الأحد، نوفمبر 28، 2010

كيلو اللحمة ب14 جنيه



ياااااااااااااااااه الايام بتجرى بسرعة اوى....العيد الكبير خلاص فاضل عليه كام يوم ربنا يستر بقى من طلبات العيال وامهم

لما اشوف كده ايه اخبار النهاردة ولو ان الجرايد اخبارها كل يوم زى ماهى.......

وقبل ان ابدأ بقراءة اول خبر

"يلقى زوجته من البلكونة بسبب لحمة العيد"

-ياساتر يارب هو فيه كده؟

-ياآميييييييييييييييييين......

استر يارب كده تبقى عاوزة حاجة..........ايوة ياستى ماتوطى صوتك ده شوية ولا انتى فرحانة بالاسم

وخرجت حرمنا المصون من المطبخ وجلست بجوارى

-ايه بقى هتجيب لنا كام كيلو لحمة السنة دى:)

لم التفت لها واكملت قراءة الخبر بصوت عالى(يمكن تخاف وترجع المطبخ تانى)

-ألقى عامل بزوجته من الطابق الثاني بسبب مطالبتها له بأموال لشراء لحمة العيد.....

-انت هتهزر ياراجل

قالتها زوجتى وهى تضحك واكملت

-قول بجد هتجيب كام كيلو لحمة..........

اسمع ياآمين

وكلمتنى بنبرة حادة

-انت لازم تكتر الكمية السنة دى ده العيد ولازم يكون الاكل كتير

مش لازم كل سنة العيال يتخانقوا مع بعض على الاكل العيال لازم تفرح

-يعنى عاوزانى ادبح لكم عجل... انتى مش عارفة الكيلو بقى بكام ؟

مانجيب على قدنا وخلاص

-امين........ اتصرف انا ماليش دعوة ولا انت عاوزنى اكلم اخواتى وهما يتصرفوا معاك بطريقتهم

-خلالالالالالالالالالالاص هى حصلت اخواتك ...حاضر هتصرف

وفى اليوم الثانى ذهبت لعملى لم استطع التركيز طلبت فنجان قهوة سادة من فرغلى لعله يستطيع ان يبعد عنى الصداع وجلست افكر بصوت عالى

- هتعمل ايه ياامين اجيبلهم منين لحمة وهدوم للعيد وكمان عاوزين يخرجوا

لا وكمان قال عاوزين ياكلوا بره ........يعنى هو علشان نعيد لازم نصرف اللى معانا كله وبعدين انا مهما عملت ومهما اخدت من الناس اكراميات مش هيكفى طلبات الهانم وعيالها

-مالك يااستاذ امين انت بتكلم نفسك؟

-اعمل ايه يافرغلى انت عارف بقى زنقة العيد واللحمة اللى بتغلى كل ربع ساعة

ده انا قريت ان الكيلو وصل ل100 جنيه فى بعض المناطق.

-لالالالالا يااستاذ امين سيبك من الاسعار دى

الكلام ده عند الناس اللى معندهاش ضمير والحرامية انما عند الحاج محى الكيلو ب14جنيه ولحمة ايييييييه ماقولكش عليها

-14جنيه يافرغلى؟؟؟؟؟؟؟؟؟؟؟؟!!!!!!

-اه والله الحج محى ده اصله جوز اختى وراجل عارف ربنا ويكره الجشع والطمع والنصب راجل مستقيم وبتاع ربنا وضميره صاحى

عنوانه فى الكارت ده روح عنده وقوله انك من طرفى ..وادعيييييلى

مع حماس فرغلى تشجعت وذهبت للحاج محى الجزار بعد انتهاء العمل ولم اصدق نفسى فعلا كيلو اللحم ب14 جنيها والزحام شديد جدا...استطعت الوصول للحاج محى واشتريت منه كمية كبيرة ولم انسى شراء الكبدة وبعض اللوازم الاخرى ...وصلت البيت وفرحت زوجتى جدا حتى انها لم تسألنى من اين جئت بثمن كل هذه الكمية!

