مدونتي
وش السعد
كلام فاضي
البداية
عدنا..
الثلاثاء، أغسطس 11، 2015
الاثنين، أبريل 21، 2014
تجربتي الصوتية على sound cloud
إزيكم :)
بما ان كان نفسي أشتغل مذيعة قلت اجرب حظي و أنزل حلقات كل فترة و أرفعها على sound cloud
و دي الحلقة الاولى
طبعا انا مش محترفة و لسة في البداية
دعواتكم لي اني اكمل و اكون أفضل
و مستنية رأيكم بقى:)
الجمعة، مارس 28، 2014
أمنية مستحيلة
كانت تشعر أن هناك من يحتل عقلها و يعبث بمحتوياته
لو كان باستطاعتها أن تستبدل هذا العقل بآخر لفعلت ذلك توًا
فعندما أحبته لم تكن تعرف أنها ستخوض حربًا لاسترجاع عقلها الذي سيطر عليه بكل مهارة...
قررت أن تتخلص من سيطرته عليها و تتركه و لكنها تراجعت في لحظة و أيقنت أنها أمنية مستحيلة.
لو كان باستطاعتها أن تستبدل هذا العقل بآخر لفعلت ذلك توًا
فعندما أحبته لم تكن تعرف أنها ستخوض حربًا لاسترجاع عقلها الذي سيطر عليه بكل مهارة...
قررت أن تتخلص من سيطرته عليها و تتركه و لكنها تراجعت في لحظة و أيقنت أنها أمنية مستحيلة.
السبت، سبتمبر 14، 2013
حوار بين بنتين
قررت مي في "ساعة مايعلم بها الا ربنا" أن تهاتف احدي صديقاتها و بعد السلامات باغتتها صديقتها بسؤال مفاجئ
-سمعتي أغنية دنيا سمير غانم الجديدة ؟
-لا لسة ماسمعتهاش هي حلوة؟
-يااااااااااه مفيش كلمات أحلى من كده الأغنية بتجسد كل معاني الحب.
-طيب هروح أسمعها و أرجعلك...
بعد قليل قامت مي بالاتصال بصديقتها ودار بينهما حديث طويييييييييل :
- ايه يا بنتي ده...ايه الاغنية دي
-عجبتك مش كده
-لا طبعا هو الكلام اللي في الغنوة دي عجبك يعني انتي ازاي كده؟
-يا بنتي انتي بس اللي مابتعرفيش تحبي
-لو الحب كده يبقى يغور انا مش عاوزة احب حد ولا حد يحبني
- هو انتي بس ايه اللي مش عاجبك فيها ؟
-كلها مش عاجباني كلمات الاغنية استفزتني بشكل مبالغ فيه يعني ايه واحدة تقبل ان حد يطلع لها فجأة كده ويخليها تغير طريقة لبسها وتسيب صحابها اللي بتحبهم وبعدين تعليمات ايه اللي هتنفذها يعني..هو ده حب ولا معسكر كشافة
أطلقت الصديقة ضحكة مصطنعة تدل على "الغيظ الشديد" وقالت:
-يعني انتي بقى عاوزة تفهميني انك لما تتجوزي مش هتسمعي كلام جوزك وهتلبسي اللي على مزاجك وتصاحبي ولاد يعني ولا ايه انتي فاكرة نفسك عايشة في انجلترا؟
-لا يا متخلفة.. انتي اللي فاهمة إنك عايشة في عصر الحريم وتقريبا كده كان نفسك تبقى واحدة من حريم السلطان وبعدين تعالي هنا هو انتي فاهمة ان اللي هيتجوزك ده لازم يتحكم فيكي ويعيد لك ترتيب حياتك من جديد؟
-أكيد من حقه يعني يقول اللي شايفه صح مش جوزي وهبقى مسؤولة منه ولا يعني يسيبني كده من غير ما يشكمني؟
-يشكمك إيه!! يعني انت مستنية واحد ييجي يعمل لعقلك Format ويبرمجك من جديد على كيفه طيب لما هو كده بقى ليه ماشفش واحدة جاهزة و متبرمجة بدل ما يتعب نفسه و يشتغل من الأول، يعني تفتكري انك من غيره هتنحرفي وتروحي تعرفي ولاد ولا انتي تربيتك تمنعك من كده؟ وتفتكري لبسك لو مش عاجبه من البداية ايه اللي هيخليه يتقرب منك علشان يرتبط بيكي ؟، كمان لو صحباتك مش عاجبينه ايه اللي هيخليه يعرفك ويكمل معاكي أساسا وهو عارف ان دول كانوا صحباتك وانتي أكيد زيهم أو حتى تفكيرك قريب لهم...انتي مش مقتنعة ان كل ده مجرد محاولات لفرض السيطرة والتحكم مش أكتر وان كل ده مالهوش علاقة بالحب..طيب لو في واحد صاحبه عرفتي انه بيخون مراته مثلا و قولتيله ماتعرفهوش تاني تفتكري هيسمع كلامك وهيبقى مقتنع انك بتحبيه وخايفة عليه ولا هيشوف ان مش من حقك تتحكمي فيه؟
-!!!!!!!!!!!
