الأحد، نوفمبر 07، 2010

كتاب مالوش اسم


اجمل حاجة واحلى حاجة لما بشترى كتاب واقرأه والاقى ان فلوسى ماراحتش على الفاضى

بكون فرحانة اوى بالمعلومات اللى بعرفها او حتى لو اخدت عظة من رواية جديدة

انما الفرحة الكبيرة بقى لما كتاب يغير حاجة من جوايا ساعتها ممكن يبقى احساس ان الفلوس اللى دفعتها فى الكتاب مش كفاية وانه يستحق اكتر من كده


انا بحب القراءة جدا ومن وانا صغيرة متعودة عليها

بس علشان استفيد اكتر عودت نفسى انى كل شهر لازم اشترى كتاب

وهو وحظه معايا بقى لو عجبنى يبقى هخلص قرايته اكتر حاجة فى 3 ايام

لو مش قد كده يبقى مش بقراه كله او بياخد معايا وقت طويل


واخيرا اشتريت كتاب احمد العسيلى اللى سماه كتاب مالوش اسم

طبعا انا عارفة انى اخر واحدة فى مصر اشترت الكتاب

لانى اشتريته فى الطبعة السادسة

اشتريت الكتاب لما سمعت من ناس كتير انه كتاب هايل

انا كنت مستغربة جدا من اسم الكتاب

ايه الفكرة يعنى ان الكتاب مايبقاش له اسم


الكتاب من اول حرف شدنى جدا

مكتوب باللغة العامية انما بشكل عبقرى

الكتاب مش بيتكلم عن فكرة واحدة

انما بيتكلم عن حاجات كتير بتشغل بال ناس كتير اوى

بيتكلم عن علاقتنا بربنا وعن الصلاة وعن الموت

وعن الضمير وعن الاطفال وحاجات تانية


انا خلصت قراية الكتاب فى 3 ايام فعلا

ولو الوقت كان سمحلى انا كنت خلصته فى يوم واحد

اختلفت مع الكاتب فى بعض حاجات

بس اتفقت معاه فى حاجات كتير

منها ان ماينفعش نقتل شقاوة اطفالنا لانهم بيضايقونا

وكمان طريقة تعاملنا مع الحشرات المزعجة بقتلنا لهم

رغم ان ربنا خلقهم هما كمان علشان يعيشوا


وحاجة تانية بقى كمان الكتاب ساعدنى انى افهمها

التأميم..........اعترف انى ماكنتش فاهمة التأميم اوى
يعنى قصدى مش فاهمة ليه فى ناس معاه وناس ضده

ليه ناس بتحب عبد الناصر وليه ناس بتكرهه

لما قريت الكتاب فهمت وكمان اقتنعت برأى العسيلى جدا


احلى حاجة عملها معايا الكتاب ده هو انى خلانى اتعامل مع الحياة بأسلوب بسيط اكتر شوية من الاول


ولما خلصت الكتاب ساعتها عرفت انه كان صعب ان الكتاب ده يكون له اسم غير كتاب مالوش اسم وانه فعلا لازم كل واحد قرأه هو اللى يسميه على مزاجه كما ذكر احمد العسيلى فى نهاية الكتاب

الحاجة الغريبة اللى قابلتنى وعرفت بعد كده انها حصلت مع ناس كتير

هى انى كل ماكنت بقرأ الكتاب كنت بسمع صوت احمد العسيلى فى ودانى

كأنه بيتكلم فى برنامجه .......غريبة مش كده؟

هناك 58 تعليقًا:

  1. شوفى فى مفاجأة كبيرة ليكى

    أنتى مش اخر واحدة أشترت الكتاب لا ابسولتلى

    انا مشترتهوش لسه

    بس هشتريه علشان الكلام الجامد اللى انتى كتبه

    بس انا معرفش أحمد العسيلى

    و ايه البرنامج بتاعه

    (: شوفتى بقا (:

    تحياتى

    ردحذف
  2. هو فعلا صوته فظيع ولكنته غريبه وأنا كل ما بسمع إسمه أو أشوف صورته بلاقي صوته وكلامه بيرنوا في وداني
    علي فكره أنا لسه ما قريتوش يعني إنتي مش متأخره ولا حاجه , بس إنتي خدتي فيا ثواب والله , شفته كذا مرة وقلقت إني أشتريه علشان إسمه , كده هروح أجيبه جري . .
    تحياتي . .

