قطط لها بخت

الناس فى مصر نوعين

نوع بيحب الحيوانات الاليفة جدا

ونوع تانى بيحدفها بالطوب فى الشارع بسبب ومن غير سبب

والحيوانات ايضا نوعين

نوع عنده حظ كبير

والنوع التانى هو اللى بينضرب بالطوب طبعا ومتبهدل من العيال الصغيرة

انا عاوزة اتكلم عن النوع الاول من الناس النوع الحنين اللى مشاعره مرهفة وقلبه رقيق

مالناش دعوة بالاشرار الوحشين اللى بيزعلوا قطط وكلاب الشوارع المساكين الغلابة.

قبل ماادخل فى الموضوع احب اقولكم انى بحب الحيوانات وبتعاطف معاها جدا

بس من بعيد لبعيد لانى بخاف من اى كائن حى بإستثناء البنى آدمين

يعنى ماعنديش اى عداوة مع اى حيوان أليف..

ندخل فى الموضوع على طول

زمان الناس كانت بتربى القطط وتخليها تاكل من اكلهم ..الاكل الباقى من البيت يعنى

شوية كبدة على سمكة فايضة من الغدا وحتة جبنة

وطبعا اللبن اللى تلاقيه قصاد القط وهو ملك زمانه

انما من فترة مش كبيرة اوى انتشرت علب شكلها شيك جدا والوانها جميلة ومرسوم عليها قطة مقطقطة

مكتوب عليها الطعام المفضل للقطط(استغربت اوى من الجملة دى)

انا بصراحة مااديتش اهتمام فى الاول

لغاية مافى يوم من الايام وتحديدا فى احد ايام شهر رمضان اللى فات ده

اخدنى الفضول انى اعرف اسعار طعام القطط المفضل ده(غايظانى اوى كلمة المفضل دى)

وفعلا اخدت علبة وبصيت على السعر

سعر العبوة كان 13.50

وحجمها بضعة جرامات قليلة

كل ده علشان عم القط ياكل ويشبع (مش عايزة حد يفتكر انى باصة للقطط فى اكلها)

المبلغ قليل بصراحة ممكن يجيب ربع كيلو جبنة يعنى مافيهاش حاجة لما القط ياكل هو كمان

ماهو قط بيتى مش قط شوارع يعنى

مش هنبقى دافعين فيه الشىء الفلانى ونستخسر فيه ملاليم

احنا مش جايبينه علشان نبهدله.

بس كمان مش معقول يبقى فى ناس عاوزة جنيه تجيب ساندويتش فول وماتلاقيش

وانت ياعم القط مدلع اوى كده

صحيح اللى عذبت قطة دخلت جهنم

واللى سقى كلب دخل الجنة

بس شوفوا بقى اللى هيطعم بنى ادم هيكون جزاءه ايه

عارفة ان ممكن حد يقولى ماهو الناس اللى عندها قطط وبتشترى لها اكل اكيد بتعمل خير

والله عارفة ماقولتش حاجة ومش معترضة

بس لما تكون طالع من السوبر ماركت وشوفت الراجل جايب كمية كبيرة من اكل القطط المفضل (وحطوا تحت المفضل دى مليون خط)

ويقابلوا على الباب واحد غلبان يطلب حسنة

والراجل يشتموا .......

.ياترى هيكون ايه رد فعلك؟

ايه الشعور اللى هيكون جواك؟

هو الراجل الغلبان ده لازم ينونو يعنى علشان ياخد حسنة!

لو الراجل مش عاوز يديله ماشى

بس مش لازم يشتمه

ربنا قال (وأما السائل فلا تنهر)

فعلا فى قطط لها بخت

حاجات كتير تانية بشوفها بترفع ضغطى وبتعصبنى

هكتبها البوست الجاى...

البوست ده مكتوب بغيظ و من غير تركيز

استنوا البوست اللى جاى ان شاء الله

يمكن اركز شوية

مشروب الرجولة الاول

لو كنت عيل صغير بتلعب فى الشارع وبتجرى ورا عربيات الرش طول النهار

لو اهلك مفيش على لسانهم غير كلمة ياعيل....

