السبت، فبراير 26، 2011

الشعب يريد إسقاط النظام...(سلسلة ازمة ضمير)


-سمعتوا عن المظاهرات اللى هيعملوها يوم التلات الجاى؟

هذا هو السؤال الذى سأله لنا زميلنا الأستاذ حسن وهو ينظر لنا من خلف نظارته الطبية
رد عليه زميلى الأستاذ خليل
-ايوة ياسيدى الواد ابنى قاللى انه نازل هو واصحابه
سألته متعجبا
-ايه ده وهتسيبه ينزل؟
أيوة ودى فيها ايه ياأستاذ أمين وبعدين احنا هنفضل كاتمين على انفاس العيال
لغاية امتى يعنى هنبقى احنا والزمن عليهم ثم انه يعنى ايه اللى هيحصل دول
هينزلوا يقولوا شوية شعارات ويروحوا بيوتهم
- ماشى ياخليل انا معاك انها شوية شعارات بس يعنى شوية العيال
دول وشعاراتهم لاهتقدم ولاهتأخر يبقى ايه لزوم العطلة بس
-اهه بقى يفك عن نفسه شوية ده ياعينى لاعارف يشتغل ولا عارف حتى يعمل مشروع صغير
يبقى يوم ماييجى يفك عن نفسه بكلمتين فى الشارع عاونى اقوله لا؟
عدت الى منزلى وقضيت يوما عاديا مع أسرتى لم أكن مهتم بالمظاهرات المنتظرة
لاننى على قناعة أنها مظاهرات عادية لن تأتى بجديد كالعادة...
ولكن ماحدث لم يكن متوقع أبدا حيث كانت المفاجآت تتوالى واحدة تلو الأخرى بشكل عجيب
حتى ظهر الرئيس فى خطابه الثانى وأعلن عن عدم ترشحه للرئاسة مرة اخرى
وفى أثناء متابعتنا لردود الافعال على الخطاب على إحدى القنوات الإخبارية
قالت ابنتى:
بجد يعنى انا مش فاهمةالناس دى عاوزة ايه بالظبط الريس قال مش هيترشح
تانى وكمان قبلها أقال الحكومة عاوزين ايه تانى؟
رد عليها ابنى الصغير وائل بمنتهى الحماس
-اييييييه يابنتى الجهل اللى انتى فيه ده ازاى فاهمة ان الناس اللى فى التحرير دول هيمشوا قبل التنحى
هما كانوا طالعين رحلة دى ثورة يابنتى افهموها بقى
تدخلت أمه فى الحوار
-انت ياواد يامفعوص انت بتجيب الكلام ده منين مالناش دعوة احنا بالكلام ده
-يعنى ايه ياماما هو انا مش مصرى ولا ايه ؟
وبعدين الاستاذ علاء قالنا نقول رأينا بحريتنا لاننا جيل المستقبل
وكان ضروريا أن اتدخل انا ايضا لاعرف من هو الاستاذ علاء هذا وكيف يبث هذه الافكار فى عقول ابنى
وسألته:
مين بقى ياحبيبى الاستاذ علاء ده وقالك ايه بالظبط؟
-يابابا ده المدرس الجديد وهو بيكلمنا فى كل حاجة واحنا بنحبه اوى وهو دلوقتى زمانه فى التحرير وقالنا ان كل واحد فينا يقول لباباه ولاخواته الكبار انهم ينزلوا...
هو احنا هننزل امتى يابابا؟
-نزلت فى حفرة يابعيد
قالتها أمه وهى فى غاية الغضب ثم أكملت
-اخرس ياواد هى ناقصاك قولتلك مالناش دعوة وبعدين انت لسة صغير
بكى ابنى متأثرا وانهمرت دموعه وهو يتكلم
-ماليش دعوة انا عاوز انزل ده زمان اصحابى هناك مع الاستاذ علاء
قلت له بعد ما مللت من حديثه
-الاستاذ علاء ده زمانه فى امن الدولة دلوقتى بيتمرجح وهو متعلق من ودانه
وقوم نام انت واختك دوشتونى
وفى حوالى الساعة الثالثة بعد منتصف الليل وجدت زوجتى تصرخ وتنادينى من الشرفة
حيث أننى كنت أقف فى نوبات الحراسة مع جيرانى
-ياأمييييييييييين...يأميييييييييين الحقنى ياامين
هرولت مسرعا انا والجيران ظنا منا بأن هناك احدهم اقتحم منزلى
