الأربعاء، ديسمبر 01، 2010

هنتخب ميييييييييين؟؟؟(2)




نعم انا وجدت الحل

اعتقد ان الاستاذ سعيد جارنا مهتم بتلك الاشياء ومؤكد انه سيفيدنى
وفى صباح يوم الجمعة وبعد انتهاء صلاة الجمعة تحديدا
تقابلت مع الاستاذ سعيد اثناء خروجه من المسجد
وجلسنا سويا على احد المقاهى القريبة من منازلنا
-والله يااستاذ سعيد انا كنت عاوز اروح انتخب السنة دى
رد الاستاذ سعيد بحماس
-هايل يأستاذ امين ده صوتك امانة ده حقك الد........قاطعته لاننى لست بحاجة للمزيد من هذا الكلام ...
-ايوة لكن انا معرفش حد خالص فياريت يعنى لو ترشحلى انت حد انتخبه
رد عليا الرجل بحدة مبالغ فيها
-ايه ده ياراجل انت بتقول ايه ارشحلك حد هو احنا بنشترى طماطم ياامين دى انتخابات يعنى انت اللى لازم تختار اللى هيمثلك فى المجلس
شوف.... انا ممكن اخدمك برضه انت ممكن تسألنى على اى مرشح وانا اقولك رأيى فيه وفى برنامجه وبعد كده انت حر ..اختار اللى يعجبك
اعجبتنى الفكرة رغم انها سخيفة الى حد ما وسألته عن احد المرشحين ...كانت لافتاته معلقة امام المقهى
رد علي قائلا
-والله هو مش قد كده يعنى...انا مستحيل انتخبه...بس انت حر
غادرنا المقهى وانا طوال الطريق اتساءل مارأيك بفلان واشاور على اللافتات المعلقة بالشوارع
وكانت اجاباته تأتى هكذا متوالية
-انتخبناه السنة اللى فاتت ومعملش حاجة..
-لالالا بلاش الراجل ده انا عارفه شخصيا...بلاش...بلاش
-ياعم بلاش الناس دى مانتتخبش حد منهم
كنت قد مللت من الاسئلة فقررت ان اسأله سؤالا اخير
-هو انت هتنتخب مين؟
وكأنه كان ينتظر السؤال
أخذ يكلمنى عن احد المرشيحن ويمدح فيه ويذكر صفاته الجميلة وفى النهاية قال
- ده احسن واحد فيهم وانا هنتخبه وكل الناس هتنتخبوا
وقتها كنت وصلت لقمة الملل وكان لسان حالى يقول
-ياشيخ منك لله ماكان من الاول بدل ماسمعتنى الكلمتين اياهم دول...ده انت راجل ممل وماعندكش ضمير والله
تدوخنى كل ده علشان برضه انتخب اللى انت عاوزه...انا اللى غلطان من الاول
وصلت بيتى وقد استقريت على المرشح الذى سينتخبه سعيد
وفى يوم السبت ذهبت لعملى وفى اثناء ركوبى للميكروباص
سمعت احد الركاب يتكلم عن الانتخابات وعن احد المرشحين
الذين سألت عنهم الاستاذ سعيد ولكنه لم يشجعنى على انتخابه
ووجدت كلامه عنه مختلف تماما ويقول
انه رجل نزيه ومحترم وهو افضل المرشحين فعلا
زادت حيرتى ولكنى قررت ان انتخب هذا الرجل
خصوصا واننى شعرت بأن الاستاذ سعيد له مصلحة ما عندما ينجح الشخص الذى سينتخبه
وفى صباح يوم الانتخابات استيقظت مبكرا وارتديت ملابسى وجلست مع اسرتى
كان اولادى سعداء جدا وفرحين بأن والدهم شخص ايجابى وسيذهب لأداء واجب وطنى
وهذا ماجعلنى أشعر بأننى جندى ذاهب الى معركة او مناضل قومى وكنت فخور بنفسى جدا
وفى ساعة الصفر وضعت بطاقتى الانتخابية بمحفظتى و نزلت الى الشارع متجها الى اللجنة الانتخابية
كانت الساعة تعدت الثانية ظهرا وكانت الشوارع مزدحمة
كنت أريد ان يعرف جميع الناس اننى ذاهب للانتخاب
وما ان اقتربت من اللجنة حتى وجدت سيارة اسعاف تقف امام الباب
وبعض الاشخاص يحملون رجلا ويضعونه فيها
توقفت قليلا قبل ان اقترب اكثر لأجد ماذا يحدث
وجدت الشرطة تقبض على رجلا وتضعه فى سيارتها
وهناك مشاجرات وسباب وزحام شديد
فى تلك اللحظة دار حوار بينى وبين نفسى
او بمعنى اوضح دار حوار بينى وبين ضميرى
-ايه ياأمين واقف كده ليه ؟ ماتروح تنتخب وتخلص نفسك
-اروح فين ده هناك ولا يوم القيامة ده الناس الاسعاف بتشيلهم
-وانت مالك هو انت هتتخانق انت هتنتخب وتمشى
-ياسلالالالالالالالالالام هو انا هستنى لما اخد كرسى فى دماغى ولا ضربة من اى حد
- طيب والمرشح اللى انت رايح تنتخبه ده وصوتك اللى كنت هتديهوله
-يعنى هو كان من باقية اهلى ولا صوتى اللى كان هينجحه؟
لو له نصيب هينجح ان شاء الله
-طيب وولادك اللى مستنيينك فى البيت وفرحانين هتقولهم ايه؟
-اااااااااه هما دول المشكلة!!!!!!!!اعمل معاهم اييييه؟
سكت قليلا افكر فى موقف اولادى منى بعدما يعرفوا ان والدهم شخص جبان
ولكن بعد لحظات خطرت على بالى فكرة جهنمية
استدرت مرة اخرى عائدا الى المنزل
ودخلت احد المكتبات واشتريت زجاجة حبر احمر
وقمت بإغراق إبهامى فيها
ثم تخلصت من الزجاجة
ووصلت المنزل