خلاص مشكلتك اتحلت اوعى تزعل ابدا ولا تشيل فى نفسك

الحل موجود ومش هيزيد سعره عن كام جنيه

نحن نقدم لك المفاجأة

الحل الاكيد للرجولة

استرجل يابنى انت وهو

استرجل بسرعة واشرب بيريل

تعالى على نفسك واستحمل طعم الشعير علشان تاخد اللقب

ده مش اى لقب

ده لقب رااااااااجل اللى علشان تاخده

لازم تسترجل فى الاول

وتشرب بيريل

انسى معنى الرجولة الحقيقى ..

انسى الشهامة والاخلاق الحلوة والكرم وانسى انك تكون كويس مع الناس ومع اهل بيتك وانسى انك تكون صادق فى وعودك وعند كلمتك وانسى انك لازم تحترم نفسك وتتقى ربنا فى تصرفاتك

انسى كل حاجة لها علاقة باللى عرفته وسمعته زمان عن الرجولة ومعناها الحقيقى.

افتكر بس معايير الرجولة الجديدة ..افتكر انك لازم تحط الانكل على الركبة علشان تكون ارجل من دروجبا..

ولازم تفتكر انك لو بتتخانق انت وصاحبك مع ناس كتير لازم تستندل وتضرب صاحبك بدل ماتجرى وتسيبه انما اوعى تفكر تقف معاه او تدافع عنه علشان هما كتير.

اشرب بيريل واسترجل علشان طعمه الجميل هيغطى على المر اللى انت بتدوقه

على اساس ان الرجالة بس هما اللى بيتبعبوا وبيدوقوا المر

وعلى اساس ان مشروب الرجولة الاول هو اللى هينسيهم المر والبيت والعيال والشغل والمصاريف

وكل القرف اللى شايفينه.

زمان كان المراهقين بيعايروا بعض بقلة شرب السجاير

وكان معيار الرجولة بالنسبة لهم هو السيجارة

دلوقتى الدنيا تطورت وبقت الرجولة كلها مقفول عليها فى زجاجة بيريل

العبقرى صاحب فكرة الاعلان عرفنا ان مشروب البيريل ده مشروب رجالى زى الملابس الرجالى والاحذية الرجالى كده

يعنى محظور على السيدات شربها

طيب ياترى لو كان فى سيدات وبنات بيحبوا يشربوا بيريل

ياترى هيكون ايه الموقف

مش كده الشركة خسرت زباين ؟

انا متهيألى ان الحملة الجاية هتكون اعلانات عن مشروب بيريل الحريمى(للسيدات فقط)

بس خليكوا شاهدين انا صاحبة الفكرة

علشان لو نفذوها تبقى حقوقى المالية محفوظة....

عم حجاب..رجل من زمن الطفولة.

كلنا نشتاق ويأخذنا الحنين للطفولة وذكرياتها نتذكر أصدقائنا وألعابنا والاشخاص الذين تركوا أثرا فى حياتنا.

عندما أتذكر طفولتى لاأستطيع أن أنسى شخصا كان جزءا مهما منها..
انه عم حجاب صاحب كشك الحلويات الوحيد بمنطقتنا ..
لااستطيع ان انساه بجلبابه الواسع البسيط وانا ذاهبة الى مدرستى كل صباح يجب ان امر عليه فى طريقى .

كان عم حجاب رجلا طيب...طيب جدا يقابلنا دائما بإبتسامة وكانت زوجته ايضا طيبة جدا مثله .

كنت معتادة ان اذهب يوميا لعم حجاب لكى اشترى منه ماأريد قبل ذهابى الى المدرسة ..أتذكر أكثر شىء كنت أشتريه كان (شيكولاتة مونى) هل تتذكروها؟

وايضا كنت أذهب إليه فى مشوار عودتى حيث يجب ان اتخلص مما تبقى من مصروفى اليومى فكنت اذهب اليه واشترى اى شىء ولو مجرد علكة ..وعندما يعودا أبى وأمى من العمل أجد عم حجاب نقل لهم أخبارى وأعلمهم بأن المصروف قد تبخر عنده.....فى الاجازة الصيفية كنت اذهب اليه مع اخوتى كل صباح واسمعه ينادينى..صباح الخير ياأستاذة..كنت افرح جدا بهذه الكلمة وأشترى ماأريد وأعود للمنزل ولاينتهى الامر عند ذلك فحسب.. حيث اننى كنت أذهب لعم حجاب مرات ومرات أثناء اليوم...كان أبى يشترى لى من العم حجاب كتب مهرجان القراءة للجميع التى لم يكن عقلى يستوعبها فى هذا الوقت والتى قرأتها عندما كبرت واحتفظ بها حتى الان ...