ولكننى علمت من زوجتى
ان ابنتى لديها الم شديد بالبطن
بالطبع انصرف جيرانى وهم ساخطين على زوجتى وابنتى واللصوص والنظام وعلى هذا الفزع اللامعقول ولم ينسوا أن يوجهوا نظرة إشمئزاز الينا قبل ان ينصرفوا
-بقى ندهانى علشان بسلامتها عندها مغص طيب اندهى بالراحة حرام عليكى انا هلاقيها منك ولا من الحرامية اللى انا مستنيهم.... منك لله ياشيخة
-يوه..........ايه ياراجل مش تيجى تشوف بنتك
- هو انا دكتور ياولية...وبعدين بقى فى الست دى يارب ارحمنى بقى
واتجهت الى ابنتى بالسؤال
-انتى اكلتى ايه يابنتى
قالت وهى متألمة
-مفيش يابابا ده حتة البسبوسة اللى كانت فى التلاجة
-!!!!!!!!!!!!!!!!!!!!!!!!!
-اكلتى نص كيلو بسبوسة لوحدك يامفترية اجيب منين دكتور دلوقتى فى حظر التجول ده
-اعمل ايه يابابا كنت جعانة اوى
طلبت من زوجتى ان تعد لها مشروبا دافئا وتعطيها مسكنا حتى نذهب للطبيب فى الصباح
وفى الصباح ازدادت حالة ابنتى سوءا وكان لابد من البحث عن طبيب فى اسرع وقت لاننا اكتشفنا انها لم تكتفى بالبسبوسة بل انها قامت بتناول بعض ثمرات التفاح وعدد من ساندويتشات الجبنة
اصطحبت ابنتى وزوجتى لنذهب الى الطبيب وقبل ان نغادر المنزل اوصيت ابنى بعدم فتح باب الشقة لاى شخص مهما كان
استغرقنا حوالى ساعتين فى مشوارنا هذا وعندما عدنا وفتحنا باب الشقة لم نجد وائل بالداخل
بحثنا عنه فى جميع الغرف دون جدوى
وبدأت امه فى البكاء
-ابنى اتخطف...الحرامية خطفوه
-ياستى وهيخطفوه يعملوا بيه ايه (ده لو قعد معاهم ساعة هيسلموا نفسهم).....
اهدى كده خلينا نفكر
-لالالالا انا عارفة بقول ايه ابنى اتخطف ياامين...هاتلى وائل انا عاوزة وائل
بلغ البوليس ياامين
-بوليس ايه مفيش بوليس دلوقتى
تركتها ودخلت الغرفة لأفكر بهدوء
وذهبت ابنتى لمشاهدة التلفزيون ولم تعبأ بصراخ امها ووصفها لها بالبلاهة لانها لاتهتم بإختفاء اخيها
وفجأة
-يالهوووووووووووووى
هرولت خارج الغرفة لكى افهم سبب صراخ زوجتى
-الحق ياامين ابنك فى المظاهرات وطالع فى التلفزيون
-؟؟؟؟؟؟؟؟؟؟؟؟؟؟؟؟؟؟؟
ردت عليها ابنتى
-مظاهرات ايه ياماما ده تلاقيه راح ياكل كنتاكى
لم أدرى بنفسى الا وانا فى الشارع استقل سيارة ذاهبا لميدان التحرير
كنت احدث نفسى اثناء الطريق
-كده ياوائل تنزل ابوك المظاهرات هو انا بتاع الكلام ده.......طيب والله لاجيبك من قفاك يابتاع الكنتاكى
ومان ان وصلت لميدان التحرير اخذت ابحث عن المحروس ولكننى شعرت وقتها شعورا عجيبا
فالمتظاهرين منظرهم رائع حقا
ولكننى لم أرى وجبات كنتاكى هناك
تمنيت أن اظل معهم
ولكنى حدثت نفسى
-ايه يا امين انت ضميرك الوطنى هينقح عليك ولا ايه اعقل كده وخد ابنك وروحوا
استمريت فى البحث عن وائل ...بحثت عنه طويلا وسط جموع المتظاهرين وفجأة وجدته كان يحمله أحدهم وهو مندمج فى الهتاف
بدأت اقترب منه لتلقينه درس عمره
وعندما رآنى لم يهتز أو يرتبك أبدا بل أنه
أشار الى بالانضمام والهتاف معهم
اقتربت اكثر واكثر الى ان وصلت للمجموعة التى يقف معها
ووجدت نفسى اشاركهم الهتاف
- الشعب يريد اسقاط النظام
______________




