الأحد، سبتمبر 11، 2011

نكرههم...ولكن؟

لا نختلف كمصريين بجميع الفئات والطبقات على كراهية إسرائيل
بل ونتمنى أن تمحى تماما من الوجود
ولكن بالرغم من ذلك إلا أن الأغلبية كانت ضد إقتحام السفارة الإسرائيلية يوم الجمعة
نظرا لعدم مسؤلية هذا التصرف الذى يعد انتهاكا للقانون الدولى
فمن حق الشعب أن يعبر عن غضبه كما يشاء ولكن دون إنتهاك للقوانين وهذا ليس دفاعا عن إسرائيل بالطبع ولكن دفاعا عن مصر التى وضعت فى موقف حرج أمام العالم
وهذا الكلام لاينطبق على سفارة إسرائيل فحسب فإن مصر عليها حماية أى سفارة على أرضها سواء كانت تلك السفارة سعودية أو أمريكية أو لأى دولة
وكذلك أى دولة فى العالم عليها أن تحمى السفارات على أرضها
هكذا يقول القانون
إن إسرائيل بالفعل لاتحترم القوانين وترتكب ممارساتها القذرة فى حق الفلسطينيين
ولم تحترم المعاهدة على الحدود مع مصر
ولكن حدث إقتحام السفارة تحديدا أعطاهم الفرصة لإستغلال الموقف
فرئيس وزرائهم تحدث عن أنهم تعاملوا مع الموقف برجاحة عقل
أى رجاحة عقل هذه ؟
أين كانت رجاحة العقل هذه من قبل على الحدود وأين كانت مع أطفال فلسطين
ولكن تلك هى إسرائيل فهم لن يفوتوا فرصة أن يظهروا أمام العالم كأصحاب حق ومعتدى عليهم وملتزمون بمعاهدتهم معنا ونحن من يتسم بالهمجية وسوء التصرف...إنها لعبة السياسة التى يلعبوها بإجادة وإحتراف ونحن للأسف لم نتعلم شىء من التاريخ
ربما يكون السبب فيما حدث هو عدم تلبية مطالب المتظاهرين بطرد السفير ردا على حماقات الجيش الإسرائيلى على الحدود
فبدأ الأمر بهدم الجدار المستفز الذى كان قرار بناؤه قرارا خاطئا
حقا علينا حماية السفارات ولكن ليس ببناء جدران أمامها
ولكن هناك تساؤل
ما كل هذا التهاون من قبل الأمن
كان من المفترض أن يقوم الأمن بالتحرك قبل تفاقم الوضع
فلا فائدة حدثت من إقتحام السفارة...فالفائدة ستكون لإسرائيل التى تسير بالمثل المصرى القائل(ضربنى وبكى وسبقنى وإشتكى)
ربما كان تكريم أحمد الشحات الذى قام بإنزال العلم الإسرائيلى للمرة الاولى من فوق السفارة أثرا فى نفوس البعض مما جعل بعض الشباب يصعد للسفارة مرة أخرى لإنزال العلم والحصول على تكريم مماثل
كان قرار تكريم الشحات قرار خاطئا ايضا
فإن جاء التكريم من الشعب فهذا طبيعى لأن الشعب المصرى يرى بعض الراحة والتشفى فى إحراق العلم الإسرائيلى مثلا فما بالك بإنزاله من فوق سفارتهم
ولكن عندما يأتى التكريم من الحكومة فيعد ذلك تشجيع للمزيد من تلك الأفعال فى ظل وقت حرج جدا يمر على البلاد
لم نستفد بأى شىء من أحداث إقتحام السفارة ومديرية أمن الجيزة ووزارة الداخلية سوى ضياع حق شهدائنا على الحدود
وتفعيل قانون الطوارىء
كم أتمنى أن نقف جميعا كمصريين صفا واحدا فى وجه من يريد إسقاط الثورة
حتى تمر تلك الفترة العصيبة وتصبح جزءا من التاريخ.