كنت اعرف عم حجاب قبل دخولى المرحلة الابتدائية بفترة وجيزة واكملت مراحل دراستى الاعدادية والثانوية وكنت يوميا أمر على العم حجاب وزوجته

ودخلت الجامعة واصبح مرورى على عم حجاب يتم على فترات..

وفى يوم من الايام صدمت عم حجاب دراجة بخارية وأصابت قدميه واحتاج لاجراء جراحة بسيطة فيها ولكن لم يخرج عم حجاب من غرفة العمليات حيا....مات عم حجاب بسبب التخدير ...واصبح لايوجد هناك عم حجاب.

وقام ابناؤه بإستئجار الكشك لآخرين....تغير المكان واصبح بلا معنى بدون عم حجاب...ولكنه مازال موجودا فى ذاكرتى لانه جزءا أساسيا من ذكريات الطفولة.

وكلما أمر من أمام كشك عم حجاب أقرأ الفاتحة وتتبعها جملة الله يرحمك ياعم حجاب.

ملحوظة:فى حياة كل منكم عم حجاب ولكن بشكل مختلف وإسم مختلف وشخصية مختلفة....

واجب من MR.PRESIDENT

انا عندى واجب من:

MR.PRESEDENT صاحب مدونة انا الريس

هو عمل الدعوة اختيارية للى عاوز يجاوب وانا جاوبت

على كل الاسئلة

وعاوزة اشكره كتير

ما هي كتب الطفولة التي بقيت عالقة في ذاكرتك؟

كنت بحب جدا مجلة ميكى ومجلة علاء الدين بس مجلة علاء الدين كنت بحبها اكتر وكنت محتفظة بأعدادها لغاية فترة قريبة وللاسف ضاعت منى اما الكتب كان بابا فى الصيف من وانا فى رابعة ابتدائى كان بيجيبلى كتب من مهرجان القراءة للجميع طبعا ماكنتش بقراها ولا كنت بفهمها لكن قرأتها لما بدأت احب القراءة واستفدت منها جدا لكن فى كتاب عجبنى عنوانه لما بابا اشتراه وكان من سلسلة ادب الطفل كان اسمه وجدت سعادتى مع الحمير للكاتب يحى حقى ده اللى فاكراه من وانا صغيرة.

مَنْ أهم الكتاب الذين قرأتَ لهم ؟

نجيب محفوظ-احسان عبد القدوس-يوسف السباعى-توفيق الحكيم-انيس منصور-علاءالاسوانى-محمد فتحى(صاحب كتاب مصر من البلكونة)

من هم الكتاب الذين قررت ألا تقرأ لهم مجددا؟

كان فى زمان حاجة كده اسمها روايات عبير اشتريتها مرة وماعجبتنيش وماجبتش منها تانى.

