الأحد، يوليو 25، 2010

سيتى ستارز...ده فى مصر ده؟



اول مرة ادخل المكان ده كان من سنتين الا شوية صغنونة بصراحة هو عجبنى لكن مانبهرتش بيه زى ناس كتير بالرغم من انى بحب اروح هناك.... يمكن علشان انا اصلا ماعنديش حكاية الانبهار بالاماكن..... عادى يعنى
اكيد ناس كتير عارفين المكان ده كويس ويمكن يكون فى ناس حافظين المكان وتفاصيله اكتر من صحابه نفسهم لكن انا لفت نظرى فيه شوية حاجات مش عارفة جايز يكون حد غيرى اخد باله منها ولا ايه؟
لما باجى ادخل سيتى ستارز ومن اول مابخرج من الجراج على الدور الاول بيكون عندى احساس انى خرجت من مصر وروحت بلد تانية
قولولى لييييه؟
هقولكم
المكان فى منتهى النظافة مافيهوش حبة تراب من اول البوابة والتفتيش اللى بالكلاب البوليسية للعربيات ودخول الجراج لغاية اخر دور وعمال النظافة مفيش عندهم راحة شغلهم مش بيقف خالص والناس اللى بتدخل المكان او الزوار يعنى مايقدروش يرموا فيه ورقة وطبعا مش كل الاماكن والشوارع فى مصر حلوة ونضيفة كده ولا عمال النظافة اللى فى الشوارع بالهمة والنشاط ده وطبعا السبب معروف وهو المرتبات.
تانى حاجة الناس اللى بتدخل المكان مش هى دى الناس اللى الواحد بيشوفها اقصد مثلا ماشوفتش هناك الناس البسيطة المصرية الحلوة اللى بيمشوا فى كل شوارع مصر بلا استثناء رغم ان المكان بيدخله مصريين و مش لازم يشتروا منه حاجة.
تالت حاجة..المفروض ان سيتى ستارز ده مول تجارى وسينما انت بتروح هناك علشان تشترى حاجة او تسأل على سعر حاجة او تدخل سينما وممكن تاكل او تشرب ... انما انا بشوف ان فى ناس بتروح تقضى اليوم هناك من اول النهار وتفضل تلف فى المحلات وتتفرج وتسأل وتمشى وترجع بعد شوية تسأل تانى وهناك الموظفين اللى فى المحلات مابيزهقوش خالص ياعينى الموظف منهم يجاوبك ويفضل معاك ويصبر عليك لغاية الاخر وممكن يبقى مش طايقك لكن طبعا لو بين لك كده هيمشى من الشغل فورا.
لكن ايه الفكرة انك تروح تلف هناك طول النهار وممكن ماتشتريش من هناك حاجة خالص ايه اللى يخليك تروح تتفرج على محلات لمدة يوم بحاله ماتروح مكان تستفيد منه بحاجة او تقضى اليوم مع اهلك فى البيت او اى حتة تختاروها!.
والشىء المستفز جدا هو الناس اللى بتدخل هناك وبتحافظ على نظافة المكان وكأنه بيتها ليه مايهونش عليهم يرموا ورقة صغيرة وهما فى المكان و ليه لما بيخرجوا الشارع ويكون معاهم حاجة بيرموها اشمعنى الشارع يعنى.

انا عن نفسى بشوف ان النيل اجمل بكتير لانه مكان مفتوح وجميل ...مش عارفة ليه لما قولت انى عاوزة اروح اتمشى على الكورنيش الناس اتريقت عليا زى مااكون قولت انى عاوزة اروح اتمشى فى توشكى هو النيل ده بقى حاجة وحشة دلوقتى؟
انا بالنسبة لى اجمل اماكن فى مصر هما وسط البلد و النيل واهرامات الجيزة بكون مبسوطة جدا وانا هناك
يمكن لما حققت رغبتى وروحت على النيل كانت اول مرة امشى على كوبرى قصر النيل سيرا على الاقدام كنت كل مرة اكون ماشية بالعربية....وكنت خايفة اوى من اهتزازات الكوبرى بس المرة الجاية ان شاء الله مش هخاف وهحاول استمتع اكتر من كده...انا مش عارفة ليه كتبت البوست ده كنت هكتب واحد تانى بس انا لقيت نفسى بكتبه....حاجة كده من باب الفضفضة.

