الثلاثاء، أغسطس 31، 2010

ان كنت ناسى افكرك.....طيب وانا مين يفكرنى؟؟؟؟؟




الحقيقة من اخر بوست كتبته وانا بفكر فى موضوع البوست الجديد رغم المشكلة او العطل اللى حصل بالاضافة لظروف سفرى لكن حبيت انى ارتب افكارى واشوف موضوع مناسب ارجع به للمدونة.


وامبارح فقط والحمد لله طبعا على كل شىء خطر على بالى فكرة حلوة جدا واتفقت مع نفسى انى هكتبها اول ماافتح الكمبيوتر ده لو ربنا اعطانى العمر طبعا.......


لكن حصل اللى ماعملتش حسابه..


انا نسيت كنت عاوزة اتكلم فى ايه........ياخبر ابيض.....الفكرة راحت فين؟

وفضلت احاول افتكر انا كنت عاوزة اكتب ايه لكن بلا جدوى ...وللاسف كل اللى فاكراه انها كانت فكرة حلوة جدا..وعلى فكرة دى مش اول مرة تحصل معايا...........حكاياتى مع النسيان مش بتنتهى لغاية هنا..انما فى اكتر من حكاية واكتر من موقف.


يعنى مثلا...

أحيانا لما يكون معايا حاجة وأشيلها فى مكان وارجع ادور عليها مش بلاقيها غير بتوفيق من عند ربنا او حد ممكن يلاقيها بالصدفة واخر حاجة ضاعت منى كانت سماعة موبايلى اللى بدور عليها وقلبت عليها البيت مش لاقياها...ياترى ممكن اكون حطيتها فين؟

اكتر حاجة كانت بتغيظنى وتفرسنى وتعكنن عليا كانت ايام الدراسة...انا مرت عليا فترة فى حياتى كنت بفتكر كل حاجة والفترة دى تقريبا كلنا بنبقى شاطرين فيها وهى فترة ابتدائى...بعد كده مابقتش بفتكر اوى يعنى (يمكن علشان ماكنتش بذاكر اوى ولا ايه مش عارفة) المهم مرت السنين وبقيت فى فترة الجامعة و كانت اصعب فترة فى حياتى بصراحة انا مش النوع الدحيح... انا بذاكر على قدر المستطاع.. والمستطاع بالنسبة لى هو قبل الامتحان بأسبوع بس كانت مذاكرة بجد وكانت المواد اللى عندنا بعضها نظرى والباقى كله محاسبة واحصاء ورياضة ...فى النظرى لو غلبت اوى يعنى كنت بطلق لخيالى العنان وهات ياتأليف (فى صميم المنهج طبعا) لكن لو عملى ودى مشكلتى كنت ببقى فى نص هدومى من المراقب اللى شايفنى قاعدة لغاية نص الوقت عنيه مش بتتحرك من على السقف...وفى الاخر كنت بضطر اكتب اى حاجة وطبعا فى النهاية النتيجة بتكون معروفة وبتعلن عن نفسها .

وبمناسبة ذكر الامتحانات انا ياما خرجت من الامتحان ونسيت اذا كنت كتبت رقم الجلوس على الورقة ولا نسيت وكنت بفضل على اعصابى وماقدرش اتكلم ولااشتكى (خايفة من التهزيق طبعا) لغاية يوم النتيجة... والحمد لله كل مرة كنت بكون كاتباه.

حاجة تانية كمان بقى وهى انى بنسى الحاجة اللى كنت عاوزة اعملها ......عملتها ولا لسة......يعنى مثلا ممكن انسى انى قفلت باب الشقة كويس.. او حاجة كنت عاوزة اشتريها.. وطبعا كل مااروح السوبر ماركت لازم انسى طلب من الطلبات...