-وجت سليمة الحمدلله:)

هناك 24 تعليقًا:

  1. ههههههههههه

    والله احسن انه يرجع لولاده جبان من جواه في نظرهم احسن من انه يرجعلهم في سيارة اسعاف

    ساعتها محدش من المرشحين هينفعه هو وولاده


    جميله القصه يا نهى وطريقتك سهله اوي بتجذب القارئ ليها

    ردحذف
  2. Dr/walaa salah

    معاكى حق والله بس هو برضه اتصرف:)
    شكرا ليكى على رأيك وذوقك
    ربنا يكرمك

    ردحذف
  3. لسه قريها...

    هو طبعا موقفه مش صحيح، لكن منطقي جدا بالنسبة للشخصية اللي رسمتيهاله.. وبيعبر طبعا عن شريحة كبيرة من المجتمع .. ويوضح أسباب سلبيتها من الداخل (أقصد من داخل نفوسها)!!

    كفاية كده لأني متأخر على الشغل... الله يسامحك :)

    تحياتي.

    ردحذف
  4. ماجد القاضى
    هو فعلا اتصرف حسب تكوين شخصيته خصوصا انه كان رايح اصلا لانه غيران من الناس اللى بتروح تنتخب
    زيارتك وتعليقك اسعدونى
    الف شكر لحضرتك
    وان شاء الله تلحق الشغل:)

    ردحذف
  5. هما نجحوا فعلاً انهم يخلوا محدش يروح ينتخب
    ولا حول ولاقوة إلا بالله...
    تحياتى لشخصكم الكريم

    ردحذف
  6. ههههههههههه

    فكرتنى بالعبارة الشهيرة

    عش جبان ولا تموت اسد

    عجبتينى اوووووووووووووى يانهى

    وانتظر اختى


    تحياتى

    ردحذف
  7. صباح الخير
    انا معلقتش علي الجزء الاول لحد ما اعرف هينتهي علي ايه
    بجد الحلقتين حلوين و هو ده رد الفعل الطبيعي لاغلب المصريين ماشيين جنب الحيط خايفين لو شاركوا في حاجة او اخدوا موقف يروحوا ورا الشمس . ماشيين بمبدأ من خاف سلم.
    عجبني اوي تعريف الديمقراطية في الجزء الاول :) هي دي فعلا الديمقراطية في بلدنا
    تحياتي و في انتطار الجديد

    ردحذف
  8. هو تعليقاتي مش بتوصل ؟؟؟

    ردحذف
  9. هو خاف على نفسه عشان خاطر عياله بس جو الانتخابات دلوقتي تخلينا نقول مش فارقه صوتك امانه بتتسرق منك وانت عايش وحتى بعد الموت لما يبقى في انتخابات بجد
    يبقى ساعتها الصوت امانه وهي يعني صحته مش امانه
    تقبلي تحياتي وتهنئتي للاستاذ امين بالعوه السالمه من ارض المعركه

    ردحذف
  10. مصر فى مهب الريح

    فى خلال الثلاثين عاما الماضية تعرضت مصر الى حملة منظمة لنشر ثقافة الهزيمة بين المصريين, فظهرت أمراض اجتماعية خطيرة عانى ومازال يعانى منها خمسة وتسعون بالمئة من هذا الشعب الكادح . فلقد تحولت مصر تدريجيا الى مجتمع الخمسة بالمئه وعدنا بخطى ثابته الى عصر ماقبل الثورة .. بل أسوء بكثير من مرحلة الاقطاع.

