضحكة.. كلنا هذا الرجل (إن جاز التعبير).

    5- صديقاتي: زوجتي تشكو مما تشكين منه، وللحق فأنتن مظلومات أكثر منا -نحن الرجال- في هذا الأمر، فبينما يملك الرجل غالبا التواصل بأصدقائه بالخروج معهم كل فترة(وإن قل ذلك) فإن الزوجة بارتباطها الطبيعي بالطفل (بحكم رعاية الأمومة) تعجز تماما عن التواصل مع صديقاتها القدامى...!

    6- أزمات: وصفك ناضج جدا لهذه المرحلة.. وأجمل تعبير قرأته عن المرحلة أنها (مرحلة فك الشفرة) التي كما يقول خبراء العلاقات الزوجية قد تستمر من 3-5 سنوات! طبعا هذه ليست قاعدة، لكن العلم بها يخفف الكثير من التوتر والتسرع أحيانا لدى البعض في إنهاء الحياة الزوجية.. ربنا يبعد عنكم كل سوء.. أعتقد مما قرأت لك أنها في سبيلها للانتهاء إن شاء الله.. مرة أخرى ربنا يسعدكم دائما.

    7- زوجي: جميل جدا إحقاقك للحق واعترافك بافضال زوجك، فهذا بالتأكيد يثقل ميزانك لديه..
    مرة ثالثة ربنا يسعدكم دائما.

    تحياتي على هذه التدوينة العميقة البعيدة كل البعد عن تكون .... كلام فاضي!

    ردحذف
  17. حبيبتي نهى
    كل سنة وانت في تفاهم وسعادة ويارب يتمم عليكم بخير وتربو عيالكم في أحسن جو من التفاهم والانسجام
    الحياة الزوجية تحتاج منا لاشياء كثيرة أولها الصبر ثم الصبر ثم الصبر
    انا بقول لك الكلام دا عن تجربة خمسة عشر سنة زواج
    ربنا يعينك ويبعد عليك كل شر
    تحياتي

    ردحذف
  18. السلامو عليكم

    أختى نهى
    كل سنه وأنتى وزوجك طيبين وعقبال ميت سنه جواز

    كلامك جميل جدا بيبين حاجات كتير
    مراحل كتير فى حيات الانسان
    من عزوبيه الى زواج الى امومه
    هى دى الحياه

    انتى انسانه عقله جدا
    ربنا يارب يقويكى على ضغوط الحياه

    أنا جايبلك كام هديه بسيطه كده بالمناسبه السعيده دى
    يارب يعجبوكى

    http://www.manasabty.com/vb/uploaded/1_1248693971.jpg

    http://files.fatakat.com/2009/10/1256817983.jpg


    تقبلى تحياتى

    محمـــد التركـــى

    ردحذف
  19. اتفق مع كارمن فيما ذكرته
    أن كل فترة من حياتنا ولها بنية خاصة ونظام معين نسير عليه

    ردحذف
  20. بسم الله ما شاء الله

    ربنا يسعدك يا نهى وكل عام وانتم قريبين ومتحابين وعلى طاعة ربنا مجتمعين

    أمين

    فعلا لخصتى حاجات كتير بكلمات خفيفه وراقيه

    من الاختلافات بعد الزواج وخاصة موضوع الصحاب ده كلنا كنا بنفكر كده لحد ما شفنا الواقع بنفسنا وعرفنا اد ايه الدنيا مشاغل

    تعليق جانبى

    التصميم الجديد جميل فعلا

    ربنا يباركلكم

    ردحذف
  21. نهى

    كل سنه وانتم بخير

    واحلى وطيب قلبين

    الزواج رباط مقدس غاليتى

    واهم حاجهفيه التفاهم

    ربنا يوفقكم دايما ويسعدكم

    تحياتى

    ردحذف
  22. صباح الخير يا نونا
    كل سنة وانتى طيبه
    عيد جواز سعيد يا حبيبتى
    ربنا يسعدك و يبارك لك فى حياتك وزوجك واولادك يارب

