الأربعاء، مارس 23، 2011

أعداء الثورة الحقيقيين!!


إنتشرت فى الآونة الأخيرة على مواقع الانترنت قوائم تمتلىء بأسماء المشاهير
تحت إسم اعداء الثورة.. ربما لأنهم لم يتحدوا مع الثورة منذ البداية॥ولكننى أعتقد أن هؤلاء ليسوا أعداء الثورة الحقيقيين فإن كان لهم رأى مختلف فعلينا ان نتقبل الرأى والرأى الأخر لأننا نريد أن نطبق الديموقراطية كما ينبغى॥ولكننى ارى ان هناك آخرين يستحقون لقب أعداء الثورة عن جدارة...
ولن اطيل حديثى وسأقص عليكم الأن واقعة حدثت لى جعلتنى أكتشف ان هناك من لايعبأ بالثورة ولا يحاول ان يغير من نفسه ليواكب مايحدث من تطورات وربما ايضا لايهتم بارواح الشهداء.
ذهبت امى لشراء قطعة ملابس من متجر كبير وإكتشفت بعد ذلك أن بها عيب صغير ولكنه ليس ببسيط
فذهبت معها فى اليوم الثانى لإستبدال القطعة بأخرى مشابهة
وبالطبع لم يمانع صاحب المتجر ولكنه أنبأنا بأن تلك القطعة كانت الاخيرة
وعرض علينا ان نختار شيئا من البضاعة المعروضة
وبالفعل اخذنا فى البحث عن شىء ملائم
ولكننا لم نجد خصوصا وأننا إكتشفنا أن معظم البضاعة لديه بها عيوب
وهذا جديد علينا لأننا نتعامل معه منذ زمن فلم يكن أمامنا إختيار أخر سوى أن نسترد النقود
ولكن صاحب المتجر رفض بشدة أن يعطينا النقود بحجة أنه قام بتقييد قيمتها فى دفاتره
ودار بيننا الحوار التالى:
- انا مش هينفع ارجعلكم الفلوس لانى خلاص سجلتها عندى
- أيوة بس هو مش فى حاجة اسمها سياسة المستبدل والمرتجع؟
- لا مفيش انا معنديش حاجة اسمها كده
- ازاى اذا كنت انت سمحتلنا اننا نبدلها من الاول يبقى اكيد من حقنا اننا نرجعها
- لا مش من حقكم لانى بشترط على الزبون ان مفيش حاجة بترجع المحل تانى
- طيب يبقى حضرتك كنت حطيت يافطة علشان نعرف الكلام ده
وبمنتهى الحدة كان رده:
- يافطة॥يافطة ايه؟ انتى مش هتعلمينى شغلى مفيش حاجة بترجع المحل

واخذ يردد بانه لن يقبل أن يرد لنا اموالنا....
حافظت على هدوئى معه على عكس عادتى تماما ربما لاننى صاحبة حق
وكنت اعلم جيدا ماذا سأفعل إن خرجنا من المتجر بدون النقود
ويبدو انه قرأ أفكارى فوجدته يقول
- بصى انا هديكى فلوسك
اخذنا النقود وانصرفنا وأنا على يقين تام بأنه اعطانا النقود
نظرا لخوفه من لجوئى لجهاز حماية المستهلك لأننى أعرف حقوقى
كما انه يستغل عدم وجود الامن وغياب الرقابة ويبيع بضائع معيوبة وبها تلفيات بأسعار باهظة
بالرغم من انه فى الماضى كان لديه أفضل البضائع ولكنه إختار الطريق الاسهل للربح।
هؤلاء هم أعداء الثورة الحقيقيين الذين لم يتغيروا وضمائرهم الخربة تمثل خطرا على الثورة...
وهؤلاء هم الذين ينبغى علينا أن نحاربهم ونقطع عليهم الطريق بحيث لايستطيعون إفساد ثورة شباب مصر।

هناك 28 تعليقًا:

  1. عند حق فقد قامت ثورتنا للقضاء علي الغش
    والجشع والاستغلال
    فالجشع الصغير حين حين يكبر يؤذي كثيرا
    فهذا عينة من وزرائنا الملقيين في السجون
    ورجال الاعمال المستغلين احتياجاتنا
    احييكي علي تصرفك الشجاع
    ويجب ان نفعل كلنا مثلك
    حتي لاتضيع بلادنا مرة اخري من ايدينا
    (((من غشنا فليس منا ))
    صدق الرسول الكريم