وفى صباح يوم العيد وتحديدا بعد انتهاء صلاة العيد قامت زوجتى بإعداد الكبدة واكلناها كوجبة افطار وكانت رائعة لدرجة ان ابنى الصغير قال وفمه ممتلىء بالطعام

-حلوة اوى الكبدة دى يابابا دى احلى كبدة كلتها فى حياتى ابقى هات منها على طول

حمدت الله وشكرته وانا طوال الوقت ادعوا لفرغلى وللحاج محى

وبعد الافطار قامت زوجتى لاعداد الشاى وجلست اتابع ماكتب فى صفحة الحوادث

ووجدت خبرا جعلنى اقفز من مكانى

"القبض على جزار يبيع لحم الحمير قبل العيد"

حدثت نفسى قائلا:

-ايه ده بقى....معقول يكون هو...الخبر بيقول انه فى المكان اللى فيه الحج محى بس مش شرط يعنى ماالجزارين كتير

وبعدين احنا كويسين اهه وقاعدين الحمدلله وام العيال بتحضر الغدا فى المطبخ ...مفيش حاجة... مفيش حاجة ....اعوذ بالله من الشيطان

ظللت جالسا اترقب زوجتى واولادى حتى بدأ المغص يتسلل الينا واحدا تلو الاخر وقام الجيران بإستدعاء الاسعاف ودخلنا المستشفى

ورغم الامى وغيظى من اننى اكلت كبدة حمار

الا اننى كنت سعيد جدا لاننا قضينا العيد بالمستشفى وتخلصت من مصروفات التنزه ليلا وشراء طعام اضافى واقنعت نفسى بأن وجودنا فى المستشفى (تغيير جو وفسحة من نوع جديد)

اما فرغلى

انا هخرب بيته بس لما ارجع له


ـــــــــــــــــــــــــــــــــــــــــــــــــــــــــــــ







البوست الجاى ان شاء الله هيكون مع امين والانتخابات...بس اعرف رأيكم الاول لان تقريبا دى بالنسبة لى تجارب اولية فى كتابة حاجات زى كده يعنى رأيكم يهمنى وهيفيدنى جدا

اشوفكم على خير:)




هناك 52 تعليقًا:

  1. ماشاء الله الفكرة جميلة...
    اقرئي كتير لتعززي ملكاتك اللغوية والأدبية...
    (:
    تحياتي

    ردحذف
  2. حلوة يا نهي الاسلوب بسيط و سلس
    استمري وما تقلقيش و احنا معاكي
    ما كلنا بنجرب في بعض :)
    في انتظار حلقة الانتخابات
    تحياتي

    ردحذف
  3. صباح الفل والورد والياسمين على اجمل وارق نهى
    روعة عجبتني
    فيها عبره
    الطمع مهلكه
    حصل لهم موقف عمرة الواحد مابينسية
    استمري بالكتابه
    بجد جمسيلة جدا
    فيها نوع من الكوميديا
    ربنا يوفقك
    تقبلي مروري
    سلامي لاجمل وارق نهى.

    ردحذف
  4. السلام عليكم ورحمة الله وبركاته
    اسلوبك وفكرتك والمضمون اكثر من رائع
    بجد برافو عليكى
    وفى الشكل الجديد بالبوست
    رائع يانهى استمرى وفىى اتظار المزيد من سلسه ازمة ضمير
    واتمنى لك كل توفيق

    ردحذف
  5. حلوة جدا
    على فكرة لحمة الحمير بتتعرف بسهولة , لكن لو مفرومة صعب جدا معرفتها
    نسيج اللحمة نفسه بيبقى تخين و خشن , أتخن من أي لحم بقري

    منتظرين بقية يوميات الأستاذ أمين
    مشكورة جدا يا نهى

    ردحذف
  6. حلووووووه قوى با نها
    اسلوب سلسل وجميل
    بدايه موفقه
    استمرى يا قمر
    ازمه ضمير دمها خفيف
    سلاموووووووز بقى

    ردحذف
  7. جميل يا نهى الفكره والإسلوب والهدف

    معتقدش ان ليا تعليق خاص على الاسلوب

    اد ما ليا تعليق على الموضوع نفسه

    مش عارفه ليه كلمة (أزمه) بقت بتكر على ودانى كتير

    من اسبوع صديقه ليا قالتلى فى وسط كلامها ان البلد فيها (أزمة أخلاق) وانتى بتقولى (أزمة ضمير) وهلم جرا

    يا ترى العيب فين؟

    ردحذف
  8. رائعه فعلاً أنا بيعجبني أوي الواقعيه دي خصوصاً في مواضيع بتمس الناس في الشارع و بجد أسلوبك جميل و سهل لكن مش سطحي و خفة الدم بقدر مش محشوره حشر
    تحياتي ليكي و متابعاك دائماً ان شاء الله