هناك 42 تعليقًا:

  1. يمكن يكون انا الكائن المصرى الأول الذى لم يذهب لسيتى ستارز حتى الأن (:(:

    لكن انا لما بكلم حد اجنبى لطبيعة شغلى

    بقوله ان شرم مش دى مصر مصر الحقيقية هى القاهرة أسكندرية

    الناس اللى ماشين فى الشارع

    انا بحب وسط البلد جدا ممكن اخرج لوحدى و افضل ماش و بس اتفرج على الناس و المكان و بس

    ممكن اكون مجنون بس دة بيريحنى جدا

    بالتوفيق دايما (:

    ردحذف
  2. اهلا يا نهى
    اصابع ايديكى مش ذى بعضها
    انت انسانه رومانسيه بتحبى انك تتمشى على النيل

    بالرغم من اننا معندناش فى بلدنا الاماكن بالمستوى ده لكن فى اماكن جميله قوى ونظيفه نحب نقضى سهره حلوه فيها مش اليوم كله
    لكم انا افضل ذيك كده اقعد فى نادى على النيل
    استمتع بسحر الميه بالليل واتمشى على الكورنيش واكل كوز دره مشوى على الفحم غيرى مش بيحب كده
    انت انسانه جميله
    ربنا يسعدك

    ردحذف
  3. السلام عليكِ
    كيفك ؟
    والله يا نهى في أماكن كثيرة في بلدنا نظيفة وجميلة .. لكن لأن هذا المكان قطاع خاص والقطاع الخاص مبيرحمش فلذلك الجميع منضبط وهذه من مزايا القطاع الخاص بالمناسبة وعلى النقيض آفات القطاع العام علمت الناس اللامبالاة لأنهم قاعدين قاعدين لكن الحمد لله زمن القطاع العام ولى وإن شاء الله مع الوقت ثقافة المجتمع هتتعدل

    خلينا أتكلم على الجو والمشاعر داخل المكان ، أنا يمكن كل ركن من مصر بحالته بتشدني وبيكونلها وقع ربم يختلف ربما يتشابه لكن في النهاية كل شبر له وقع طيب داخلي وعن نفسي أحب القرية المصرية اللي ما زالت محتفظة ببساطة القرية لكنخسارة قليلة هي القرى اللي ما زالت محتفظة بهذا الشكل ، كل القرى أصبح بها عمران وعمارات واشياء على الرغم من حداثتها وربما يكون بها عشوائية إلا أنها في المجمل لا تروق لي

    أحب ريف زمان ولسه في منه هنا في كفرالشيخ

    شكراً على التدوينة الطيبة

    ردحذف
  4. بغض النظر عن ان ستي ستارز ده مكان تحفة وبحبه جدا الا ان خروجة في مركب في النيل مع اصحابي ليها طعم تاني خااااااااااااالص وطبعا مع الدرة المشوي والترمس

    ردحذف
  5. بوصى متتعبيش نفسك فى اسئله يمكن متلقيش ليها اجابات
    لانها ثقافه شعب اتغيرت يمكن مع الوقت والتوعيه تتغير

    بجد بوست حلو اوى وجامد ومش عارف ليه البلوجر كلو واخد مواضيع حوالينا وانتى كمان انضميتى ليهم بموضوع وبوست هائلين

    بس عايز اقولك حاجه على الجزء الاخير فى البوست مش انتى لوحدك اللى بتبحى الاماكن دى انا بعشق انى كمان امشى فى طلعت حرب بليل فى ناس هاى وناس بسيطه مفيش دوشه وزحمه فيه اللى غنى وفيه اللى بيدور على لقمه عيش فى جزء كبير من مصر زيه زى النيل الكل بيشرب منو واللى شايف غير كدا يسال نفسه مين اللى خلى النيل فى نظره وحش هيلاقى انو اول واحد غلط فى حقه وحق النيل لانه اول حد غلط

    بوست جميل بجد وموضوع كونت بفكر اكتب فيه بس انتى سبقتينى وكتبتى فيه اجمل منى كمان

    ربنا يوفقك ومن قلبى بتمنلك كل خير وسعاده وصحه وتوفيق وفرح وابتسامه تدوم يا رب طول العمر

    ردحذف
  6. ٌٌRamy
    فعلا مصر هى القاهرة واسكندرية وكل المحافظات
    وفعلا المشى فى وسط البلد له طابع خاص جدا غير كل شوارع القاهرة
    يمكن كمان احسن من اجمل واشيك الاماكن فى مصر