    ردحذف
  3. شوقتينى يا نهى انى اقرا الكتاب
    هدور عليه ان شاء الله و اجيبه
    ملاحظاتك عليه حلوه اوووى

    تحياتى

    ردحذف
  4. للاسف مقريتهوش بس هحاول ادور عليه واقراه لان اكير دعايه للكتاب ان نهي تكون قراته واقتنعت بيه تحيه طيبه

    ردحذف
  5. من كلامك عن الكتاب شجعنى انى اقتنيه واقراه
    واضح انه فعلا جميل
    وفكره ان الكتاب يسمى بدون اسم فكره رائعه حقا
    يجعل كل انسان يسميه ذى ما يشوفه او يتخيله

    شكرا على التنويه يا نهى
    ربنا يسعدك ويفرح قلبك

    ردحذف
  6. شكرا
    يبدو فعلا أنه كتاب كويس

    ردحذف
  7. احلى مافى الحياه القراءه

    سواء قراءه كتاب او قراء وفهم شخص قدامك
    او قراءه موقف اما عينك
    القراء بتفهمك وبتوضحلك
    المعانى

    وصديقنى التعلم الحقيقى فى القراءه المجديه مش قراءه حفظ لوقت معين

    ردحذف
  8. القراءة هي العلم والمعرفة
    والعلم والمعرفة هي الحياة نكتسب معرفتنا في كل يوم من ايام حياتنا ومن منا يثري تلك المعرفة بالقراءة
    والقراءة هي امر من اومر الله عز وجل كما العلم والمعرفة
    عرض جيد للموضوع افادك الله

    ردحذف
  9. القراءة هي العلم والمعرفة
    والعلم والمعرفة هي الحياة نكتسب معرفتنا في كل يوم من ايام حياتنا ومن منا يثري تلك المعرفة بالقراءة
    والقراءة هي امر من اوامر الله عز وجل كما العلم والمعرفة
    دومتي بخير عرض اكثر من شيق

    ردحذف
  10. نحاول ان شاء الله نجيبه ونقراه
    وانا واثقه انه كتاب ذو قيمه من خلال كلامك عنه
    ربنا يسهل
    مرسيى ليكى كتير يا نونا على التنويه بالكتاب
    دمتى بخير

    ردحذف
  11. عندك حق بس المشكلة انى مش بحب القرايه اوى

    ردحذف
  12. جميل لما الواحد يقرا حاجة وتاثر فيه وتبقي سبب لتغيير مفاهيم واراء وافكار
    احييكي انك عرفتنيا بالكتاب ده وياريت تبقي تاخدي فكره منه عجبتك تنشريها وتقولي رايك فيها نناقشها كلنا مع بعض
    هايبقي بوست هايل
    تحياتي

    ردحذف
  13. مقرتش الكتاب .. بحب أحياناً أسمع احمد العسيلى ..

    مش دايماً ..

    بس شجعتينى لما قلتى محتوى الكتناب المتنوع ..

    حاجة جميلة بجد يا نهى بقيت بشوف كل الكتب دلوقت اللى عليها إقبال جامد وناجحة هى كتب لشباب وتقريباً بتكون أول تجارب ليهم

    هى من رأيى حاجة ناجحة .. إنما شفت كتير حواليا مش مؤمنين بدة تحت شعار .. كل من كتب له كلمتين نعمل له كتاب .. ونقول الكاتب فلان

    تفتكرى بقى إيه الصح ؟؟

    " إيه الرغى دة كلة ؟ "

    تحباتى يا قمر :)

    ردحذف
  14. الحمد لله ان فى حد بيقرأ اليومين دول
    احييك وحافظى على تنمية عادة القراءة
    فالانسان عدو ما يجهل

    تحياتى وتقديرى

    ردحذف
  15. الكتاب فعلا ممتاز .. بس للاسف قريت منه ييجي 5 صفحات بس ومش عارف اكمله من اللي ورايا .. ربنا يكرم واكمله قبل 2020 :D

    ربنا يكرمك كده وتخلصي كل الكتب اللي في الدنيا علشان تيجي وتقوليلنا المفيد ;)

    تحياتي *_*

    ردحذف
  16. جميل جداً إنك بتحبى القراءة
    وكلامك عن الكتاب شجعنى على شرائه وقراءته
    فشكراً لك