    ردحذف
  2. سواح فى ملك الله
    أشكرك
    بس لازم الناس دى تكتفى بقى باللى عملوه بجد حرام الجشع ده واستغلال الناس
    نورت

    ردحذف
  3. عندك حق فعلا الموضوع مش تغيير نظام وبس الاهم تغيير سلوك والتخلص من العادات السيئة التي وان جلبناها من النظام السابق الا انها يجب ان تنتهي بانتهاءه
    احسنتي

    ردحذف
  4. دى سلوكيات تحدث عندما لا يكون هناك قانون رادع و نافذ سريع

    و لكن فى اعتقادى الثورة المضادة يقودها احد اهم المتحكمين فى الحكم الان و الادلة المنطقية كثيرة

    ردحذف
  5. سندباد
    كل الناس لازم تتغير مش النظام بس احنا كانت مشكلتنا الاكبر كانت السلوكيات
    يعنى بسلوكياتنا النظام كان بيستغلنا

    ردحذف
  6. تيرز
    الثورة مش نهاية المطاف
    لسة بدرى اوى
    الثورة كانت البداية

    ردحذف
  7. اعداء الثوره هم من يستمرون
    في افعالهم الدنيئه
    ويريدون استمرار الفساد

    ردحذف
  8. الغش سلوك سيئ وخصوصا فى الاشخاص الذين ماتت ضمرائرهم ولم يوثر فيهم دماء شهداء الثوره فالامبالاه عند كثيرين وانا لا اندهش ابدا من هذه السلوكيات
    اتمنى اننا فعلا نحاول نغير انفسنا قبل ما نطالب الغير بالتغيير

    ردحذف
  9. كارولين فاروق
    معاكى حق بكل تاكيد
    نورنتى المدونة ياقمر

    ردحذف
  10. mrmr
    الغش مش هينتهى ابدا ولا الكذب ولا الصفات الوحشة
    هى دى الدنيا بس احنا بنحاول نتغير ونكون احسن
    منورانى

    ردحذف
  11. كل مكان فيه فساد حتي في نفوسنا احنا من زمان وانا بقول ان لو كل واحد صلح نفسه وبينه وبين ربه قبل مايشغل نفسه بالاخرين اكيد كلنا هنكون احسن

    ردحذف
  12. والله يا نهى معاكي حق
    بصراحة منظر مخزي اننا نكتشف ان اغلب الناس مكنتش بتعمل الصح علشان مقتنعة بيه لكن العكس كانت بتعمله علشان خايفة
    حاليا محدش بيحترم اشارة المرور
    واغلب الناس بقت بتعمل الغلط وهي متاكدة ان مفيش امن يومقفهم عند حدهم
    ربنا يستر
    وان شاء الله القادم افضل
    تحياتي

    ردحذف
  13. كارثه لو كان من امثال هذا البائع الكثير في مصر
    المشكله لو في كل مجال وجد هذا النموذج وبكثره

    هيبقى ايه الحل ؟؟؟

    أعتقد ان العقوبات الرادعه هي الحل لأمثال لهؤلاء
    وكمان معرفة الناس حقوقهم من اهم الحلول الي هتخلي الناس دي تخاف وتحسب عواقب الخطوات الي بتعملها

    ردحذف
  14. carmen
    هو ده الوقت اللى المفروض كل واحد يبدأ بنفسه بس مين يسمع ويفهم
    نورتينى

    ردحذف
  15. مصطفى سيف
    صح يامصطفى الناس كانت بتخاف مش كانت بتعمل على اقتناع
    الثورة برضه بينت سلبيات الشعب
    نورت

    ردحذف
  16. من كل بستان زهرة
    للاسف امثاله كتير جدا ومن كل الفئات والمهن
    مش عارفة الحل معاهم ممكن يكون ايه
    بس لازم نحاول برضه
    نورتينى

    ردحذف
  17. أنا بسجل حضوري في كلام فاضي لأنه في الصميم


    أسعدك الله

    ردحذف
  18. احمد الصعيدى
    متشكرة جدا بجد وسعدت جدا بزيارتك لمدونتى وسعدت جدا برأيك فيها لك منى جزيل الشكر

    ردحذف
  19. الأستاذة الفاضلة نهى
    لم يكن فساد صاحب المحل وليد يوم و ليلة ، بل هونتاج زمن طويل لكنك لم تكتشفيه من قبل ، فلا الفاسد صار فاسداً بين عشية و ضحاها و لا الصالح ينحرف بين يوم وليلة . نعم أزاحت الثورة طبقة الفاسدين الكبار ، لكن بقى الفساد بيننا.
    الرابط التالي يوضح المسألة أكثر
    http://pulpit.alwatanvoice.com/articles/2010/02/28/190719.html

    ردحذف
  20. السلام عليكم أختي نهى

    جزاك الله خيرا على إيجابيتك في الموقف ، وفي نقل الموقف لمن يستفيد منه..

