السبت، ديسمبر 04، 2010

واجب.......من شيرين سامى


فى عالم التدوين انتوا عارفين ان موضوع الواجبات ده انتشر

انا عموما مش بيجيلى واجبات كتير لان مدونتى لسة ماكملتش سنة يعنى مدونة نونو

بس لما بتجيلى بلتزم ان انا اعملها

شيرين سامى صاحبة مدونة حدوتة مصرية بعتتلى واجب لذيذ اوى بيتكون من سؤالين (ياسلام لو كانت واجبات المدرسة زمان من سؤالين وبس:))

انا بقى عملت الواجب اهه وعاوزة التصحيح والدرجة النهائية ونجمة المتفوقين كمان:)


السؤال الاول
هل انا فضولية وبحب اتدخل فى شئون الاخرين؟
انا مش فضولية ولا حاجة
بالعكس انا مش بحب اتدخل فى شئون حد علشان محدش يتدخل فى شئونى
بس المشكلة ان عندنا ناس بتبقى فضولية من بعيد لبعيد يعنى ممكن تعرف حاجات عنك من الناس المحيطين بيك
انا مش بحب ادخل نفسى فى شئون اى حد
لكن فى ناس بيبقى التدخل ضرورى فى حياتهم
يعنى طبعا انا فضولية جدا وحشرية جدااااااا فى اى حاجة تخص جوزى
يعنى لازم اعرف ادق التفاصيل عن اى حاجة
وطبعا ده طبع معظم الزوجات:)
والحمدلله هو مش بيزعل او بينزعج من الحكاية دى
وطبعا فضولية مع بابا وماما واخواتى
انما مع الاصحاب مثلا انا ممكن اسالهم من باب الاطمئنان واللى يحب يحكى هو حر لكن مش بتحايل على حد
السؤال الثانى
ماهى الاسئلة التى تستفزنى؟
انا عادة ماعنديش مشكلة مع الاسئلة
لان الطبيعى ان الناس تسألك
لكن انا اللى ممكن يستفزنى الطريقة بتاعة السؤال
يعنى فى طرق للاسئلة تتعب الواحد وتجيبله العصبى
وكمان اللف والدوران فى الاسئلة مش بيعجبنى
كان فى سؤال وانا صغيرة بيغيظنى اوى
ياترى بتحبى ماما اكتر ولا بابا
السؤال ده كان بيخلينى متغاظة اوى
يعنى ايه بحب مين اكتر
طبعا الاتنين بحبهم اوى
وبعدين ايه الاحراج ده اصلا واساسا ايه الفايدة من السؤال يعنى
ولسة السؤال ده بيضايقنى لغاية دلوقتى لما حد بيساله لاى طفل
ممكن نقول انها عقدة منذ الطفولة:)
فى كمان سؤال تانى
كنت بستغربه شويتين
ياترى بنتك شبهك ولا شبه باباها؟
اكيد يعنى شبه حاجات مننا احنا الاتنين
زى اى طفل فى العالم
بس انا دلوقتى بقى اللى بقيت أسأل
هى شبه مين
وبفرح اوى لما بيقولوا انها شبهى
وبفرح برضه لما بيقولوا انها شبه باباها
معادلة صعبة مش كده
طبعا اسئلة كتير تانية بتغيظ
زى سؤال هتخاوى بنتك امتى
متهيالى دى حاجة خاصة محدش ليه دعوة بيها
بس عموما الفضوليين فى حياتى مش كتير والحمدلله
انا خلصت اجابات بقى خلاص
واحب اوجه الواجب اللذيذ الظريف الجميل الصغنن ده
لرحاب صالح صاحبة مدونة حياتى ومش حرة فيها
ومها البنا صاحبة مدونة الطير المهاجر
وwise صاحبة مدونة احلام على ورق ومدونة انها حقا عائلة محترمة
كان نفسى اوجه التاج ده لناس كتير بس انا عارفة ان فى ناس كتير عملته
والدعوة مفتوحة يعنى اللى عاوز يكتب الواجب يكتبه
اشوفكم على خير ان شاء الله:)

هناك 21 تعليقًا:

  1. noha saleh
    السلام عليكم ورحمة الله وبركاته
    واضح ان اللى بنعمله فى الاولاد هيطلع علينا
    الواحد نسى موضوع انه ياخد واجبات ده من زمان
    اتعود انه هو اللى يدى الواجب بحكم المهنة
    واضم صوتى معاكى اننا نبعت الtag
    لمها البنا و رحاب صالح
    وانا مستعد اصحح لهم معاكى ماعنديش مانع
    هههههههههههه
    لا ان شاء الله لى عودة

    ردحذف
  2. اولا نتيجة التصحيح 10 من 10 ممتاز يا نهي و نجمة :))
    تانيا في ما يتعلق يكون الانسان حشري لازم طبعا نكون حشريين في ما يتعلق بالازواج هي سايبة و لا ايه........
    في سؤال تاني للاطفال بيستفزني اوي
    تحبي تطلعي زي بابا و لا زي ماما ؟
    ايه الغلاسة دي هو لازم يزرعوا في دماغ الطفل انه يشتغل نفس مهنة والده اووالدته
    معلش طولت عليكي بس الموضوع حلو و الاجابات من المقرر

    ردحذف
  3. بالتوفيق يا نهى

    ردحذف
  4. سبقت انبارح
    كل اسئله وانتى طيبه
    بس احيكى على اجاباتك
    جميله
    واجمل ما فيها انك مش حشريه
    هههههههه
    وحشانى يا نونا

    ردحذف
  5. انتي كده خدتي الفول مارك يا نهى بجد اجابات نموذجيه و عرفتنا عليكي أكتر
    تحياتي ليكي و ربنا يخليلك بنوتك يارب:))

