السبت، سبتمبر 14، 2013

حوار بين بنتين

قررت مي في "ساعة مايعلم بها الا ربنا" أن تهاتف احدي صديقاتها و بعد السلامات باغتتها صديقتها بسؤال مفاجئ
-سمعتي أغنية دنيا سمير غانم الجديدة ؟
-لا لسة ماسمعتهاش هي حلوة؟
-يااااااااااه مفيش كلمات أحلى من كده الأغنية بتجسد كل معاني الحب.
-طيب هروح أسمعها و أرجعلك...
بعد قليل قامت مي بالاتصال بصديقتها ودار بينهما حديث طويييييييييل :
- ايه يا بنتي ده...ايه الاغنية دي
-عجبتك مش كده
-لا طبعا هو الكلام اللي في الغنوة دي عجبك يعني انتي ازاي كده؟
-يا بنتي انتي بس اللي مابتعرفيش تحبي
-لو الحب كده يبقى يغور انا مش عاوزة احب حد ولا حد يحبني
- هو انتي بس ايه اللي مش عاجبك فيها ؟
-كلها مش عاجباني كلمات الاغنية استفزتني بشكل مبالغ فيه يعني ايه واحدة تقبل ان حد يطلع لها فجأة كده ويخليها تغير طريقة لبسها وتسيب صحابها اللي بتحبهم وبعدين تعليمات ايه اللي هتنفذها يعني..هو ده حب ولا معسكر كشافة
أطلقت الصديقة ضحكة مصطنعة تدل على "الغيظ الشديد" وقالت:
-يعني انتي بقى عاوزة تفهميني انك لما تتجوزي مش هتسمعي كلام جوزك وهتلبسي اللي على مزاجك وتصاحبي ولاد يعني ولا ايه انتي فاكرة نفسك عايشة في انجلترا؟
-لا يا متخلفة.. انتي اللي فاهمة إنك عايشة في عصر الحريم وتقريبا كده كان نفسك تبقى واحدة من حريم السلطان وبعدين تعالي هنا هو انتي فاهمة ان اللي هيتجوزك ده لازم يتحكم فيكي ويعيد لك ترتيب حياتك من جديد؟
-أكيد من حقه يعني يقول اللي شايفه صح مش جوزي وهبقى مسؤولة منه ولا يعني يسيبني كده من غير ما يشكمني؟
-يشكمك إيه!! يعني انت مستنية واحد ييجي يعمل لعقلك Format ويبرمجك من جديد على كيفه طيب لما هو كده بقى ليه ماشفش واحدة جاهزة و متبرمجة بدل ما يتعب نفسه و يشتغل من الأول، يعني تفتكري انك من غيره هتنحرفي وتروحي تعرفي ولاد ولا انتي تربيتك تمنعك من كده؟ وتفتكري لبسك لو مش عاجبه من البداية ايه اللي هيخليه يتقرب منك علشان يرتبط بيكي ؟، كمان لو صحباتك مش عاجبينه ايه اللي هيخليه يعرفك ويكمل معاكي أساسا وهو عارف ان دول كانوا صحباتك وانتي أكيد زيهم أو حتى تفكيرك قريب لهم...انتي مش مقتنعة ان كل ده مجرد محاولات لفرض السيطرة والتحكم مش أكتر وان كل ده مالهوش علاقة بالحب..طيب لو في واحد صاحبه عرفتي انه بيخون مراته  مثلا و قولتيله ماتعرفهوش تاني تفتكري هيسمع كلامك وهيبقى مقتنع انك بتحبيه وخايفة عليه ولا هيشوف ان مش من حقك تتحكمي فيه؟
-!!!!!!!!!!!
-طبعا مش عارفة تردي واللي زيك لما هتتجوز مش هتخلف لنا غير واحد معقد ومريض نفسي زيك انتي و أبوه بالظبط وهتفهميه انه سيد الكل ويكبر ويطلع عقده على واحدة مسكينة تانية...ولا مسكينة ليه أكيد برضه هتبقى واحدة مريضة زيك وعندها هوس بإنها تفضل مجرد تابع علشان مجتمعها فهمها الحب والجواز غلط.
-انتي ازاي تكلميني كده أصلا...أنا مش عاوزة أعرفك تاني يا مي انتي معقدة
-أنا اللي معقدة ولا انتي اللي جاية من عصر البخار انا اللي مش عاوزة أعرفك تاني.
وتغلق مي السماعة بشدة وتذهب لتسمع أغنية ثورة نسائية
ومع انتهاء اليوم كانت قد انتهت العديد من الصداقات بسبب هذه الأغنية.
 