هناك 43 تعليقًا:

  1. السلام عليكم
    تابعت كلمات مقالك لاهميتها بمحاولة لقراءتها بشكل واضح
    اقول ان تكريم احمد الشحات من قبل الحكومة جاء رغبة فى كسب ود الناس ومحاولة اظهار ان المكرم تدعم الثورة وشباب الثوار وليس سوى اكتساب نقاط ف صالحهم دون الالتفات الى اى نتئج اخرى فهى رؤية قاصرة ينبغى تعديلها واعادة النظر فيها .
    اما عنا كشعب فنحن نتحرك وفقا للماشعر ونندفع خلف اى اشاعات او دعوات تبغى نشر الفوضى بيننا مادامت جاءت موافقة لرغباتنا ومكنونات نفوسنا .
    اقول ان الجيش استفز الشعب ببناء جدار عازل حول السفارة واقول ان اختيار هذا المكان فى هذه المنطقة للسفارة من بدايته اختيار مستفز فالجميع يعلم واسرائيل نفسها قبلهم ان لا احد يطيقها على وجه الارض فلما لا تكون سفراتهم فى منأى عن الاهالى والتجمعات والمناطق السكنية كما ان تأمين السفارة ليست مهمة صعبة ولكن لمن أراد أن يؤمنها سواء منا كمصر او منهم كصهاينة .
    ينبغى ان نقدم مصر على كل شئ ولا ننساق خلف دعوات تثير الفوضى وتكسب عدونا نقاط فى صالحه يأخذها علينا وكما قلتى فهم برعة فى اقتناص تلك الفرص .
    عذرا على طول التعليق
    دومتى بخير

    ردحذف
  2. Noha

    لنرجع لمجازر شتيلا وشبعا والعدوان علي لبنان ومجازر البوسنة والهرسك وانتهاك المدنيين بالعراق والتخلص من مسلمي كشمير وأجندات لا حصر لها من الاضطهاد للعرب والمسلمين نعرف أن الأمم المتحدة ما جعلت إلا لمحاربة كل من هو عربي ومسلم
    أعتقد ان ما قام به بواسل شباب المصري خرق لضعف الشخصية المصرية التي بناها المخلوع فطمع فينا حشرة تطير
    من الان لن يحكم مصر الا شعب مصر وهو من سيدافع عن حرياته

    أشكر لك قلمك
    وللعلم
    أمريكا صوتت منذ ثلاثة أيام بحق الفيتو ضد قيام دولة فلسطين

    إزيك بجااااااااااااا

    أعتقد ان هناك مشكلة بحسابي

    أحمد الصعيدي
    مدونة شجر الليمون

    ردحذف
  3. فعلا يلوم الجمعه الماضي احنا خسرنا كشعب قدمنا صوره مش كويسه للثوره ساعدنا اسرائيل وساعدنا قانون الطوارئ وصنعنا فرصه لتاجيل الانتخابات واطالة عمر المجلس العسكري انا شايف ان احنا محتاجين نفكر شويه عشان نوصل للي احنا عاوزينه
    تحياتي

    ردحذف
  4. متفقه معاكي جداً يا نهى لسه كاتبه بوست شبهه..فعلاً الجدار كان إستفزاز مش أكتر و جر رجل عشان خطة مش عارفه هتودينا لفين...و الأمن مهزلة بكل المقايس.
    ربنا يستر و يرحمنا

    تحياتي ليكي مقال رائع كعادتك

    شيرين سامي

    ردحذف
  5. والله يا نهى .. انا عندي رأي ثاني خالص .. هي اسرائيل من متى تهتم برأينا وتقلب علينا الرأي العام .. مهما فعلنا حتى لو صلينا لها ركعتين سوف تقلب الدنيا علينا ، يكفي فرحتنا كفلسطينيين ، يكفي ان الشباب المصري ادخل الفرحة لكثير من البيوت الحزينة هنا في غزة ، يكفي انهم شفوا غليلنا وصدورنا .. صدقيني اسرائيل لا تبحث عن حجة لتستعطف العالم ليقف معها ضدنا كعرب ، فهذه هي مهمتها وهوايتها وهي بارعة فيها ، يكفي ان مهاجمة السفارة ، جعلتهم يحسبون ألف حساب للشباب المصري ، وهم الذين استهانوا بالدم المصري المسفوك على حدود سيناء بغير وجه حق ، ورفضوا ان يقدموا ولو اعتذار عما حدث .. " شايفة قد ايه هم متغطرسون !" ، هل رأيتي النموذج التركي في التعامل مع دولة الاحتلال ، لانهم رفضوا الاعتذار عن مقتل الاتراك في اسطول الحرية .. هل النموذج التركي افضل من المصري ؟؟ يجب ان تعلم اسرائيل ان مصر بعد الثورة قد تغيرت ، يجب ان يعملوا لمصر الف حساب من اليوم ورايح .. مصر لم تعد كما كانت في عهد مبارك ..

