الحقيقة من اخر بوست كتبته وانا بفكر فى موضوع البوست الجديد رغم المشكلة او العطل اللى حصل بالاضافة لظروف سفرى لكن حبيت انى ارتب افكارى واشوف موضوع مناسب ارجع به للمدونة.
وامبارح فقط والحمد لله طبعا على كل شىء خطر على بالى فكرة حلوة جدا واتفقت مع نفسى انى هكتبها اول ماافتح الكمبيوتر ده لو ربنا اعطانى العمر طبعا.......
لكن حصل اللى ماعملتش حسابه..
انا نسيت كنت عاوزة اتكلم فى ايه........ياخبر ابيض.....الفكرة راحت فين؟
وفضلت احاول افتكر انا كنت عاوزة اكتب ايه لكن بلا جدوى ...وللاسف كل اللى فاكراه انها كانت فكرة حلوة جدا..وعلى فكرة دى مش اول مرة تحصل معايا...........حكاياتى مع النسيان مش بتنتهى لغاية هنا..انما فى اكتر من حكاية واكتر من موقف.
يعنى مثلا...
أحيانا لما يكون معايا حاجة وأشيلها فى مكان وارجع ادور عليها مش بلاقيها غير بتوفيق من عند ربنا او حد ممكن يلاقيها بالصدفة واخر حاجة ضاعت منى كانت سماعة موبايلى اللى بدور عليها وقلبت عليها البيت مش لاقياها...ياترى ممكن اكون حطيتها فين؟
اكتر حاجة كانت بتغيظنى وتفرسنى وتعكنن عليا كانت ايام الدراسة...انا مرت عليا فترة فى حياتى كنت بفتكر كل حاجة والفترة دى تقريبا كلنا بنبقى شاطرين فيها وهى فترة ابتدائى...بعد كده مابقتش بفتكر اوى يعنى (يمكن علشان ماكنتش بذاكر اوى ولا ايه مش عارفة) المهم مرت السنين وبقيت فى فترة الجامعة و كانت اصعب فترة فى حياتى بصراحة انا مش النوع الدحيح... انا بذاكر على قدر المستطاع.. والمستطاع بالنسبة لى هو قبل الامتحان بأسبوع بس كانت مذاكرة بجد وكانت المواد اللى عندنا بعضها نظرى والباقى كله محاسبة واحصاء ورياضة ...فى النظرى لو غلبت اوى يعنى كنت بطلق لخيالى العنان وهات ياتأليف (فى صميم المنهج طبعا) لكن لو عملى ودى مشكلتى كنت ببقى فى نص هدومى من المراقب اللى شايفنى قاعدة لغاية نص الوقت عنيه مش بتتحرك من على السقف...وفى الاخر كنت بضطر اكتب اى حاجة وطبعا فى النهاية النتيجة بتكون معروفة وبتعلن عن نفسها .
وبمناسبة ذكر الامتحانات انا ياما خرجت من الامتحان ونسيت اذا كنت كتبت رقم الجلوس على الورقة ولا نسيت وكنت بفضل على اعصابى وماقدرش اتكلم ولااشتكى (خايفة من التهزيق طبعا) لغاية يوم النتيجة... والحمد لله كل مرة كنت بكون كاتباه.
حاجة تانية كمان بقى وهى انى بنسى الحاجة اللى كنت عاوزة اعملها ......عملتها ولا لسة......يعنى مثلا ممكن انسى انى قفلت باب الشقة كويس.. او حاجة كنت عاوزة اشتريها.. وطبعا كل مااروح السوبر ماركت لازم انسى طلب من الطلبات...
اكتر حاجة بتحرجنى فى الحكاية دى هى انى لو شوفت شخص لاول مرة بنسى شكله يعنى لازم اشوفه اكتر من مرة علشان افتكره واعرفه ولكم ان تتخيلوا لما حد بيشوفنى وانا لسة ماحفظتش شكله ويقابلنى فى الشارع وانا اعدى من جنبه عادى جدا ....حاجة سخيفة جدا بجد...
بس فى حاجات بفتكرها ومش بنساها....
انا مش بنسى التواريخ الحمد لله يعنى اعياد الميلاد والمواعيد المهمة والذكريات الحلوة وممكن يكون فى تواريخ فى دماغى مش لاقية لها مناسبة...اللهم لك الحمد.
كمان فى حاجة تانية مش بنساها......انا مش بنسى تصرفات الناس معايا يعنى سواء كانت حلوة او مش حلوة ولابنسى الجمايل ابدا...
هى قلبت دراما كده ليه؟.....المهم خلينا نتكلم بقى فى الموضوع الجديد والفكرة الجديدة اللى فكرت فيها بعد الفكرة اللى نسيتها....
النهاردة هنتكلم عن....
عن....
عن....
يووووووووووه نسيت!!!