اكتر حاجة بتحرجنى فى الحكاية دى هى انى لو شوفت شخص لاول مرة بنسى شكله يعنى لازم اشوفه اكتر من مرة علشان افتكره واعرفه ولكم ان تتخيلوا لما حد بيشوفنى وانا لسة ماحفظتش شكله ويقابلنى فى الشارع وانا اعدى من جنبه عادى جدا ....حاجة سخيفة جدا بجد...

بس فى حاجات بفتكرها ومش بنساها....

انا مش بنسى التواريخ الحمد لله يعنى اعياد الميلاد والمواعيد المهمة والذكريات الحلوة وممكن يكون فى تواريخ فى دماغى مش لاقية لها مناسبة...اللهم لك الحمد.

كمان فى حاجة تانية مش بنساها......انا مش بنسى تصرفات الناس معايا يعنى سواء كانت حلوة او مش حلوة ولابنسى الجمايل ابدا...

هى قلبت دراما كده ليه؟.....المهم خلينا نتكلم بقى فى الموضوع الجديد والفكرة الجديدة اللى فكرت فيها بعد الفكرة اللى نسيتها....

النهاردة هنتكلم عن....

عن....

عن....

يووووووووووه نسيت!!!



هناك 43 تعليقًا:

  1. النسياااااان

    عندما نذكر النسيااان فأنتِ تذكورينى انا (:(:

    شوفى انا مش هحكى كتير غير موقف واحد

    انا فى مرة بتصل بعمى اه بأمانة بعمى
    هههههههه

    و قفلت السكة اول ما حد رد عليا علشان نسيت اسمه

    كفاية كدة عليكى

    ههههههههههههههههههههه

    فى مواقف طبعا كتير

    بس دة علشان اقفل خالص الموضوع او ان انتى تنفسينى (:

    هههههههههههه

    شكرا ليكى

    على ايه

    على الموضوع الجامد دة

    اللى فكرنى بالموقف دة


    ربنا يحفظك و متبقيش كده

    ردحذف
  2. أنا كنت عاوزه اعلق واقول....


    أقووول......

    أقووول.....


    يوووووووه


    نسيت برضه


    شكلها عدوى وماشيه فى البلد (:


    جميل البوست يا نهى

    ردحذف
  3. إيه ده !!
    أنا إيه اللي جابني هنا ؟؟
    D:
    حلو جدا بجد . .

    ردحذف
  4. Ramy
    هههههه
    حد ينسى اسم عمه....متهيألى مفيش مواقف اصعب من كده
    واضح ان النسيان ده بقى حالة عامة

    ردحذف
  5. نهى ..
    البوست دة عاجبني اوي ..
    بس اعتقد ان النسيان دة له علاتقة بجينات الوراثة ..
    انا باكتب كل حاجة عشان مانساش .. و اسماء بتكتب على ايدها !!
    :)
    فماتقلقيش ..
    دة تقريبا التطور الطبيعي لجيناتنا الوراثية :)

    ردحذف
  6. مها البنا
    طبعا يابنتى النسيان معدى انتى بتقولى فيها
    بس المشكلة بقى العدوى دى لما بتنتشر اوى بتبقى صعبة حبتين

    ردحذف
  7. faw
    اهلا بيك فى المدونة اتمنى انها ماتكونش الزيارة الاخيرة
    شكرا على رأيك
    وكل سنة وانت طيب

    ردحذف
  8. اللى عايز اقوله اقوله اه نسيانك صعب اكيد تحياتى ليكى تقبلى مرورى

    ردحذف
  9. شيماء على
    بنت خالتى العزيزة افهم من كلامك ان عيلتنا نساية بطبيعتها
    يعنى الموضوع وراثى بحت....طيب انا فعلا بكتب الحاجات اللى عاوزة اشتريها مثلا بس برضه ممكن انسى انى أقرأ حاجة من الورقة برضه...
    بقالك كتير مانورتيش المدونة...ماتغيبيش كده تانى ياشوشو