    ردحذف
  6. ربنا يوفقك ان شاء الله

    ردحذف
  7. صباح الورد يا نهي ...اما انا بكتشف حاجات اليومين دول بجد تجنن...معني كدة انك متجوزة وكمان معاك بنوتة ...؟ بتمنالك بجد حياة سعيدة ...
    وشكرا علي الواجب اللي مش هعتبره تدبيسة ...يمكن لاني كنت عايزة اتكلم عن حاجة معينة خاصة فعلا بالسؤالين دول...
    وتاني بقولك سعيدة بمعرفتك جدا وبتمني تاني اني اعرفك اكتر ...مش فضول ..لكن الصداقة كنز كلنا بندور عليه....صباحك ورد ويارب دايما حياتك سعيدة

    ردحذف
  8. عشره من عشره يا نهي

    بالنسبه لسؤال بتحبي مين اكتر بابا ولا ماما ده بيتسأل على طول وفعلا سؤال مستفز

    انا بعتقد ان اللي بيسأل السؤال ده عايز يوقع بينا وبين اهالينا هههههههه

    اما بالنسبه امتى هتخاوي بنتك بردوا سؤال شائع اوي

    الناس مش بتسيب بعض في حالها

    ربنا يهدي

    بس اجابات ممتازه وربنا يخليلك بنوتك يارب وتفرحي بيها

    بس عندي سؤال يا نهى لو سمحتي

    هو انتي صحيح امتى هتخاوي بنتك هههههههههههههههههه

    ردحذف
  9. دومتي بخير
    ودائما الي الامام ان شاء الله

    ردحذف
  10. اجابات جميلة وشكرا انك عرفتينا علي جزء من شخصيتك
    خالص نقديري واحترامي

    ردحذف
  11. السلام عليكم

    طبعا مثل هذه الواجبات تزيد من التعارف بين المدونين..

    حقيقة معظم الأسئلة التي تستفزك هي مستفزة لغالبنا..
    خاصة السؤالين إياهم :)

    بالنسبة للسؤال بتاع بابا وماما، أنا وزوجتي استحالة نسأله للبنتين.. وإذا أحد سأله لهما أنهاه مباشرة لعدم إرباك الطفل...!

    أما السؤال الأكثر استفزازا (إمتى هتخاوي بنتك؟).. فصدقيني دائما من يسأل هذا السؤال ستجديه لا يجد ما يقوله في الجلسة.. فيكون هذا السؤال جاهزا لملء الفراغ!!!
    طيب إنتي بتتسئليه ومعاك بنت واحدة، أمال أنا بقى أعمل إيه ومعايا بنتين!!!! :)
    عامة السؤال ده بالذات أنا عامله بوست مخصوص هينزل إن شاء الله الأسبوع القادم.

    على فكرة أنا كنت هسألك نفس السؤال من باب الاستفزاز التدويني.. لكن د.ولاء سبقتني :)

    تحياتي أختي الكريمة مع تمنياتي بأن يبعد الله عنك الفضوليين والمستفزين.

    ردحذف
  12. اجابات معقلنة ومتميزة
    تحياتي اختي نهى

    ردحذف
  13. عسولة يا نهى
    اجابتك عشرة على عشرة وفعلا الناس بقت حشرية
    اوووى اليومين دول وبتدخل فى اللى ليها واللى ملهاش
    فية ربنا يبعدنا عنهم يا رب
    وربنا يخليلك جوزك وبنتك ويجعل ايامك كلها سعادة

    ردحذف
  14. السلام عليكم
    باختصار انا كدةشايفك اكتر
    انسانة متحفظة ومهذبه وعايشة علي سجيتها لاتتكلف
    تحياتي ياختنا الفاضلة نها

    ردحذف
  15. ياسلام عليكي يانونو
    اجابات في الجول ياقمر
    بوسة هنا وبوسة هنا
    اموووواه

    ردحذف
  16. سلام عليكم

    اولا ولا يهمك

    هما طلعو اغنية مخصوص عشان حكاية مين بتحبو اكتر دي
    في طيور الجنة هههههه

    تانيا

    كلماتك حلوة انت دمك عسل

    زورينا

    على المدونة دي
    http://1000khybawkhyba.blogspot.com/

    ردحذف
  17. كل تدبيسه وانتى طيبه
    اجاباتك طبيعيه
    فعلا كلها اسئله مستفزه
    تفقع المراره
    علشان كده انا بشيل شويه مرارات احتياطى فى شنطتى
    علشان كل ما تنفقع واحده احط الاستبن
    ههههههههه
    اقعدى بالعافيه

    ردحذف
  18. الله عليكى
    هو ده الكلام
    موضوع الاستفزاز
    فكرتينى بيه
    عليا الواجب
    ده من زماااااااااااان
    هحله فى اقرب وقت

    ردحذف
  19. ايه ده يانهى

    كل الحلاوة دى كانت غايبه عنى فين

    لا بجد شخصيه حكيمه جدا

    ربنا دايما يوفقك

    وكل عام وانت بخير ياقلبى

    تحياتى

    ردحذف
  20. الف الف مليون شكر ليكم كلكم
    ربنا مايحرمنيش منكم
    كل سنة وانتم طيبين وبخير دايما

    ردحذف
  21. ايه ده؟؟؟ انا اسمى موجود اهو :)

    عموما واجب مقبول وجارى حله ان شاء الله لكن بعد الشغل

    دوقتى اقوم البس بس القى نظره على اخر بوست ليكى قبل ما اقوم

    سلام يا قمر

    ردحذف

ممكن تكتب رأيك هنا وممكن تناقشني وتنتقدني كمان لكن الغلط ممنوع :)