    ردحذف
  7. mrmr
    ياااه انتى هتقوليلى على الذرة المشوى
    انا ماكلتوش على النيل قبل كده غير مرة واحدة وانا صغيرة
    لكن غير كده بشتريه من اى حتة وبحبه جدا
    انا مش رومانسية اوى يعنى بس بحب الناس وبحب اشوفهم ماشيين فى الشارع معرفش ليه بكون مبسوطة
    وعلى فكرة انتى الاجمل وميرسى على الكومنت الجميل ده

    ردحذف
  8. احمد شريف
    انا كنت اسمع زمان عن الارياف وجمالها وهدوئها وزورت مؤخرا بلدين يعتبروا ارياف صحيح فيها عمران كتير زى مابتقول كده
    لكن فعلا سبحان الله هناك الواحد بيلاقى الجو حاجة تانية خالص وفى راحة نفسية او شعور مختلف عن المدينة
    وغير كده الناس هناك بتنام بدرى جدااا ودى ميزة مش موجودة عندنا فى المدن

    ردحذف
  9. wa7ed w5las
    النيل مكان جميل اوى فى مصر فى ناس مش بتقدر المكان ده للاسف لما الناس كانت بتستغرب انى عاوزة اتمشى على النيل تخيلت انى مش طبيعية لغاية ماروحت هناك وشوفت ناس كتير اوى والحمد لله هنا كمان كل الناس بتروح هى كمان اهه
    يعنى انا ماكنتش غلطانة

    ردحذف
  10. amirelhob
    معاك حق فى تعقيبك على الجزء الاخير من البوست طبعا ناس كتير مش عارفة قيمة الحاجة الحلوة اللى موجودة معاها
    الناس اللى بتروح بعيالها على النيل دى يمكن مش بتروح علشان هو احسن مكان
    جايز تكون بتروح علشان المكان غير مكلف او تكلفته بسيطة لكن فى النهاية اكيد بيروحوا مبسوطين وبيقضوا وقت جميل

    ورأيك فى المدونة والبوست اسعدنى جدا

    الف شكر ليك

    ردحذف
  11. مصر حلوة طبعا بناسها الطيبين وبأرضها الطيبة ونيلها الجميل
    وسط البلد جميلة وشوارع مصر العتيقة من القاهرة لاسوان
    سيتي ستارز وثقافة المولات
    سيتي ستارز زيه زي مولات كتير في مصر بس الفكرة انو بقي اوسع
    طبعا ما بنكرش انو حلو جدا وفي كل حاجة زي ما بيقولوا من الابرة للصاروخ
    لكن دلوقتي لو رب اسرة او ام طلبوا منهم اولادهم يخرجوا ويتفسحوا صعب طبعا ان تخرج اسرة مكونه من خمس افراد وتروح وسط البلد وتمشي علي النيل وتاكل ذرة وسميط اللي كنا بنسمع عنه في الافلام القديمة
    لكن من السهل جدا في سيتي ستارز وهو مكان مغلق مع بعض الحماية والكثير من الامن انهم يلعبوا وياكلوا ويشتروا كمان اي حاجة
    فهي الفكرة ان سيتي ستارز قرب البعيد زي النت (القرية الصغيرة) وزي الريموت كنترول
    الناس بتحب السهل وموضوع ان حد يسأل وميشتريش ده جايز بيأخد فكرة ويشتري بكره
    وجايز بيشوف ويقارن بين الاسعار ويقول ده انا من الشطار ده انا عندي زي ده بربع الثمن
    بوست جميل نهي وربنا يوفقك ان شاء الله

    ردحذف
  12. مصر كلها حلوة يا نهى ..
    و سيتي ستارز ميزته انه فيه اكبر تجمع للمحلات الشيك ..
    هي ايوة اسعارها بتبقى نصاااابة جدا جدا
    بس يعني .. أهو كله أكل عيش :)

    ردحذف
  13. magdy hatem
    والله انا معاك ان المكان اوسع وحلو كمان لكن ايه الفكرة فى انه امان اكتر ماهو الشارع كمان امان ولو تقصد العربيات والزحمة فالناس زمان قبل سيتى ستارز والمولات كانوا بيخرجوا فى الشارع فى الزحمة وسط العربيات
    هو الفكرة فى رأيى ان ده تغير فى فكر المصريين يعنى لو ماكنش عندنا مولات كانت الناس هتخرج عادى فى الشارع

    ردحذف
  14. شيماء على
    اهه ده حاجة والاسعار دى حاجة اكتر حاجة مستفزة فيه لكن احقاقا للحق الحاجة اللى بتيجى من هناك بتبقى حلوة اوى