    ردحذف
  10. الحنين
    شكرا ليكى ولمرورك الكريم
    رمضان كريم

    ردحذف
  11. من نعم الله علي الانسان النسيان
    ولا اعرف اذا كنا ننسي او نتناسي مع تكنولوجيا العصر من اله حاسبة في المقام الاول ومن كمبيوتر وموبيل
    اصبح النسيان آفه لتقدم التكنولوجيا فبعدنا عن التفكير والحساب وقراءة الكتب وحفظ الارقام فكل شي اصبح مخزن علي شي صلب
    حفظك الله

    ردحذف
  12. magdy hatem
    صحيح والله التطور التكنولوجى له دور كبير فى الموضوع
    لانه بيبعدنا عن التفكير
    وخصوصا موضوع الالة الحاسبة ده بالنسبة لى

    ردحذف
  13. النسيان يا عزيزتى
    مرض العصر والمغرب والعشاء
    ههههههههه
    سعات بتكون نعمه
    لكن فى حالتى انا من المواقف اللى بمر بيها تكون نقمه
    هو انا جايه هنا ليه

    ااااااااااااه

    افتكرت
    علشان اقولك
    كل سنه وانتى طيبه
    رمضان كريم

    ردحذف
  14. مع كل النسيان ده اوقات تلاقى نفسك فاكرة حاجات حصلت من ميت سنةو ما تخصكيش كمان وقتها تبقى هتتفرسى من نفسك اوى

    ردحذف
  15. mrmr
    النسيان فعلا يامرمر بيكون نعمة فى اوقات كبيرة
    لكن لما تنسى الاشياء الاساسية بيكون فعلا مرض العصر والمغرب والعشاء
    كل سنة وانتى طيبة ورمضان كريم عليكى
    وبجد نورتى

    ردحذف
  16. dreams
    اهلا بيكى فى المدونة
    والله فعلا الكلام ده مظبوط
    احيانا بفتكر حاجات حصلت ماليش اى علاقة بيها وماتهمنيش فى اى حاجة رغم ان فى حاجات تخصنى عاوزة افتكرها ومش بعرف
    بجد حاجة بتغيظنى جدا
    رمضان كريم وكل سنة وانتى طيبة

    ردحذف
  17. اول مره بس مدونه زى العسل

    ردحذف
  18. admin
    شكرا ليك ونورت المدونة

    ردحذف
  19. كلنا ذاك الرجل
    اقصد فى الزهايمر اللى شغال
    فينا
    شباب وكبار
    حتى الصغييرين
    بس نعمل ايه
    ممكن مفكره الولحد يكتب فيها الححاجات اللى مهم يعملها
    ربنا يبعد عنك النسيان يارب

    ردحذف
  20. محمود(باحث عن حب)
    فعلا النسيان منتشر جدا بس ياترى ايه السبب معقول يكون مثلا الموضوع له علاقة بالاكل او العوامل الجوية
    ممكن مفكرة صغيرة تحل المشكلة احيانا
    ربنا يبعد النسيان عننا جميعا ويبعد عننا كل شر

    ردحذف
  21. بمناسبة النسيان ده
    انا ايام الكليه كانت جاتلى حاله كده من النسيان المستمر ، اللى بقت تضايقنى ، فقعدت افكر ... افكر ... فى حل للموضوع ده لغاية ما ربنا هدانى لفكره الا وهى انى اجيب مفكره الكترونيه اسجل عليها اللى بناسه ، وفعلا جبتها وبقيت اسجل عليها اى حاجه تيجى فى ذهنى او عايز ما انساهاش .... شويه ...... وبقيت بنسى المفكره نفسهااااا
    ههههههههههههه اه والله ، فساعتها استسلمت للامر الواقع .