    ردحذف
  23. عقبال ما تحتفلوا بعد زواجكم المئوى:)

    عجبنى اوى العنوان الخاص بتليفونك المحمول:)

    ردحذف
  24. ممممممممممممممم

    لو هو ده الكلام الفاضي

    يبقى ايه الكلام المليان؟


    انا شايفة ان الكلام لإنسانة ناضجة ومتوازنة من جواها ومتصالحة مع نفسها

    فبالتالى الكلام ده لا يمكن يكون كلام فاضى

    ربنا يباركلك فى جوزك وبنتك ويجعل ايامك كلها سعيدة


    سلام

    اختك خيخة

    ردحذف
  25. عقبال مائة سنة
    والله الفضفضة احسن شىء وحسيت انك بتتكلمى عنى اكيد
    كل الحاجات دى بتحصل مع كل واحدة بتتجوز وتفتح بيت
    واجمل شىء فى الجواز التفاهم والمحبة
    ربنا يسعدك ويفرح قلبك

    ردحذف
  26. يااااااااااااااااااارب مليون سنه فى حب وهنا وخير
    وياااااااااااااارب تكتبى عن احفادك كمان

    ربنا يفرح قلبك وكل لحظه وانتى بخير مع كل احبابك يااااااارب


    زهراء

    ردحذف
  27. عقبال اليوبيلات الفضية والماسية ووووووو

    ربي يبارك لكم ويخليلك البيبي الجميله يارب

    وفعلا انا من كام يوم لقيت موبايلي فيه 307 رقم ما بين سباك وبتاع الغسالات وكهربائي وكل ابن من ابنائي حاطه ارقام أصحابهم علشان لو اتأخروا أو موبايلاتهم فصلت شحن .......هههههه عقبالك كده يارب

    ردحذف
  28. أسعد الله حياتكما وأدام فيها الخير وجعلكما قرة عين لبعضكما وبارك في ذريتكما
    سعيد بمشاركتكِ لنا هذه الرسائل الرقيقة

    قرأت التدوينة الجديدة كذلك :)
    إلى الأمام

    ردحذف
  29. ما شاء الله عليكم

    ربنا يسعدك يا حبيبتي وتفرحي ببنوتك يارب وتشوفيها عروسه زي القمر

    كويس انك قدرت تفهمي الحياه بعد الزواج بتكون ازاي وقدرتي تتاقلمي عليها

    مشكوره يا حبيبتي على الفضفضه الجميله

    ردحذف
  30. اجمل حاجة هي المشاركة بين الزوجين في كللللل حاجة..
    وبحب قوي ان الرجل يشارك زوجته في (حاجاتها) البسيطة... قد ايه بتساوي عندها كتييير :)
    ربنا يسعد ايامكم يا فينوس :)

    ردحذف
  31. نهى صالح
    ربنا يجمعكم دايما على كل خير وطاعه
    وعقبال عمركم كله مع بعض

    ردحذف
  32. كل الأشياء الكبيرة تبدو فى أول الطريق صغيرة أو دعينى أقول عن بعد و أنا ارى نجمة ستسطع عما قريب فى شأن الكتابة و المعايشة القعلية ليوميات أسرة فى زمن الإشتباك و الشقطرات المطر و قد طالعت بعض أجزاء مما كتبتى و أعجبت بسلاسة اللفظ و سهولة التعبير و الصدق الذى ينطق به كل حرف نطق به قلمك الذى يود أن يخط صفحات و صفحات .
    تمنياتى بالتوفيق و استمرى ونحن سنتابع ...
    والسلام عليكم و رحمة الله و بركاته

    ردحذف

ممكن تكتب رأيك هنا وممكن تناقشني وتنتقدني كمان لكن الغلط ممنوع :)