 
 
 
 
 
 
 
 

هناك 15 تعليقًا:

  1. تعرفى يا نهى
    أنا لقيت تعليقات كتير على الأغنيه دى فى مدونات كتير
    بس بصراحة أول موضوع يعجبنى مع ان راى مى ناقصه حاجه

    طبعا احنا عايشين فى مجتمع لاغى تفكيره نهائى وبندعى التدين وهو مش موجود اساسا الغرب بيحاول يشغلنا بحاجات فاضيه علشان يبعدنا عن تحقيق الرسالة الى ماطالبين بيها ونرجع ندور يا ترى الرجالة صح ولا النساء صح والمشكله ان كل بنت بتتعصب للفكره دى فى الغالب ربنا بيوقعها فى واحد من الصنف الى بتكرهه ده ويوريها الى كانت بتنتقده كله والذكور أيضا نفس الفكره يعنى من الأخر الغرب بيسوق أفكارنا للوجه الى هو عايزها
    الأغنيه كلماتها المقصود بيها تعبير عن الحب انه وصل لدرجة انها بتسمحله يغير حاجات فى حياتها والغريبه لما جنات قالت حبيبى على نياته كل البنات اخواته وبعدين قالت انها هى الى غيرت ده فى حياته محدش اعترض حتى الذكور لانه تعبير عن الحب
    فأكيد زمان لما منيره المهديه قالت الطشت قالى مكنتش بتكلم الطشت يعنى :)
    ويا ريت مننساش ان سيدنا محمد وصى بالنساء وقال لا يكرمهن الا كريم ولا يظلمهن الا لئيم وقال استوصوا بالنساء خيرا وجعل زوجاته أمهات المؤمنين كما ذكر أمثله للمراه فى القران كماشطة فرعون واسيا زوجته وبلقيس وغيرها
    خلقنا الله شعوب وقبائل لكى نتعارف ونحافظ على الجنس البشرى ليس لكى نقول حقوق المراه وحقوق الرجل
    لو كان المراه أو الرجل الى بيرددوا الكلام ده مؤمنين انها قضيه يا ريت ميتجوزوش لان جوازهم بينقل الأفكار دى لأجيال تانيه وكمان يا ريت البنت الى كده متزعلش لو ملقتش نصها التانى هى كده احسن والشاب كمان الى بيؤمن ان فيه نديه بين الرجل والمراه يا ريت ميبحثش عن زوجه ليه


    أنا بشرك على عرضك ببموضوع بالطريقة دى وأسف للإطالة لكن بجد أنا بزعل لما بلاقى ناس بتناقش فى حاجات مش اساسيه فى الحياة وفى النهاية يزعلوا من بعض علشانها


    تحياتى لكى أختى الكريمة

    ردحذف
  2. أحترم وجهة نظرك يا أستاذ جمال
    وسعيدة ان الموضوع عجب حضرتك
    لكن في النهاية الفن بيأثر بشكل مباشر على المجتمع والاغنية دي بتعكس صورة انا مابحبش اشوفها
    ومعاك ان ربنا خلقنا لنتعايش لكن لو في طرف اخد اكتر من حقه يبقى من حق الطرف التاني يحاول يسترد الحق المسلوب منه
    كمان مش كل اللي بتتكلم عن حقوق المراة لما بتتجوز بيبقى اللى اتجوزته عكس ما تتمني بالعكس في رجال كتير متفهمة وعارفة ان المرأة انسان ولها عقل وتقدر تفكر وتاخد قرار سليم
    نورت المدونة :)

    ردحذف
    الردود
    1. الأفكار اتغيرت كتير عن زمان وأنا مش بنكر ان فيه اماكن ما زالت تقهر المراه لكن ده مبقاش حاجه عامه

      الاغنيه لو بتاث يبقى كان مفروض الذكور اغتالوا حبيب جنات لما قالت حبيبى على نياته وكل البنات اخواته وإن هى السبب فى ده

      التفاهم ده واجب على الرجل لان ربنا جعل علاقة الرجل بالمراه ذات رباط وثيق وسيدنا محمد قال لا يكرمهن الا كريم ولا يظلمهن الا لئيم أعتقد ان الى الإنسان الى مش عايز يبقى لئيم ميظلمهمش