    ردحذف
  22. شعرت انك تحدثيننى هههههه
    يابنتى الزهايمر دا مرض
    تخيلى انى نسيت اعز صديقه ليه معايا فى الجرنال لسبب انها غابت عنى شهرين
    قابلتها عماله اقول انا شوفتها قبل كدا ودار حوار بينا هى متذكرانى وانا لا ذهب مع الريح ولا حياه لمن تنادى غير فى الاخر لما سألتنى عن الجرنال وكدا افتكرت ورجعتلى الذاكرة تانى والحمد لله هههههههه

    ردحذف
  23. النسيان نعمة

    بس يكون فى المعقول

    اكتر يبقى نروح لدكتور

    مع اننا كلنا بنسى والله بس زى ما بنقول نسيان عن نسيان يفرق

    تحياتى

    ردحذف
  24. النسيان يعتبر يعتبر ماعلينا نسيت كنت هقول ايه
    انا بردوه كثير بنسى حاجات كتير
    يعنى مثلا كنت كنت كنت ماعلينا نسيت
    المهم
    كنت بتقولى انك بتنسى قفلتى باب الشقه ولا لا ديه احيانا بتحصلى بس احيانا بحس انها مجرد وسوسه مش حكايه نسيان ربنا يستر من الوسوسه ومن النسيان الزائد واسف لل لل لل ايه ماعلينا نسيت اه افتكرت اسف للاطاله

    ردحذف
  25. ويكا
    بعنى على رأى اللى قال...مفيش فايدة... هننسى يعنى هننسى
    سعيدة بالزيارة الاولى واتمنى ان المدونة تكون عجبتك

    ردحذف
  26. دموع القمر
    مش ممكن نسيتيها وهى زميلتك بجد موقف محرج جداااااا طيب لو ماكنتش سألنك عن الجرنال كنتى عملتى ايه
    الحمد لله ان انتى افتكرتى كمان اسم الجرنال والا كانت اتعقدت جدا:)

    ردحذف
  27. تيمور
    ممكن لو العملية زادت نروح للدكتور
    بس اهم حاجة نفتكر مواعيد الدواء
    المشكلة ان النسيان فعلا دلوقتى منتشر جدا بين الشباب للاسف

    ردحذف
  28. عمرو يسرى
    واضح ان النسيان فعلا عدوى:)
    فعلا باب الشقة احتمال يكون وسوسة بس الاتنين فعلا حاجة مزعجة جدا خصوصا لما بتكون متكررة
    ومفيش اطالة ولا حاجة....

    ردحذف
  29. أحيانا تأخذنا متاهات الحياة إلى متاهات أخرى وتبعدنا عن هدفنا .. والأفضل لك أن تضعي جدول زمني للأشياء الأهم ثم المهمة وفقك الله

    ردحذف
  30. طب والله لخبططتيني ونستيني انا كنت ها اعمل ايه..؟
    عاجبك كده..؟؟
    ممكن بقى تفكريني انا جيت هنا ليه..؟؟
    اكيد انا جيت عشان حاجة..
    بس ايه هي..
    مش فاكر..
    ممكن يكون عشان....
    لألألألأ..
    اكيد عشان....
    ولا ممكن اكون جيت عشان...؟؟
    يوووووه..
    جيت عشان اقولك كل سنة وانت طيبة :)

    ردحذف
  31. اولا حمدلله علي السلامة نورتي مدونتك
    ثانيا تقريبا كلنا بنمر بنفس الحالة احيانا لما الهموم تكتر
    ربنا يبعد عنك الهم
    تحياتي

    ردحذف
  32. ام الخلود
    فعلا احيانا ضغوط الحياة ممكن تخلينا ننسى حاجات مهمة
    فكرة الجدول الزمنى دى حلوة جدا...ربنا بكرمك
    نورتى

    ردحذف
  33. timo
    ههههههههههههه
    الحكاية فعلا والله تلخبط بجد بتبقى حاجة مزعجة جدا لما بنسى اى حاجة خصوصا لو حاجة نسيت مكانها ولسة بدور عليها
    كل سنة وانت طيب
    رمضان كريم