في صحراء قاحلة ، أي الكتب تحمل معك؟

القرآن الكريم وكتاب أذكار وشوية روايات لاحسان عبد القدوس

ما هو الكاتب الذي لم تقرأ له أبدا ، وتتمنى قراءة كتبه ؟

طه حسين

ما هي قائمة كتبك المفضلة ؟

كل روايات احسان عبد القدوس

حديث الصباح والمساء لنجيب محفوظ

قصة حياتى العجيبة لـ هلين كيلر

يوميات نائب فى الارياف لتوفيق الحكيم

رواية عمارة يعقوبيان

رواية غادة الكاميليا

رواية غادة رشيد

كتاب مصر من البلكونة

حقوق المرأة فى الاسلام

ما هي الكتب التي تقرؤها الآن ؟

اخر حاجة كان كتاب مصر من البلكونة الكتاب ده حلو جداااااااااا

اللي بعت الدعوه ؟

MR.PRESIDENT صاحب مدونة أنا الريس

أرسل الدعوة لمدون واحد علي الأقل من أجل مشاركتنا باطلاعهم في القراءة ؟

انا هبعتها لبنت خالتى وحبيبتى شيماء على صاحبة مدونة قهوة بالفانيليا

أرض النفاق

منذ أيام شاهدت فيلم أرض النفاق وهو عن قصة للكاتب الكبير يوسف السباعى الذى أحب كتاباته جدا وبالرغم من اننى احفظ الفيلم واتذكره جيدا الا اننى من هواة مشاهدته مرارا وتكرارا.......ولكن عندما شاهدته فى تلك المرة اخذتنى افكارى وشردت بعيدا عن الفيلم وفكرت فى الاحداث اليومية التى نتعرض لها وعن بعض الكلمات والجمل التى تخرج من افواهنا بصفة مستمرة وبشكل شبه يومى هل نطلق عليها فى المطلق نفاق ام يحددها الموقف الذى تعرضنا له عندما صرحنا بهذه الكلمات او تلك الجمل.

وزاد شرودى اكثر عندما اتيت بأمثلة لبعض المواقف التى تحدث ويمكن لنا بأن نفسرها كنفاق او مجاملة....

مثلا...عندما يقول الزوج لزوجته بأنها جميلة بل انها أجمل نساء الارض فمن المؤكد أنه يكذب وربما تعلم زوجته ذلك وهذا ليس لان زوجته قبيحة او دميمة لاسمح الله ولكن لانه لم يجول فى الارض من شرقها لغربها حتى يرى جميع نسائها ويحكم بأن زوجته هى أجملهن ومع ذلك تتقبل الزوجة تلك الكلمات بسعادة بالغة.

مثلا آخر وهو علاقة الموظف بمديره فى العمل وخصوصا عندما يكون هذا المدير مستجد فى العمل ستجد لافتات الترحاب فى كل مكان واستقبال رائع وعبارات مدح لاحصر لها بالرغم من ان الموظفين ربما لم يروه فى حياتهم سوى فى أول يوم عمل له فى المكان..وتجدهم يستقبلونه بالزهور...ومعظمهم يقولون له حال العمل لن يغيره للافضل سواك يافندم..ومع ذلك تجد المدير سعيدا ممتنا لهم جميعا.

وهناك علاقة اخرى ربما يكون فى ظاهرها المجاملة والحب وبباطنها الكذب والنفاق فعندما تتزوج فتاة تبادر لاكتساب ود وحب حماتها وتناديها بماما وفى رأيى الشخصى أنه لايصح أن تنادى الزوجة حماتها بماما حيث من الممكن أن تحبها دون أن تجعل احدا يشارك أمها الحقيقية فى لقب تتمناه كل أم من ابناءها.فالفتاة بالطبع لن تحب حماتها مثل أمها وربما تكون تكره حماتها ولا تحبها.

واعتقد انه ليس هناك فتاة تكره أمها...

والحماة أيضا لن تحب زوجة ابنها مثل ابنتها ابدا بالاضافة الى ذلك فإن حماة الزوجة ليست بحاجة لشخص اضافى يناديها بماما لانها بالطبع لديها أبنائها الذين يشبعونها بتلك الكلمة....ولكن لاانكر ان ربما هناك زوجات ينادون حماتهن بلقب ماما حبا فيهن بالفعل ولكنهن قليلات جدا.ولكن دائما تجد أن الحماة لاتكترث لهذا التودد ولا تقتنع به وتعلم جيدا انه مجرد كلمة تقولها زوجة ابنها لارضائها وربما تقتنع من داخلها ان زوجة ابنها لاتحبها (يعنى بالعربى كده ومن الاخر الحموات مش بياكلوا من الكلام ده.... ريحوا نفسكم ياستات).

وهناك الكثير من الامثلة التى تحتاج كتبا لا رسالة كهذه. اعتدنا عليها يوميا ونتعامل بها وببراعة شديدة...ربما لانعلم ان هذا نفاق وربما نقصد به المجاملة بالفعل ...

لمزيد من التفاصيل شاهدوا فيلم أرض النفاق.