    اتمنى ان لا تغضبي من تعليقي ووجهة نظري ، وانا اشعر بأن قلبك كبير يتسع للجميع ع اختلاف أرائهم ..

    دمتي بخير انت ومصر الحبيبة التي مافتئت تدخل الفرحة لقلوب الشعب الفلسطيني .

    ردحذف
  6. معاكي في كل كلامك

    تكريم أحمد الشحات ده أكتر حاجة غاظتني
    كان كفاية إشادة غير رسمية
    ومينفعش أبدا في ظل الظروف المنيلة دي أديله شقة ووظيفة
    طب ما هو المخزن مليان أهو , خلاص نطلع كل يوم نجيبلك العلم S:

    تحياتي . .

    ردحذف
  7. السلام عليكم
    ازيك يانها؟
    انا عن نفسى واله مابقيت عارفه الشعب ده بيفكر ازاى ولا الحكومه دى مش راسيلها على وجه
    شويه طيبه وشويه بقناع
    وشويعه شديده وكمان اراء الشباب والمطالب الكتير الفئويه
    مش معنى ان اسرائيل بتلط يبقى نعمل زيها
    بالعكس المفروض اننا مشنسي فرصه ليهم يجملونا ولا يحسسونا اننا اصغر منهم
    وبرده مشفاهمه حاجه
    وبوست حلو حرك جوايا الكتير
    تسلمى ودمتى بخير

    ردحذف
  8. أحييك سيدتى
    على هذا الطرح الموضوعى والعقلانى
    بارك الله فيك وأعزك

    ردحذف
  9. كل ما بقراء لكي استفز استفزاز استفزاز

    ردحذف
  10. العزيزه نها
    تحياتى
    هذا التعليق اقوله دائما فى كل الزيارات التى ازورها وتتحدث عن هذا الموضوع

    انا حـ اعلق وتعليقى حيكون صدمه لكتير من الناس
    يا ست نها انا مش موافق خالص على اللى بيحصل
    لا موافق على اللى عمله احمد الشحات ولا موافق على اللى عملوه يوم الجمعه فىالسفاره الاسرائيليه
    من حقنا نحتج ونعمل مظاهرات امام السفاره ونعمل اللى نعمله
    لكن نقتحم السفاره .. دا كلام تهريج وهبل ولعب عيال ما يفهموش يعنى ايه اقتحام سفاره اى سفاره حتى لو كانت سفارة جهنم
    احنا ادينا كلمه وكلمة الرجاله لازم تحترم وتتحط على الراس .. واظن مصر اكبر من كل الرجاله اللى فى العالم ومصر اعطت كلمه انك يا هباب الطين يا اسرائيل حنعمل معاك علاقات دبلوماسيه ونفتح لك سفاره .. يبقى لازم نبقى عند كلامنا ونحترم كلامنا .. حتقولوا مش احنا دا انور السادات .. اقول لك كان بيمثل مصر الرجاله سواء كنا موافقين عليه او غير موافقين كان واجهة مصر امام العالم والا كان المفروض نثور عليه ونخلعه زى المخلوع بتاع اليومين دول .. حتقولوا الشرطه والجيش وخلافه والاعتقالات .. اقول لك دا ما يشفعش لنا امام العالم
    كلام الامم المتحده مش كلام فارغ .. فيه اتفاقيات دوليه لابد من احترامها واصبح من الحقوق احترام المواثيق الدوليه مهما كان رأينا فيها
    فيه طرق كتيره للتعبير ولاسترجاع حق الشهداء ..
    شكلنا ايه امام العالم الآن
    الثوره المصريه السلميه المتحضره التى احترمها العالم .,. شكلها ايه الوقت
    يعنى هوا احنا شوية همج او شوية رعاع اللى يطلع فى دماغه حاجه يعملها ولا ايه
    يعنى كل السفارات فىالقاهره تسحب البعثه بتاعتها عشان خايفه على نفسها من الناس الهمج دول ولا ايييييييه
    احنا لحد امتى حتمشينا ادمغتنا وفتحة الصدر وناخد كل حاجه بفتحة الصدر ..