    ردحذف
  9. هههههههههههههههههههههههههههههه
    ياعيني ناس مطحونة بجد
    بوست لذيذ
    تحياتي

    ردحذف
  10. حلووووووووووو اووووووى يانهى

    اولا الطرح والاسلوب

    اجدتى يافتاتى

    اشكرك

    تحياتى

    ردحذف
  11. كنت متوقع ان الموضوع هايبقي جميل جدا لاني عارف ان اسلوبك رائع دايما وكلنا في انتظار باقي الحلقات بشغف
    دام ابداعك
    دمتي بخير

    ردحذف
  12. متتاخريش بس في الحلقة الجاية

    ردحذف
  13. سلام عليكم /بجد انا ضحكت اوي
    وقبل ماتخشي في الانتخابات عايز اعرف
    امين وولاده بداو ينهقوا ولا لسه
    بسيطه القصه يانها ورائعه

    ردحذف
  14. نهى

    انت ذكرت فى الحدوثة الفائدة من قضاء العيد فى المستشفى
    وتوفير المصاريف
    بس هناك فائدة مستخبية
    لم يعرفها الا الابن الصغير الذى ابدى اعجابه بالكبده الحميرى ...الكبدة الحميرى كلها فايدة
    بيقولوا الحمار بيتهان وبيضرب كثييير فبتتكون مضادات
    حيوية فى كبده
    واى حد بياكلها تزداد مقاومته وصبره وتحمله
    واحنا فى امس الحاجة لتلك الفوائد
    هههههههههه

    بوست جميل
    فى انتظار التالى

    تحياتى وتقديرى

    ردحذف
  15. بيتنا القديم
    شكرا ليك
    وانا فعلا بحاول اقرأ كتير

    ردحذف
  16. mona abo-els3od
    شكرا ليكى على تشجيعك ياقمر
    وان شاء الله البوست الجديد نازل قريب

    ردحذف
  17. خواطرى مع الحياة
    حبيبتى ربنا يكرمك على ذوقك
    على فكرة انا مش عارفة اعلق عندك خالص هو ايه المشكلة؟

    ردحذف
  18. wise
    مبسوطة من تعليقك
    طبعا انتى عارفة انى بحب كتاباتك اوى وخصوصا هل لنا ان نعود
    تسلمى ياقمر

    ردحذف
  19. اشكرك على رأيك
    بس متهيألى ان مش كل الناس عندها المعلومات دى علشان كده الناس احيانا بتشتريها وتاكلها ويقبضوا على الجزارين
    شكرا ليك جدا والحلقة الجديدة نازلة قريب

    ردحذف
  20. mrmr
    ربنا يكرمك يامراميرو
    شكرا ليكى بجد على ذوقك

    ردحذف
  21. مها البنا
    نورتى ياقمر
    كلمة ازمة فعلا بقت مكررة كتير علشان فعلا احنا بنعانى من حاجات كتير
    فعلا فى ازمة اخلاق وازمة ضمير

    ردحذف
  22. شيرين سامى
    رأيك أسعدنى جدا بجد
    نورتى ياقمر وشكرا لذوقك

    ردحذف
  23. karmen
    نورتى ياقمر
    وتسلمى

    ردحذف
  24. جايدا العزيزى
    نورتينى بجد
    شكرا ليكى
    وعيد زواج سعيد

    ردحذف
  25. سندباد
    بجد الف شكر على كلامك
    ربنا يكرمك

    ردحذف
  26. سندباد
    لا ان شاء الله مش هتأخر

    ردحذف
  27. سواح فى ملك الله
    الف شكر ليك
    امين وولاده راحوا المستشفى ولحقوهم قبل ماينهقوا:)
    جت سليمة الحمد لله
    بجد شكرا وربنا يكرمك

    ردحذف
  28. sal
    عارف فى ناس لو سمعت الكلام ده
    هتبيع لحمة الحمير وخصوصا الكبدة اغلى من اللحوم التانية...مش لازم حد يعرف المعلومة دى
    شكرا لرأيك فى البوست

    ردحذف
  29. لحمة يادنيا لحمة

    فكرة جميلة

    تقبلي مرورى

    ردحذف
  30. جميل جميل اكثر من رائع متابع لحضرتك اكتبي فابدعي ما شاء الله ربنا يبارك فيك وفي موضوعاتك جاري قراءة باقي الموضوعات

    ردحذف
  31. محاولة طيبة لسبر أغوار ملامح أناس في حياتنا اليوم تعركهم الحياة بلا رحمه ... تحياتي لك .