    ردحذف
  34. sendbad
    الله يسلمك
    واضح فعلا ان معظم المصريين دلوقتى بينسوا كتير
    ربنا يسترها معانا ويبعد عنا الهم على رأيك
    رمضان كريم

    ردحذف
  35. على فكرة يا نونا والله مش انتى بس عندى امى كل ما تيجى تنادى عليا لازم تنادى على اسماء بنات عائلتنا كلهم اسم اسم لحد ما توصلى مع انها مش عجوزة ولا حاجه48سنه بس وتاته كمان كل يوم تصحى من النوم تصوط وتقولى انتى مين اقولها انا منه يا تاته تقولى حرامى مع ان عندها86سنه بس يعنى لسه مدوبتش فستان الفرح يعنى يابنتى الناس اللى لسه ف عز شاببهم حصلهم كده احنا بقا نعمل ايه هههههههههه تقبلى مرورى وموضوع عثل عثل زيك يا قمرايه.منه

    ردحذف
  36. عاشقة وبدوب فى حبيبى
    هههههههههههه والله بجد ضحكتيتى على رأيك احنا هنعمل ايه
    مش عارفة والله ده حكاية النسيان دى باين حالة عامة ولا ايه؟
    كل الناس بتنسى ربنا يستر بجد
    نورتينى يامنة وضحكتينى ومبسوطة من رأيك فى البوست
    وبجد انتى موهوبة جدا ومدونتك عاجبانى

    ردحذف
  37. ساعات بيبقى النسيان نعمة ورفاهية ناس بتتمناها
    تحياتى

    ردحذف
  38. حاجه حلوة اوي النسيان على فكرة النسيان نعمه لانه لو ما بننسى كان الحياة صعبة جدا جدا
    مدونة رائعه جدا

    ردحذف
  39. هههههههههههه


    عادى يا قلبى


    بتحصل فى احسن العائلات


    انا مرة دخلت الامتحان فى اعدادى


    والمراقب كان غلس شويتين


    قولت هتعب نفسى معاة ليه


    اذا كان خلانى انسى كل حاجه


    وسلمته الورقه فاضيه


    بس انا طلعت انصح منك


    كتبت اسمى ورقم جلوسى


    امال ايه

    مدونتك جميله ودمها خفيف

    ياريت نكون اصدقاء

    وكل عام وانت بخير


    تحياتى

    ردحذف
  40. ابراهيم رزق
    اكيد فعلا النسيان نعمة كبيرة ربنا انعم بيها على البشر
    واحيانا ناس كتير بتتمناه
    نورت المدونة

    ردحذف
  41. وردة الحياة
    النسيان نعمة من ربنا طبعا ونحمد ربنا انه موجود
    نورتى المدونة بزيارتك الحلوة والف شكر على رأيك
    وكل سنة وانتى طيبة

    ردحذف
  42. جايدا العزيزى
    اكيد طبعا يسعدنى اننا نكون اصدقاء وصداقتك تشرفنى
    بس قوليلى بقى يعنى انتى سلمتى الورقة فاضية وكتبتى اسمك ورقم جلوسك....لا فعلا والله طلعتى انصح منى:)
    ده انا ياما سلمت الورق فاضى ايام الكلية مااعرفش والله ايه كان بيحصل ينسينى كل الاجابات
    بس خلصت الحمد لله
    نورتينى بالزيارة الحلوة ورأيك اللى اسعدنى
    كل سنة وانتى طيبة ورمضان كريم

    ردحذف
  43. حاولت اعلق علي بوست ارض النفاق معرفتش الظاهر في مشكلة في التعليقات علي العموم بوست جميل وعلي فكرة المجاملات دلوقتي بقت ليها دور مهم جدا في المعاملات حتي بينا وبين الموظف اللي رايحين نخلص عنده مصلحة
    تحياتي الهالصة

    ردحذف

ممكن تكتب رأيك هنا وممكن تناقشني وتنتقدني كمان لكن الغلط ممنوع :)