الجمعة، يوليو 30، 2010

يعنى إيه كلمة وطن؟؟؟








العنوان هو اسم اغنية لمحمد فؤاد انتهى بيها فيلم من افلامه لما كانوا راجعين من محاولة فاشلة للذهاب الى امريكا..وطبعا اكيد كلكم عارفين كده بس اليومين دول الاغنية او تحديدا عنوان الاغنية اصبح سؤال يردده معظم الشعب المصرى سرا وعلانية .. سمعنا وقرأنا كتير عن حوادث تعذيب حصلت فى اقسام الشرطة المصرية لكن كان اخرها وابرزها على الاطلاق حادثة الشاب السكندرى المرحوم خالد سعيد ويمكن تكون أحدثت صدى اكتر من اى حادثة اخرى.



خالد سعيد لما تنظر لصورته تاخد عنه انطباع انه شخص هادىء ومؤدب وتستغرب جدا لما تسمع انه كان معاه مخدرات او اى شىء له علاقة بالاجرام لكن كل شىء وارد يعنى ممكن نلاقى شخص بيصلى وحاجج بيت ربنا وبيعطف على المحتاجين وفى النهاية يطلع نصاب او تاجر مخدرات على سبيل المثال (ومع ذلك برضه مش مقتنعة اطلاقا ان صاحب الصورة ده مجرم )



ولكن....



هو مش المتهم برىء حتى تثبت ادانته...لو فرضنا ان خالد سعيد مجرم وعتيد الاجرام ياترى ينفع يتم تعذيبه بالشكل البشع ده؟



وللعلم انا لم اضع صورته بعد التعذيب لبشاعتها رغم انها منتشرة وكل الناس شافتها لكن مش قادرة احطها عندى,



تقرير الطب الشرعى قال انه بلع مخدرات وذلك ادى الى الوفاة...لكن ايه كمية الضرب والتعذيب اللى فى الصورة دى....



ناس كتير جدا على المدونات وعلى الفيس بوك بيطالبوا بحق خالد سعيد والحصول على محاكمة عادلة لمن قتلوه...



بس ياترى الناس زعلانة علشان خالد سعيد فقط ولا علشان خايفين انهم ممكن يمشوا فى الشارع ويلاحقهم المخبرين ويعذبوهم ويكونوا تكرار لحالة خالد سعيد وماقبله.



ياترى الناس اللى عذبوه مافكروش فى امه واهله,



مافكروش انه ممكن يكون مكانه قريبهم او صاحبهم او ابنهم او حتى هم شخصيا,



عموما انا مش هتكلم كتير عن موضوع خالد سعيد لان كتير جدا اتكلموا فيه...والحمد لله فى محاكمة للمتهمين بقتله...




لكن الموضوع الاساسى او السؤال الاساسى اللى عاوزة اتكلم فيه هو عنوان الموضوع .......يعنى ايه كلمة وطن؟



ياترى الوطن هو الارض والنيل والهرم..

ولا اصلنا والناس اللى بنحبهم واصحابنا وذكرياتنا الحلوة اللى فيه..



ولا الحكومة والشرطة..



ولا ايه بالظبط؟



صلاح جاهين بيقول:




على اسم مصر التاريخ يقدر يقول ما شاء
أنا مصر عندي أحب وأجمل الأشياء
بحبها وهي مالكة الأرض شرق وغرب
وبحبها وهي مرمية جريحة وقت الحرب
بحبها بعنف وبرقة وعلى استحياء
واكرهها والعن أبوها بعشق زي الداء


فى اخر سطرين من الرباعية الجميلة لصلاح جاهين يتلخص حال المصريين من وجهة نظرى المحدودة فإذا دخلت على الفيس بوك او اى منتدى او حتى شاهدت احد برامج التلفزيون تجدهم ساخطين على البلد ويصبون عليها لعناتهم ويمكن ان تقرأ او تسمع بعض العبارات منها:


عملت لنا ايه البلدى علشان نديها حاجة..


مصر مابقتش ام الدنيا..


انا لو بإيدى كنت سافرت من الصبح وهجيت على اى حتة..


المصرى بقى رخيص اوى كده ليه..


لكن تعالى بقى وقولى رأيك لو فى حد من بره هاجم مصر او قرب بس ناحيتها او اتكلم عنها بطريقة لم تعجب المصريين ..ساعتها فقط ستجد كمية غضب وكمية حب للبلد وكأن مفيش حد بيحب بلده ووطنه زينا.


اكيد فى فئة من ضباط وامناء الشرطة لايستحقوا مناصبهم وممكن يكون منهم من يتخذ منصبه حجة لتسوية حساباته مع الاخرين ...لكن مع ذلك فى منهم ناس كويسين ومحترمين وولاد ناس وبيمارسوا مهنتهم بمنتهى الشرف والامانة.


