الجمعة، نوفمبر 05، 2010

اشترك معانا...ممكن+تحديث(لينك بيت المدونين)




فى الاول بس عاوزة اعتذر للناس اللى دخلت تشوف موضوع سرقة وبجاحة ومالقتهوش

لان الموضوع ده له ظروف خاصة هقولهالكم البوست الجاى ان شاء الله اللى هينزل النهاردة او بكرة بالكتير

المهم بقى البوست ده كل الناس المشاركين فى بيت المدونين عارفينه تقريبا لانه منول من هناك بس ياريت بقى الناس اللى لم تشترك فى بيت المدونين معانا تشترك وتشوف الموضوع وياريت كمان اللى لسة مانقلهوش ينقله عنده فى مدونته.

اشوفكم على خير قريب جدا ان شاء الله:)


سالخير عليكم .....
اولاً ومن هذا المنبر الجديد احب ان امرر خالص شكرى واعتزازى وتقديرى و .......
.... ايه الدخله دى .........
لا لا لا ...... انسوا الكلام اللى فوق فى اولاً ده ....... احنا مش كده خالص .....


احنا هنا اصحاب وزملاء ..... احنا هنا قرايب وعزوه .............
يعنى لا فيه رسميات ولا هو موقع عام بيتكلم بشكل رسمى او بصوره مرسومه مسبقاً وهيكل واطار وبرواز وتشكيل وتبــــ ....... برده الكلام كبر منى تانى .........


لا بقى بصوا ...... انا هقول تانى بس بالشكل بتاعنا اللى كلنا هنتفق عليه الا وهو ......
اننا هنا مش عاملين موقع رسمى او مؤسسه وده واجهتها ....... لا خاااالص ...... ابسلوتلى ........


يا اخوانا هنا زى ما قلنا بيت المدونين ...... يعنى كل الناس اللى هنا اعضاء فيه ..... بدون طلب اشتراك او التحاق ........


ده بيت معمول عن طريق مجموعه من وسطنا ..... بهدف نتلم ونتقابل فيه ....... حاجه كده زيها زى التجمعات التدوينيه ..... لا بيبقى فيها ريس ولا بيبقى فيه برنامج مفروض ........

بمعنى أصح وأقرب للفهم ...... هنا بمثابة تجمع تدوينى ، بس بدل ماهو بشحمنا ولحمنا ....... هيبقى بقلمنا وكيبوردنا .......


لان مش كل الناس بتعرف تحضر التجمعات ..... مش كل الناس بسهوله تقدر تتواجد فى كل الأماكن .......
لكن هنا كله يقدر يتواجد فى نفس الوقت من اى مكان او زمان ......... من اسكندريه لاسوان ...... صحره كان او بستان ..... حلوه الـ (وان دى ) ....
حتى ولو عايش برا مصر هيقدر يتواصل ........ هنقدر نتكلم وندردش ....... هنقدر نتبادل الحوار والنقاش .......
هنقدر نقترح على بعض افكار كتير ومواضيع اكتر واكتر ..............


احنا هنا بنعتقد ان المدونين فى مصر بدأوا يبقوا فى الصوره ..... بدأو يبقوا كيان مؤثر فى المجتمع والاعلام ......


لقد قال نابليون بونابرت يوماً :
"لا أخشى ألف مدفع وألف جندي بقدر ما أخشى لسان صحفي أو مقال جريدة. ... "


فالصحافه هى الطابور او السلطه الرابعه ..... وهى المؤثر والمحرك للمجتمع ........
علشان كده قلنا نحاول نتجمع.....
نعمل مكان نتلم فيه ومن بعض نسمع ........
اكيد هتفرق كتير معانا ...... اكيد هتفرق مع المجتمع .......