    1- الانفجار السكانى .. وكيف أنها خدعة فيقولون أننا نتكاثر ولايوجد حل وأنها مشكلة مستعصية عن الحل.
    2- مشكلة الدخل القومى .. وكيف يسرقونه ويدعون أن هناك عجزا ولاأمل من خروجنا من مشكلة الديون .
    3- مشكلة تعمير مصر والتى يعيش سكانها على 4% من مساحتها.
    4 - العدالة الاجتماعية .. وأطفال الشوارع والذين يملكون كل شىء .
    5 - ضرورة الاتحاد مع السودان لتوفير الغذاء وحماية الأمن القومى المصرى.
    6 - رئيس مصر القادم .. شروطه ومواصفاته حتى ترجع مصر الى عهدها السابق كدولة لها وزن اقليمى عربيا وافريقيا.

    لمزيد من التفاصيل أذهب إلى مقالات ثقافة الهزيمة بالرابط التالى
    www.ouregypt.us

    ردحذف
  11. نهى
    انا قلبى وجعنى من الانتخابات دى

    بس عرف يتصرف برضوووو

    وحشانى يا قمر
    معليش مقصرة معاكى
    مشغوله اوى اليومين دول

    ردحذف
  12. عجبني اوي الجزء بتاع هي طماطم دي ^_^
    المشكلة في معظم الشعب المصري انه ماعندوش وعي سياسي وفي ناس لسه بتسأل نفسها ايه الفرق بين الجمهورية والمملكة
    الناس مشغولة بالبحث عن لقمة العيش ومشغولة عن اي حاجة تاني
    وهذا هو المطلوب من اصحاب المصلحة
    اسلوب رائع تسلم ايدك
    تحياتي

    ردحذف
  13. :)
    انتخبت أكثر من ست مرات وكل مرة أدخل وأخرج في هدوء :)

    ردحذف
  14. عارفة حتى لو كان دخل كان ممكن الحزب الواطي يصلحله غلطه برضه ههههههههههههههههه...كويس انه اشتري حبر مش ميكركروم

    ردحذف
  15. جميلة جدا يا نهى وخيالك واسع عجبنى تصرف الاستاذ
    انا لو مكانة حعمل كدة علشان مليش فى الانتخابات واللى من نصيبنا حيصبنا
    وفقك الله شكر ياقمر على القصة

    ردحذف
  16. مساء الجمال على اجمل بنوتة
    ايزكي انهى
    يارب تكوني بالف خير
    زي ماقالوا الكل احسن يكون جبان ولا يخسر نفسه عشان انتخابات
    هم هيعملوا ليه ايه الي هيتخبهم
    ولا شي
    هيسرقوا وينهبوا من تحت لتحت
    تقبلي مروري
    سلامي لاجمل وارق نهى.

    ردحذف
  17. هاهاهاهاااااااااااااااااااا
    جميييييييييييييييل البوست الساخر ده على الوضع المؤسف ده

    لولا

    ردحذف
  18. حاجه تفقع المراره الانتخابات دى
    سبحان ما تعدى على خير بدون خساير فى الارواح

    ردحذف
  19. انا لو مكانه بصراحة ونزلت هرجع واقول منتخبتش :)
    أو هحاول ادخل ايا كانت النتائج

    بس اللى عملته فعلا
    انى فضلت فى بيتى مستنية اسمع التعقيب على اليوم الانتخابى
    اللى ببقى متوقعة احداثه من قبل ما اعرفها :)

    تحياتى

    ردحذف
  20. والله حل جميل المفروض كله يعمله علشان يقنع نفسه قبل ولاده .
    تحياتي . .

    ردحذف
  21. أول زيارة ليه

    وإن شاء يكون تعليق مناسب

    هو الموضوع جميل

    بس لازم إحنا نكون نعرف مين إلي ح ننتخبو معرفة جيد مش ننتخب أي حد كدة

    لإن إلي إحنا ح ننتخبوا دا ح يتكلم بصوتنا

    فيجب إختياري أو صوتي ميكنش إلي لواحد عنده ضمر

    واحد بيخاف ربنا مش واحد ..........

    بس
    معلش في الرد
    لو كل واحد عمل زيك
    معلش محدش حينجح ولا حد حينتخب
    ويجب علي كل إنسان إنه ميخفش من حاجة

    ويجون جريئ في التعبير عن رأية

    ردحذف
  22. أسفه على التأخير
    موضوع الانتخايات ده بيخنقني حتى لو انتخب
    كده أو كده النتيجة واحده:(
    تحياتي يا جميله

    ردحذف
  23. هههههههههههههه
    كالعادة كل مرة تتالقين عن السابق
    ماشاء الله
    وانا معاهم يرجع لاولاده بالسلامة احسن له ولهم
    لاننا سواء اتنخبنا او لا
    الموضوع محسوم ياولدى

    ردحذف
  24. مبسوطة جدا انها عجبتكم
    شكرا لكل الناس اللى قرأت البوست وشكرا لكل الناس اللى ردت
    الف شكر ليكم

    ردحذف

ممكن تكتب رأيك هنا وممكن تناقشني وتنتقدني كمان لكن الغلط ممنوع :)