معنى كلمة وطن فى نظرى اننا نفهم ان وطنا مالهوش دعوة بغلاء الاسعار ومالهوش دعوة بطوابير العيش ومالهوش دعوة بالتعذيب فى الاقسام ومالهوش دعوة بالواسطة والكوسة والقرع.


ومش معنى ان الناس مش راضية عن احوال واوضاع معينة يبقى البلد او بمعنى تانى الوطن وحش وقبيح وكل شوية نشتمه ونلعن فيه ..


اعتقد ان لو فى حد بيكره بلده مش ممكن بلد تانية تقدره ...


يمكن فكرت فى انى افسر يعنى ايه وطن مالقتش تفسير غير انى بحبه بكل عيوبه ومهما كان معناه.واكيد نفسى يكون احسن واجمل وطن فى الدنيا.




الأحد، يوليو 25، 2010

سيتى ستارز...ده فى مصر ده؟



اول مرة ادخل المكان ده كان من سنتين الا شوية صغنونة بصراحة هو عجبنى لكن مانبهرتش بيه زى ناس كتير بالرغم من انى بحب اروح هناك.... يمكن علشان انا اصلا ماعنديش حكاية الانبهار بالاماكن..... عادى يعنى
اكيد ناس كتير عارفين المكان ده كويس ويمكن يكون فى ناس حافظين المكان وتفاصيله اكتر من صحابه نفسهم لكن انا لفت نظرى فيه شوية حاجات مش عارفة جايز يكون حد غيرى اخد باله منها ولا ايه؟
لما باجى ادخل سيتى ستارز ومن اول مابخرج من الجراج على الدور الاول بيكون عندى احساس انى خرجت من مصر وروحت بلد تانية
قولولى لييييه؟
هقولكم
المكان فى منتهى النظافة مافيهوش حبة تراب من اول البوابة والتفتيش اللى بالكلاب البوليسية للعربيات ودخول الجراج لغاية اخر دور وعمال النظافة مفيش عندهم راحة شغلهم مش بيقف خالص والناس اللى بتدخل المكان او الزوار يعنى مايقدروش يرموا فيه ورقة وطبعا مش كل الاماكن والشوارع فى مصر حلوة ونضيفة كده ولا عمال النظافة اللى فى الشوارع بالهمة والنشاط ده وطبعا السبب معروف وهو المرتبات.
تانى حاجة الناس اللى بتدخل المكان مش هى دى الناس اللى الواحد بيشوفها اقصد مثلا ماشوفتش هناك الناس البسيطة المصرية الحلوة اللى بيمشوا فى كل شوارع مصر بلا استثناء رغم ان المكان بيدخله مصريين و مش لازم يشتروا منه حاجة.
تالت حاجة..المفروض ان سيتى ستارز ده مول تجارى وسينما انت بتروح هناك علشان تشترى حاجة او تسأل على سعر حاجة او تدخل سينما وممكن تاكل او تشرب ... انما انا بشوف ان فى ناس بتروح تقضى اليوم هناك من اول النهار وتفضل تلف فى المحلات وتتفرج وتسأل وتمشى وترجع بعد شوية تسأل تانى وهناك الموظفين اللى فى المحلات مابيزهقوش خالص ياعينى الموظف منهم يجاوبك ويفضل معاك ويصبر عليك لغاية الاخر وممكن يبقى مش طايقك لكن طبعا لو بين لك كده هيمشى من الشغل فورا.
لكن ايه الفكرة انك تروح تلف هناك طول النهار وممكن ماتشتريش من هناك حاجة خالص ايه اللى يخليك تروح تتفرج على محلات لمدة يوم بحاله ماتروح مكان تستفيد منه بحاجة او تقضى اليوم مع اهلك فى البيت او اى حتة تختاروها!.
والشىء المستفز جدا هو الناس اللى بتدخل هناك وبتحافظ على نظافة المكان وكأنه بيتها ليه مايهونش عليهم يرموا ورقة صغيرة وهما فى المكان و ليه لما بيخرجوا الشارع ويكون معاهم حاجة بيرموها اشمعنى الشارع يعنى.