    ليه احنا بنضيع حقنا والذى كان كالشمس الساطعه

    تفتكرى اسرائيل بآلتها الدعائيه واعلامها العالمى حتفوت الموضوع دا بالسهل

    يا عالم يا هوه احنا ضيعنا حقنا بهمجيتنا وادمغتنا الناشفه اللى زى الحجر

    يا عالم يا هوه لازم يكون فيه فرمله على افكارنا المتهوره

    يا عالم ياهوه شوية مخ .. شوية عقل .. شوية تفكير .. هو ما حدش بيفكر خالص ولا ايه الحكايه ..

    طبعا نا كتبت التعليق ده ورزقى على الله ودا رأيى وكل واحد حر فى رأيه ..


    تحياتى وكل عام وانت بخير

    ردحذف
  11. لما نبقى نتشطر على البلطجية الاول نبقى ندور على حروب خارجية ....نفسي نتعلم من اسرائيل السياسة كله من تحت لتحت وبيوصلو لهدفهم ...اما احنا فبنضيع حقوقنا بايدنا .وصوتنا عالي واونطجية ......الناس اللي فتحو عكا كان عملو ايه لو كان ده حصل لسفارتنا هناك ردا على كدة....كسرو الجدار ماشي كرمز لكن تخشو السفارة يبقى همجية,,,,...حتى لو هما مش حباينا ....

    ردحذف
  12. بالتوفيق والسداد
    تحيتي ومودتي

    ردحذف
  13. ابحثى عن الشرطة

    الموضوع فيه لغز كبير
    كيف لم تحرق السفارة
    بينما حرقت وزارة الداخلية

    تحياتى

    ردحذف
  14. عندى كلام كتير فى دماغى عاوزه اقوله .. بس لسه مش مركزه ودماغى مش مظبوطه

    هو الحقيقه الوضع كله بالنسبه ليا غير مفهوم ..

    ان شاء الله ارجع واعلق لما اركز .. بس دوقتى حبيت اقول انى عدت للمدونات

    ردحذف
  15. المجال حالياً ليس ميدان التحرير
    ولا حتى إنزال العلم الإسرائيلي

    المفروض أن تكثف كل الجهود نحو ميدان "مجلس الشعب" حتى يمثلنا نواب حقيقيين

    ردحذف
  16. انا رئى ان وجود السفاره غلط من اساسه هو مش مفروض اقتحامها بس لامفروض ازالتها نهائى وجودسفاره يبقىاحنا معترفين باسرائيل كدوله مش كا محتل صهيونى لارض فلسطين يا جماعه اسرائيل مش دوله جنب فلسطين لا دوله جوه ارض فلسطين محتله اعترافنا بالسفاره يبقى مفيش احتلال صح ولا ايه؟؟؟؟؟؟؟؟

    ردحذف
  17. قولتى كل الىجوايا
    وبرده انا مصممه ان الواحد مبقاش فاهم اى شىء
    بس المهم انك كويسه وربنا يدم عزيمتك وقوه مقالاتك
    تحياتى لكى

    ردحذف
  18. ازيك يا استاذة نهى ومرحبا بيكى بين قرائك

    معاكى حق فى كل الكلام ده بس عارفة احنا غلطنا فى

    اقتحام السفارة لاننا شعب متحضر من الالاف السنين

    لم نتعود على السطو و شغل العصابات و اغتصاب الارض
    و قتل الابرياء العزل

    ولكن الدم المصرة ليس هين و لو كانت الحكومة اخدت

    موقف سريع يهدئ الشارع المصرى كانت الامور اتغيرت

    و كان لازم الاسرائلين يحسوا بغليان الدم المصرى

    علشان تصبح ذاكرة فى اذهان من تسول له نفسه الغدر

    بالدم المصرى مرة اخرى

    لكن الفرحة اخذتنا فى اتجاه اخر بدل ما يكون احساس

    جميل تحول الى هدية شقة و وظيفة جعلها مزحة و اضاعت

    الفرحة مع اعمال الشغب بس خلينا نبص لبكره و

    مستقبل جديد و اعادة احترام الانسان المصرى من جديد

    ردحذف
  19. مدونة رحلة حياة

    معاك حق قرار بناء الجدار استفز الناس جدا

    وهدم الجدار عموما ماكنش مشكلة

    لكن مش لازم نمشى خلف مشاعرنا لان مصلحة البلد مافيهاش مشاعر
    نورت المدونة

    ردحذف
  20. سواح فى ملك الله

    اشكرك جدا ونورت المدونة

    ردحذف
  21. هكمل رد على التعليقات النهاردة ان شاء الله

    ردحذف
  22. أحمد الصعيدى

    كان عندى علم فعلا بتصويت امريكا ضد فلسطين

    عموما اكيد الاختلاف فى الراى لايفسد للود قضية

    حضرتك نورت:)