    ردحذف
  15. صلى على النبى
    المووضوع ببساطه ان
    ده بزخ من وجهه نظرى بمعنى
    ان له طبقات معينه من الشعب بتروح هناك علشان تفكر تشترى
    اما الطبقه الوسطى اللى هما احنا يادوب يتفرجوا وبس
    ويتحسروا بس
    ويتعكننوا بس
    علشان اللى هناك دهه
    قليل اللى مينبهرش
    واحترم ذالك عندك
    ولكنى
    تعب من هذه الاماكن
    بحسها ان هناك اللى محتاج
    فتافيت الفتافيت
    علشان خاطر يعيش
    يارب يبارك فيكى وكل عام انتى بخير

    ردحذف
  16. نهى
    بصى يا ستى لما سافرت القاهره ورحت المكان دا اللى اسمه ستيى استاز الصراحه انبهارت بيه وعجبنى اوى بس هى لفه واحده وقولتلهم انا عايزة اطلع كفايه
    بلدنا جميله مليانه بأماكن روعه وطبعا اولها نيلها الجميل الصراحه لما بسافر القاهره بحب موووت اتفرج على النيل وانا ماشيه بالعربيه وبالذات منظره بالليل بيجنن العقل
    كل حاجه فى بلدنا حلوه وومكن بأدينا نحليها اكتر ونحافظ عليها
    انما سيتى ستارز ممكن للشوبينج والاكل والسينمات زى ما قولتى مكان ترفيهى مش اكتر

    اسعدنى مرورك الكريم يانهى ومرسيى ليكى
    دمتى فى حفظ الرحمن

    ردحذف
  17. محمود(باحث عن حب)فعلا انا عارفة ان صعب عدم الانبهار بالمكان ومعاك حق انه بذخ انا شوفت هناك نظارة شمس ب5000 جنيه ونفسى اشوف حد اشترى نظارة حاجة زى كده علشان يقنعنى انه عنده حق يشترى نظارة بالسعر ده احساسه بيكون ايه وهو خارج فرحان بيها ويعدى على واحد غلبان ابنه بيعيط علشان نفسه فى حاجة وهو مش قادر يجيبهاله
    وكل سنة وانت طيب

    ردحذف
  18. الحب الجميل
    شوفتى ماقدرتيش تكملى لفة واحدة هناك
    فى ناس بتلف طول النهااااار
    ايه اللى يغيظ ان دى محلات ودى محلات بس يمكن علشان هناك اكبر تجمع للماركات العالمية
    بس بجد انا كنت بستغرب لما حد بيقولى هو لسة فى ناس بتروح على النيل؟
    لكن الحمد لله مش انا لوحدى وناس كتير اهه بتحب النيل
    كل سنة وانتى طيبة وربنا يسعدك

    ردحذف
  19. الناس لما بتروح حته نظيفه بتحافظ على نظافتها وده اللى بيخليهم لما بيكونوا فى سيتى ستار بيحافظوا على نظافه المكان ولما بخرجوا الى الشارع لو كان نظيف عيحافظوا على نظافته اما سلوك العمال المنضبط فده علشان الادره اسلوبها جيد
    وفعلا اجمل مكان فى مصر هو النيل انا بحبه كتيير

    ردحذف
  20. القضية مش مرتبات السر هو الكامرات عارفين انهم هشتغلوا بجد هيبقضوا اى تقليد لموظفين الحكومة أو لعب

    هيلقى نفسه متصور و الجزاء نازل فوق راسه واحتمال يركب الوزة

    ردحذف
  21. لكن طبعا لو بين لك كده هيمشى من الشغل فورا.
    لكن ايه الفكرة انك تروح تلف هناك طول النهار وممكن ماتشتريش من هناك حاجة خالص ايه اللى يخليك تروح تتفرج على محلات لمدة يوم بحاله ماتروح مكان تستفيد منه بحاجة او تقضى اليوم مع اهلك فى البيت او اى حتة

    " بيتفسحوا يانهى كانهم بيستجموا خارج البلاد لمدة يوم واحد واول ما بيبقوا على اعتاب المول من برة كانهم نازلين من الطيارة في احضان الوطن ههه"
    لولا

    ردحذف
  22. عمرو يسرى
    اكيد طبعا الناس بتحافظ على المكان النضيف
    بس الشارع مين اللى خلاه مش نضيف ماهما الناس برضه
    والادارة مع عمال النظافة ناجحة جدا والمفروض تكون ادارة نظافة الشوارع احسن من كده
    وطبعا معاك حق فى ان النيل هو اجمل مكان فى مصر