تخيلوا لو مثلاً ...... المكان ده فعلاً بقى بيلتقى فيه اكبر عدد مننا ..... وبقينا نتفق على حاجات مع بعض من خلاله .....
وبقى كل الناس عارفاه ... القاسى منهم والبادى ..... ومثلاً مثلاً .......
جينا على تجمع زى بتاع التبرع بالدم اللى خالد همس الاحباب بيدعى ليه ده ........ وجينا معلنين هنا وقولنا "يا جماعه عايزين الايام الجايه دى كلها كل المدونين يعلنوا عندهم على التجمع حتى اللى مش هيجوا يعلنوا ..... لان التجمع مش مقتصر على المدونين بس ............... "
وفعلا الناس كلها عجبتها الفكره واعلنت ............... متخيلين رد الفعل ؟!!!!

متخيلين الفكره دى (التجمع ) ممكن تعجب ناس تانيه اد ايه وممكن يعملوها فى محافظاتهم ازاى ؟! وعلى ذلك قيسوا امثله كتيره ......
متخيلين مدى تأثيرنا هيبقى عامل ازاى فى المجتمع ؟!!

ده من جهه ...... وفيه جهات تانيه او افكار تانيه كتيره هى هدفنا هنا برده ..............

زى ايه ؟!!
زى اخبارنا اللى احنا بننشرها كل يوم دى ..... فلان اتجوز، فلانه اتجوزت ...... فلان عيد ميلاده امتى ...... فلانه غسلت المواعين ولا لسه ؟!
فلان اتخنق من مراته ...... فلانه قتلت جوزها ..............
طبعا كده بقى الموضوع جرسه وشرده ........... لا مش كده .....
لان بكل بساطه ...... احنا هنا مش هنذيع او ننشر اى خبر الا من خلال صاحبه ..............
صاحبه فقط هو اللى هيقولنا عليه وننشرهوله ...... مش هننشر شئ الا ما صاحبه هو اللى يقول او يوافق مسبقاً ..... لان بكل بساطه .....
الخبر هيتنشر وصاحبه هو اللى بنفسه هيجى يعلق عليه ويرد على تعليقات الناس ............
بمعنى اصح هيبقى فيه تواصل اكتر ومشاركه اكبر ........ هيبقى فيه ود وترابط وتراحم ......
لان الموضوع مش هيبقى عباره عن "موقع بينشر اخبار" (موقع اخبارى) لا .............. احنا هدفنا هنا اجتماعى ......
برده زى خبر مدونه جديده اتفتحت ، ممكن نعلن عنها ، لمزيد من الانتشار ومساعده للمدونين الجدد انهم يجوا وينتشروا وسطينا بدون مجهود كبير ووقت طويل ....
زى برده اننا نحط لنكات كل المدونين المتواجدين معانا ومش متواجدين .... بنحاول نضيف كل اللى نعرفه .... (طالما ان محتوى مدونته فى اطار مقبول ... طبعاً) ...



فيه افكار تانيه برده كتيره عندنا وعندكم ممكن تقولولنا عليها ونناقشها .......

يعنى على سبيل المثال ....... عندنا فكره جديده هقترحها عليكم دلوقتى ...... ونتناقش فى كيفيه تنفيذها ..... زى ما اتناقشنا فى الشعار بتاع بيتنا هنا واختارناه فعلا على حسب اقتراح الاغلبيه وقد كان والحمد لله ............



وان كان انا نفسى بعترف ان الشعار فيه حته كده عايزه تتغطى ......................... (بس ان شاء الله هنغطيها ونلبسها نقاب كمان ان شاء الله ....... ههههه ) . بس يا جماعه والله ما حد فينا يعرفها الست دى ..... دا احنا لقيناها كده فى وسط الجماعه اللى واقفين واتكسفنا نمشيها ..............



المهم
نرجع لموضوعنا وفكرتنا ................ الا وهى :

هنستضيف كل فتره معينه (ثابته او متغيره.... للنقاش برده ) ، مدون من المدونين ......
حاجه كده هتبقى زى التاج .... بس المره دى فيها ميزتين ...... الاولى انه هيبقى معمول له هو بعينه .... والتانيه هيبقى فيه تفاعليه اكتر ..... ليه ؟! ..... لان .....