    لكني أعتقد أن أعداء الثورة هم من يخططون لإجهاضها فعلا.. ويمكننا اعتبار ظهور عينات معلولة مثل هذا البائع هي إحدى ظواهر محاربة الثورة (مثل اختفاء الأمن الرادع والمتعمد بصورة أو بأخرى رغم جهود الوزير الجديد الذي أثق فيه صراحة)..

    نقطة أخرى أرجو ألا يقع فيها الكثيرون، وهي أن يوتوبيا التحرير لن تتكرر خارج التحرير، لأن تقارب القلوب وتوحدها لا يحدث إلا في الأزمات الكبيرة والمباشرة.. بينما خارج التحرير لم ولن تتحول الحياة إلى يوتوبيا لمجرد أن الثورة قامت.. فالمجتمع ما زال مليئا بالغشاشين والمرتشين والكذابين وووو... لكن الحفاظ على مكتسبات الثورة دوره أن يمنع هذه الأعشاب الضارة من النمو بفجاجة، وإن نمت فإنه يسهّل اجتثاثها سريعا.

    تحياتي.

    ردحذف
  21. صح كلامك دول اعداء الثورة

    واعداء الحياة الشريفة


    تحياتى

    ردحذف
  22. محمد محمود عمارة
    حضرتك معاك حق يا استاذ محمد بس احنا لازم نحاول اننا اكون احسن
    عارفة ومتأكدة ان الغشاشين ماصحيوش لقوا نفسهم غشاشين دى حاجة اخدت زمن كبير
    بس يمكن نقدر نقلل الفساد لو حاربناه

    ردحذف
  23. ماجد القاضى
    انا عارفة اننا مش فى الجنة علشان اللى حصل فى التحرير يحصل بعد كده
    انا نزلت الشارع وشوفت الناس لسة بترمى اكياس الزبالة فى الشارع ومخالفات المرور ماتتعدش كمان
    مش هتيجى بقى على البياعين وجشع البعض منهم
    بس انا عارفة ان انا وحضرتك وكلنا عندنا امل نكون احسن والحاجات دى كلها فعلا سببها غياب الامن او له فيها عامل كبير
    انا بشكر حضرتك جدا:)

    ردحذف
  24. الملكة هند
    شكرا ليكى ونورتى المدونة بزيارتك

    ردحذف
  25. ماتتخيليش .. أبدا .. إن روح ميدات التحرير أو أخلاقه هتسري في شريانات المجتمع !!
    إذا كان الهدف منها تم إسقاطه في أول محاولة للديمقراطية !!
    أنا مش عاوزة اتشاءم عندك هنا :)
    المهم يعني كويس انك خدتي فلوسك

    ردحذف
  26. غاليتي
    لا يغير الله بقوم حتى يغيروا ما بانفسهم
    ظلم النظام او الحكومات هي صورة زوم لظلم الانساان لاخيه الانسان
    فلابد ان نبتدأ باسفل الهرم لا بقمته
    لان الاساس هو القاعدة ولو كانت هذه الاخيرة مغشوشة فمهما علي الهرم سيقع لا محالة
    تحياتي لطرحك الذي لامس الجرح

    ردحذف
  27. شيماء على
    عارفة ان الدنيا مش هيبقى فيها روح التحرير
    وتشائمى براحتك ياشيماء لان كده هيبقى الحال من بعضه
    انا متشائمة برضه:)
    واخدنا الفلوس الحمد لله بس انا مش فرحانة علشان اخدتهم انا فرحانة علشان حاسة انى كنت ايجابية:)

    ردحذف
  28. شهرزاد
    بجد معاكى حق بس تفتكرى اننا ممكن نعمل ايه فى سلوك شعب لم يتغير من سنين

    ردحذف

ممكن تكتب رأيك هنا وممكن تناقشني وتنتقدني كمان لكن الغلط ممنوع :)