    ردحذف
  23. eng-semsem
    معاك حق
    مشكلتنا اننا بنتعامل فى السياسة بمشاعرنا والسياسة مفيهاش مشاعر نهائى

    ردحذف
  24. شيؤين سامى

    شكرا لكى يا شيرين على رأيك

    فعلا الجدار كان استفزاز والناس هدوه اقتحام السفارة هو اللى كان غلط

    ردحذف
  25. وجع البنفسج
    اكيد احنا كمصريين مقدرين جدا معاناة الشعب الفلسطينى لكن فى حاجات لازم يكون التعامل معاها بهدوء اكتر من كده علشان تجيب نتائج ايجابية مش العكس

    ردحذف
  26. faw

    متفقة معاك جدا

    حاجة زى كده هتخلى الناس كل يوم تعمل حاجة طالما بيلاقوا تشجيع

    ردحذف
  27. ينت الاسلام

    هو ده بالظبط اللى انا اقصده

    نورتى

    ردحذف
  28. محمد الجرايحى

    شكرا لحضرتك جدا
    ربنا يخليك

    ردحذف
  29. فشكووول

    اولا اهلا بحضرتك

    ثانيا حضرتك بتتكلم صح جدا

    وفعلا بهمجيتنا ضيعنا حاجات كتير جدا

    نورت المدونة:)

    ردحذف
  30. تركيب

    فعلا هما عندهم من الخبث مايكفى انهم يقدروا يقلبوا الحقائق
    يعنى تعاملنا معاهم لازم يكون فيه ذكاء

    ردحذف
  31. محمد ملوك

    شكرا ليك

    نورت المدونة

    ردحذف
  32. ابراهيم رزق

    حاجات كتير جدا حصلت وبتحصل واحنا مش عارفين عنها حاجة

    كل حاجة دلوقتى مجرد ألغاز

    شكرا لحضرتك

    ردحذف
  33. مها البنا

    اهم حاجة انك رجعتى تانى بالسلامة

    فى انتظار كتاباتك الجديدة

    ردحذف
  34. عارفة...مش عارف ليه

    متفقة معاك جدا

    المهم دلوقتى الانتخابات

    ردحذف
  35. الحنين

    فعلا هى دولة محتلة
    وبغض النظر عن شعورنا كشعب ناحيتهم
    لكن مجرد ان لهم سفارة عندنا يبقى الحكومة مسؤولة عن حمايتها زيها زى اى سفارة تانية

    ردحذف
  36. بنت الاسلام

    شكرا ليكى

    ربنا يكرمك

    ردحذف
  37. محمد السيد

    احييك على رأيك جدا

    شكرا ليك ونورت المدونة

    ردحذف
  38. صح يانها معاكي حق جدا ربنا يستر في اللي جاي

    ردحذف
  39. كارمن

    فعلا ربنا يستر

    نورتى ياكارمن

    ردحذف
  40. السلام عليكم
    تحياتى
    استاذه نهى
    الموضوع بقى سداح مداح وكل واحد او كل فئه تقدر تلوى دراع الدوله بتعمل كدا مع اننا كلنا مظلومين ومافيش مهنه اهم من مهنه وان الموضوع ان العمل زى العجله كله بيوصل لكله ومافيش وظيفه هى اهم وظيفه فى الدوله لانها لوحدها مش حـ تعمل حاجه .. كل وظيفه مهمه وكله بيساعد كله
    يا رب اكون واضح
    تحياتى

    ردحذف
  41. فشكووول
    حضرتك معاك حق طبعا بس العيب مش عليهم
    العيب على الدولة اللى بتقبل انه يتلوى دراعها او بمعتى اوضح العيب على الدولة اللى بتسيب الناس تتكلم لغاية ماتزهق وتنفجر

    نورت المدونة

    ردحذف

ممكن تكتب رأيك هنا وممكن تناقشني وتنتقدني كمان لكن الغلط ممنوع :)