لان ايه ؟!

لان احنا هنتفق مع المدون ده الاول زنبلغه انه مرشح للبوست اللى جاى علشان يتعمل معاه حوار ..... ولو وافق ....
هننزل خبر فى بوست نقول:
"ان المدون اللى هيتعمل معاه الحوار القادم يا اخوانا هو ..... فلان ......
وبالتالى الناس فى صفحة التعليقات تبدأ تكتب الاسئله اللى عايزين يسألوهاله ........ (طبعاً فى المعقول يعنى ..... ) ، واللى هيبعتوا الاسئله ممكن يبعتوا بالاسم بتاعهم او لو محرجين ممكن يبعتوا باسم غير معروف .............
من ضمن الاقتراحات برده ...... ان التعليقات فى البوست بتاع الاسئله ده بعينه (الاسئله المقترحه) هتبقى معمول لها اشراف ، بحيث ما احناش ضمنين الظروف برده ......
واحد زى على علوكه او اشرف كوخه ممكن يدخلوا بغير معروف ويسألوا اسأله كخه .... ونبقى اتسببنا فى احراج للراجل او الراجله اياً كان .......



عموماً الموضوع بين اديكم ....... الفكره كلها اتعرضت ...... (اقصد فكرة البيت نفسه ) .... والفكره بتاعت الحوار برده اتعرضت ...... مستننين ارائكم ومقترحاتكم ......



صحيح برده احنا عايزين نسمى الفكره الاخيره دى اسم .... زى موضوع التاج كده ما اصطلح عليه انه اسمه تاج ......

يعنى عايزين نسمى البوست ده اسم ثابت مثال :

" فى بيتنا مدون " .....

"على القهوه " .....

"انا مين " ...........

" اقفش مدون " ......
" مدون فى ورطة " ........

كده يعنى .............
وعلى فكره الاسماء دى مش للاختيار ، دى للمثال .... يعنى عايزين اسماء تانيه .....
............
...............


بس...........


انتوا لسه قاعدين ............ الموضوع عجبكم ولا إيه .... انا عايز أروح ....

بيت المدونين تروحوا له
من هنا


سلاااام
ويكا
منقول من بيت المدونين

هناك 28 تعليقًا:

  1. فكره مبدعه
    والست اللي مابتختشيش دي اعطي البنر لحد بيعرف فوتوشوب ويلبسها نقاب ولا يهمك
    وعندي سؤال البيت هذا للمدونين المصريين بس ؟؟

    ردحذف
  2. موضوع هايل
    ومجهود زي الفل

    ردحذف
  3. اوك مستنين (:


    و روحت و شوفت و علقت (:

    (:

    فكرة حلوة على فكرة (:


    تحياتى

    ردحذف
  4. سؤال على الماشى كده يا نهى

    هو البيت ده فين؟

    يعنى بيوصلولوا منين

    ولينكه ايه؟

    ردحذف
  5. انا معاكم ياقلبى

    جزاك الله كل خير

    وتعالى استلمى هديتك

    عيد حب سعيد

    تحياتى

    ردحذف
  6. شغال

    نشترك اوكيز

    سولاماتوا عليكم

    ومستنى الموضوع اللى لنكه راح ده

    ردحذف
  7. الله ينور ياريس

    شغل تمام

    دى الرجاله ولا بلاش

    ردحذف
  8. انا رديت مرة هناك بس قلت اجي اسلم عليك لانك واحشاني مووووت
    وكنت جاي امسك في خناقك عشان انا دخلت اسأل عنك في البوست اللي فات لقيتك حذفتيه ^_^
    يارب تكوني بخير حبيبتي