    ردحذف
  17. ماغريب الا الشيطان

    جمييييييل انك تشترى كتاب كل شهر والله بفكر اعملها
    الكتااب جمييييل انا سمعت عنه لكن مقرتوش وشكلى هشتريه فى الطابعه التاسعه هههههه
    واحشانى

    ردحذف
  18. هو فعلا كتاب جميل وممتع

    تحسى انك ملهوفه انك تقريه بسرعه

    هو فعلا من الكتب المفيده

    وسعيده انك اخيرا قرتيه

    تحياتى

    ردحذف
  19. اممم حاجة غريبة فعلا بس يمكن عشان صوته مميز وطبعا اكيد نفس اسلوبه في الكتابة فبتتخيليه بيتكلم
    يمكن
    بوست هايل يانها ما تتأخريش كده عشان بتوحشينا ^_^

    ردحذف
  20. أول زياره لمدونتك سعيده جداً بالموضوع لأني كنت دائما بمر بالكتاب ده بس ماكنتش متشجعه أشتريه لأني اشتريت كتب كتير طلعت مش قد كده..بس دلوقتي هجيبه و أنا مطمنه
    تحياتي ليكي

    ردحذف
  21. السلام عليكم
    اخبارك يانهى؟
    يارب تكوني بالف صحة وعافية.
    بصراحة انا مااقراء كثير بالاصح مااحب القراءه
    بقراءه الكتب الي تشدني من مواضيعها وققص الجراءم
    في كتب ثقافية قرئتها لكن قليل
    انا هدور على هذا الكتاب عندنا لو لقيته هشترية ويارب الاقيه
    شوقتيني بكلامك عنه
    انشاءالله الاقيه
    وعتذر عن تاخري
    تقبلي مروري
    سلامي لا واحلى وارق نهى

    ردحذف
  22. لو بتتكلمى عن احمد العسيلى بتاع او تى فى

    يبقى الواد ده انا مش بطيقه ، مش بحس انه مسلم من طريقة كلامه وانتقاده للدين.

    بجد مش عايز اقولك رأيى فيه ايه ، لانى شوفته كتير وشفت فكره .....

    اما لو حد تانى يبقى هشوف الكتاب واحاول اقراه ان شاء الله

    ردحذف
  23. Ramy
    فعلا مفاجأة كبيرة انى اعرف انى مش اخر واحدة
    اصل انا لقيت كل الناس قرأت الكتاب الا انا
    احمد العسيلى ده اللى كان عامل برنامج fm tv
    واللى كان بيذاع على مزيكا ونجوم اف ام
    وكان عمل برنامج حبة عسيلى على otv
    وبرامج تانية كمان

    ردحذف
  24. faw
    انا كمان كنت مستغربة اسمه جدا جدا
    بس لما جبت الكتاب عرفت انه فعلا ماينفعش يكون له اسم تانى

    ردحذف
  25. صيدلانية طالعة نازلة
    الكتاب فعلا عبقرى
    هو موجود فى دار الشروق

    ردحذف
  26. سواح فى ملك الله
    متشكرة اوى لذوقك ربنا يخليك
    الكتاب فعلا يستحق انه يتقرى
    ربنا يكرمك

    ردحذف
  27. mrmr
    شكرا لذوقك ياقمراية
    هستنى بقى رأيك فى الكتاب
    انا عارفة انه ان شاء الله هيعجبك
    وربنا يسعدك انتى كمان

    ردحذف
  28. يوميات شحات
    فعلا هو كتاب رائع
    نورت

    ردحذف
  29. BNT ELISLAM
    معاكى حق القراءة جميلة ومفيدة
    بس انا بحب قراءة الكتب اكتر من قراءة الاشخاص
    نورتى

    ردحذف
  30. Magdy Hatem
    شكرا لرأيك ومعاك حق طبعا ان القراءة من اوامر ربنا
    نورتنى

    ردحذف
  31. الحب الجميل
    الكتاب حلو اوى اوى
    وهو موجود فى مكتبات دار الشروق
    وانا علشان استمعت بقراءته حبيت اقولكم يمكن يعجبكم:)

    ردحذف
  32. سندباد
    فكرة عبقرية حكاية مناقشة افكار الكتاب دى
    متشكرة اوى
    وان شاء الله هنفذها فى اقرب فرصة