-طبعا مش عارفة تردي واللي زيك لما هتتجوز مش هتخلف لنا غير واحد معقد ومريض نفسي زيك انتي و أبوه بالظبط وهتفهميه انه سيد الكل ويكبر ويطلع عقده على واحدة مسكينة تانية...ولا مسكينة ليه أكيد برضه هتبقى واحدة مريضة زيك وعندها هوس بإنها تفضل مجرد تابع علشان مجتمعها فهمها الحب والجواز غلط.
-انتي ازاي تكلميني كده أصلا...أنا مش عاوزة أعرفك تاني يا مي انتي معقدة
-أنا اللي معقدة ولا انتي اللي جاية من عصر البخار انا اللي مش عاوزة أعرفك تاني.
وتغلق مي السماعة بشدة وتذهب لتسمع أغنية ثورة نسائية
ومع انتهاء اليوم كانت قد انتهت العديد من الصداقات بسبب هذه الأغنية.
السبت، سبتمبر 07، 2013
الاثنين، يوليو 01، 2013
حولياتى
أصدقائي المدونين
هنا لينك مدونتي الجديدة حوليات نهى صالح
اللي بشارك فيها في فعاليات التدوين اليومي لمدة عام (حوليات)
وهنا لينك اول تدوينه
الأحد، مايو 05، 2013
ينفع كده ياريس؟
في
الاول بس ماتفكرش ان دى رسالة فيها تطاول ولا حاجة لالالا أبدا أصلهم زمان علمونى
إن التطاول عيب والشتيمة غلط بس بينى وبينك وماتقولش لحد يعنى أنا بشتم فى سرى
ينفع كده ياريس عاجبك اللى بيحصل فى البلد ده
مش انت برضه الريس ولا أنا غلطت فى العنوان
ماهو طالما انت الريس يبقى تشوفلك حل بقى مع
المشاكل اللى مخليانا مش عارفين نعيش فى بلدنا
مش إنت عارف إن فى مشاكل ولا إيه؟
المهم ياريس علشان ما أطولش عليك وأسيبك
لمشاغلك
عاوزة أسألك سؤال هى الثورة دى قامت علشان فى
الآخر المواطن يبقى نصيبه من العيش خمس أرغفة بس صحيح أنا مش مستفيدة من العرض
الهايل ده
بس يعنى مش عاجبنى انكم تحددوا للناس الكمية
اللى هياكلوها ما هو ممكن فى يوم نصحى نلاقيكم عاملين لنا خريطة بمشاويرنا كمان
طيب بلاش العيش
البنزين يا ريس
قولى كده لو انت رايح تفتتح خط انتاج
المكرونة إياه الخمسة لتر دول هيكفوك
لو إبنك رايح يشترى قميص وبنطلون من سيتى
ستارز هيكفوه الخمسة لتر ياريس ولا انتم بتتعاملوا بشكل تانى
بقولك ايه ياريس مش انت قولت ان فى علاوة
طيب الوزير قال ان ماينفعش يا ريس
بتعشم الناس ليه والبلد مافيهاش فلوس
هو احنا اصلا عارفين يعنى اننا بلد مفلسة بس
اهه الناس مستنية تتعلق بقشاية تقوم تعشمهم وتخلى بيهم يا ريس؟
المفروض
يبقى فى رحمة بالمواطن علشان هو أصلا مش ناقص غلب وبقى ماشى والله بيكلم نفسه
شكلك زهقت ياريس بس معلش استحملنى ما هو أنا
برضه من البلد دى ومن حقى عليك تسمعنى
بيقولوا إن الإعلام هو السبب فى البلاوى دى
كلها وبيقولوا إن القنوات مضللة وبيضحكوا علينا وكل حاجة تمام
طيب أنا هعمل بالنصيحة واتفرج على قناة مصر
25 ومش هتفرج على أى قناة تانية بس تفتكر ياريس لما أعمل كده
كيلو البامية سعره هينزل؟
طيب الأمن هيرجع تانى ومانمشيش وإحنا خايفين؟
النور مش هيقطع كل ساعة والتانية وفاتورة الكهرباء هتقل والشوارع هتنور تانى؟
طيب انت عارف انهم هيزودوا ساعات قطع النور
فى الصيف رغم اننا بندفع الفواتير العالية دى وبندفع ضرايب كمان
طيب هما هيقطعوا النور عندك ياريس؟
صحيح ياريس سايب هشام قنديل يعمل ايه فى البلد
حاول تغيره ياريس هات واحد فاهم لها من اى
حتة يارب حتى يبقى من شمال جنوب شرق تنزانيا المهم يعمل حاجة جديدة
يعمل
حاجة كويسة تفيد البلد
وتخلى وزير الإعلام يبطل الكلام اللى بيقوله
للصحفيين ده...شكلنا بقى وحش والله
وفى النهاية على رأيك البلد بقت شبه المكرونة
الإسباجيتى يعنى ملعبكة على الأخر بس ياترى مين اللى لعبكها كده؟؟
أنا عارفة إن كلامى مش هيعجب الإخوان وقايلين
إنهم إخوان
ومش هيعجب الإخوان وبيقولوا على فكرة أنا مش
إخوان
وممكن مايعجبش ناس أصلا مش إخوان
يمكن هما شايفين حاجات مش شايفينها
وربنا ينور بصيرتهم كمان وكمان
بس مش مهم أصلهم كانوا كلمتين وكنت عاوزة
أقولهم وخلاص
أنا عارفة طولت عليك ياريس بس معلش أهه فى
النهاية مجرد كلام والسلام
سلام ياريس
الاشتراك في:
الرسائل (Atom)