    ردحذف
  9. صباح الفل يا نهى
    انا اجيا اصبح عليكى يا قمر
    صباحك قشطه بالبسبوسه
    امووواه

    ردحذف
  10. شكرا على المجهود اختى

    انا معاكم انشالله

    ابقى زورينى

    ردحذف
  11. محمود باحث عن حب
    ربنا يكرمك يامحمود
    كلنا لازم نتفاعل مع بيت المدونين لانه مهم اوى بالنسبة لكل مدون بجد

    ردحذف
  12. noora
    اهلا بيكى يانورا
    وبالنسبة للبنت اللى فى الصورة دى ويكا قال انه هيبقى يتصرف فيها ان شاء الله
    وبيت المدونين لكل المدونين مش للمصريين بس

    ردحذف
  13. faw
    طالما الفكرة عجبتك يبقى لازم تشترك

    ردحذف
  14. Ramy
    ربنا يكرمك يارامى
    وفعلا الفكرة حلوة اوى

    ردحذف
  15. مها البنا
    عنوان البيت هيبقى عندك حالا فى مدونتك:)

    ردحذف
  16. جايدا العزيزى
    ربنا يخليكى على الهدية الحلوة اوى اوى اوى
    والله انا فرحت بيها جداااااااااا
    تسلميلى
    هابى فالانتين

    ردحذف
  17. illusionist
    ان شاء الله الموضوع اللى لينكه راح هينزل تانى
    وان شاء الله تكون مشترك دلوقتى فى بيت المدونين

    ردحذف
  18. لولا وزهراء
    تمام يالولا لازم تكونوا معانا:)

    ردحذف
  19. ويكا
    الفكرة فعلا تستحق اننا نروج لها
    واحنا اللى لازم نشكرك

    ردحذف
  20. karmen
    ربنا يخليكى ياقمر شكرا على سؤالك بجد وبتنورينى
    وماتمسكيش فى خناقى علشان البوست نازل اهه ان شاء الله
    وانا الحمد لله بخير وانتى كمان واحشانى

    ردحذف
  21. mrmr
    صباح الفل يامراميرو
    ربنا يسعد صباحك ويبقى احلى من البسبوسة كمان
    انا بحب البسبوسة على فكرة جداااا

    ردحذف
  22. حسن
    سعيدة جدا بزيارتك يااستاذ حسن
    ونتشرف ان حضرتك تكون معانا
    وبجد نورت المدونة

    ردحذف
  23. لسه مرحتش هناك..

    جيت هنا الأول أقولك الفكرة واله جميلة جداً .. بيبقى صعب على واحدة زى حالاتى بتغرق فى شبر ميه انها تروح تجمع مع انى بكون حابة جداً أعرف ناس كتير متميزة ومحترمة ..

    الفكرة تمام ..بحييكى عليها

    هروح بقى أشوف

    :)

    ردحذف
  24. كويس انك قلتي علي البوست اللي فات لاني استغربت جدا وقلت ان عيب في الكمبيوتر او النت عندي ....
    حلوة اووي فكرة بيت المدونين والكلام اللي قلتيه جميل جدا
    ان شاء الله انا معاكم برغم اني مش عارفة هيكون ازاي

    ردحذف
  25. زهرة
    انا كمان صعب عليا اروح التجمعات وبكون زعلانة اوى من كده
    انما الفكرة هايلة جدا وهتحل المشكلة دى
    لازم تشتركى بقى

    ردحذف
  26. re7ab.saleh
    فكرته جميلة فعلا يارحاب والكلام مش انا اللى كاتباه
    بس انا فرحت اوى بالفكرة ومتحمسة لها جدا
    انتى بس روحى اشتركى وهتفهمى هناك كل حاجة
    والبوست اللى اتحذف هينزل تانى ان شاء الله

    ردحذف

ممكن تكتب رأيك هنا وممكن تناقشني وتنتقدني كمان لكن الغلط ممنوع :)