    ردحذف
  33. زهرة
    معاكى حق فعلا اغلب الكتب الناجحة بتكون للشباب
    وفى ناس فعلا بتهاجم ده
    بس مش عارفة ليه
    ايه المشكلة لما الناس يكون عندها تقبل للواقع
    فيها ايه لما شخص موهوب يعرض موهبته
    الناس عموما مش بيعجبها حاجة
    لما الشباب يشتغل يسخروا منهم
    ولما مايشتغلش يقولوا الشباب فاشل ومعندهوش قدوة

    وبعدين رغى ايه؟
    اتكلمى براحتك ياقمر دى حاجة بتسعدنى

    ردحذف
  34. sal
    فعلا الانسان عدو مايجهل
    معاك حق اكيد
    وشكرا على رأيك

    ردحذف
  35. Hamdy
    ان شاء الله ربنا يكرمك وتخلص الكتاب بسرعة قبل سنة 2020
    واشكرك على الدعوة

    ردحذف
  36. محمد الجرايحى
    اشكرك على رأيك واتمنى انك تستفيد من الكتاب كما افادنى
    واهلا بيك

    ردحذف
  37. همسات وبحر الحياة
    والله انتى كمان وحشتينى
    موضوع كتاب كل شهر ده حلو اوى
    والكتاب هيعجبك ان شاء الله
    خدى كلامى ثقة والحقى الطابعة التاسعة:)

    ردحذف
  38. جايدا العزيزى
    انا كمان مبسوطة اوى انى قريت الكتاب
    وكان عندى فعلا احساس انى عاوزة اقراه كله من اول سطر فى وقت قياسى

    ردحذف
  39. Karmen
    هو اسلوبه فى الكلام وصوته مميزين جدا
    واثناء قرايتى للكتاب كنت سامعه صوته
    رأيك سليم اكيد لانه فعلا كاتب بنفس الطريقة اللى بيتكلم بيها
    ان شاء الله مش هتأخر لانكم برضه بتوحشونى

    ردحذف
  40. شيرين سامى
    نورتى المدونة بزيارتك الاولى اللى اسعدتنى واتمنى تتكرر دايما
    انا كمان زورت مدونتك وعجبتنى جدا مدونة رائعة بجد
    ان شاء الله الكتاب يعجبك

    ردحذف
  41. خواطرى مع الحياة
    انا الحمد لله بخير ويارب انتى كمان تكونى بخير
    وطبعا تيجى المدونة فى اى وقت يعجبك
    ان شاء الله تلاقى الكتاب عندكم وتقريه ويعجبك

    ردحذف
  42. ويكا
    هو فعلا احمد العسيلى بتاع otv
    انا ماكنتش بتابع برنامجه اوى
    وجبت الكتاب من رأى الناس فيه
    الكتاب فعلا فى حاجات كتير انا اختلفت معاه فيها
    بس هو فى مضمونه حلو اوى وبيتكلم فى حاجات كتير حقيقية اوى

    ردحذف
  43. الحنين
    خسارة انك مش بتحب القراءة
    رغم ان كتابة الاشعار بتحتاج للقراءة علشان تقوى اللغة العربية اكتر

    ردحذف
  44. يعتبر بقى انا اخر واحدة قارءة الكتاب
    بس بجد نفس اللى الاحساس اللى اتقال فى كلامك حسيته
    وعلى فكرة انا من اول صفحة لاخر صفحة قريت الكتاب فى يوم واحد
    مقدرتش اسيبه الا لما اخلصه

    eng-hillin

    ردحذف
  45. غير معرف
    اغرب حاجة انا عرفتها فعلا ان معظم الناس اللى اشترت الكتاب حست بنفس الاحساس ده
    نورت المدونة يا eng-hillin

    ردحذف
  46. السلامو عليكم

    نهى
    اخبارك ايه يارب تكونى بخير

    والله يانهى انا لسه مشفتش الكتاب بس هشتريه واشوفه مع انى مش مع الفتره اللى كان فيها عبد الناصر بستثناء التاميم
    لكن كانت فتره حكمه جحيم على ناس كتير ونعميم على ناس تانيه

    الله اعلم الحق فين
    انا ولا شفته ولا كنت اتولدت اصلا فى فتره حكمه
    اصلى انا عقبال املتك من مواليد الباشا
    اللى لسه مشفتش غيره نفسى اشوف حد غيره قبل ما اموت
    شكله هيموتنا كلنا ويحكم هو
    هههههههههه