      أنا مش معترض ان لجان حقوق المراه تنزل الأماكن الى لسه مقفولة وتتكلم فيها مش يقعدوا فى القاهره ويتكلموا وخلاص أظن العمل أحسن من القول

      ودلوقتى غالبية الشباب بيحترم الست الى ليها ثقافتها الخاصة وتفكيرها الشخصى

      وشكرا جزيلا على قبول المناقشة
      وأتمنى من الله أن يجعل ما تقومين به فى ميزان حسناتك

      حذف
    2. اغنية جنات اصلا معناها مش وحش ومفيهاش أي كلام يدل على انه تابع لها لكن اغنية دنيا سمير غانم معظم كلامها بيعجب المراهقات جدا وبيفهم البنت معنى الحب غلط ولما تكبر وتفهم المعنى الحقيقي يكون الوقت عدى
      كمان المشكلة بالنسبة لي مش الاغنية بس هي مشاهدات كتير لناس بتتصرف تصرفات غلط وجه موضوع الاغنية ده كمل الصورة
      وانا على فكرة مش بشتغل في أي أنشظة خاصة بالمرأة للأسف انا بكتب بس وبنتقد حاجات مش بتعجبني في المجتمع سواء كانت سياسية أو اجتماعية...سعيدة بالمناقشة مع حضرتك جدا :)

      حذف
    3. الشغل فى الأشطة الإجتماعيه حاجه مشرفه وانا مقصدتش انك بتشتغلى فى اى نشاط أنا كنت بعطيكى مثل وأنا مقتنع بكلامك بس مختلف معاكى ان ممكن اغنيه تغير ثقافة مجتمع . وكمان فكر الشباب والبنات مش واحد يعنى ممكن تلاقى شاب بيحب يكون هو كل حاجه وواحد تانى عايز حياة مستقره ومشاركه وفيه نوع للاسف ملوش اى دور فى حياته انا عارف ان أفضلهم النوع التانىبس صدقينى فيه بنات بتحب النوع الاول والاخير أكتر البنت المتسلطه بتحب الشاب عديم الشخصية والبنت السلبيه بتحب الشاب الى يرسملها حياتها والبنت الى فاهمه الحياة صح والعلاقة بين الرجل والمراه كويس دى بتحب النوع المعتدل
      ومش معنى انى بحب اى نوع من دول انه يبقى النوع الصح ممكن يكون مش افضلهم بس انسبهم بالنسبه لى انا
      صدقينى صعب جدا كل البنات أو النساء يأمنوا بقضية واحده او فكر واحد لان طبيعة الحياة الأختلاف

      وأنا أكثر سعادة بالمناقشه وخصوصا مع انسانه ذات فكر راقى شكرا جزيلا لحضرتك :)

      حذف
    4. متفقة مع حضرتك في بعض النقاط بس صدقني الفن سواء كان عبارة ان فيلم او اغنية حتى لو مغيرش تغيير كلي بيأثر بشكل كبير
      وشكرا لحضرتك على كلامك ونورت المدونة

      حذف
  3. جميل جدا يا نهى
    وكان لازم ننتقد حاجة زى دى لان الفن رسالة واللى يبتعرض علينا بينعكس علينا بعد كده ما ينفعش نتجاهله ونقوله انه مش مهم

    ردحذف
    الردود
    1. شكرا ليكي يانوجا
      رأيك أسعدني وزيارتك كمان :)

      حذف
  4. انا لسه مسمعتش الاغنية دي بس الحوار ده شجعني اني اسمعها عموما انا متفقة معاكي اني في بنات كتير عايشين في عصر الحريم وده نتيجة انهم شافوا امهم خاضعة لأبوهم وللأسف دلوقتي بقت البنت هي عدوة البنت اللي زيها اكتر من الولد

    ردحذف
    الردود
    1. معاكي حق
      ولو سمعتي الاغنية هتحسي باستفزاز شديد بلاش تسمعيها :)
      نورتيني

      حذف
  5. كلام اكثر من رائع استمرى من فضلك
    العاب بنات
    العاب تلبيس

    ردحذف
  6. أختك بجد كلامها في غاية الروعة ..مفيش مشكلة أن الإنسان لو في حاجة غلط يقول أو يوجه لكن يحوله لتابع ويلغي عقله وشخصيته ده أكبر غلط...رائع:)

    ردحذف
  7. حلوه انا مش مع البنت الاوله انا مع التنيه الي هي مي ميوش

    ردحذف

ممكن تكتب رأيك هنا وممكن تناقشني وتنتقدني كمان لكن الغلط ممنوع :)