    ردحذف
  23. العيسوى الصغير
    والله جايز برضه بس هو عموما الشغل فى القطاع الخاص ميزته ان اللى بيشتغل بيتقدر واللى مش بيشتغل بيمشى

    ردحذف
  24. لولا
    والله بجد ضحكتينى اوى
    عندك حق الناس بتخرج من المكان زى مابتقولى كده
    ضحكت جدا ربنا يسعدك

    ردحذف
  25. بصى يا نهى

    هو انا مش من القاهره وعمرى ما شفت سيتى ستارز ده لكن عندنا فى اسكندريه حاجه شبهه اعتقد اسمها سان استيفانو جراند بلازا .. عموما فى كلا الحالتين مش هتستفيدى منى شئ فى الرد على البوست ده

    بس انا جايه اسأل سؤال ع الماشى وامشى معاه

    انا عاوزه اكبر حجم التعليقات واضيف المدونات اللى بتابعها على جنب من المدونه ومش عارفه ازاى

    فلو تكسبى فى اختك ثواب وتقوليلى هدعيلك دعوه كبيره قوى واحنا داخلين على ايام مفترجه

    اما بقى لو مش هتقوليلى



    فبرضه هدعيلك دعوه كبيره قوى واحنا داخلين على ايام مفترجه

    ردحذف
  26. مها البنا
    بصى بقى ياقمر علشان تعملى القايمة دى بتفتحى تصميم اللى هى فوق فى الصفحة جنب تسجيل الخروج كده
    بعد مابتدخلى على تصميم بتضغطى على اضافة اداه هتتفتحلك قايمة اختارى منها قائمة المدونات الالكترونية وبعد كده اى مدونة عاوزة تضيفيها بتاخدى اللينك بتاعها وبتحطيه زى ماهو وبتقوليله اضافة ثم حفظ وبس خلاص ولو فى حاجة اسألينى
    نورتى وشكرا على الدعوات مقدما وربنا يكرمك

    ردحذف
  27. مها
    نسيت اقولك تكبير التعليقات
    بتدخلى تصميم وبتفتحى مصمم النماذج وبتختارى من اليمين متقدم وبعدين نص الصفحة وتكبرى الخط وتقوليله تطبيق على المدونة

    ردحذف
  28. بصراحة إحنا عندنا في جزيرة العرب بين كل مول ومول .. مول مافيش مكان للسكن بقت الناس تنام في المولات عشنها نظيفة!!!

    ردحذف
  29. يا سلاااااااااااام

    تصدقى الشكل العام إختلف للمدونه خالص؟ هههههه

    حقيقى ربنا يباركلك يا نهى على سرعة ردك وإستجابتك

    أما الدعوه فانا مش ناسياها

    بس هخليها بظهر الغيب باذن الله

    الف شكر يا قمر

    ردحذف
  30. ام الخلود
    للاسف احنا ماعندناش ثقافة اننا نحافظ على الحاجة علشان لازم نحافظ عليها انما بنحافظ عليها علشان مجبرين على كده
    يعنى الناس عندكم لو تحافظ على نظافة الشوارع كانت كل البلد هتكون جميلة
    ونفس الحال عندنا طبعا
    نورتى

    ردحذف
  31. مها البنا
    اى خدمة يامها بس انا دخلت عندك مالقتش تعديل
    لو قدامك مشكلة قوليلى
    ولاشكر على واجب احنا اخوات

    ردحذف
  32. روحى إلقى نظره تانيه كده وهتلاقيهم ان شاء الله


    الف شكر يا نهى

    ربنا يباركلك

    ردحذف
  33. السلام عليكم ورحمه الله وبركاته
    أختى العزيزه
    نهى

    أنا أول مره أزور مدونتك وعجبنى أسمها جدا
    بس اللى جو المدونه كلام مش فاضى ولا حاجه ده كله فى المليان اه

    أنا بصراحه زرت أماكن كتير بس للأسف عمرى مارحت ستى ستارز
    بس عندنا فى اسكندريه فيه الفورسيزون
    حاجه راوعه
    انا انبهرت بيها وفى نفس الوقت اتعجبت
    لانى بحكم شغلى دخلت المكان ده ولولاه عمرى ماكنت هدخله