    المهم هشترى الكتاب واكيد هقولك رأى فيه

    تحياتى لشخصك الطيب

    محمـــد التركـــى

    ردحذف
  47. محمد التركى
    متهيالى ان اكتر حاجة انقسم فيها الناس على حب عبد الناصر او كرهه هى التاميم
    وانا مع وجهة نظر العسيلى فى رأيه عن التاميم
    ان شاء الله لما تشترى الكتاب يعجبك
    اما عن باقى الكلام اللى فى التعليق
    انا خلاص تأكدت تماما انكم ناويين تقفلوا البلوجر

    ردحذف
  48. عظيم اوى حرصك يا نهى على القراءة و شراء الكتب فى وقت لم يعد فيه حد يقرأ اى حاجة و لا حتى الجريدة و اصبحت فيه الكتب باهظة


    تحياتي لعقلك

    ردحذف
  49. الله
    عليكى يانهى
    عرضك
    للكتاب
    رائع
    وجميل يارب ينفعك بيه
    واللى اتعلمتيه تعليمه لاولادك

    ردحذف
  50. tears
    تصورى بقى انا بحب اوى الجرائد وبهتم جدا بحل الكلمات المتقاطعة
    مش بهزر والله
    موضوع القراءة ده الفضل فيه يرجع لبابا بعد ربنا طبعا
    نورتينى بزيارتك ياتيرز

    ردحذف
  51. محمود باحث عن حب
    شكرا لذوقك وشكرا على الدعوة الحلوة كمان
    ربنا يكرمك ويسعدك ان شاء الله

    ردحذف
  52. طريقة عرضك حلوة قووي يا نهى..
    شجعتيني اشتري الكتاب رغم اني مش عندي وقت بس ها اخليه معايا في العربية وكل فترة اقرا منه جزء :)

    ردحذف
  53. timo
    شكرا ياتيمو ربنا يكرمك
    على فكرة لما هتشتريه هتحاول انك تلاقى وقت علشان تقراه لانه فعلا يستحق

    ردحذف
  54. ياااااااااااااة يا نهي ..حلو اووي بجد
    تعرفي انا هحاول اشتري الكتاب بس تعرفي انا غيرك خااالص يعني ممكن اقرا الكتاب في ساعة او ثلاث ساعات مش ثلاث ايام انا قريت رواية فوضي الحواس وهي ثلثمائة وخمس وسبعون صفحة في يومين لاني كمان كنت مشغولة ...اصل انا بمووووووووت في القراية ويموووت في الاحتفاظ بالكتب ...هكتب اسم اكتاب حالا عشان اجيبه لما اروح القاهرة

    ردحذف
  55. كل سنة و انت طيبة (:

    و يعيد عليكى الأيام بخير

    ردحذف
  56. السلام عليكم ورحمة الله وبركاته
    انا فعلا سمعت عن الكتاب ده كتير
    واتناقشت انا وصديقاتى كتير عنه
    ويكفى ان اللى كاتيبه احمد العسيلى
    اللى بتمتع ببساطة الاسلوب وتميزه والاجمل انه بيظهر لنا الواقع المؤلم مع حرصه على تغليفه بغلاف رقيق من المرح والسخريه لنخفيف حدته
    بجد يانهى ربنا يبارك لك على مشاركتك لنا الكتاب
    ولو انى كنت حابه انك تتناولى معانا اهم الافكار اللى عجبتك فيه ونفنح مجال للنقاش سوا اكيد هنستفيد كلنا

    كل سنه وانت واسرتك بافضل حال

    ردحذف
  57. مش اخر حد اشترى الكتاب ولا حاجة
    لسه شاريه من يومين والحمد لله خلصته وعجبنى جدا
    كتاب مميز فعلا وعلى فكرة
    أخر نسخة فى كارفور انا اللى أشتريتها :D

    ردحذف
  58. انا اليومين دول بس قريت الكتاب مش عارفة ليه مش قريته قبل كده لكن فعلا كتاب تحفة واسلوبه ممتع وشيق عايزة اقول انى خلصت الكتاب فى 3 ساعات زى ما اكون حد جعان اوى وشاف اكلة حلوة انا اكتر حاجة كانت وخدانى انه الكتاب فى مواضيع كتير كانه بيقرا افكارى وبجد كتاب حلو جدااااااا

    ردحذف

ممكن تكتب رأيك هنا وممكن تناقشني وتنتقدني كمان لكن الغلط ممنوع :)