انا عن نفسى بشوف ان النيل اجمل بكتير لانه مكان مفتوح وجميل ...مش عارفة ليه لما قولت انى عاوزة اروح اتمشى على الكورنيش الناس اتريقت عليا زى مااكون قولت انى عاوزة اروح اتمشى فى توشكى هو النيل ده بقى حاجة وحشة دلوقتى؟
انا بالنسبة لى اجمل اماكن فى مصر هما وسط البلد و النيل واهرامات الجيزة بكون مبسوطة جدا وانا هناك
يمكن لما حققت رغبتى وروحت على النيل كانت اول مرة امشى على كوبرى قصر النيل سيرا على الاقدام كنت كل مرة اكون ماشية بالعربية....وكنت خايفة اوى من اهتزازات الكوبرى بس المرة الجاية ان شاء الله مش هخاف وهحاول استمتع اكتر من كده...انا مش عارفة ليه كتبت البوست ده كنت هكتب واحد تانى بس انا لقيت نفسى بكتبه....حاجة كده من باب الفضفضة.

الاثنين، يوليو 12، 2010

الانجليزى.....سيبك منه


من كام يوم كنت شوفت بوست عجبنى جدا فى مدونة اسمها فضفضة وافتكرت حاجة حصلتلى ليها علاقة بموضوع البوست فحبيت انى اكتبها....

واليكم التفاصيل

من حوالى كام سنة كنت قاعدة بتناقش مع واحدة صاحبتى فى موضوع كده والثقافة والمعرفة كانت واخدة حقها جدا وانا كنت عايشة فى الدور بشكل مرعب وكأنى احمد زويل ولما لقيت صاحبتى بتعترض على كلامى اتفزلكت ورحت قولتها اسكتى انتى ماعندكيش blood وياريتنى مانطقتها فجاة لقيت صاحبتى بتضحك وبتقولى اسكتى انتى ياجاهلة طبعا اتحمقت جدااا وقولتلها انا مش جاهلة انا واثقة من كل كلمة بقولها قالتلى لا انتى جاهلة كلمة blood مش بتتنطق كده وطبعا خدتنى اللماضة وصممت انى صح وصاحبتى جابت ناس صحابنا تانيين سألتهم وأثبتتلى بالدليل القاطع والبرهان المؤكد انها صح وانى فعلا بنطق الكلمة غلط وكانت فضيحة بجلاجل
انا كنت بنطق الكلمة عادى زى مابكتبها يعنى فى حرف الO مكرر مرتين يبقى الكلمة بالضمة يعنىbloood انتوا فاهمين ولا ايه؟
وتباعا توالت الاكتشافات بعد مااهتميت بالموضوع لما حصل الموقف ده وطبعا بعد ماقررت انى مش هنطق اى كلمة انجليزى قدام حد لغاية مااشوف ايه الحكاية... عرفت ان 95% من الانجليزى بتاعى بكتبه صح جدااااا وبنطقه غلط جدا جدا جدا وابتديت اشتغل على نفسى جامد اشتريت اسطوانات وفضلت اسمع واكتب وانطق ودى كانت اهم حاجة بالنسبة لى ولزقت قدام mbc2 والكلام اللى اسمعه اكتبه وانطقه زيهم او قريب ليهم.

انا اتعلمت فى مدارس حكومة واخدت انجليزى لاول مرة فى الصف الاول الاعدادى وعلى فكرة صديقتى اللى لفتت نظرى للكارثة دى واصحابنا اللى أيدوا رأيها هما كمان معظمهم مدارس حكومة مش مدارس خاصة أو لغات كلهم زيى كده لكن الفرق بينى وبينهم ان حظهم كان مع مدرسين عارفين انجليزى مش مجرد مدرسين انجليزى بالإسم
الموضوع ده خلانى ارجع بالذاكرة لورا(وكأن شريط ذكريااااات بيمر قدام عنيا) وافتكرت المدرسة وهى واقفة تحفظنا وإحنا نقول وراها عشر مرات لغاية مانزلت لنا اللوز بالنطق الغلط ده
وهى كلها ثقة وصوتها عالى جدا لما كانت واقفة تقولنا
Repeat after me blooood..blooood
يعنى انا وزمايلى اللى فى الفصل والعيال اللى فى الفصول اللى جنبنا كنا بنتعلم كده واجيال تانية من بعدنا كمان اتعلمت كده
يعنى مدرسة بحالها الانجليزى بتاعها كفتة
كنا بنصحى الصبح بدرى ونقف فى الطابور ونقعد فى المدرسة نص اليوم ونخرج ناخد درس عند نفس المدرسين ده طبعا غير الواجب اللى بنكتبه لما بنروح بيوتنا وفى الاخر ننسى كل ده بمزاجنا او غصب عننا
واجمل حاجة بناخدها منها هى الذكريات الحلوة للصحاب.
لكن انا مش زعلانة لان الموضوع ده خلانى بجد اهتم جدا واكون احسن بكتير من الاول يمكن كان متأخر شوية لكن مش مهم على الاقل كفاية انى بتعلم بمزاجى ووقت ماأنا عايزة
سلام بأه علشان فى فيلم اجنبى جاى دلوقتى وعاوزة اكتبلى كلمتين.