    والله أنا شخصيآ يكفينى أتمشى على الكورنيش وبالذات فى الشتى
    ده بيبهرنى أكتر وأكتر
    جربتى قبل كده تكونى فى اسكندريه وتتمشى على البحر فى الشتى وكمان تكلى ايس كريم
    أحساس دايمآ أحنا أهل اسكندريه بنعيشه
    ياريت تجربيه مش هتندمى

    تقبلى مرورى الاول وليس بالأخير

    ويسعدنى تشريفك لمدونتى المتواضعه
    أنا فى تشوق لرأيك

    تحياتى لشخصك الطيب
    محمد التركى

    ردحذف
  34. مها البنا

    كده شكلها اختلف كتير
    بقت جميلة اوى

    ردحذف
  35. اسمع كل اهل اسكندرية بيتكلموا عن موضوع الكورنيش والايس كريم فى عز البرد وبيقولوا انهم بيكونوا مبسوطين رغم البرد الكتير
    وبسمعهم كمان بيقولوا ان اسكندرية اجمل فى الشتا

    متهيألى ممكن يكون سيتى ستارز شبه الفورسيزون اللى عندكم او على الاقل نفس روح المكان

    شكرا لزيارتك وتعليقك وان شاء الله ازور مدونة حضرتك قريب جدا

    ردحذف
  36. انا اكتشف هنا ان فى كتير زيى
    وان انا مش حاله شاذه

    ردحذف
  37. هههههههههههه عاملة نفسك عارفة كل حاجة ف مصر يا ست نهى وكمان بتعملى أستطلاع راى أما حاجة مستفزة بجد ربنا يعافينا من اللى زيك قولوا أمين يا جماعة
    هههههههههههههههههههههههههههه

    ردحذف
  38. غير معروف 1
    اكيد كل الناس اللى كانت فاكرة انها هى بس اللى بتحب النيل ووسط البلد والريف والبحر واى مكان فى محافظات فى مصر اكتشفت ان فى كتير زيها ومش هما بس اللى كده

    ردحذف
  39. غير معروف 2
    على فكرة انا مش بزعل لما حد بيختلف معايا فى الرأى لان ده عادى جدا والدليل على كده انى نزلت تعليقك
    بس كنت عاوزة اعرف فين استطلاع الرأى ده ومين اللى قالك انى عارفة فى مصر كل حاجة ده كان مجرد رأيى فى مكان انا زورته واعتقد ان كل واحد حر فى رأيه
    شكرا لزيارتك وتعليقك فى مدونتى

    ردحذف
  40. معرفش ايه حكاية المول ده كل اخواتي راحوه وانا المعفن الوحيد اللي في العيلة ميعرفش ايه هوا سيتي ستارز ، بيني و بينك الصورة ذهلتني ، عاملة زي الأبراج بتاعة العرب و المراكز التجارية بتاعتهم اللي تفزع ، و مكدبش عليكي بعد ما شفت الصورة انعدمت عندي و اتبخرت و زالت الرغبة في الذهاب للمكان ده ، لإني بتوتر جدا من الأماكن النضيفة :)
    النيل-اللي هاينحسر عن قريب ان شاء الله-مش مكان يستحق اي تريقة بالعكس ، في أماكن كتير بتطل ع النيل اكتر من رائعة ، صحيح أنا بكره اقف ع النيل من فوق الكوبري و بحب دايما اعمله احترام و اجهزله جلسة هدوء تأملية في ساقية الصاوي-اللي انحسرت هيا كمان و بقا دخولها بعضوية.
    انا عن نفسي لما بحب افكر بقعد في المترو :) و دي عادة أتمني ابطلها عن قريب ان شاء الله...
    الكلام هنا عجبني لإنه فكرني بحاجات حلوة في مصر زي النيل ، إنما البوست الأحدث من ده وجع قلبي اكتر و صحاني من تاني ع الحقيقة المرة اللي بحاول أتناساها...
    تحياتي آنسة نها و آسف علي الإطالة...

    ردحذف
  41. معقول ممكن حد يعرف يفكر فى المترو وسط الزحمة....فعلا سيتى ستارز شكله كمان من بره حلو جدا بس ناقصه الروح الحلوة اللى فى الاماكن التانية
    زيارتك ورأيك وتعليقك اسعدونى جدا وطبعا مفيش اطالة ولا حاجة
    تحياتى

    ردحذف
  42. انادخلت المكان ده ولعبت فيه وكان جميل

    ردحذف

ممكن تكتب رأيك هنا وممكن تناقشني وتنتقدني كمان لكن الغلط ممنوع :)