هناك 17 تعليقًا:

  1. الله يا نهي
    قد ايه جميله
    واحيانا الاب والام بيتعلموا فعلا
    علي ايدي اولادهم في مواقف كتير

    ردحذف
  2. اولا قصة واقعية تستحق التقدير
    انا لم انزل ميدان التحرير ولكن زوجى نزل يوم معركة الجمل والحمد لله انة رجع سالم وحكى لى عن مدى اصرار المتظاهرين وجلدهم وقوة تحملهم لاى شىء مهما كان فقد شاهد ناس مصابين يخرجون وسط الحشود وهم ينزفون يتلقون العلاج ويضعون القطن والشاش ويرجعون مسرعيين مرة اخرى
    تمنيت ان اكون معهم ولكنى نزلت يوم التنحى ولا استطيع ان اصف مدى روعة مشهد الناس وهم فى قمة فرحهم وكانة عيد المشهد مختلف عن ما نراة فى الفضائيات
    تحياتى

    ردحذف
  3. حلوه أوي يا نهى واقعيه و عصريه و أجمل ما فيها النهايه لأن ده شعور أي مصري بيحب مصر و خايف عليها حتى لو مش مستوعب المشاعر دي الثوره طلعتها
    أشكرك على القصه الجميله
    تحياتي الخالصه لك

    ردحذف
  4. قصةجميلة تعكس جميع اتجاهاتنا أيام ثورة الغضب ، أحييك أ. نهى

    ردحذف
  5. السلام عليكم
    جميل قوى يا نهى
    علمينا ازاى نكتب كمان وكمان
    دومتى رائعة

    ردحذف
  6. جميله زى سلسه ازمه الضمير
    جميله
    يا نهى

    ردحذف
  7. جميل بدون شك يا نهى
    دمك شربات
    تحياتى

    ردحذف
  8. د نهى
    لقد ابدعت حقا في تصوير الاحداث والشخصيات حيث سلبتينا اهتمامناا وغرستيه في تربة القصة
    لنستمته بريحها العطر
    دمت ودام قلمك

    ردحذف
  9. كان فيه ناس كتير خايفة او شايفة الموضوع مظاهرة و تعدى بس كان فى نفس الوقت فيه مجموعه متحمسه جدا خاصة بعد ما فوجئت ان عدد المشاركين فى الحماس اكبر من توقعهم

    ماحدث اعاد لمصر الروح و سيغير مفاهيم كثيرة

    ردحذف
  10. جميله اوى يا نهى

    بجد كلنا كناش نعرف هقولك على قصه انا كمان

    احنا كنا من بعض الشباب الى استجبنا ونزلنا كنا فكرين اننا لما هننزل نصلى الجمعه ونطلع المظاهرات فكرين اننا هنلاقى نفسنا مع شويه كمان وبس بس بجد كان عندنا زهول

    وكل مكان يحصل تطاول من افراد الامن كان شيئ بيشجعنا اكتر وبيحمسنا اكتر وبجد كان احساس جميل واحنا واقفين بندافع عن حقوقنا وكل مكان حد يتصاب فينا كان بجد احساس جميل انى بتصاب عشان انا عايذ حقى مش هقدر اكمل اكتر من كدا
    ولكنى تحمست لكلامك الجميل فى قصتك الواقعيه جدا

    ردحذف
  11. الله عليكى وعلى احساسك قصة اجمل من رووووعه

    ردحذف
  12. السلام عليكم
    حبية القصة وحبكتك وهدفك فيها
    بجد في بعض الاهل مايقبلوا انهم يخلوا اولادهم ينزلوا
    بس بعد ماينزلوا ويحسه ان هم زي كل الي نزلوا فيتراجعوا عن قرارهم
    اعذريني على تأخري
    تقبلي مروري
    سلامي لاجمل وارق نهى.

    ردحذف
  13. السلام عليكم أختي نهى

    رغم أنها متأخرة.. لكن أقولها بلا مجاملة: الفكرة جميلة جدا.. الحوار بسيط ويصل لأي أحد ناهيكِ عن تلقائيته وحميميته لأي بيت مصري :)
    تدرج الأحداث حتى لحظة الذروة كان منطقي ومتصاعد دون ملل..

    إعجاب خاص بالإشارة لأهمية وعظم دور المعلم الذي - إن كان على قدر المسئولية وذو مصداقية - يؤثر بشدة في التلاميذ، ربما بدرجة أكبر من تأثرهم بالأبوين أحيانا.

    تحياتي أختي الكريمة.

    ردحذف
  14. انا معجبه جدا جدا بالموضوع
    وبالاشخاص وبالافكار وبالمضمون وانك استخمدتى المعلم بطريقه صح واثبتى انه له دور فىة تاثير سواء ايجابى كما راينا هنا او سلبى لابجد حلوه اوى




    وتغير الى حصل للاب وتفكيره فى لحظه لانه شاف بعينه غير لما كان بيسمع


    ربنا يهدى الجميع ويثبتنا على تغير منافضل الى افضل تحياتى لكى يانها

    ردحذف
  15. امممممممممممم

    بصراحه ما بعرف كيف ارد عليكم انا بحي الشعب المصري اوي اوي جدا جدا

    واحترم حسني مبارك شوي صغيره وكنت اتمنى ان يطلع بشرف من الحكم


    اخي لو احببت ان نعمل تبادل اعلاني في ما بيننا ارجى التعليق في هذا الموضوع وشكرا لك
    http://sunforsun.blogspot.com/2009/11/blog-post_11.html

    ردحذف
  16. بجد رائعة جدا يا نهى

    انا عارف انى اتأخرت كتير

    بجد رائعة جدا اتمنالك التوفيق

    و موضوع رائع و يحاكى الواقع

    فى انتظار باقى معالم الثورة و الحرية يأيدى مصرية

    بالتوفيق و النجاح دائما

    ردحذف

ممكن تكتب رأيك هنا وممكن تناقشني وتنتقدني كمان لكن الغلط ممنوع :)