    ردحذف
  32. القصه جميله انما حكاية لحم حمير تعبت بطني بصراحه بس بالنسبه ليكي العيب مش فيكي ولا في القصه العيب في الضمير اللي مات عند البشر وبقينا نسمع قصص زي ده
    تقبلي تحياتي وشدي حيلك انت غايبه بقالك كتير لازم تعوضي اللي فات

    ردحذف
  33. بداااااااااية
    لاء يا نهي دي مش بداية دا انت بجد محترفة
    حلو اووي بجد
    ومستنية الباقي
    اسلوبك بجد بيعجبني جدا
    وحشاني يا نهي
    وبتمني اعرفك بجد

    ردحذف
  34. انا شفت كلمة كيلو اللحمةب 14 جنية واتجننت قلت لازم ادخل اشوف في اية
    حلوة مدونتك وبجد طريقتك حلوة اووي في الكتابة
    انا هقرا اللي قبل كدة كمان

    ردحذف
  35. haytham alsayes
    شكرا ليك
    نورت المدونة

    ردحذف
  36. غير معرف
    الف شكر ليك
    وسعيدة ان المدونة عجبتك
    نورت المدونة

    ردحذف
  37. تركى الغامدى
    اشكرك جدا
    نورت المدونة

    ردحذف
  38. بعد التحية
    اسلوب مميز ورائع اري انه يجمع بين العامية والفصحي له طابع خاص
    دمتى بخير

    ردحذف
  39. eng-semsem
    اعتذر عن الازعاج اللى سببته:)
    بس للاسف فعلا ده واقع
    اكيد هحاول اعوض اللى فاتنى
    نورت

    ردحذف
  40. re7ab.sale7
    والله ماعارفة اقول ايه
    ربنا يكرمك يارحاب
    انا كمان والله نفسى اوى انى اتعرف عليكى
    اكيد هيحصل ان شاء الله

    ردحذف
  41. عاجبنى جدا اسلوبك

    تحسي انه مشوق جدا جدا

    والبساطة اللى فيه بتدل على بساطة روحك وفكرك العالى

    تقبلى تحياتى

    ردحذف
  42. أنا وحماتى
    اهلا بيكى ونورتى المدونة
    شكرا ليكى على رأيك
    ونورتينى
    اسم مدونتك حلو:)

    ردحذف
  43. غير معرف 2
    شكرا ليك على رأيك وذوقك
    واهلا بيك فى المدونة

    ردحذف
  44. ذو الوجه المبتسم
    شكرا ليك على رأيك
    اسعدنى جدا
    نورت المدونة

    ردحذف
  45. جميلة الفكرة والنهاية اجمل تقبلى مرورى
    واسمحيلى بمتابعتك وشكرا

    ردحذف
  46. هبة فاروق

    أهلا بيكي في المدونة
    متابعتك تسعدني وتشرفني
    شكرا ليكي علي رأيك
    نورتي المدونة

    ردحذف
  47. حفلة وانت معزوم تعالي خد هديتك ^_^

    karmenhome.blogspot.com/2010/11/blog-post_30.html

    ردحذف
  48. karmen
    ماشى ياكارمن انا جاية اهه:)

    ردحذف
  49. مدوونتك حلوة اوى يا نهي واسلوبك مميز وشيق
    متابع الي الابد

    تحياتي نهي

    ردحذف
  50. غير معرف
    اهلا بيك فى المدونة
    متابعتك اكيد هتسعدنى
    شكرا ليك جدا

    ردحذف
  51. ما شاء الله تحفه بجد..تسلم ايدك انا اندمجت جدا وصدقت ان ف واحد اسمه امين وفرغلى..من تفوق لتفوق كده دايما يااااااارب..
    koki

    ردحذف
  52. شكرا ياكوكى ربنا يكرمك
    والف شكر على الدعوة الحلوة دى
    اتمنالك التوفيق

    ردحذف

ممكن تكتب رأيك هنا وممكن تناقشني وتنتقدني كمان لكن الغلط ممنوع :)